Katakin Katak ko Rem̧ool, jān Michael T. Malm

Juun 8–14

Alma 8–12

Jisōs Kraist Enaaj Itok im Lo̧mo̧o̧ren Armej ro An

Ekkatak jān jeje ko rekwojarjar ej bōktok revelesōn. Ilo am̧ riiti Alma 8–12, je en̄jake ko an Jetōb ilo An katakin eok jān ennaan ko an Alma im Amulek.

Je En̄jake ko Rej Im̧we Eok

Jerbal ko an Anij reban likjab. Ak kijejeto ko ad n̄an jipan̄ ilo jerbal in An jet iien rej likjab—ak ebwe, jemaron̄ jab kajju lo tōprak ko jej kōjatdikdik kaki. Jet iien jemaron̄ en̄jake jidik ad āinwōt Alma ke ekar kwaļo̧k gospel ilo Ammōnaia—rekar makoko kake, kabiloiki, im kadiwōjļok. Ak lo ke juon enjeļ ekar kōmeļeļeiki bwe en roolļo̧k im bar kajjieon̄, Alma ekar lukkuun peran im “kakaiururļo̧k im roolļo̧k” (Alma 8:18), im Anij ekar kōpooj iaļ im̧aan. E ekar jab leļo̧k wōt kijen Alma im jikin an jokwe, ak Ekar bar kōpooj Amulek, eo ekar erom̧ juon rikarejaran, juon rijojomar eo ellāj an gospel eo, im juon mōttan eo etiljek. N̄e jej ioon inepata im illu ilo ad jerbal ilo aelōn̄ in kiin̄ eo an Irooj, jemaron̄ keememej wāween an Anij kar rie im tōl Alma, im jemaron̄ lōke bwe Anij enaaj barāinwōt rie im tōl kōj, men̄e ilo jekjek ko reppen.

Ļōmņak ko n̄an Ekkatak Jeje ko Rekwojarjar eo Ippem̧ Make

Alma 8

Kijejeto ko aō n̄an kwaļo̧k kōn gospel eo ebōk aikuj jejjet im kijenmej.

Men̄e juon emaron̄ makoko kōn naan in kam̧ool eo am̧, ejjab meļeļein en ejjeļo̧k kōjatdikdik—ālkin aolepān men kein, Irooj ejamin elļo̧k jān armej eo, im Enaaj tōl eok ilo wāween am̧ kōm̧m̧ane. Ilo jekjek eo an Alma, juon enjeļ ej kakien e n̄an jepļaak n̄an Ammōnaia n̄an kwaļo̧k gospel men̄e armej ro ie raar lukkuun kakkure im makoko kake (lale Alma 8:14–16). Ta eo kwoj ekkatak jān e kōn waanjon̄ak eo an Alma ilo an kar kwaļo̧k gospel eo men̄e mālijjon̄ im jum̧ae ko? Eoon ta ko ilo Alma 8 ej kōļapļo̧k am̧ ikdeelel n̄an kwaļo̧k gospel eo?

Lale barāinwōt 3 Nipai 18:30–32; Jeffrey R. Holland, “Wōņāān eo—im kōjeram̧m̧an ko—an Rikaļooran,” Ensign ak Liaona, Māe 2014, 6–9.

Alma 9:18–25; 10:16–23

Anij ej ekajet ajri ro Nejin ekkar n̄an meram im jeļāļo̧kjeņ ko ewōr ippāer.

N̄e jej riit kōn wāween an RiNipai ro ilo Ammōnaia kar kōm̧m̧an n̄an rikarejaran Irooj, epidodo ad meļo̧kļo̧k ke rekar bar mour kōn gospel eo, im kar “kanooj utiej ippān Irooj” (Alma 9:20). Ilo m̧ool, m̧ōttan enaan eo an Alma n̄an armej ro ilo Ammōnaia kōnke raar pen buruōer jekdoon jeram̧m̧anin in m̧weie ko aer, jon̄an eo rekar pād ie enana ļo̧k jān RiLaman ro, ro me ekar lukkuun ļap aer jakoļo̧k ilo jerawiwi. Ta eo oktak in ej katakin kōj kōn wāween an Anij ekajet ro Nejin?

Ilo am̧ kar riit kōn kōjeraam̧m̧an ko reļļap an Anij me ekar leļo̧k n̄an armej ro an Nipai (lale eļaptata Alma 9:19–23), kejōkļo̧kjeņ kake kōjeraam̧m̧an ko reļļap me Em̧ōj an lewaj n̄an eok. Ta eo kwoj kōm̧m̧ane n̄an m̧ool wōt n̄an kōjeraam̧m̧an kein? Ta oktak ko me kwoj en̄jaki me kwoj aikuj kōm̧m̧ani?

Bar lale Katak im Bujen ko 82:3.

Alma 11–12

Karōk eo an Anij ej karōk in lo̧mo̧o̧r.

Rikanaan ro ilo Bok in Mormon rej kōjerbal elōn̄ kain et ko n̄an kōmeļeļeik karōk eo an Anij n̄an ro Nejin, āinwōt karōk in lo̧mo̧o̧r ak karōk eo ekam̧ōņōņō. Ilo Alma 11–12, Alma im Amulek rej ņa etan karōk in lo̧mo̧o̧r. Ilo am̧ riiti jebta kein, kejōkļo̧kjeņ kake etke naan in “pinmuur” ej jerbal n̄an kōmeļeļeiki karōk eo. Komaron̄ je juon kōm̧eļeļe ekadu kōn ta eo Alma im Amulek rekar katakin kōn m̧ōttan kein rej ellajrak kōn karōk eo.

Wōtlo̧k Eo:

Ripinmuur Eo:

Ukweļo̧k:

Mej:

Jerkakpeje:

Ekajet:

Lale jon̄an kajoor in naan ko an Amulek n̄an armej ro (lale Alma 11:46). Etke kwoj ļōmņak katak kien relukkuun kajoor? Ewi wāween aer kōm̧m̧an oktak ilo mour eo am̧?

Lale barāinwōt D. Todd Christofferson, “Jerkakpeje eo an Jisōs Kraist,” Ensign ak Liaona, Māe 2014, 111–14.

Alma 12:8–18

Eļan̄n̄e iban kapen buruō, imaron̄ bōk eļapļo̧k naan an Anij.

Jet armej remaron̄ ļōmņak etke Jemedwōj Ilan̄ ejjab kalikkar men otemjej n̄an kōj. Ilo Alma 12:9–14, Alma eaar kōmeļeļeik juon unin an mennin ittino ko an Anij jet iien rejjab alikkar n̄an kōj. Kajjitōk kein remaron̄ jipan̄ eok ļōmņak kōn ta ko ekar katakin kaki:

• Ta meļeļein kapen buruōd? Em̧ōj ke am̧ loe menin ilo kwe?

• Etke Irooj emaron̄ kar dāpij naan ko an jān ro me rej kapen buruōer?

• Ekōjkan wāween am̧ kar en̄jake kalim̧m̧ur in n̄an bōk “ijo edikļo̧k in naan eo juon”? (Alma 12:10). Āinwōt en̄jake rōt eo?

• Ta eo komaron̄ kōm̧m̧ane n̄an kalikkare bwe naan ko an Anij ej “pād ilo [kwe]”? (Alma 12:13). Eļan̄n̄e ewōr naan in Anij ilo kwe, ta eo em̧m̧an enaaj waļo̧k ilo “naan ko,” “jerbal,” im “ļōmņak”am̧? (Alma 12:14).

N̄an juon waanjon̄ak kōn katak kein, keidi Amulek n̄an armej ro jet ilo Ammonia. Ewi wāween an en̄jake in an Amulek (lale eļaptata Alma 10:1–11) kōmeļeļeiki ta eo Alma ej katakin ilo eoon kein?

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.

Alma 8:10–18

Ta eo jemaron̄ ekkatak jān Alma kōn an “kakaiururļo̧k” ilo pokake Irooj (eoon 18) men̄e emaron̄ epen? N̄an kōkajoorļo̧k katak in ippān ajri jidik ro, komaron̄ ikkure juon ikkure eo me kwoj kōmeļeļe kōn juon jerbal im lale ewi jon̄an an mōkaj an ro uwaan baam̧le eo kadedeikļo̧k. N̄an waanjon̄ak, komaron̄ lo wōn eo emōkaj an limi m̧ōttan nuknuk eo.

Alma 10:1–12

Ta eo jemaron̄ ekkatak jān en̄jake eo an Amulek ilo eoon kein? Ta eo em̧m̧an eaar waļo̧k jān naan in kam̧ool eo an n̄an ro rej ron̄jake? Karuwaineneik ro uwaan baam̧le eo n̄an kōm̧m̧an juon pepe n̄an kōm̧m̧ane juon men ilo wiik in me ej pedpep wōt ioon ta eo raar ekkatak jān e jān waanjon̄ak eo an Amulek.

Alma 10:22–23

Ta eo jej ekkatak jān e jān eoon kein kōn kareeo an juon kurup in armej ro rewāppen emaron̄ kōm̧m̧ane ilo juon laļ eo ejerawiwi?

Alma 11:34–37

Ta oktak eo ikōtaan Jisōs Kraist ej lo̧mo̧o̧ren kōj ilo jerawiwi ko ad im jān jerawiwi ko ad? (lale Helamōn 5:10; lale barāinwōt 1 Jon 1:9–10). N̄ān kōmeļeļeik ta eo Amulek eaar katain, komaron̄ kwaļo̧k bwebwenato eo ilo jinoin ennaan eo an Elder Allen D. Haynie “Kememej ilo Wōn Jej Lōke” (Ensign ak Liaona, Nob. 2015, 121–23). Ewi wāween an Jisōs Kraist lo̧mo̧o̧ren kōj jān jerawiwi ko ad?

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkōm̧anm̧anļo̧k Ad Ekkatak

Ekkatak naan ko an rikanaan im rijilōk ro ilo raan-ko āliktata. Riiti ta ko rikanaan im rijilōk ro rekar katakin kōn m̧ool ko kwoj loe ilo jeje ko rekwojarjar. N̄an waanjon̄ak, komaron̄ kālet juon unin kōnono ilo Alma 8–12 im kappukōt tapik in ilo enaan ko rekāāl tata an kweiļo̧k eo eļap (lale Teaching in the Savior’s Way, 21).

Pija in Alma ej m̧ōn̄ā ippān Amulek jān Dan Burr