Ammōn ej kōnono n̄an Kiin̄ Lamonai

Ammōn im Kiin̄ Lamonai, jān Scott M. Scott

Juun 22–28

Alma 17–22

“Inaaj Erom Juon Kein Jerbal ilo Pein Anij”

Ilo am̧ riiti Alma 17–22, je en̄jake ko am̧ me kwoj en̄jaki im kōm̧m̧an ekkar n̄ani. Kōm̧m̧an āindein enaaj kwaļo̧k n̄an Irooj am̧ ikdelel n̄an bōk eļapļo̧k revelesōn.

Je En̄jake ko Rej Im̧we Eok

Ļōmņak kōn aolep un ko unin an armej jab kwaļo̧k gospel eo: “Ejabwe aō jeļā” ak “Ijjab lukkun jeļā n̄e rekōņaan” ak bōlen “Ak n̄e ikaenepataik er?” Bōlen kwoj kile ippām make ke kwoj ļōmņak kōn men rōt kein jet iien. Ewōr bar unin an RiNipai ro kar jab kwaļo̧k kōn gospel eo n̄an RiLaman ro: “rawiia im kijn̄en̄e im juon armej rellāj; juon armej ro reitok-limo ilo uror e RiNipai ro” (Alma 17:14; bar lale Alma 26:23–25). Ak ekar ļap unin an ļōmaro nejin Mosaia kar en̄jake etke rej aikuj kwaļo̧k gospel eo n̄an ri Laman ro: “Raar kōņaan bwe mour en kar ajeededļo̧k n̄an aolep armej, bwe ren maron̄ jab ļōmņak bwe jabdewōt armej en jako” (Mosaia 28:3). Iakwe in me eaar im̧we Ammōn im ļōmaro jatin emaron̄ barāinwōt im̧we eok n̄an kwaļo̧k kōn gospel eo n̄an baam̧le eo am̧, ro m̧ōttam, im ro kwoj iiaio ippāer—barāinwōt ro me remaron̄ jab m̧ōņōņō in ron̄jake ilo am̧ watōke.

pija ej bōk jikin ekkatak ippem̧ make

Ļōmņak ko n̄an Ekkatak Jeje ko Rekwojarjar eo Ippem̧ Make

Alma 17:1–4

Ilo aō kōkajoorļo̧k tōmak eo aō make, emaron̄ em̧m̧anļo̧k aō kwaļo̧k kōn gospel eo.

Em̧ōj ke am̧ bar kobaļo̧k ippān ro m̧ōttam im kar en̄jake wāween eo Alma ekar en̄jake—kar obrak kōn lan̄lōn̄ jon̄an raar kajoor wōt ilo tōmak ko aer? (lale Alma 17:1–2). Ta eo komaron̄ ekkatak jān ļōmaro nejin Mosaia kōn wāween n̄an dāpij wōt tōmak eo am̧ ilo gospel in im kallim̧ur n̄an kajoor wōt? Ilo am̧ kejōkļo̧kjeņ kake kajoor eo an ļōmaro nejin Mosaia ilo jetōb, ta eo kwoj en̄jake me ej im̧we eok n̄an kōm̧m̧ane?

Ewi wāween ilo an kar kepopo eo an ļōmaro nejin Mosaia ilo jetōb jelōt jerbal ko aer ippān RiLaman ro? Bōlen komaron̄ kar kōjerbal iien in em̧m̧an n̄an etale kijejeto ko n̄an katakin kōn gospel eo “kōn kajoor im maron̄ an Anij” (Alma 17:3).

Alma 17:6–12

Imaron̄ erom juon kein jerbal ilo pein Anij n̄an bōktok lo̧mo̧o̧r n̄an ajri ro Nejin.

Būreejtōn Thomas S. Monson ekar ba, “Ikōņaan bwe Irooj en jelā ke elan̄n̄e Ej aikuj kōm̧m̧an juon jerbal, Tom Monson enaaj kōm̧m̧ane jerbal eo n̄an E” (“On the Lord’s Errand: The Life of Thomas S. Monson,” video, ChurchofJesusChrist.org). Ilo am̧ riiti Alma 17:6–12, pukōt ta eo me ļōmaro nejin Mosaia raar kōm̧m̧ane bwe ren maron̄ kar erom kein jerbal ilo pein Anij. Ewi wāween am̧ maron̄ erom̧ juon kein jerbal ilo pein Anij n̄an kōjeraam̧m̧an ro jet? Ta eo kwoj ekkatak jān waanjon̄ak kein me ej kōperan eok n̄an kōm̧m̧ane ta eo Irooj ej aikuj eok n̄an kōm̧m̧ane?

Lale barāinwōt Dallin H. Oaks, “Kwaļo̧k Gospel eo kar Kōjepļaktok,” Ensign ak Liahona, Nob. 2016, 57–60.

Alma 17–18

Imaron̄ jipan̄ ro jet kōpooj er n̄an bōk gospel eo.

Lamonai ekar juon ritōl eo n̄an “armej rawiia im kijn̄en̄e im juon armej rellāj” (Alma 17:14), aaet ekar anjo̧ jān iminene in manit ko ium̧win iiō ko im ekar bōk gospel eo an Jisōs Kraist. Ilo am̧ riiti kōn jem̧jerā eo an Ammōn im Lamonai, kwoj ke loe ta eo Ammōn ekar kōm̧m̧ane me ekar jipan̄ Lamonai erom juon eo em̧ōņōņō in eoron̄ enaan eo an. Eļan̄n̄e enej wōr am̧ ļōmņak kōn ta eo komaron̄ kōm̧m̧ane n̄an kwaļo̧k gospel eo n̄an ro jet, je en̄jake kein jān jetōb.

Emaron̄ bar jipan̄ n̄an kōkaļļe ak je m̧ool ko me Ammōn ekar katakin Lamonai (lale Alma 18:24–39) im m̧ool ko me Aaron ekar katakin jemān Lamonai (lale Alma 22:1–16). Ta ko eoon kein rej kwaļo̧k n̄an eok kōn m̧ool ko me komaron̄ kwaļo̧k n̄an ro jet n̄an jipan̄ er bōk naan in kam̧ool kōn gospel eo?

Ammōn ej lo̧mo̧o̧ren jip ko an kiin̄ eo

Minerva K. Teichert (1888–1976), Amōn ej Lo̧mo̧o̧ren Menin Mour ko Nejin Kiin̄ eo, 1935–1945, oil ioon masonite, 35 x 48 inches. Brigham Young University Museum of Art

Alma 18–22

Naan in kam̧ool eo aō emaron̄ ļap an im̧we im kōketak.

Men̄e bwebwenato ko kōn an armej oktak tok ko me jej riiti ilo jeje ko rekwojarjar ekkā an waļo̧k men ko rekōļļapļap, ilubwiljin men kein jej loe elōn̄ kajojo armij rekar peran n̄an kwaļo̧k ainikier im kwaļo̧k kam̧ool ko aer n̄an ro jet. Juon wāween n̄an ekkatak kōn ta ko rekar walok ilo Alma 18–22 ej n̄an pukōt ta oktak eo em̧m̧an ekar waļo̧k ilo an juon armej kwaļo̧k naan in kam̧ool eo an. Bōlen komaron̄ je ta eo kwoj loe ilo pija in āinwōt in:

Ammōn ekar kwaļo̧k gospel eo n̄an , wōn eo ekar kwaļo̧k gospel eo n̄an e , im kar ta jinōkjej eo .

Alma 19:36

Pein Irooj ekar erļo̧k n̄an eō ke ij ukweļo̧k.

Ilo jem̧ļo̧kin bwebwenato in oktak tok eo an Lamonai, Mormon ekar katakin juon men eo me eaorōk kōn mour āinwot Irooj. Ta eo Alma 19:36 ej kwaļo̧k n̄an eok kōn armej eo an Irooj? N̄āāt eo kwar en̄jake pein Irooj ej erļo̧k n̄an eok? Ewi wāween komaron̄ jipan̄ ro kwoj iakwe er en̄jake tūriam̧o̧ eo An?

pija ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.

Alma 17–19

Ewi wāween komaron̄ kōm̧m̧an bwe bwebwenato ko ilo jebta kein ren kūrm̧ool n̄an baam̧le eo am̧? Komaron̄ tieta kōn bwebwenato in Ammōn ilo an kōjparok jip ko ak bwebwenato in Abij ke ej aintok jarlepju eo n̄an kam̧ool kōn kajoor an Anij. Bōlen ro uwaan baam̧le eo remaron̄ jin̄n̄aiki pija ko reoktak jān doon kōn bwebwenato eo im kōjerbal pija ko n̄an kwaļo̧k bwebwenato eo. Ta eo baam̧le eo am̧ enaaj kōm̧m̧ane n̄an ļoor waanjon̄ak ko an Ammōn im Abij?

Alma 18:24–39

Bōlen ro uwaan baam̧le eo am̧ remaron̄ riiti Alma 18:24–39 ippān doon im kalikkar m̧ool ko me Ammōn ekar katakin Lamonai. Etke jej ļōmņak bwe Ammōn ekar katakin Lamonai m̧ool kein m̧okta? Etke eaorōk n̄an kōj bwe jen bōk naan in kam̧ool kōn m̧ool kein?

Alma 20:8–15

Ta eo jemaron̄ ekkatak jān e kōn wāween an Lamonai kar uwaake jemān? Ewi wāween ad ļoor waanjon̄ak eo an Lamonai ilo an kar peran n̄an jutak kōn ta eo ejim̧we? (N̄an jet waanjon̄ak, lale pija in alooj eo “Dare to Stand Alone” ilo ChurchofJesusChrist.org.)

Alma 22:15–18

Etale Alma 20:23 n̄an lale ta eo jemān Lamonai ekar ikdelel bwe en kōjekdoon n̄an lo̧mo̧o̧ren mour eo an. Innām etale Alma 22:15 n̄an lale ta eo ekar ikdelel n̄an kōjekdoon bwe en maron̄ bōk m̧ōņōņō eo an gospel. Ta eo ekar ikdelel n̄an kaarmejete bwe en maron̄ jeļā Anij? (lale eoon 18). Bōlen ro uwaan baam̧le eo remaron̄ kajjojo je juon pepe n̄an kaarmejet juon men bwe ren maron̄ ļapļo̧k aer jeļā Anij.

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkōm̧anm̧anļo̧k Ad Ekkatak

Kile Katak ko im mour kaki. Men̄e dipdik in bwebwenato ko ilo jeje ko rekwojarjar remaron̄ jab lukkun ekkar n̄an eok ilo am̧ watōke, katak ko ilo bwebwenato kein rekkar n̄an eok. Ilo am̧ riit kōn Ammōn im Aaron, ta katak ko kōn kwaļo̧k gospel eo kwoj loe?

Kōrā eo pāleen Kiin̄ Lamonai eļōtļo̧k

Kōrā eo pāleen Kiin̄ Lamonai ej jerkak jān laļ, im ej nōbar Jisōs. O, Jisōs Jeram̧m̧an, jān Walter Rane