Alma im Amulek rej diwōj jān kaļbuuj

Pija in Alma im Amulek ke rekar diwōjļo̧k jān kaļbuuj, jān Andrew Bosley

Juun 15–21

Alma 13–16

“Deļo̧n̄ ilo Kakkije eo an Irooj”

Im̧we eo kwoj en̄jake ilo am̧ kejōkļo̧kjeņ kōn eoon ko elukkuun aorōk. Komaron̄ kwaļo̧k bwe kwoj lukkuun kaorōke ilo am̧ je im mour kake.

Je En̄jake ko Rej Im̧we Eok

Ilo elōn̄ wāween ko, ekar lukkuun em̧m̧an an Amulek im Ziezrom mour ilo Ammonia. Amulek ekar “juon em̧m̧aan ejjab dik an bun̄bun̄,” kōn “elōn̄ ro nukū im jera” im “eļap m̧weie” (Alma 10:4). Ziezrom ekar “juon eo etijem̧ļo̧k” ilubwiljin lawyer ro im kar m̧ōņōņō kōn “eļap jerbal ko” (Alma 10:31). Innem Alma ekar tōparļo̧k Ammonia kōn juon kūr ekwojarjar n̄an ukweļo̧k im “deļo̧n̄ ilo kakkije eo an Irooj” (Alma 13:16). N̄an Amulek, Ziezrom, im ro jet, n̄an bōk kūr in ekar aikuj bwe ren kaarmejjet kōņaan ko aer innām deļo̧n̄ ilo apan̄ ko reppen n̄an jelmaeiki.

Ak aaet bwebwenato in ejjab jem̧ļo̧k ijeņ. Ilo Alma 13–16, jej ekkatak ta eo ej waļo̧k āliktata n̄an ro me rej tōmak “ilo kajoor an Kraist n̄an lo̧mo̧” (Alma 15:6). Jet iien elōn̄ lo̧mo̧o̧r, jet iien kōmour—jet iien men ko me reppen ilo mour in. Ak aolep iien, “Irooj ej bōk er lōn̄ļo̧k [armej ro An], ilo aiboojoj” (Alma 14:11). Aolep iien, Irooj ej leļo̧k aer “kajoor, ekkar n̄an tōmak eo [ad] eo ej ilo Kraist” (Alma 14:28). Im aolep iien, “tōmak ilo Irooj” ej letok n̄an kōj “kōjatdikdik bwe [jenaaj] bōk mour indeeo” (Alma 13:29). Ilo am̧ riiti jebta kein, komaron̄ bōk kaenōm̧m̧an ilo kallim̧ur kein, im komaron̄ meļeļe ļo̧k ta meļeļein an Alma kar kōnono ke ej ba “kakkije eo an Irooj.”

pija ej bōk jikin ekkatak ippem̧ make

Ļōmņak ko n̄an Ekkatak Jeje ko Rekwojarjar eo Ippem̧ Make

Alma 13:1–19

Kain̄i ko an Priesthood ej jipan̄ eō bōk lo̧mo̧o̧r kōn Jisōs Kraist.

Komaron̄ kakeememej menin ilo Alma 12, Alma ekar katakin kōn Karōk in Lo̧mo̧o̧r eo an Anij (lale Alma 12:24–27). Ilo jebta 13, ekar kōnono kōn pris ro me Anij ekar kapit er n̄an katakin men kein n̄an armej ro” (Alma 13:1). Naan ko an Alma ej kwaļo̧k elōn̄ kajoor in m̧ool ko kōn priesthood eo. Bōlen komaron̄ kajjieon̄ n̄an kakilen diktata juon iaan m̧ool ko ilo kajjojo eoon ko ilo Alma 13:1–9. Erkein rej jet ļōmņak ko komaron̄ jino kaki:

Eoon 1:Priesthood rej bar ņa etan “Laajrak an eo Nejin Anij” (bar lale K&B 107:1–4).

Eoon 2:Anij ekar kapit pris ro n̄an jipan̄ armej ro n̄an reiļo̧k wōt n̄an eo Nejin n̄an bōk lo̧mo̧o̧r.

Eoon 3:Rikabwijer Priesthood ro rekar kōpopo n̄an eddo ko aer “eo me eaar jān pedped an laļ.”

Elōn̄ ke bar men kwoj loe? Ewi am̧ en̄jake kōn priesthood eo ilo am̧ kejōkļo̧kjeņ kake m̧ool kein? Ewi wāween an kain̄i ko an priesthood kar jipan̄ eok oktak n̄an Kraist n̄an bōk lo̧mo̧o̧r?

Ekabwilōn̄lōn̄ n̄an je ke elōn̄ armej ro ilo Ammonia rekar rikaļoor an Nior (lale Alma 14:18; 15:15). Ewi wāween an pris ro ilo kappe an Nior (lale Alma 1:3–6) oktak jān pris ro kar kapit er “ilo̧kan Laajrak an eo Nejin Anij” (K&B 107:3), eo me Alma ekar kōmeļeļeiki?? (lale Alma 13:1–19).

Bar lale Dale G. Renlund, “Priesthood eo im Kajoor in Pinmuur eo an Rilo̧mo̧o̧r,” Ensign ak Liaona, Nob. 2017, 64–67.

likao ro ilo tabōļ in kwojkwoj eo

Kain̄i ko an Priesthood ej jipan̄ kōj oktak ļo̧k n̄an Jisōs Kraist n̄an bōk lo̧mo̧o̧r.

Alma 13:3

Rikabwijer Priesthood rej ke ro wōt “kar kūr er im kar kōpooj er jān pedped an laļ”?

Katak ko an Alma ilo Alma 13:3 ej kōnono kōn rikabwijer priesthood ro. Ijoke, katak eo me ekar katakin—me kajjojo armej rekar bōk ijjitōk ko im kar kōpooj er n̄an kakūrm̧ooli “jān pedped an laļ”—ej iooktok kōj aolep. Būreejtōn Spencer W. Kimball ekar ba: “Ilo laļ eo m̧okta jen ad kar itok n̄an ijin, kōrā ro retiljek kar leļo̧k kajjojo ijjitōn̄ ko im em̧m̧aan ro retiljek kar kapit er n̄an kajjojo eddo ko an priesthood. Ilo ad jab keememej menin, menin ejjab ukōt aibojooj eo em̧ool kōn ta eo me raar errā kake” (Teachings of Presidents of the Church: Spencer W. Kimball [2006], 215–16; bar lale K&B 138:55–56).

Alma 14

Jet iien Anij ej kōtļo̧k bwe ro rekwojarjar ren en̄taan.

Alma 14 ej ba kōn armej ro rekwojarjar ro rekar en̄taan im mej kōn tōmak eo aer. Komaron̄ bwilōn̄, barāinwōt elōn̄ ro jet, etke men ko renana rej waļo̧k n̄an armej ro me rej kajjieon̄ mour erreo. Komaron̄ jab lo aolep uwaak ko n̄an kajjitōk in epen ilo Alma 14, ak eļapļo̧k an lōn̄ men ko n̄an ekkatak jān wāween eo me Alma im Amulek rekar kōm̧m̧ane kōn jekjek ko rekar jelm̧aeiki. Ta eo naan ko aer im kōm̧m̧an ko aer rej katakin eok kōn unin an Irooj jet iien kōtļo̧k bwe armej ro rekwojarjar ren en̄taan? Ta eo komaron̄ ekkatak jān er kōn wāween jelm̧ae jum̧ae ko?

Bar lale Matu 5:43–44; Mark 14:55–65; Rom 8:35–39; 1 Piter 4:12–14; Katak im Bujen Ko 122:5–9.

Alma 15:16, 18

Mour in rikaļoor emenin aikuj kaarmejete konaan ko ad.

Emaron̄ kabwilōn̄lōn̄ n̄an kōm̧m̧an juon laajrak in men ko me Amulek ekar kōjekdooni n̄an dāpdep wōt ilo gospel (lale Alma 10:4–5; 15:16) im keidi n̄an juon laajrak in ta eo ekar bōke (lale Alma 15:18; 16:13–15; 34:8). Ta eo kwoj ikdeleel n̄an kaarmejjete bwe kwon maron̄ erom̧ juon kaļoor eo etiljek?

pija ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota an Baam̧le

Ilo am̧ riiti eoon kein ippān baam̧le eo am̧, Jetōb eo emaron̄ jipan̄ eok jeļā ta katak ko n̄an kwaļo̧k im kōnono kaki n̄an ņa mejļan mōjņo̧ ko an baam̧le eo am̧. Erkein rej jet iaan ļōmņak ko.

Alma 13

Baam̧le eo am̧ emaron̄ jeram̧m̧an jān bwōne aolep iien ej waļo̧k naan in “kakkije” ilo Alma 13. Ta naan ko jet im ļōmņak ko me rej waļo̧k ippān tok? Ewi wāween an menin jipan̄ eok meļeļe ta meļeļein “kakkije eo an Irooj”? Ewi wāween an oktak jān kakkije ilo mour in kanniōk?

Alma 13:10–12

N̄an jipan̄ baam̧le eo am̧ loļo̧kjeņ kōn ta in eoon kein rej katakin, bolen komaron̄ kwaļkoļ jet men ippān doon—āinwōt jet nuknuk mouj. Ewi wāween ad en̄jake n̄e jej ettoon? Ewi wāween ad en̄jake n̄e jej erreo? Ewi wāween an en̄jake kein āinwōt juon n̄an ta eo jej en̄jake n̄e jej jerawiwi innem ukweļo̧k im erreo kōn Pinmuur eo an Rilo̧mo̧o̧r?

Alma 15:1–12

Ta eo jej ekkatak kake jān en̄jake eo an Ziezrom kōn kajoor eo an Irooj n̄an kōkajoorļo̧k im kōmour kōj, men̄e jej kōm̧m̧an bōd? Ta jerbal eo priesthood emaron̄ kōm̧m̧ane ilo ad bōk kajoor im kōmour eo An?

Alma 16:1–10

Ālkin riiti eoon kein, komaron̄ riit Alma 9:4. Ta eo jej ekkatak jān oktak in wāween an Zoram en̄jake kōn naan ko an rikanaan n̄an wāween an armej ro an Ammonihah kar en̄jake? Ta eo jej kōm̧m̧ane bwe jen m̧ool n̄an naan ko an rikanaan eo ad emour rainin?

N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkm̧anm̧anļo̧k Ad Katakin

Pojak iien otemjej. Iien ko n̄an katakin rej mootļo̧k wōt, kōn menin bōki kōjeraam̧m̧an kein n̄e kwoj jelm̧aeiki. Jorrāān ko ilo laļ in, n̄an waanjon̄ak, emaron̄ juon bar iien n̄an kwalok kōn katak ko jān Alma 14 kōn unin an Irooj jet iien ej kōtļo̧k bwe armej ro ejjeļo̧k ruōer ren en̄taan. (Lale Teaching in the Savior’s Way, 16.)

Alma im Amulek ilo kaļbuuj

Alma im Amulek ilo Prison, jān Gary L. Kapp