“Juun 15–21. Alma 13-16: ‘Deļo̧n̄ļo̧k ilo Kakkije eo an Irooj,’” Itok, Ļoor Eō —N̄an Būraimere: 2020: Book of Mormon 2020 (2020)
“Juun 15-21. Alma 13–16,” Itok, Ļoor Eō —N̄an Būraimere: 2020
Wāween an Alma im Amulek kar diwōj jān kaļbuuj, jān Andrew Bosley
Juun 15–21.
Alma 13–16
“Deļo̧n̄ļo̧k ilo Kakkije eo an Irooj”
Kwoj pād ippān ajri ro ilo kūlaajruum̧ eo ilo juon iien ekadu kajjojo wiik. Kwonaaj kōjeraam̧m̧an mour ko ad eļan̄n̄e komaron̄ im̧we er n̄an wōnm̧aanļo̧k wōt im ekkatak jān Bok in Mormon itulikin kūlaaj eo—eļaptata ippān baam̧le ko aer.
Je En̄jake ko Rej Im̧we Eok
Kajjitōk n̄an Kwaļo̧k
Leļo̧k n̄an ajri ro iien em̧m̧an n̄an kwaļo̧k ta eo raar jeļā kōn bwebwenato ko ilo Alma 13–16. N̄an jipan̄ er, kwaļo̧k pija ko āinwōt ilo Itok, Ļoor Eō—N̄an Kajjojo im Baam̧le ko ak “Jebta 22: Mijen eo an Alma n̄an Ammōnaia” (Bwebwenato ko ilo Bok in Mormon, 58–63).
Katakin Katak ko: Ajri ro Reddikļo̧k
Priesthood eo ej jipan̄ n̄a itok n̄an Kraist.
Lukkuun ļōmņake ta eo ajri ro ilo kūlaaj eo am̧ rej aikuj in meļeļe jān ta eo Alma eaar kwaļo̧ke kōn priesthood ilo eoon kein.
Makūtkūt ko Maron̄ Kōm̧m̧ani
-
Kajjitōk ippān ajri ro n̄an āliji ippam meļeļe eo an priesthood, āinwōt “priesthood ej kajoor eo an Anij.”
-
Kōppeļļo̧k jeje ko rekwojarjar n̄an Alma 13:2, im jiron̄ļo̧k ajri ro ke Anij ņaetan rikabwijer priesthood ro “bwe armej ro ren maron̄… reim̧aanļo̧k n̄an Nejin.” N̄an kōmeļeļeik elmen an rikabwijer priesthood ro kōm̧m̧ane menin, kwaļo̧k pija ko wāween an rikabwijer priesthood ro jerbal (lale Gospel Art Book, nos. 38–41, 103–9), innām kwaļo̧k bwebwenato ko kōn wāween an kar Jisōs jerbal (lale Matu 26:26–28; Mark 5:22–24, 35–43).
-
Etal n̄an Alma 13:6, im kōmeļeļeiki bwe rikabwijer priesthood ro rej “katakin kien ko an [Anij] n̄an ro nejin armej.” Jipan̄ ajri ro ļōmņak kōn rikabwijer priesthood ro rejeļā kajjieer. Elmen aer katakin kien ko? Kajjitōk ippān ajri ro n̄an jin̄aik juon rikabwijer priesthood rejeļā kajjien ej katakin juon armej kōn kien ko an Anij.
Kain̄i ko an priesthood rej jipan̄ kōj reiļo̧k n̄an Jisōs Kraist kōn pinmuur.
Jemedwōj Ilan̄ ekōkajoor eō ekkar n̄an aō tōmak.
Bwebwenato eo an Alma im Amulek kōn aer diwōj jān kaļbuuj emaron̄ im̧we ajri ro n̄an oktakļo̧k n̄an Irooj n̄e rej aikuj jipan̄.
Makūtkūt ko Maron̄ Kōm̧m̧ani
-
Kwaļo̧k pija in Alma im Amulek ilo peij in m̧ākūtkūt eo an wiik in ilo am̧ kwaļo̧k bwebwenato eo ilo Alma 14:18–29. Komaron̄ bar etal n̄an “Jebta 22: Mijen eo an Alma n̄an Ammōnaia” (Bwebwenato ko ilo Bok in Mormon, 58–63, ak video ko ilo ChurchofJesusChrist.org). Kōtļo̧k bwe ajri ro ren bōk kuņaer kōjerbal pija ko n̄an kwaļo̧k bwebwenato eo. Kwaļo̧k bwe Alma im Amulek raar bōk kajoor n̄an ko jān kaļbuuj “ekkar n̄an tōmak eo [aer] ilo Kraist” (Alma 14:26).
-
Jipan̄ ajri ro anto̧o̧neļo̧k elmen an Alma im Amulek kar en̄jake ke rekar pād ilo kaļbuuj, im kajjitōk ippāer n̄an jerbale en̄jake kein (lale eoon 22). Kōmeļeļeik bwe Alma eaar kajjitōk ippān Irooj kōn jipan̄ (lale eoon 26). Kam̧ool bwe Anij enaaj kōkajoor kōj n̄e jej jar kōn tōmak.
-
Kōjerbal peij in m̧akūtkūt eo an wiik in n̄an katakin ajri ro kōn jet iaan wāween ko Anij ej kōkajoorļo̧k ro rej tōmak. Ilo an ajri ro kōļari peij in m̧akūtkūt eo, kwaļo̧k kōn juon tōre Anij eaar lewaj n̄an eok kajoor.
Ij jeraam̧m̧an n̄e ij ļoor rikanaan eo.
Zoram, jeban kapen eo an jarin tariņae eo an Rinipai ro, eaar jeļā bwe Alma eaar juon rikanaan im kar pukot tōl eo an. Kōn wōt menin, Zoram eaar tōprak.
Makūtkūt ko Maron̄ Kōm̧m̧ani
-
Kwaļo̧k naan ko am̧ make kōn bwebwenato in ilo Alma 16:1–8. Kwaļo̧k bwe Zoram im jarin tariņae eo an Rinipai ro raar ļoor rikanaan Alma, Rinipai ro raar maron̄ in lo̧mo̧o̧ren ro m̧ōttaer ro raar kaļbuuj jān Rileman ro. Kwaļo̧k juon en̄jake ke kwaar jeraam̧m̧an kōn am̧ kar ļoor rikanaan eo.
-
Kwaļo̧k juon pija in Būreejtōn eo an Kabun̄ in, im kwaļo̧k jet men ko eaar katakin kōj n̄an kōm̧m̧ani. Jipan̄ ajri ro ļōmņake jet wāween ko remaron̄ ļoor Jisōs ilo kōm̧m̧ane ta eo rikanaan eo An ej katakin kōj.
-
Kwaļo̧k pija in rikanaan ro (lale Gospel Art Book, nos. 6–9, 14, 18, 26–27) ilo am̧ al ippān ajri ro juon al kōn rikanaan ro, āinwōt “Follow the Prophet” (Children’s Songbook, 110–11). Kwaļo̧k naan ko ilo al eo me ej katakin kōj unin ad ļoor rikanaan eo.
Katakin Katak ko: Ajri ro Rerūtoļo̧k
Priesthood eo ej jipan̄ n̄a itok n̄an Kraist.
Ilo am̧ riiti Alma 13:1–19, ta eo kwoj loe me ej kapenļo̧k am̧ kautiej priesthood eo? Ta am̧ en̄jake n̄an kwaļo̧k n̄an ajri ro kwoj katakin? Ļōmņak kein ilaļ remaron̄ jipan̄.
Makūtkūt ko Maron̄ Kōm̧m̧ani
-
Riit ippān ajri ro Alma 13:10 im 13, pukot m̧wiļ ko ewōr ippān juon rikabwijer priesthood eo. Kajjitōk ippāer n̄an ļōmņake armej ro rejeļā kajjier ro waanjon̄ok ko aer āinwōt m̧wiļ kein.
-
Jipan̄ ajri ro kōm̧m̧ane juon laajrak in kain̄i ko jej būki jān priesthood eo (lale “Ordinances” in True to the Faith, 109–10). Kajjitōk ippān juon bwe en riiti Alma 13:16. Elmen an kain̄i kein jipan̄ kōj “reiļo̧k n̄an [Jisōs Kraist] kōn juon jeo̧rļo̧kin jerawiwi ko [ad]”?
-
Kajjitōk ippān ajri ro eļan̄n̄e rejeļā elmen an kar Melkisedek Priesthood kar bōk etan. Jipan̄ er pukot uwaak ko ilo Alma 13:14–19 im Katak im Bujen ko 107:1–4. Ta eo jaar ekkatak jān Melkisedek kōn kilen an priesthood eo maron̄ jerbal?
Jemedwōj Ilan̄ ej kōkajoor eō ekkar n̄an aō tōmak.
Alma im Amulek raar pād ilo kaļbuuj elōn̄ raan ko m̧okta jān an Irooj kōtļo̧k er. Bwebwenato in emaron̄ jipan̄ ajri ro jeļā bwe apan̄ ko aer reban m̧ōkaj ak pidodo jekjekier, ak Irooj enaaj kōkajoor er “ekkar n̄an [aer] tōmak” (Alma 14:26).
Makūtkūt ko Maron̄ Kōm̧m̧ani
-
Je kajjitōk ko ioon boot eo n̄an jipan̄ ajri ro pukot meļeļe ko jān Alma 14:18–29, āinwōt Ta eo riekajet ro raar kōm̧m̧ane n̄an Alma im Amulek ilo kaļbuuj? ak Elmen aer kar kwaļo̧k tōmak ilo Jisōs Kraist? Leļo̧k n̄an kajjojo ajri juon eoon ak ruo n̄an riiti, pukot uwaak ko n̄an kajjitōk ko.
-
Kajjitōk ippān ajri ro n̄an pijaik kōmeļeļe ko jān Alma 14:18–29, innām kōtļo̧k bwe ren kōjerbal pija ko aer n̄an kwaļo̧k bwebwenato eo. Elmen ad maron̄ āinwōt Alma im Amulek?
-
Kwaļo̧k en̄jake ko ilo am̧ kar kwaļo̧k tōmak ilo Irooj im Eaar lewaj n̄an eok kajoor n̄an anjo̧ im dipļo̧ke juon apan̄. Rōjan̄ ajri ro n̄an kwaļo̧k ejja en̄jake ko aer.
Gospel in emaron̄ ukōt bōro ko.
Ilo jinoin Zeezrom eaar jum̧ae Alma im Amulek, ak naan in kam̧ool ko aer eaar im̧we būruwōn im kar im̧we e n̄an ukweļo̧k. Ilo am̧ katak eoon kein, ļōmņak elmen en̄jake eo an Zeezrom emaron̄ kar im̧we ajri ro kwoj katakin.
Makūtkūt ko Maron̄ Kōm̧m̧ani
-
Etale ippān ajri ro ta eo raar ekkatak wiik eo ļo̧k kōn Zeezrom. Riit ippān doon Alma 15:3–12 n̄an pukote elmen an kar oktak.
-
Kajjitōk ippān ajri ro n̄an anto̧o̧ne n̄e raar ioon Zeezrom m̧okta jen an kar ukweļo̧k. Ta eo rekar ba n̄an jipan̄ e tōmak gospel in? Remaron̄ keidi ta eo ren kar ba kōn ta eo Alma im Amulek raar katakin Zeezrom (lale Alma 11:40–46; 15:6–11). Etke jeļā m̧ool kein ej jipan̄ juon kōņaan oktak?
Kōketak Ekkatak ilo Mweo
Kajjitōk ippān ajri ro n̄an ļōmņake jet men remaron̄ kōm̧m̧ane wiik in n̄an kwaļo̧k aer tōmak ilo Irooj. Rōjan̄ er n̄an kwaļo̧k kōttōbar ko im en̄jake ko aer ippān baam̧le ko aer.
Kōkōm̧anm̧anļo̧k Ad Katakin
Jeļā n̄an kile revelesōn. “Revelesōn ekkā an itok ‘ļain im bar ļain’ (2 Nipai 28:30), ejjab ilo juon wōt iien. … Ilo am̧ kōļmenļo̧kjeņ elmen an pedped in gospel eo kwoj katakin naaj kōjeraam̧m̧an ro uwaan kūlaaj eo am̧, ļōmņak im im̧we ko renaaj waļo̧k ilo aolepān mour eo am̧—ilo am̧ ilo̧k im jerbal, kōm̧m̧ani jerbal ko ilo m̧weeo, ak iiaio̧ ippān baam̧le ak ro m̧ōttam̧” (Teaching in the Savior’s Way, 12).