“Juun 8–14. Alma 8–12: Jisōs Kraist Enaaj Itok n̄an Lo̧mo̧o̧ren Armej ro An,” Itok, Ļoor Eō—N̄an Armej im Baam̧le ko: Bok in Mormon 2020 (2020)
“Juun 8–14. Alma 8–12,” Itok, Ļoor Eō—N̄an Būraimere: 2020
Katakin Katak ko Rem̧ool, jān Michael T. Malm
Juun 8–14
Alma 8–12
Jisōs Kraist Enaaj Itok im Lo̧mo̧o̧ren Armej ro An
Ilo am̧ riiti ta eo Alma im Amulek rekar katakin armej ro ilo Ammōnaia, ta eo kwoj en̄jake ke elukkuun aorōk n̄an ajri ro kwoj katakin er?
Je En̄jake ko Rej Im̧we Eok
Kajjitōk bwe ren Kwaļo̧k
Kajjitōk ippān ajri ro n̄an kōmeļeļeik ta ko mijenede ro rej kōm̧m̧ane im ba n̄an eok kōn juon armej eo me rejeļā kake eo ej kōm̧m̧an jerbal in mijenede. Ta eo mijenede ro rej katakin armej kake? Jipan̄ ajri ro meļeļe bwe Alma im Amulek rekar jet mijenede ro me rekar kwaļo̧k gospel eo n̄an armej in Ammōnaia.
Katakin Katak ko: Ajri ro Reddikļo̧k
Imaron̄ kwaļo̧k gospel eo.
Alma ekar ito itak aolepān āneo n̄an kwaļo̧k kōn gospel eo, im Amulek ekar kwaļo̧k naan ilo jikin eo an make n̄an ro m̧ōttan im ro rūtūrin. Ewi wāween komaron̄ im̧we ajri ro n̄an ļoor waanjon̄ak ko aer im kwaļo̧k gospel eo n̄an ro jet?
M̧akūtkūt ko Maron̄ Kōm̧m̧ani
-
Riit ippān doon jinoin “Jebta 22: Mijen eo an Alma n̄an Ammōnaia” (Bwebwenato ko ilo Bok in Mormon, 58–63; bar lale pija in alooj ko rejjejet n̄an katak in ilo ChurchofJesusChrist.org). Kajjitōk ippān ajri ro n̄an kobaik pā ko jim̧or im erom̧ āinwōt n̄e Amulek im Alma, ro me rekar kwaļo̧k gospel eo n̄an doon, ilo aer al juon al kōn jerbal in mijenede, āinwōt “I Want to Be a Missionary Now” (Children’s Songbook, 168).
-
Jipan̄ ajri ro āliji juon katak em̧ool an gospel jejjo alen, āinwōt “Bok in Mormon ej kam̧ool kōn Kraist” ak “Ijeļā Jisōs ej iakwe eō.” Innām kajjitōk ippān kajjojo ajri n̄an kōmelmel kwaļo̧k m̧ool in n̄an juon ajri ilo kūlaaj eo. Āinwōt m̧ōttanļo̧k makūtkūt in, komaron̄ jipan̄ ajri ro kadedeikļo̧k peij in makūtkūt eo an wiik in.
-
Kajjitōk ippān ajri ro n̄an ba juon men eo rekar kwaļo̧k n̄an juon eo uwaan baam̧le eo aer ak juon m̧ōttāer—āinwōt juon kein ikkure ak juon tōn̄al. Jipan̄ er kōlaajrak jet iaan men ko raorōk me jemaron̄ kwaļo̧k n̄an ro jet kōn Jisōs Kraist. Kōmeļeļeik bwe kōnke elukkuun aorōk gospel eo, Alma ekar etal im kwaļo̧k n̄an armej ro ilo elōn̄ jikin ko bwe ren maron̄ jeļā ewi wāween bwe ren m̧ōņōņō.
Imaron̄ erom̧ juon m̧ōttāer eo em̧m̧an.
Jerbal eo an Amulek n̄an Alma ej juon waanjon̄ak em̧m̧an n̄an ajri ro kōn wāween aer maron̄ iakwe im jerbal ippān doon.
M̧akūtkūt ko Maron̄ Kōm̧m̧ani
-
Kajjitōk ippān juon ajri n̄an erom̧ āinwōt n̄e e Amulek im bar juon ajri n̄an erom̧ āinwōt n̄e e Alma ilo am̧ kwaļo̧k bwebwenato in ilo Alma 8:18–22. Kōtļo̧k bwe ajri ro ren jipan̄ ba bwebwenato eo, im kajjitōk ippān ajri ro kajjojo n̄an erom̧ āinwōt Alma im Amulek. Ewi wāween an kar Amulek erom̧ juon m̧ōttan Alma eo em̧m̧an? Kajjitōk ippān ajri ro n̄an kōnono kōn wāween an juon armej m̧ōttāik ro jet. Ewi wāween aer kar en̄jake kōn menin? Etke Anij ekōņaan bwe en em̧m̧an ad m̧ōttāik ro jet?
-
Kappukot ak jin̄aik juon pija eo me ej bōk jikin jem̧jerā (āinwōt ruo armej rej atbo̧kwōj doon ak juon jekjek in menono), im mwijit n̄an kōm̧m̧an m̧ōttan bajjōļ. Itulikin bajjōļ ko kajjojo, je juon men eo me Alma im Amulek rekar kōm̧m̧ane bwe ren jino m̧ōttāik doon ak men ko me jemaron̄ kōm̧m̧ane n̄an m̧ōttāik ro jet. Kajjitōk ippān ajri ro n̄an kajjojo bōk koņaer n̄an kālet m̧ōttan kein im kobaikļo̧k n̄an bajjōļ eo ilo am̧ riiti ta eo em̧ōj am̧ je ilo tulikin. Jipan̄ er ļōmņak kōn armej ro me remaron̄ m̧ōttāik er. Kam̧ool bwe Jisōs Kraist ej eo m̧ōttad em̧m̧an tata.
Jemaron̄ erom̧ m̧ōttā rem̧m̧an n̄an ro jet.
Ālkin mej, inaaj bar jerkakpeje.
Amulek ekar katakin armej ro ilo Ammōnaia kōn Jerkakpeje. Ewi wāween am̧ jipan̄ ajri ro kwoj katakin er meļeļe ta meļeļein n̄an jerkakpeje?
M̧akūtkūt ko Maron̄ Kōm̧m̧ani
-
Kōjerbal pā ko peim n̄an bōk jikin jetōb, im kōjerbal tebukro eo n̄an bōk jikin ānbwin. Wūtki tebukro ko jān peim n̄an kwaļo̧k n̄an ajri ro bwe jetōb ko im ānbwin ko renaaj bar jepeļo̧k ilo iien mej. Innām bar kōņaki tebukro ko n̄an kwaļo̧k bwe jetōb ko im ānbwin ko renaaj bar koba ippān doon ilo iien Jerkakpeje eo. Kōm̧m̧an bwe ajri ro ren kajjojo bōk koņaer kōņaki tebukro ko im wūtki n̄e kwoj riiti Alma 11:43 n̄an er. Kajutak juon pija in Meri im Jisōs ālkin an kar jerkakpeje (Bok in Gospel Pija, no. 59), im kam̧ool bwe Jisōs Kraist ekar kōm̧m̧an bwe aolep armej ren maron̄ bar jerkakpeje.
-
Kajjitōk ippān ajri ro n̄an jin̄aik juon pija in ro m̧ōttāer ak ro uwaan baam̧le eo, ekoba baam̧le ko am̧ me ekilep. Ilo an ajri ro kwaļo̧k pija ko aer, jitōn̄ kajjojo m̧ōttam̧ ak ro uwaan baam̧le eo ta eo me rekar jin̄aiki im kōmeļeļeik bwe e enaaj bar jerkakpeje. Kam̧ool bwe Jisōs ekar kōm̧m̧ane bwe en kūrm̧ool n̄an kōj ke baam̧le ko rej n̄an indeeo.
Katakin Katak ko: Ajri ro Rerūttoļo̧k
Imaron̄ kwaļo̧k gospel eo.
Alma im Amulek rej kwaļo̧k gospel eo, men̄e ekar jab lukkuun pidodo kōm̧m̧ane. Ewi jon̄an aer peran im aer tōmak im̧we ajri ro me rej katakin er?
Makūtkūt ko Maron̄ Kōm̧m̧ani
-
Ilo naan ko am̧ make, kakaduikļo̧k ta ko rekar waļo̧k ilo Alma 8–10. Kālet jet iaan katak ko jān eoon kein me remaron̄ jipan̄ ajri ro kwaļo̧k gospel eo, āinwōt niknik (lale Alma 8:8–13), kam̧ool kōn Kraist (lale Alma 9:26–27), im kōn jem̧jerā eo an (lale Alma 10:7–11). Kajjitōk ippān ajri ro n̄an riiti eoon ko emōj kāleti im ba ta eo rekar ekkatak kōn wāween kwaļo̧k gospel eo. Etke elukkuun aorōk n̄an ba n̄an ro jet kōn gospel eo?
-
Kajjitōk ippān ajri ro n̄an kwaļo̧k en̄jake ko aer n̄e rej kwaļo̧k gospel eo n̄an bar juon armej, ak kwaļo̧k en̄jake ko aer make. Kajjitōk ippān ajri ro n̄an ron̄jake jet iaan wāween ko remaron̄ kōpooj er kwaļo̧k gospel eo ilo aer al juon al kōn jerbal in mijenede “We’ll Bring the World His Truth” (Children’s Songbook, 172). Etke Jemedwōj Ilan̄ ekōņaan bwe jen kwaļo̧k gospel eo? Jipan̄ ajri ro karōke wāween ko n̄an kwaļo̧k gospel eo ippān ro m̧ōttāer, āinwōt leļo̧k n̄an er juon kape in Bok in Mormon ak kūr er n̄an juon makūtkūt an Kabun̄ in. Leļo̧k n̄an er iien ikkure n̄an kwaļo̧k kilen ta eo remaron̄ ba ak kōm̧m̧ane ilo jekjek kein.
Karōk eo an Anij ej juon karōk in lo̧moor.
Ewi wāween am̧ naaj kōjerbal Alma 11–12 n̄an “[kōm̧m̧an] bwe en alikkar n̄an [ajri ro] karōk in lo̧mo̧o̧r”? (Alma 12:30).
M̧akūtkūt ko Maron̄ Kōm̧m̧ani
-
Je ioon boot eo jet iaan katak ko me rej iookļo̧k karōk in lo̧mo̧o̧r eo me ej pād ilo Alma 11–12, āinwōt Wōtļo̧k eo an Adam im Iv, Pinmuur eo an Jisōs Kraist, ukweļo̧k, mej, jerkakpeje, im ekajet eo. Riiti eoon ko jān Alma 11 ak 12 me ej katakin kōn katak ko, im leļo̧k n̄an ajri ro aer iien n̄an jin̄aik juon pija eo ej bōk jikin katak eo. Ta eddo eo an Rilo̧mo̧o̧r ilo karōk in? Innām kōmeļeļeik ajri ro n̄an kōjerbal pija ko aer n̄an kōm̧m̧ane āinwōt juon ikkure ak role-play n̄an katakin juon eo m̧ōttāer kōn karōk eo an Anij.
Eļan̄n̄e ijjab kapen buruō, imaron̄ bōk eļapļo̧k naan an Anij.
N̄e ej itok n̄an ekkatak m̧ool ko an jetōb, jekjek in buruōd elukkuun aorōk āinwōt bar maron̄ in kōļmenļo̧kjeņ ko ad.
M̧akūtkūt ko Maron̄ Kōm̧m̧ani
-
Riit ippān doon Alma 12:10, im kōmeļeļe ta meļeļein n̄an “kapen” buruōd. Etke juon bōro epen emaron̄ kōm̧m̧an bwe en eļapļo̧k an pen n̄an ekkatak jān Anij?
-
N̄an kōmeļeļeik katak in, kwaļo̧k n̄an ajri ro juon matmat im juon dōkā im kajjitōk ippāer ewi wōt enaaj jerom eļap dān. Ewi wāween jemaron̄ kwaļo̧k n̄an Irooj bwe jekōņaan bwe buruōd en lukkuun em̧m̧an im meo̧eo̧ āinwōt matmat eo epidodo?
Kōketak Ekkatak ilo M̧weo
Kajjitōk ippān ajri ro n̄an lale iien ko rem̧m̧an n̄an kwaļo̧k gospel eo ak n̄an jipan̄ juon armej ilo wiik in.
Kōkōm̧anm̧anļo̧k Ad Katakin
Kwaļo̧k naan in kam̧ool eo am̧ ilo kūlaaj eo am̧. Juon naan in kam̧ool emaron̄ ļōmwaan āinwōt “Ijeļā bwe Jemedwōj Ilan̄ ej iakwe kōj kajjojo” ak “Ij en̄jake aenōm̧m̧an ilo aō ekkatak kōn Jisōs Kraist.” (Bar lale Teaching in the Savior’s Way, 11.)