Kwojjab Atajinemjen, jān Jon McNaughton

Juun 1–7

Alma 5–7

“Kom̧ Ar Bōk ke Oktak in Ekajoor ilo Buruōmi?”

Lukkuun ļōmņake pedped in katak ko ilo Alma 5–7 me kwoj en̄jake rekkar n̄an ajri ro kwoj katakin.

Je En̄jake ko Rej Im̧we Eok

Kajjitōk bwe ren Kwaļo̧k

Kajjitōk ippān ajri ro n̄an kwaļo̧k ta eo raar ekkatak kōn Alma eo Edik jejjo̧ wiik rem̧ootļo̧k. Kōmeļeļeik bwe ālkin an Alma kar oktak, eaar katakin armej ro men ko raorōk kōn gospel in. Kōtļo̧k bwe ajri ro ren kwaļo̧k ta eo rejeļā kōn men ko eaar kwaļo̧ki.

Katakin Katak: Ajri ro Reddikļo̧k

Alma 5:44–48

Imaron̄ bōk aō make naan in kam̧ool jān Jetōb Kwojarjar eo.

Ajri ro kwoj katakin remaron̄ kōļapļo̧k naan in kam̧ool ko aer make, men̄e rej iddik wōt.

Makūtkūt ko Maron̄ Kōm̧m̧ani

• Kōjerbal juon pija in Alma eo Edik (lale Bok in Gospel Pija, no. 77) n̄an etale bwebwenato in loļo̧k eo an enjeļ eo n̄an e (lale Mosaia 27). Innām kajjitōk ippān ajri ro n̄an kōmeļeļeiki ta in naan in kam̧ool, im jipan̄ er eļan̄n̄e ekkar. Kōmeļeļeik bwe Alma ekar jerbal n̄an bōk juon naan in kam̧ool ālkin an enjeļ eo kar loļo̧k e. Riit kadikdik Alma 5:46 jet alen, im kajjitōk ippān ajri ro n̄an ron̄jake ta eo Alma ekar kōm̧m̧ane im elmen an kar jeļā m̧ool eo. (Kwomaron̄ aikuj in kōmeļeļeik bwe jitlo̧k meļeļein jab m̧ōn̄ā im idaak.)

• Kwaļo̧k pija in men ko me rej eddōk jidik kōn jidik im rej aikuj kōjparoki, āinwōt juon ine ak juon menin mour jidikdik. Kajjitōk ippān ajri ro n̄an kwaļo̧k elmen ad kōjparok men kein im jipan̄ er eddōk. Kakeememej er bwe jej aikuj bar kōjparok naan in kam̧ool ko ad.

• Kōjerbal juon bujeāān̄ eo ejjeļo̧k kobban n̄an bōk jikin juon naan in kam̧ool im kabbolle jidik ilo iien am̧ kwaļo̧k men me ej jipan̄ naan in kam̧ool ko eddōk. Lukwoj bujeāān̄ eo im leto-letake, kajjitōk ippān ajri ro n̄an kwaļo̧k juon men remaron̄ kōm̧m̧ane n̄an jipan̄ naan in kam̧ool ko aer eddōk. Kajjitōk ippān ajri ro n̄an jin̄aik er make kōm̧m̧ani men ko me renaaj kōkajoorļo̧k naan in kam̧ool ko aer.

N̄e jej bōk gospel in, ej āinwōt jino juōn mour kāāl.

Alma 7:10–13

Rilo̧mo̧o̧r Make eaar bōk ioon jerawiwi ko aō, metak ko, im en̄taan ko.

Mool ko ilo Alma 7:10–13 remaron̄ jipan̄ ajri ro jeļā bwe Jisōs Kraist ej kea kōn er im maron̄ jipan̄ er.

Makūtkūt ko Maron̄ Kōm̧m̧ani

• Kwaļo̧k n̄an ajri ro juon pija in Jisōs. Kōmeļeļeik bwe Ejeļā ta in metak, būrom̧ōj, ak mijak. Riiti jet iaan naan ko ilo Alma 7:11–13 me ej kōmeļeļeik ta kar en̄taan eo an Rilo̧mo̧o̧r, im kōmeļeļeik naan ko bwe ajri ro ren maron̄ meļeļe. Ba bwe Jisōs emaron̄ jipan̄ im kaenōm̧m̧an kōj n̄e jej būrom̧ōj. Kwaļo̧k elmen an Rilo̧mo̧o̧r kar jipan̄ im kaenōm̧m̧an eok.

• Kajjitōk ippān ajri ro n̄an kwaļo̧k en̄jake ko ke raar nan̄inmej ak metak ak jōrrāān ko jet me raar kōm̧m̧an aer būrom̧ōj. Kwaļo̧k naan in kam̧ool eo am̧ bwe Rilo̧mo̧o̧r eaar en̄taan bar kōn men kein im jeļā elmen n̄an jipan̄ kōj.

Alma 7:19–20

Iaļ eo n̄an ro̧o̧lļo̧k n̄an Jemedwōj Ilan̄ im Jisōs Kraist ejim̧we.

Elmen am̧ maron̄ kōjerbal naan ko an Alma kōn iaļen ro̧o̧lļo̧k eo n̄an Jemedwōj Ilan̄ n̄an jipan̄ ajri ro jeļā n̄an kōm̧m̧ani kālet ko rem̧m̧an?

Makūtkūt ko Maron̄ Kōm̧m̧ani

• Riiti Alma 7:19 n̄an ajri ro, im kōmeļeļeik bwe n̄e jej kōm̧m̧ani kālet ko rem̧m̧an, jej pād ilo iaļ eo ej tōlļo̧k kōj n̄an Jemedwōj Ilan̄. Leļo̧k n̄an ajri ro kālet ko ak jerbal ko (āinwōt jab jouj n̄an ro uwaan baam̧le eo ak jerbal n̄an er). Kajjitōk ippāer n̄an jiron̄ eok eļan̄n̄e kālet ko rem̧m̧an im rej tōlļo̧k n̄an Anij ak eļan̄n̄e renana im rej kōttoļo̧k jān E.

• Riiti Alma 7:20 im jipan̄ ajri ro meļeļe naan ko ilo eoon kein me rej kōmeļeļe iaļ eo ļo̧k n̄an Anij. Jin̄aik ioon boot eo juon iaļ ekajim̧we jān kōj n̄an Jemedwōj Ilan̄. Innām jin̄aik juon iaļ ankeke me ejjeļo̧k jem̧ļo̧kin me ej tōlļo̧k kōj jān Anij. Kajjitōk ippān ajri ro n̄an anōk iaļ eo kōn addin peier. Iaļ ta eo em̧m̧an? Jipan̄ er ļōmņake kālet ko rem̧m̧an me renaaj jipan̄ er pād wōt ilo iaļ eo ejim̧we.

Katakin Katak eo: Ajri ro Retūttoļo̧k

Alma 5:12–14, 27–28, 57; 7:14–24

Ij aikuj bar ļotak innām ļoor iaļ eo me ej tōlļo̧k n̄an Anij.

Elmen am̧ maron̄ jipan̄ ajri ro meļeļe ta meļeļein bar ļotak?

Makūtkūt ko Maron̄ Kōm̧m̧ani

• Kwaļo̧k juon pija in juon nin̄nin̄ edik, innām kajjitōk ippāer im kōnono kōn ta in nin̄nin̄ im n̄e rej ļotak tok. Kajjitōk ippān juon ajri n̄an riiti Alma 5:14. N̄an jipan̄ ajri ro meļeļe ta meļeļein “ļotak jān Anij … jetōb,” kajjitōk ippāer n̄an ļōmņake kōn ta paoktokin Alma eo Edik m̧okta jān an kar oktak. Elemen karpaoktokin tokālkin? (Lale Mosaia 27:23–32 im Alma 36:12–24.) Kōmeļeļeik bwe n̄e ewōr ad tōmak ilo Jisōs Kraist im mour kake gospel eo An, ej āinwōt ilo ad jino juon mour kāāl, āinwōt juon nin̄nin̄.

• Riit ippān doon Alma 7:19, im kōmeļeļe bwe ālkin ad bar ļotak, jej aikuj ļoor “iaļ eo ej tōlļo̧k n̄an aelōn̄ in kiin̄ eo an Anij.” Ņoji peba ko ipeļaakin ruum̧ eo ippān eoon in jipan̄ ko em̧ōj je ioer: Alma 5:12–13, 27–28, 57; 7:14–16, 23–24. Kajjitōk ippān ajri ro n̄an pukot peba ko, pukot jeje ko rekwojarjar, im kwaļo̧k ta kajjojo eoon ko rej katakin kōj n̄an kōm̧m̧ane n̄an ro̧o̧lļo̧k n̄an im̧aan mejen Anij.

Alma 5:14, 44–48

Imaron̄ bōk naan in kam̧ool eo aō make jān Jetōb Kwojarjar eo.

Enjeļ eo eaar loļo̧k Alma, ak naan in kam̧ool eo an “kar kwaļo̧k n̄an [e] jān Jetōb Kwojarjar”Alma 5:46).

M̧akūtkūt ko Maron̄ Kōm̧m̧ani

• Riit ippān ajri ro Alma 5:44–46. Ta eo Alma ekar kōm̧m̧ane n̄an bōk naan in kam̧ool eo an make kōn gospel in? Leļo̧k n̄an kajjojo ajri juon m̧ōttan in peba eo im kajjitōk ippāer n̄an kōm̧m̧ane juon karōk n̄an kōm̧m̧ane juon men wiik in n̄an kōkajoorļo̧k naan in kam̧ool ko aer.

• Leto-letak juon kūlaaj im kōtļo̧k an ajri ro kalimjōk annan̄i er make ilo aer riiti Alma 5:14. Ta meļeļein n̄an bōk annan̄in Rilo̧mo̧o̧r ilo paoktokiid? Kwaļo̧k jet tōre n̄e juon ej ba ak kōm̧m̧ani men ko me raar kakeememej eok kōn Rilo̧mo̧o̧r, im kajjitōk ippān ajri ro n̄an kōm̧m̧an ejja āinwōt.

Alma 7:10–13

Rilo̧mo̧o̧r Make eaar bōk ioon jerawiwi ko aō, metak ko, im en̄taan ko.

Ilo am̧ riiti Alma 7, kōļmenļo̧kjeņ elmen am̧ maron̄ kalōk tōmak an ajri ro ilo Jisōs Kraist bwe ren ro̧o̧lļo̧k n̄an E kōn apan̄ ko aer.

Makūtkūt ko Maron̄ Kōm̧m̧ani

• Kajjitōk ippān ajri ro n̄an riiti Alma 7:11–13, pukot men ko Jisōs Kraist eaar en̄taan kaki. Remaron̄ kōņaan kwaļo̧k en̄jake ko n̄e rej en̄jake metak, nan̄inmej, ak en̄taan. Ekkar n̄an eoon kein, etke Rilo̧mo̧o̧r eaar kōņaan en̄taan kōn aolep men kein? (Kōmeļeļeik bwe “succor” meļeļein “n̄an jipan̄.”)

• Jiron̄ļo̧k ajri ro kōn juon nan̄inmej, jorrāān, ak en̄taan ko jet kar am̧, im kajjitōk eļan̄n̄e raar en̄jake ejja kain in. Riit ippān doon Alma 7:11–13, im kwaļo̧k ta eo Jisōs Kraist eaar en̄taan kake n̄an kōj. Jipan̄ ajri ro ļōmņake tōre ko Rilo̧mo̧o̧r eaar en̄jake men kein, āinwōt iien eo kar kapo E (lale Matu 4:1–11) ak iien eo Eaar en̄taan ilo Gethsemane. Elmen an jipan̄ kōj jeļā bwe Jisōs Kraist ejeļā apan̄ ko ad? Kwaļo̧k naan in kam̧ool eo am̧ kōn kajoor eo an Jisōs n̄an kaenōm̧m̧an, jipan̄, n̄an kōmour kōj.

Kōketak n̄an Ekkatak ilo M̧weo

Kajjitōk ippān ajri ro n̄an katotoik juon pija in Jisōs ilo juon jikin ijo ren loe n̄an kakeememej er kōn ta eo raar ekkatak kōn E rainin.

Kōkōm̧anm̧anļo̧k Ad Katakin

Kōkōm̧anm̧anļo̧k āinwōt juon Rūkaki Āinwōt Kraist. Āinwōt juon rūkaki, eaorōk n̄an kōļmenļo̧kjeņ kōn wāween ko komaron̄ kōļapļo̧k bōklekōt eo am̧ n̄an jipan̄ ajri ro kalōk tōmak eo aer ilo Jemedwōj Ilan̄ im Jisōs Kraist. Lōmņak in kōjerbal etale in kajjitōk ko an juon make ilo peij 37 an Teaching in the Savior’s Way.