“Eprōļ 13–19. Mosaia 1–3: ‘Obrak kōn Iakwe n̄an Anij im Armej Otemjeļo̧k,’” Itok, Ļoor Eō—N̄ān Būraimere: Bok in Mormon 2020 (2020)
“Eprōļ 13–19. Mosaia 1–3,” Itok, Ļoor Eō—N̄ān Būraimere: 2020
Minerva K. Teichert (1888–1976), King Benjamin’s Farewell Address, 1935, oil on masonite, 36 x 48 inches. Brigham Young University of Art
Eprōļ 13–19
Mosaia 1–3
“Obrak kōn Iakwe n̄an Anij im Armej Otemjeļo̧k”
Ilo am̧ riiti Mosaia 1–3, jar n̄an jeļā ekōjkan am̧ maron̄ jipan̄ ajri ro kwoj katakin meļeļe aorōk in m̧ool ko Kiin̄ Benjamin eaar katakin. Je en̄jake ko rem̧m̧an rej iwōj n̄an eok jān Jetōb Kwojarjar eo.
Je En̄jake ko Rej Im̧we Eok
Kajjitōk bwe ren Kwaļo̧k
Kwaļo̧k pija eo kōn an Kiin̄ Benjamin katakin, loe ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko. Kajjitōk ippān ajri ro n̄an kwaļo̧k ta eo rejeļā kōn pija in.
Katakin Katak eo: Ajri ro Reddikļo̧k
N̄e ij jerbal n̄an ro jet, ij barāinwōt jerbal n̄an Anij.
Ta eo kwonaaj kōm̧m̧ane n̄an jipan̄ ajri ro meļeļe bwe jerbal n̄an ro jet ej barāinwōt juon wāween n̄an jerbal n̄an Anij?
M̧akūtkūt ko Maron̄ Kōm̧m̧ani
-
Kōm̧m̧an bwe ajri ro ren kajjojo kōņak juon kūrauun (peij in m̧akūtkūt eo an wiik in ewōr ie waanjon̄ak) im jutak ioon juon jea ak juon kein jutak n̄an āinwōt n̄e kwe Kiin̄ Benjamin. Remaron̄ kōm̧m̧ane menin ilo am̧ kwaļo̧k jet iian men ko me Kiin̄ Benjamin eaar katakin armej ro an, loe ilo Mosaia 2–3. Lale Barāinwōt “Jebta 12: Kiin̄ Benjamin” (Bwebwenato ko ilo Bok in Mormon 32–35, ak pija in alooj eo an ilo ChurchofJesusChrist.org.)
-
Kajjitōk ippān ajri ro n̄an bar āliji jentōj in jet naan illo̧k jet ilo aer kabokboke kajjojo syllabal ippām̧: “Bwe eļan̄n̄e kom̧ij jerbal n̄an armej ro ami kom̧ij jerbal wōt n̄an ami Anij” (Mosaia 2:17). Bar āliji menin m̧ae iien ajri ro rej katak jet ak aolepān naan ko. Kam̧ool bwe n̄e jej jipan̄ ro jet, jej barāinwōt jipan̄ Jemedwōj Ilan̄ im Jisōs im kōm̧m̧an bwe Er ren em̧ōņōņō. Kajjitōk ippān ajri ro n̄an kwaļo̧k wāween ko remaron̄ jipan̄ ro jet.
-
Jipan̄ ajri ro anōk peier ioon juon m̧ōttan peba im jin̄aik juon men remaron̄ kōm̧m̧ane n̄an jerbal n̄an baam̧le ko aer. Al ippān doon juon al kōn jerbal in jipan̄, eo āinwōt “When We’re Helping” (Children’s Songbook, 198).
Kiin̄ Benjamin eaar katakin bwe jemaron̄ jerbal n̄an Anij kōn jerbal n̄an ro jet.
Aolep kōjeraam̧m̧an ko aō rej itok jān Jemedwōj Ilan̄.
Ilo an ajri ro kile Anij āinwōt unin aolep kōjeraam̧m̧an ko, renaaj ettā im kam̧m̧oolol.
M̧akūtkūt ko Maron̄ Kōm̧m̧ani
-
Kōmeļeļeik bwe Kiin̄ Benjamin eaar katakin bwe aolepān kōjeraam̧m̧an ko ad rej itok jān Jemedwōj Ilan̄. Kajjitōk ippān ajri ro n̄an ron̄jake kōjeraam̧m̧an eo Jemedwōj Ilan̄ eaar letok n̄an kōj ilo am̧ riiti Mosaia 2:21. Ta kōjeraam̧m̧an ko jet Jemedwōj Ilan̄ eaar letok n̄an kōj? Ekōjkan ad maron̄ kwaļo̧k bwe jej kam̧m̧oolol kōn men kein? (lale Mosaia 2:22).
-
Ikkure juon ikkure me ajri ro rej jaketo jaketak juon men ilo aer al juon al kōn kam̧m̧oolol ak ron̄jake juon al lale “Gratitude” ilo unin kōnono ko ilo index eo an Children’s Songbook. Kabōjrak al ak kabōjrak al eo iien n̄an iien, im kajjitōk ippān jabdewōt eo ej jibwe men eo n̄an kwaļo̧k juon kōjeraam̧m̧an ej kam̧m̧oolol kake.
Ij tōmak ilo Jisōs Kraist.
Juon enjeļ eaar jiron̄ Kiin̄ Benjamin m̧ool ko raorōk kōn mour im jerbal in karejar eo an Jisōs Kraist. Lali eoon kein kōn m̧ool ko kōn Jisōs me kwoj en̄jake rej aorōk n̄an an ajri ro n̄an katak.
M̧akūtkūt ko Maron̄ Kōm̧m̧ani
-
Kwaļo̧k pija ko kōn jet iien ko kar kōnono kaki ilo Mosaia 3:5–10 (lale, n̄an waanjon̄ak, Bok in Gospel Pija, nōm̧ba ko. 30, 41, 42, 57, 59). Kajjitōk ippān ajri ro ta eo ej waļo̧k ilo pija ko, im jipan̄ er n̄e emenin aikuj. Kadikdik riiti Mosaia 3:5–10, im kajjitōk ippān ajri ro n̄an kotak peier n̄e kwoj riit kōn juon men ilo juon iaan pija ko. Kajjitōk ippān ajri ro n̄an kwaļo̧k men ko jet me rejeļā Jisōs eaar kōm̧m̧ani ke Eaar pād ioon laļ in.
-
Jin̄aik juon aļ ilo tulōn̄ in boot eo n̄an jutak kōn lan̄. Jin̄aik jet iaļ ko me rej tōlļo̧k n̄an jikin ko rokoktaktak ipeļaakin boot eo ak ijello̧kin wōt juon iaļ me ej tōlļo̧k n̄an lan̄. Kajjitōk ippān ajri ro n̄an pukōt iaļ jab eo im likūt pija in Jisōs ioon. Riiti Mosaia 3:17, im kam̧ool bwe ļoor Jisōs Kraist ej iaļ eo de eo n̄an bar jepļaak n̄an Jemedwōj Ilan̄.
Katakin Katak eo: Ajri ro Rōrūttoļo̧k
N̄e ij jerbal n̄an ro jet, ij barāinwōt jerbal n̄an Anij.
Ekōjkan am̧ maron̄ jipan̄ ajri ro katak jān waanjon̄ak in jerbal in jipan̄ eo an Kiin̄ Benjamin?
M̧akūtkūt ko Maron̄ Kōm̧m̧ani
-
Kwaļo̧k n̄an ajri ro juon pija in Kiin̄ Benjamin ej katakin armej ro an (lale unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko ak Bok in Gospel Pija, nōm̧ba ko. 74). Jipan̄ ajri ro kappukot Mosaia 2:11–18 n̄an lale ta eo Kiin̄ Benjamin eaar kōm̧m̧ane n̄an jerbal. Etke eaar jerbal n̄an armej ro an? Etke jej aikuj in jerbal n̄an doon?
-
Je ioon boot eo eoon ko jān Mosaia 2:16–17 ippān jet naan ko rejako. Kajjitōk ippān ajri ro n̄an kappukot ilo eoon ko kōn naan ko rejako. Kajjitōk ippāer n̄an kōmeļeļeik ta meļeļe in eoon kein n̄an er. Kajjitōk ippāer n̄an kwaļo̧k en̄jake ko ke ro jet raar jerbal n̄an er ak ke raar jerbal n̄an ro jet. Ekōjkan an en̄jake kein kar kōm̧m̧an bwe ren en̄jake?
-
Leļo̧k n̄an ajri ro jidik peba bwe ren je wāween ko remaron̄ jerbal n̄an ro uwaan baam̧le ko aer, im leļo̧k n̄an kajjojo ajri juon pāāk n̄an likūt peba ko ilowaan. Kōketak ajri ro n̄an bōk juon m̧ōttan peba ko reddik jān lowaan pāāk eo kajjojo raan im kōm̧m̧ane jerbal in jipan̄ eo n̄an juon.
Ij aikuj jab kōmājāje kōn jerbal in jipan̄ eo aō im jerbal ko rem̧m̧an.
Ļōmņak kōn ekōjkan am̧ maron̄ jipan̄ ajri ro kwoj katakin meļeļe bwe jerbal in jipan̄ eo ad aikuj in im̧we jān ad iakwe n̄an ro jet im n̄an Anij.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an kwaļo̧k ekōjkan aer kar kōmeļeļeik naan eo kōmājāje ak jipan̄ er pukōt meļeļe eo ilo juon tikjinede. Jipan̄ er etale Mosaia 2:15–24, pukot un ko etke Kiin̄ Benjamin eaar jab kōmājāje kōn jerbal in jipan̄ eo an n̄an ro jet. Etke jej jerbal n̄an ro jet? Ālkin an ajri ro kwaļo̧k ļōmņak ko aer, jipan̄ er meļeļe bwe jej aikuj kappukot n̄an jerbal n̄an ro jet kōnke jej iakwe er im Anij, ejjab bwe jenaaj em̧m̧an kōjāllid n̄an ro jet.
-
Kajjitōk ippān ajri ro n̄an kwaļo̧k jekjek ko me juon eaar kajjieon̄ kōmājāje ak jejjej kōn juon men. Etke ebōd n̄an kōmājāje ilo jekjek ko? Kajjitōk ippān ajri ro n̄an kōjerbal kapilōk eo jān ennaan eo an Kiin̄ Benjamin ilo Mosaia 2:15–24 n̄an jipan̄ er kōn uwaak ko aer.
Jisōs Kraist ej karreoik eō jān jerawiwi im ej jipan̄ eō erom̧ juon armej ekwojarjar.
N̄an maron̄ erom̧ āinwōt Jemedwōj Ilan̄, jej aikuj eļapļo̧k jān karreo jān jerawiwi ko ad—būruwōd ej aikuj oktak. Āinwōt an Kiin̄ Benjamin kar katakin, jej aikuj in anjo̧ ioon ikdeelel in jerawiwi ko ad im erom̧ armej ro rekwojarjar kōn Pinmuur eo an Rilo̧mo̧o̧r eo.
M̧akūtkūt ko Maron̄ Kōm̧m̧ani
-
Jin̄aik ruo armej ro ioon boot eo—juon n̄an jutak kōn “armej ilo lukkuun piktokin” im eo juon n̄an jutak kōn juon “armej ekwojarjar.” (Komaron̄ aikuj in kōmeļeļeik naan kein.) Riit ippān doon Mosaia 3:19, im kajjitōk ippān ajri ro n̄an kappukot oktak ko me armej ilo lukkuun piktok in ej aikuj in kōm̧m̧ani n̄an maron̄ erom̧ juon armej ekwojarjar. Ta naan ko jet an eoon ko ajri ro remaron̄ in aikuj jipan̄ meļeļe?
-
Ajri ro kwoj katakin er renan̄in ke kar jipan̄ ro jinier im jemeer kōpooj m̧ōn̄ā ko ilo aer kōjerbal juon iiōk? Eļan̄n̄e emōj, komaron̄ kajjitōk ippāer n̄an kōjerbal Mosaia 3:19 n̄an itok kōn juon “iiōk” kōn ekōjkan ad maron̄ erom āinwōt Jisōs Kraist. Etke Pinmuur eo an Jisōs Kraist ej “kein kāre” eo eaorōk tata?
Kōketak n̄an Ekkatak ilo M̧weo
Kajjitōk ippān ajri ro n̄an kōjerbal peij in m̧akūtkūt eo n̄an kwaļo̧k ippān baam̧le ko aer ak ro m̧ōttaer ekōjkan aer naaj ļoor waanjon̄ak eo an Kiin̄ Benjamin im jerbal n̄an ro jet.
Kōkōm̧anm̧anļo̧k Ad Katakin
Ajri ro rej jeraam̧m̧an jān bar āliji. Jab mijak n̄an bar ālij m̧akūtkūt ko elōn̄ alen, eļaptata ippān ajri ro reddikļo̧k. Bar āliji enaaj jipan̄ ajri ro keememej ta ko rej ekkatak.