Jekab im Inōs, jān Scott Snow

M̧aaj 23–29

Inōs–Naan ko an Mormon

Ej Jerbal ilo N̄a n̄an Kōm̧m̧ane Ankilaan

Maanjabpopo n̄an katakin jān riiti Inōs–Naan ko an Mormon im ejaake juon karōk in katakin (lale Teaching in the Savior’s Way, 19). Elmakot ko im katak ko ilo laajrak in remaron̄ in jipan̄ eok lewaj meļeļe ko

Je En̄jake ko Rej Im̧we Eok

Kajjitōk bwe ren Kwaļo̧k

N̄an leļo̧k n̄an ro uwaan kūlaaj eo iien ko rem̧m̧an n̄an aer kwaļo̧k ippān ro jet ta eo rej ekkatak ilo m̧weo im̧ōer, komaron̄ ajeje er n̄an kūrub ko im jitōn̄ kajjojo kūrub n̄an riiti juon iaan jebta ko jān Inōs–Naan ko an Mormon. Kajjitōk ippāer n̄an kālet eoon ko jān jebta eo me rej en̄jaki ke kūlaaj eo ej aikuj kōnono kaki. Kōllaajraki eoon kein ioon boot eo, im kālet jejjo n̄an kōnono kaki.

Katakin Katak ko

Inōs 1:1–17

Jemaron̄ bōk jeorļo̧k bōd in jerawiwi ko ad ilo ad kōjerbal tōmak ilo Jisōs Kraist.

• Erkein rej jet iaan kajjitōk ko komaron̄ kajjitōk ippān ro uwaan kūlaaj eo n̄an kejōkļo̧kjeņ kaki im ekōnono kaki ilo am̧ ekkatak Inōs 1:1–17; Ta eo jej ekkatak jān en̄jake ko an Inōs kōn bōk jeorļo̧k bōd in jerawiwi ko ad? Ewi wāween an Inōs kōmeļeļeiki tōmak eo an ilo Jisōs Kraist? Ewi wāween an en̄jake in jelet Inōs im ewi wāween an loe e make im ro jet?

Inōs 1:4–17

Jar ko ad rem̧ool renaaj bōk uwaak.

• N̄an jipan̄ ro uwaan kūlaaj eo kam̧wilaļļo̧k aer meļeļe kōn jar, komaron̄ in ajeje er n̄an kūrub ko reddik im kajjitōk ippān kajjojo kūrub n̄an katak juon iaan eoon kein jān Inōs 1: eoon 2–8, 9–11, ak 12–17. Innām kajjitōk ippān kajjojo kūrub n̄an katakin ro jet uwaan kūlaaj eo jet iaan men ko rekar ekkatak kōn jar jān eoon ko kar liļo̧k n̄an er. N̄an waanjon̄ak, komaron̄ kajjitōk ippāer bwe ren kwaļo̧k naan ko im meļeļe ko me rej kōmeļeļeiki wāween an Inōs kar jar.

• Ilo kakkobaba n̄an ekkatak kōn wāween an Inōs kar jar, jemaron̄ barāinwōt ekkatak eļap jān ta eo Inōs ekar jar kake. Bōlen ro uwaan kūlaaj eo remaron̄ kakilene wōn eo ak ta eo Inōs ekar jar kake ilo Inōs 1:4–17. Ekkar n̄an eoon kein, etke Inōs ekar kōņaan jar kōn ro jet? Ta m̧ool ko jet kōn jar jej ekkatak jān Inōs?

Jarom–Omnai

Eļan̄n̄e jej kōjparok kien ko, jenaaj jeraam̧m̧an.

• Jarom im rijeje ro an Omnai rekar jeje kōn laļ eo an Nipai, ak ennaan ko aer rej barāinwōt jerbal n̄an kajjojo armej. Jej ekkatak jān bok ko an Jarom im Omnai kōn wāween an wāppen tōlļo̧k n̄an jeraam̧m̧an? (n̄an waanjon̄ak, lale Jarom 1:7–12 im Omnai 1:5–7, 12–18). Emaron̄ jipan̄ ro uwaan kūlaaj eo n̄an kōmeļeļeiki jeraam̧m̧an kōjerbale juon tikjinede im jeje ko rekwojarjar (n̄an waanjon̄ak, lale Alma 37:13; 48:15). Ewi wāween an meļeļe ko an laļ in keidi n̄an meļeļe ko an Irooj? Ewi wāween an Irooj jipan̄ armej ro An jeraam̧m̧an?

• Baj āinwōt an rikanaan ro an RiNipai ro tiljek jerbal n̄an katakin kien ko n̄an armej ro, rikanaan ro ad ilo raan ko āliktata rej barāinwōt katakin kōj kōn kien ko. Ālkin riiti Jarom 1:9–12, ro uwaan kūlaaj eo remaron̄ in ekōnono kōn katak ko rekāāl an ritōl ro an Kabun̄ in me rej im̧we er n̄an kōjparok kien ko. Emaron̄ lukkuun in jipan̄ ro uwaan kūlaaj eo n̄an etali ennaan ko rekāāl an kweilo̧k eo eļap ilo māākjiin ko an Kabun̄ in ak ilo Gospel Library app. Ak remaron̄ in etale jon̄ak ko kar kōnono kaki ilo For the Strength of Youth. Eļan̄n̄e emenin aikuj, komaron̄ kōnono kōn laajrak in ennaan ko ilo “Kein Jipan̄ ko jet.” Ewi wāween an pokake kien ko jipan̄ kōj “jeraam̧m̧an” ilo mour ko ad?

Omnai

Irooj ekar bōktok elōn̄ armej ro n̄an ānen kallim̧ur eo.

• Bok in Mormon eo ej kitbuuj juon bwebwenato eļap, dāpij wōt kūrub in armej ro roktak ej kōmeļeļeiki emaron̄ in pen. Juon wāween n̄an ekkatak kōn kajjojo iaan armej rein ilo Bok in Mormon eo emaron̄ in ejaake juon jaat ioon boot eo im kajjitōk ippān kūlaaj eo n̄an kanne kōn meļeļe ko kōn kajjojo kūrub in armej ro (āinwōt RiNipai ro, Rileman ro, im armej ro ilo Zarahemla). N̄an waanjon̄ak, jaat eo emaron̄ ļoore laajrak in ennaan kein: Etan Kūrub, N̄āāt im ewi wāween aer kar itaaktok, im Ta eo ekar waļo̧k n̄an er. Kōnono ippān doon etke elukkuun jipan̄ n̄an meļeļe men ko kwaar ekkatak kōn kajjojo kūrub. Kōmeļeļe kein ilo Unin Tōl eo n̄an Jeje Ko Rekwōjarjar (ChurchofJesusChrist.org) remaron̄ jipan̄: “Coriantumr,” “Jaredites,” “Lamanites,” “Mulek,” “Nephites,” im “Zarahemla.”

Naan ko an Mormon 1: 1–8

Anij enaaj jerbal kōn kōj eļan̄n̄e jej ļoor tōl eo An.

• Āinwōt m̧ōttan wōt juon ekōnono Naan ko an Mormon, komaron̄ kajjitōk ippān juon uwaan kūlaaj eo n̄an itok m̧aanjabpopo n̄an kwaļo̧k etke Mormon ekar bōk im̧we n̄an kobaik pileij jiddik ko (1 Nipai–Omnai) ilo Bok in Mormon eo. In uwaan kūlaaj eo emaron̄ m̧aanjabpopo ilo riiti Naan ko an Mormon im kein jipan̄ ko jet, āinwōt Katak im Bujen ko 10:8–19, 39–45; unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko; im jebta 5 in Armej ro Rekwojarjar, volume 1. Rōjan̄ ro uwaan kūlaaj eo n̄an kobaiktok meļeļe ko rem̧m̧an kōn jako eo an 116 peij ko an Bok in Mormon im etke piliej ko reddik rekar aikuj bōk jikin peij ko rejako. Ta m̧ool ko ro uwaan kūlaaj eo rej ekkatak jān menin kōn wāween an Irooj jerbal kōn armej? Ta eo ro uwaan kūlaaj eo rej loe ilo Naan ko an Mormon 1:1–8 ko rej im̧we er n̄an ļoor tōl jān Anij men̄e rejjab lukkuun meļeļe tarlep in unleplep eo?

  

  Mormon ej Kobaiki Pileij Kooļ ko jān Jorge Cocco

• Mormon ekar kōjeraam̧m̧an mour ko an milien armej ro kōnke ļoor im̧we ko an Jetōb eo kōn pileij ko reddik (lale Naan ko an Mormon 1:7). Ļōmņak kōn wāween ko remaron̄ jipan̄ ro uwaan kūlaaj eo am̧ meļeļe bwe er remaron̄ barāinwōt kōjeraam̧m̧an ro jet ilo aer pukot n̄an erom̧ kein jerbal ilo pein Anij im ļoor im̧we ko an Jetōb Kwojarjar eo. Ewi wāween an Anij jerbal kōn Mormon? Ta eo ro uwaan kūlaaj eo rekar loe eo Irooj ej kōm̧m̧ane kōn er ak ro jet āinwōt aer kar eo̧ron̄ Jetōb eo im pukot ankilaan Anij? Bwebwenato eo kōn Būreejtōn Thomas S. Monson ilo “Kein Jipan̄ ko jet” rej bōktok juon waanjon̄ak me emaron̄ jipan̄ ro uwaan kūlaaj eo ļōmņak kōn waanjon̄ak ko jān mour ko aer make.

Kōketak Ekkatak ilo M̧weo

Kōnke jim̧or kweilo̧k eo eļap im Ijtō rej itok wōt jejjo wōt wiik, rōjan̄ ro uwaan kūlaaj eo n̄an ron̄jake ennaan ko me ro uwaan Būreejtōnji eo Kein Kajuon im Doulul eo an Jon̄oulruo Rijilōk ro rej kwaļo̧k ippān ro jet aer rikam̧ool ro rejenolo̧k an Jisōs Kraist.

Kein Jipan̄ ko jet

Pija in alooj ko ilo Bok in Mormon eo kōn Inōs.

Pukot pija in alooj eo me ej bōk jikin bwebwenato jān bok in Inōs ilo pija in alooj ko ilo Bok in Mormon ilo ChurchofJesusChrist.org ak Gospel Library app.

Ennaan ko an kweilo̧k eo eļap kōn kōjparok kien ko.

• Thomas S. Monson, “Kōjparok Kien ko,” Ensign ak Kweilo̧k eo Eļap, Nob. 2015, 83–85

• Dieter F. Uchtdorf, “Mour Lem̧ōņōņō in Gospel in,” Ensign akr Kweilo̧k eo Eļap, Nob. 2014, 120–23

• Dallin H. Oaks, “Ejjeļok Bar Anij Ran Jet,” Ensign ak Kweilo̧k eo Eļap, Nob. 2013, 72–75

“Idik pein aolep ajri ro.”

Ke Būreejtōn Thomas S. Monson ekar jerbal āinwōt juon membōr in Doulul eo an Jon̄oulruo Rijilōk ro, ekar kōnono kōn aiintok ajri in Būraimere ro ilo juon bukwōn ilo Samoa. Ālkin wōt, ekar bōk im̧we n̄an an make iakiakwe kajjojo iaan 247 ajri ro rekar pād. Ijoke, ekar kile enej ejjeļo̧k an iien, ekar kajjieon̄ likūt ļōmņak in iakiakwe ajri ro jān ļōmņak eo an ak ekar jab maron̄.

Āliktata ekar oktak n̄an rūkaki ro an ajri ro im ba, “Inaaj lukkuun kōņaan idik pein kajjojo ļaddik im leddik rein. Enaaj ke tōprak?”

Rūkaki ro rekar ettōn̄dikdik im kōnono ļo̧k n̄an ajri in Samoa ro. Rekar kōjeboluul bōrāer ilo uwaak. Innām rūkaki eo ekar jiron̄ļo̧k Elder Monson bwe ke ekar jeļā bwe juon iaan Jon̄oulruo Rijilōk ro ekar loļo̧k Samoa, ekar kallim̧ur ajri ro bwe eļan̄n̄e renaaj m̧ool ilo jar im tōmak, Elder Monson enaaj loļo̧k jikin eo aer im enaaj bōk im̧we jān Jetōb Kwojarjar eo n̄an idik pein kajjojo ajri (lale Thomas S. Monson, “Friend to Friend: Talofa Lava,” Friend, May 1972, 12–13).