Mour Lem̧ōņōņō ilo Gospel in
Jān Būreejtōn Dieter F. Uchtdorf
Rikapilōklōk eo Kein Karuo ilo Būreejtōnji eo Kein Kajuon
Tōmak ilo kajoor in lo̧mo̧o̧r eo an Jisōs Kraist; kōjparok kien ko An. Ilo bar juon wāween ba—mour elem̧ōņōņō ilo gospel.
Sister ro jeiū im jatū rejitōn bōro, ro jera im rikaļoor ro rejeram̧m̧an an Jisōs Kraist, Iuteej kōn iien in em̧m̧an ñan aō pād ippāmi ilo ad kōppeļļo̧k bar juon kweilo̧k eļap an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ilo wiik in ej itok Būreejtōnji eo Kein Kajuon im Jon̄oulruo Rijilōk ro renaaj kweilo̧k ippān aolep Ritōl ro Routiej im ritōl ro an radik ko im naaj m̧wein̄an ko jet kōn kweilo̧k in eļap ad ipeļaakin laļ in naaj waļo̧k ilo Jādede im Jabōt. Eļap aō m̧ōņōņō kōn Rikanaan eo ad, Būreejtōn Thomas S. Monson, kar kajjitōk ippa bwe in itok ilo etan Būreejtōnji eo Kein Kajuon ilo aō kōnono n̄an sister ro an Kabun̄ in.
Ilo aō kolmenlokjen kōn ta imaroñ kōnono kake, kōļmenļo̧kjeņ e aō ewaanlikļo̧k ñan kōrā ro raar lame mour eo aō im jibañ eō bwe in ellāļo̧k jen mālijon̄ ko ilo mour in. Ij kam̧m̧oolol jibū eo elōñ iiō ko remo̧o̧tļo̧k eaar ļōmņak bwe en bōk baam̧le eo an ļo̧k ñan juon iien jar in kwojkwoj an Mormon. Ij kam̧m̧oolol Sister Ewig, juon kōrā in Germany eo ejaad rūtto, eo eļan̄n̄e jenaaj ukōte etan ñan kajin pālle enaaj “Sister Eternal.” Liin eo eaar letok kūr in ekōpperan im em̧m̧an ñan lellap eo jibū. Elap lok ao kamolool jinō, eo eaar kōkkajiriki emān ajri ro ibūlōn kauwōtata ko an Pata eo an Lal in Kein Karuo. Ij kam̧m̧oolol barāinwōt leddik eo nejū, leddik eo jibū im epepen ko rej itok wōt an kōrā ro rettōmak im juon raan renaaj bar āinwōt.
Im, aaet, ij m̧ōņōņō ñan indeeo kake kōrā eo ippa, Harriet, eo eaar kamōnōnōik eō āinwōt juon remman ded, eaar inek apañ ko reddo tata am ilo baam̧le āinwōt juon jinen, ej jutak itūrū āinwōt juon pāleō, im ej kamōnōnō im iakwe ajri ro nejimro, ro jibūmro, im ro nejin jibūmro. E ej kajoor eo am ilo mweo jim̧or ilo iien em̧m̧an im nana. Ej bōtok meram ñan mour ko an ro rejjelā kajjen.
Āliktata, ij lukkuun m̧ōņōņō kake kom̧ aolep, millien kōrā ro jeiū im jatū ewōr aer tōmak ipeļaakin lal in ro rej kōm̧m̧ane ijo eļap n̄an kalōk aelōn̄ in kiiñ eo an Anij. Ij kam̧m̧oolol kom̧ kōn an tar jen an lōñ wāween ko komij kōm̧m̧ani ñan kōketak, kaddōkļo̧k im kōjeram̧m̧an ro ipeļaakūm̧i.
Leddik ro Nejin Anij
Ij m̧ōņōņō in pād ilubwilijin elōñ leddik ro nejin Anij. Ke jej al kake al eo ej ba “N̄a Nejin Anij,” ainikien eo ekobrak būwuwō. Kōļmenļo̧kjeņ kōn m̧ool in—bwe jej ajri ro nejin ro Jined im Jemedwōj Ilañ1—ekobrak kōj kōn eñjake eo kōn wōn kōj, jibadbad, im mejān kajjik eo ad.
Ej juon men em̧m̧an ilo ad kememej aolep iien ke jej leddik ro nejin Anij. Jelā in enaaj bōkļo̧k eok ilo iien ko reppen tata ilo mour eo am im enaaj kōkajoor eok ñan kōttōpar men ko rekabwilōñlōñ. Bōtaab, ebarāinwōt aorōk ñan kememej bwe juon leddik eo nejin jined im jemed ro rej ñan indeeo ejab juon men kwoj bōk āinwōt kōļļā eo am ak juon eo kwonaaj luuji. Kwonaaj wōt im ñan indeeo nejin Anij. Jemedwōj Ilan̄ elōñ an karōk ñan eok, ijoke, ijo ekwojarjar kwar itok jene make ejjab letok wōt juon kōjatdikdik eo bwe kwoj juon rijolet ekwojarjar. Anij eaar jilkintok eok ñan ijin ñan m̧aanjabpopo n̄an ilju eo em̧m̧anļo̧k jān men otemjej kwoj maron̄ ļōmņake.
Kōjeram̧m̧an ko an Anij kar kalim̧m̧ur kaki n̄an eo ej tiljek raiboojoj im reim̧we. Ilubwilijier rej tron ko, aelōn̄ in kiin̄ ko, irooj ko, im kajoor ko, im rutiej ro, aolep uteej ko and m̧wilaļ ko.2 Im ej bōk eļapļo̧k jān peba in ļo̧tak ilo jetōb ak juon “Peba in Uwaan ro Nejin Anij” n̄an ekkar n̄an kōjeram̧m̧an ko jeban maron̄ meļeļe kaki.
Ewi wāween ad tōpari?
Rilo̧mo̧o̧r eo eaar uwaake kajjitōk in ilo tōre in ad:
Eaar ba bwe n̄e jejjab mour kōn kien eo An jej jab maron̄ tōpar aiboojoj in.
Bwe iaļ eo ejim̧we, im eaidik iaļ eo ej tōlļo̧k n̄an mour ippān Anij. …
… Kōn menin kwōj aikuj bōk kien eo An3
Kōn un in, jej kōnono kōn etetal iaļ eo an rikaļooran.
Jej kōnono kōn pokake kien ko an Anij.
Jej kōnono kōn mour lemōņōņō ilo gospel in, kōn aolepān būruwōd, maron̄, ļōmņak, im jetōb.
Anij Ejeļā Juon Men Jejjab Jeļā
Im aaet n̄an jet iaad, pokake kien ko an Anij ejjab lukkuun kam̧ōņōņō aolep iien. Jen jelm̧ae: bōlen elōn̄ jet remaron̄ eppenļo̧k ak edik aer kaitoktoklimo—kien ko jen wōnm̧ai kōn itoklimo eo an juon ajri ej jijet kōn juon pileej eōne ak edike leen wōjke. Jej kūj dōkein n̄iid im kipel kōj make n̄an kōm̧m̧an āinwōt bwe jen maron̄ wōnm̧aanļo̧k wōt n̄an elōn̄ m̧akūtkūt ko rōkaitoktoklimo.
Bōlen ilo tōre rot in jemaron̄ lo ad make kajjitōk, “Jej ke aikuj lukkuun pokakeaolep kien ko Anij?”
Uwaak eo aō ñan kajjitōk in epidodo:
Ij ļōmņak Anij ejeļā juon men jejaje—men ko reļļāļo̧k ilōn̄ in maron̄ kein ad n̄an ad meļeļe! Jemed ilo Lan̄ eo ej indeeo im etijem̧ļo̧k, māletlet, im jeļāļo̧kjeņ eo an eļapļo̧k jān kein ad. 4 Ejjab menin wōt, ak E ej barāinwōt iakwe n̄an indeeo, tūriam̧o, im ļōmņak wōt kōn jeram̧m̧an an juon: n̄an bōktok mour jab wabanban im mour indeeo.5
Ilo bar juon wāween ba, E ejab jeļā wōt ta eo em̧m̧an n̄an kom̧; Ekōņaan bwe kom̧in kālet ta eo em̧m̧an tata n̄an kom̧.
Eļaañe kwōj tōmak menin ilo buruwōm—eļan̄n̄e kwōj lukkuun tōmak unleplep in kōtōpar eo an Jemedwōj Ilañ kautej im kokwōjarjar ajri ro Nejin im bwe Ejjela tata wāween kōm̧m̧ane—ta ejjab jim̧we bwe jen kaorōk im ļoor kien ko An, mekarta ralikkar aer eppen tok? Ta jejjab aikuj m̧ōņōņō kōn meram in eaar letok. Eaar letok ñan kōj tōl in jān marok im mālijjon̄ ko ilo mour in? Rej kalikar iaļen ad jepļaak ñan kapejuknen eo ad ilañ! Ilo ad kālet ial eo an Jemedwōj Ilañ, komij erloke juon pedped ekwojarjar ñan ami make eddōkļo̧k āinwōt juon leddik nejin Anij eo enaaj kōjeramman kom̧ ilo aolepān ami mour.
Mōttan kabañbañ eo ad ej, ij ļōmņak, bwe jej pijaik ilo kōļmenļo̧kjeņ bwe aolep kōjeram̧m̧an ko repād ippān Anij im emōj an laki ilo juon kōdo eļap imejatoto, im emakoko in litok m̧ae iien jej ļoor jet jekjek ko raambak im rekaadimakoko emōj an karōki. Ak kien ko rejjab āindein ļo̧k wōt ñan jidik. Ilo m̧ool, Jemedwōj Ilañ ej aolep iien kowōtlo̧k wōt iood. Jej mijak, pere, im jerawiwi innām, āinwōt juon am̧būrila, ej bōbrae kōjeram̧m̧an ko jen aer tōpar tok kōj.
Kien ko An rej kōmeļeļe in iakwe im jipan̄ eo ekwojarjar n̄an kōj n̄an kiil am̧būrila eo bwe jen maron̄ bōk utar in kōjeram̧m̧an ko ilan̄.
Jej aikuj bōk kien ko an Anij ejjab baj juon laajrak eaitok ikijen ļōmņak ko rem̧m̧an. Rejjab “etao ko jen kampiutōr ko ak jet naan in jiroñ jen Pinterest board. Rej jet kōkapilōklōk ko rekwojarjar, pedped ioon m̧ool ko ñan indeeo, litoki bwe en wōr aenōm̧m̧an ioon lal in, im mour indeeo ilo mour eo tokālik.”6
Innām ewōr ad kālet. Itu rejet eo juon, ewōr juon kōļmenļo̧kjeņ kake an lalin oktakļo̧k bwebwenato ko kake im kōnaan ko reped ilo iialan kajitōk. Itu rejet eo juon, ej ped naan ko an Anj ñan ajri ro Nejin—An māletlet ej n̄an indeeo, kalim̧m̧ur ko An rem̧ool, im kōmeļeļe in iakwe eo An ñan jepļaakļo̧k ñan imaan Mejān ilo aibojooj, iakwe, im kajoor.
Kālet eo ej am!
Rikōm̧anm̧an eo an lojet, bok ko, im iju ko rellōñ ej lewaj pein ñan tōpar eok rainin! Ej lewaj iiōk in mōñā eo enno tata ñan m̧ōņōņō, aenōm̧m̧an im mour indeeo!
N̄an ad maroñ tōpar kōjeram̧m̧an kein raibojooj, kwōj aikuj kōttaik eok make, kōjerbal am tōmak, bōk ioom etan Kraist, pukōte ilo naan im ilo jerbal, im kijñeñe “jutak āinwōt ri kam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko.”7
Ta eo Etke jej Pokake
Iien eo wōt kwoj lukkuun meļeļe kōn wōn Anij im kien ko An, kwonaaj barāinwōt meļeļeļo̧k kake eok make im unleplep in pād eo am ekwojarjar ijin. Ippān menin, am kate eok in ļoor kien ko enaaj oktak, im enaaj kōņaan eo eļap an būruwōm̧ n̄an mour lemōņōņō ilo gospel in.
N̄an waanjoñak, ro rej lo bwe aer etal ñan jar ko an Kabuñ ej juon wāween an juon make kōlapļo̧k iakwe eo aer ñan Anij, rej lo aenōm̧m̧an, lōñaj ro jet, pukōt tōl an jetōb, im bar kōkāāl kalim̧m̧ur eo ñan ļoor Jisōs Kraist renaaj lapļo̧k aer tōpar jet eñjake ko jen ro rej bōk aer iien im jijjet bajjōk ilo jea. Sister ran, ejlukkuun aorōkbwe jen pād ilo iien jar ko ad ilo Jabōt, ak ijeļā bwe Jemedwōj Ilañ aaet elapļo̧k an inepata kake tōmak ko ad im ad ukweļo̧k jen oran ad etal n̄an jar.
Eñin bar juon waanjoñak:
Juon jinen ruo ajri jiddik ro ej kab mōj an bōk bok aidik. Aaet, eaar jab etto ajri ro nejin raar barāinwōt bok. Jerbal eo ñan lale e make kab ajri ro ruo nejin reddik etar jen joñan ñan juon jinen eo ejiroñ. Innām, men eo ewaļo̧k, m̧weo ekōn libijinjin etton im pok. Etton im ejojik kōnno ko ilowaan jikin kwalkol kōnno eo, im nuknuk etoonon reojik im ejeblōklōk.
Ilo an eñtaan ippān an ajri ro jañ—im enañin bar jañ wōt jidik—juon ej kōlļalaļ ilo kōjam eo an. Ej kōra ro rej loļo̧k mōko. Epidodo aer lo an jiroñ eo ewōr nejin aaer an ļōmņak. Rej maroñ lo mweo imōn, jikin kōmat eo an. Rej roñ an ajri ro jañ.
Kiiō, eļan̄n̄e sister rein raar kea wōt bwe ren kadedeļo̧k ijjitōn̄ ko aer kajjojo allōn̄, remaroñ kar bajjōk lelok juon pileej in kukiij, im ba bwe raar jab loe ilo Doulul eo an Kōrā wiik eo lok, im ba juon men āinļo̧k wōt in, “Jemaroñ ke jeļā eļan̄n̄e ewōr jabdewōt jemaroñ jipañ kake!” Innām rej m̧ōņōņō im ro̧o̧l, kam̧m̧oolol bwe rekar 100 bōjāān ilo bar juon allōn̄.
Men eo em̧m̧an, sister rein ro rej m̧oolin rikaļooraņ Kraist. Raar lo an aikuj ko an sister eo im kwaļo̧k im kōjerbal mōkade im iminene ko aer. Raar karōk men ko rōbok lamjako, raar bōktok meram im kalikar ke em̧ men eo, im kūr ro mōttaer ñan bōktok jet m̧ōñā bwe eļap an menin aikuj. Āliktata ke ej dedeļo̧k aer jerbal im rej iakiakwe n̄an jepļaak jāne, raar kōm̧m̧an menin an toor dānin mejān—dānin kōmjaļaaļ kōn kam̧m̧oolol im iakwe.
Jen iien eo m̧aanļo̧k, ļōmņak eo an jinen eo ejiroñ kake rūkaki in loļo̧k m̧ōko eaar oktak. “Ijeļā,” eaar ba, “bwe ijjab aikuj kōtļo̧k bwe bar juon en tōn jerbal tok ñan eō.”
Aaet, rūkaki in lo̧ļo̧k ro an kōrā reaikuj tiljek n̄an kōm̧m̧ani lo̧ļo̧k ko aer kajjojo allōn̄, ilo ejjeļo̧k likjab kōn aorōk eo etke kien in: n̄an iakwe Anij im aolep armej.
Eļan̄n̄e jenaaj watōk kien ko an Anij im ijoko koņaad ñan kalōk aelōñ in kiiñ eo An bwe rej āinwōt juon laajrak in jerbal n̄an etali, jej kajej tokjen unleplep eo an ro rikaļooran. Jelikjab jen eddōkļo̧k eo ej itok ilo ad mour in lañlōñ ilo kien ko an Jemed ilo Lan̄.
Etetal āinwōt ro rikaļooraņ ejjab aikuj bwe en juon menin ļōkatib. “Etōñal ilōn̄in men otemjeļo̧k eo etōn̄al.” 8Ej jab juon men ej kaddoik kōj. Jerbal in rikaļoor ej lōñaj jetōb ko ad im kemōramļo̧k buruwōd. Ej kemourur kōj ilo tōmak, kōjatdikdik im iakwe. Ej kobrak jetōb ko ad kōn meram ilo iien ilo iien marok im aenōmman ilo iien buromōj.
Ej letok ad kajoor ilo kwojarjar im lañlōñ eo ejjeļo̧k jem̧ļo̧kin.
Mour Lem̧ōņōņō ilo Gospel in
Sister raņ jeiū im jatū ilo gospel in, mekerta kwe 8 ak 108, ewōr juon men ij kōjatdikdik eļap am meļeļe im jeļā:
Kwaorōk.
Kwaorōk ippān jinedwōj im jemedwōj ilan̄.
Eļap im Rikōm̧anm̧an an meram im mour indeeo ejeļā wōn kwe! Ej kea kake eok.
Aaet, Anij ej iakwe eok rainin im iien otemjej.
E ejjab kōttar in iakwe eok wōt eļan̄n̄e ededeļo̧k am eļļā ioon mālijjon̄ im manit ko renana. Ej iakwe eok rainin ilo an meļeļe men otemjej am apan̄. Ejeļā ke kwōj kūr ñane kōn buruwōm im kōjatdikdik ilo jar. Ejeļā kake iien ko kwar tōpar meram eo edik im tōmak eo am―mekerta emarok jilōñlōñ. Ejeļā eñtaan ko am. Ejeļā kōn am eddodo kake iien ko kwar wōtļo̧k im likjab. Im Ej Iakwe wōt eok.
Im Anij ejeļā kōn jeram̧m̧an ko am, meñe remaroñ iddik ilo am loi, ej kili im m̧ōņōņō kōn kajjojo iaer. Ej iakwe eok ilo am leļo̧k eok make. Ej iakwe eok ilo am kajjieon̄ tōpar ro jet im jipañ ineek eddo ko aer—men̄e kwoj apan̄ kōn apan̄ ko am make.
Ejeļā men otemjej kake eok. Ej lo eok—Ejeļā lukkuun kwe. Im Ej iakwe eok—rainin im indeeo!
Kwōj ke kile ke ewōr tokjen ippān Jemedwōj Ilañ bwe kwōn kaibojooj eok, nuknuk ko am, bōram, im akkim bwe ren poļemāer? Kwōj ke ļōmņak bwe aorōkim ippān enaaj ukōt jete mōttam ilo Instagram ak Pinterest? Kwoj ļōmņak ke bwe Ekōņaan bwe kwon inepata ak illu n̄e juon ejjab m̧ōttā ak ejjab ļoor eok ilo Facebook ak Twitter? Kwōj ke ļōmņak bwe paoktokūm̧ ak kattōñtōñ ne am, dettan nuknuk eo am̧ enaaj kōm̧m̧an jidik oktak ilo aorōkim ippān eo eaar kōm̧anm̧an mejatoto ko?
Ejjab iakwe wōt eok kōn wōn kwe rainin, ak barāinwōt kōn aibojooj ilo armej im meram eo am enaaj waļo̧tok im ikdelel ñan oktak.
Elapļo̧k jen am maron̄ ļōmņak kake, Ekōnaan bwe kwon tōpar kōttōbar eo am—ñan bar jepļaak ñan kapijuknen eo am̧ ilan̄ ilo uteej.
Ij kam̧ool bwe wāween eo ñan kōttōbar men in ej ilo am likit kōņaan ko am rellap im kōm̧m̧an ko ejjeļo̧k aorōkier ioon lokatok in kaarmejete im jerbal eo. Kōrā ro jeiū im jatū, tōmak ilo kajoor in lo̧mo̧o̧r eo an Jisōs Kraist; kōjparok kien ko An. Ilo bar juon wāween ba—mour lem̧ōņōņō ilo gospel in.
Ej aō jar bwe kom naaj eñjake kōkkāāl im lapļo̧k joñan iakwe eo eaibojooj an Anij ilo mour ko ami; bwe kom naaj lo tōmak, kijejeto, im kalim̧m̧ur ñan katak kien ko an Anij, kaorōki ilo buruwōmi, mour lem̧ōņōņō ilo gospel in.
Ij kalim̧m̧ur bwe ilo kōm̧m̧ane menin, kwonaaj lo em̧m̧antata eo ilo kwe—lukkuunkwe. Kwonaaj lo ta lukkuun meļeļein erom leddik eo nejin Anij indeeo, Irooj in kwojarjar otemjej. Ij kam̧ool kōn menin im likut aō kōjeram̧m̧an āinwōt juon an Irooj Rijilōk, ilo etan Jisōs Kraist, amen.