2010–2019
Rejtake Rikanan ro
Oktoba 2014
15:20

Rejtake Rikanan ro

Jān Elder Russell M. Nelson

Jān Doulul eo an Jon̄oulruo Rijilōk ro

Ad rejtake rikanaan ro ej juon kalim̧m̧ur an juon make bwe jenaaj kōm̧m̧ane ijo kuņaad em̧m̧an tata n̄an dāpij aorōk tata in kanaan eo aer.

Būreejtōn Eyring, kōmij kam̧oolol eok kōn kōmeļeļe im ennaan eo ekabbōkakkak am̧. Ro jeiū im jatū rejitōnbōro, kōmij kam̧oolol kom̧ kōn tōmak im kijejeto eo ami. Inne, kar kūr kōj kajjojo n̄an rejtake Thomas  S. Monson āinwōt rikanaan eo an Irooj im Būreejtōn eo an Kabun̄ eo an Irooj. Im emakijkij ad al, “Kimij Kamolol Yuk, O Anij, Kin Juōn Dri Kanan.”1 Kom im n̄a jej ke lukkuun meļeļe ta meļeļe naan kein? Ļōmņak kōn iien eo em̧m̧an Irooj eaar letok n̄an kōj kōn rejtake rikanan eo An, eo kapilōk ko an renaaj erreo, reban kabodān, reban jarjartok jān jabdewōt jibadbad an juon make, im relukkuun m̧ool!

Ekōjkan ad lukkuun rejtake juon rikanaan? M̧okta jān an kar erom Būreejtōn an Kabun̄ in, Būreejtōn Joseph  F. Smith eaar kōmeļeļeiki: “Ej juon eddo eaorōk epād ioon ro Rekwōjarjar me … rej rejtake riutiej ro an Kabun̄ in, n̄an kōm̧m̧ane men in jaab wōt kōn kotak pā, ej kōkaļļe wōt ilo lale, ak ilo jerbal im ilo m̧ool.”2

Eokwe Ij lukkuun kememej “ļamļam” eo aō n̄an rejtake juon rikanaan. Āinwōt juon taktō im juon rim̧wijm̧wij menono, eaar wōr aō eddo in kōm̧m̧ane m̧wijm̧wij in kōpeļļo̧k menono eo an Būreejtōn Spencer  W. Kimball ilo 1972, ke eaar juon Diktakin Būreejtōn an Doulul eo an Jon̄oulruo Rijilōk ro. Eaar aikuji juon iien m̧wijm̧wij eo ekapokpok. Bōtaab eaar ejjeļo̧k aō iminene in kōm̧m̧ane kain m̧wijm̧wij rōt eo n̄an juon rinan̄inmej 77-iiō-dettan eo enana an menono eo an jerbal. Iaar jab rie kōm̧adm̧ōd eo im kar kōnnanōkļo̧k Būreejtōn Kimball im Būreejtōnji eo Kein Kajuon. Bōtaab, ilo tōmak, Būreejtōn Kimball eaar kālet n̄an kōm̧m̧ane kōm̧adm̧ōd eo, kōn wōt kar rōjan̄e jān Būreejtōnji eo Kein Kajuon. Ej kwaļo̧k ekōjkan an rejtake ritōl ro an! Im kālet in eaar kōm̧m̧an bwe in wididdid!

Kam̧oolol n̄an Irooj, kōm̧adm̧ōd eo eaar jejjet. Ke menono eo an Būreejtōn Kimball eaaar bar emenono, eaar kōm̧m̧ane kōn eļap kajoor! Ilo tōre eo wōt, eaar wōr juon aō kam̧ool ealikkar jān Jetōb bwe lein enaaj kar juon raan erom Būreejtōn an Kabun̄ in!3

Kom̧ jeļā ta eo eaar waļo̧k ālkin. 20 wōt allōn̄ tokālik, Būreejtōn Kimball eaar erom Būreejtōn an Kabun̄ in. Im eaar letok tōl ekajoor im em̧m̧an ium̧win elōn̄ iiō ko.

Jān tōre eo jaar rejtake Būreejtōn ro Ezra Taft Benson, Howard W. Hunter, Gordon  B. Hinckley, im kiiō Thomas  S. Monson āinwōt Būreejtōn ro an Kabun̄ in—rikanaan ro ilo aolep aer naan!

Ro jeiū im jatū rejitōnbōro, eļan̄n̄e Jepļaaktok eo kar kōm̧m̧an jabdewōt, eaar rubrube tōmak eo me eaar pād ium̧win juon iien eaetok bwe Anij ebōjrak an kōnono n̄an ajri ro Nejin. M̧elele in eļap an ettoļo̦k jān m̧ool eo. Juon rikanaan ekar jutak ijjōbōran Kabun̄ eo an Anij ilo aolep tōre in bōk eddo ko, jān Adam n̄an rainin.4 Rikanaan ro rej kam̧ool kōn Jisōs Kraist—kōn kanin lan̄ eo An im kōn mijen eo im jerbal eo An ilo laļ in.5 Jej kautiej Rikanaan Joseph Smith āinwōt rikanaan an tōre in bōk eddo in āliktata. Im jej kautiej kajjojo em̧m̧aan ro me raar bōk jikin āinwōt Būreejtōn an Kabun̄ in.

N̄e jej rejtake rikanaan ro im ritōl ro jet,6 jej kōjerkaktok kien eo aolep rej errā ie (law of common consent) eo, bwe Irooj eaar ba: Ejjamin naaj leļo̧k n̄an jabdewōt n̄an ilo̧k n̄an kwaļo̧k ko̧jpeļ eo An ak n̄an kalōk Kabun̄ eo An ijello̧kin em̧m̧aan eo ej ekkapit jān juon eo me ewōr an mālim im jeļā kake ilo Kabun̄ eo me ewōr an mālim im ededeļo̧k an kar ekkapit jān jeban ro an Kabun̄ in.”7

Menin ej letok n̄an kōj, āinwōt ro uwaan Kabun̄ eo an Irooj, lōke im tōmak eo ilo ad kajjieon̄ kōjparok kakien eo ilo jeje ko rekwōjarjar n̄an ron̄jake ainikien Irooj8 āinwōt an itok kōn ainikien ro Rikarejeran, rikanaan ro.9 Aolep ritōl ro ilo Kabun̄ eo an Irooj rej kūr jān mālim eo ejim̧we. Ejjeļo̧k rikanaan ak jabdewōt bar ritōl ilo Kabun̄ in, kōn jekjek in, em̧m̧aan ak kōrā e kar kūr e make. Ejjeļo̧k rikanaan enan̄in kar ettōr ilo ekkālel. Irooj eaar kalikkar bwe ke Eaar ba, “Kom̧ ar jab kāālōt Eō, a N̄a Iar kāālōt kom̧, im likūt kom̧.”10 Kwe im n̄a jejjab “vote” kōn ritōl ro an Kabun̄, ilo jabdewōt lābōļ. Ijoke, kōj, ewōr ad utiej n̄an rejtake er.

Iaļ ko an Irooj reoktak jān iaļ ko an armej. Iaļ ko an armej rej kōm̧akūt armej ro jān opiij ak pejnej n̄e rej rūttoļo̧k ak kōnke rōmōjno̧ ilo ānbwin. Bōtaab iaļ ko an armej rejjab im rejjamin iaļ ko an Irooj. Ad rejtake rikanaan ro ej juon kallim̧ur an juon make bwe jenaaj kōm̧m̧ane ijo em̧m̧an tata n̄an dāpij aorōk ko m̧oktata an rikanaan ro aer. Ad rejtake ej juon bujen kalikkar bwe jej kile kūr eo aer āinwōt juon rikanaan āinwōt juon jim̧we im kile epād iood.

Rōn̄oul-jiljino iiō ko m̧okta jān an kar erom Būreejtōn an Kabun̄ in, kar Elder George Albert Smith eaar ba: “Eddo eo me jej kōm̧m̧ane n̄e jej kajutak pā ko peid … ej juon eo ekanooj ekwōjarjar. Ejjab meļeļe in bwe jenaaj ikōn̄ ilo iaļ eo ad im m̧ōņōņō wōt bwe rikanaan eo an Irooj enaaj tōl jerbal in, bōtaab ej meļeļe in … bwe jenaaj jutak itulikin; jenaaj jar kōn e; jenaaj jojomare āt eo em̧m̧an etan, im jenaaj kajieon kōtōprak naan in tōl ko an āinwōt an Irooj naaj jiron̄e.”11

Irooj eo emour ej tōl Kabun̄ eo An emour! 12 Irooj ej kwaļo̧k An kilaan n̄an Kabun̄ eo Ej kwaļo̧k n̄an rikanaan eo An. Inne, ālkin kar karuweinene kōj n̄an rejtake Thomas S. Monson āinwōt Būreejtōn eo an Kabun̄ in, eaar barāinwōt wōr ad mennin utiej n̄an rejake e, rikōkapilōklōk ro an ilo Būreejtōnji eo Kein Kajuon, im ro uwaan Doulul eo an Jon̄oulruo Rijilōk ro āinwōt rikanaan ro, rilolo ro, im rikwaļo̧k revelesōn ro. Ļōmņake mōk men in! Jej rejtake 15 em̧m̧aan ro āinwōt rikanaan ro an Anij! Rej kabwijer aolep priesthood kii ko me kar likiti ioon em̧m̧aan ilo tōre in bōk eddo in.

Kūr eo an em̧m̧aan ro 15 n̄an doulul ekwōjarjar in rijilōk ej letok onaake eļap n̄an kōj āinwōt ro uwaan Kabun̄ in. Etke? Kōnke jemļo̧k ko an ri tōl rein eaikuj ilo juon wōt bōro.13 Kom̧ maron̄ ke ļōmņak ekōjkan an Jetōb eo aikuj in im̧we 15 em̧m̧aan ro n̄an errā ilo juon wōt lōmnak? Em̧m̧aan rein 15 ekkajo aer jekjek in jeļāļo̧kjeņ im ļōmān jerbal ko aer, eoktak aer ļōmņak kōn elōn̄ men ko. Tōmak eō! Em̧m̧aan rein 15—rikanaan ro, rilolo ro, im rikwaļo̧k revelesōn ro—rejeļā ta ankilaan Irooj n̄e rej tōpar juōn wōt lōmņak! Rej kallim̧ur n̄an lale bwe ankilaan Irooj em̧ool enaaj dedeļo̧k. Jar eo an Irooj ej letok jon̄ak eo n̄an kajjojo em̧m̧aan rein 15 n̄e rej jar: “Ren kōm̧anm̧an ankil Am̧ āinwōt i lan̄, barāinwōt ioon laļ.”14

Rijilōk eo me eto tata an pād ilo opiij an Rijilōk ej tōl.15 Jekjek eo kōn aitok tata an pād (seniority) enaaj ekkā an bōktok em̧m̧aan ro rerūttoļo̧k n̄an opiij eo an Būreejtōn an Kabun̄ in.16 Ej na wāween ejjeļo̧k m̧wijkōk ilo jerbal, rūtto in kolmenļo̧kjen,minene, im m̧aanjabpopo eļap, āinwōt kar tōl jān Irooj.

Kabun̄ in rainin eaar ekkar in Irooj Make. Eaar likūt ilo jikin juon jekjek in tōl ekabwilōn̄lōn̄ me ej na wāween āljinmen in joortoklik. Jekjek in ej leļo̧k n̄an tōl an rikanaan em̧ool men̄e nan̄inmej ej waļo̧k im ban emaron̄ itok kōn rūttoļo̧k.17 Ekanooj lōn̄ wāween kajjim̧we ko im kōjparok ko bwe en ejjeļo̧k juon em̧m̧aan en tōl Kabun̄ in ilo bōd. Ritōl ro rōrūtto rej iien otemjej katakin bwe juon raan rej pojak n̄an jijet ilo ko̧o̧njeļ ko reutiej tata. Rej katak ekōjkan ron̄jake ainikien Irooj kōn unoojdikdik ko an Jetōb.

Ke ikar jerbal āinwōt Rikakpilōklōk eo Kein Kajuon n̄an Būreejtōn Ezra Taft Benson, eo eaar epaakļo̧k jem̧ļo̧k in mour eo an, Būreejtōn Gordon B. Hinckley eaar kōmeļeļeiki:

“Pedped ko im jekjek ko me Irooj eaar likūt ilo jikier n̄an tōl kabun̄ eo An ekepooj jabdewōt … jekjek. E aorōk … bwe en ejjeļo̧k pere ak n̄ūrbōktok ko kōn tōl an Kabun̄ in im kōjerbal menin letok an rikanaan, ekoba jim̧we eo n̄an im̧we im revelesōn ilo tōl jerbal ko im būrookraam̧ ko an Kabun̄ in, n̄e Būreejtōn eo emaron̄ in nan̄inmej ak ban maron̄ lukkuun jerbal.

“Būreejtōnji eo Kein Kajuon im Ko̧o̧njeļ eo an Jon̄oulruo Rijilōk ro, kar kūr im kapit er n̄an kabwijer priesthood kii ko, ewōr mālim eo im eddo eo n̄an tōl Kabun̄ in, n̄an kōm̧m̧ani kain̄i ko an, n̄an kōmeļeļeik katak eo an, im n̄an kajutak im dāpij wōt iminene ko an.”

Būreejtōn Hinckley eaar wōnm̧aanļo̧k wōt:

“N̄e Būreejtōn eo ej nan̄inmej ak e ban maron̄ lukkuun jerbal ilo aolep eddo ko an opiij eo an, Rikakpilōklōk ro ruo an ippān doon rej ejake Doulul eo an Būreejtōnji eo Kein Kajuon. Rej kōm̧m̧ane jerbal eo raan-n̄an-raan an Būreejtōnji eo. …

“… Bōtaab jabdewōt kajjitōk ko reļļap kōn kakien (policy), rāpeltan jerbal ko (procedures), būrookraam̧ ko, ak katak rej lukkuun watōki ilo tiljek im eļap jar jān Būreejtōnji eo Kein Kajuon im Jon̄oulruo ro ippān doon.”18

Iiō eo ļo̧k, ke Būreejtōn Monson eaar tōpar 5 iiō in an jerbal āinwōt Būreejtōn an Kabun̄ in, eaar ļōmņak kōn 50 iiō ko in an jerbal in rijilōk im e kar kōm̧m̧ane ennaan in: “Āliktata ad bwijwōļāļo̧k ewōr ijo an iood wōj aolep. Mekarta, jej kobaik ainikied ippān Kiin̄ Benjamin, eo eaar ba, … ‘A n̄a ij āinwōt kom̧, ij dien wōt aolepn m̧ōjņo̧ ko otemjeļo̧k an ānbwin im ļōmņak; mekarta n̄a kar kālōte  …  im kar ekapit jān jema,  …  kar oņaake im kōjparok eō jān kajoor eo emake wōt An, n̄an jerbal n̄an kom̧ kōn aolepān aō maron̄, ļōmņak im kajoor eo Irooj eaar letok n̄an eō’ (Mosaia 2:11).”

Būreejtōn Monson eaar wōnm̧aanļo̧k wōt: “Jekdo̧o̧n jabdewōt idajon̄jon̄ an ājmour me emaron̄ itok n̄an kōj, jabdewōt m̧ōjņo̧ ilo ānbwin ak ļōmņak, jej jerbal n̄an ijo em̧m̧an tata an maron̄ eo ad. Ij kam̧ool n̄an kom̧ bwe Kabun̄ in ej pād ilo pā ko rem̧m̧an. Jekjek eo kajutake n̄an Ko̧o̧njeļ eo an Būreejtōnji eo Kein Kajuon im Doulul eo an Jon̄oulruo [Rijilōk ro] ej kam̧ool n̄an [kōj] bwe enaaj ieen otemjej pād ilo em̧m̧an im bwe, jekdo̧o̧n ta enaaj waļo̧k, ejjeļo̧k aikuj in inepata ak mijak. Ad Rilo̧mo̧o̧r, Jisōs Kraist, eo jej ļoore, eo jej kabun̄-jar n̄an e, im eo jej jerbal n̄an e, ej jeban.” 19

Būreejtōn Monson, kōmij kam̧oolol eok kōn m̧ool kein! Im kōmij kam̧oolol eok kōn jerbal in wujlepļo̧k, eo ej letok juon waanjon̄ak. Ikōņaan kōnono ilo etan ro uwaan Kabun̄ in ilo aolepān laļ in ilo ad juon wōt im m̧ool ilo kwaļo̧k am kam̧oolol n̄an kwe. Kōmij kautiej eok! Kōmij iakwe eok! Kōmij rejtake eok! ejjab wōt kōn kotak peiūm̧ ak kōn aolepān būruwōm im kijejeto ko rekwojarjar. Ilo ettā im kijejeto, “eļapļo̧k am̧ jar kōn eok, am rikanaan jitōnbōro”! 20 Ilo etan Jisōs Kraist, amen.

Kakeememej ko

  1. “Kimij Kamolol Yuk, O Anij, Kin Juōn Dri Kanan, Al In Ajri, nō. 26.

  2. Teachings of Presidents of the Church: Joseph F. Smith (1998), 211; kab bar kakobaba. Ennaanin eaar kōm̧m̧an ilo 1898 ke Būreejtōn Smith eaar Rikakpilōklōk eo kein Karuo ilo Būreejtōnji eo Kein Kajuon.

  3. N̄an eļapļo̧k meļeļe ko, lale Spencer J. Condie, Russell M. Nelson: Father, Surgeon, Apostle (2003), 153–56. (2003), 153–56.

  4. Lale Bible Dictionary, “Dispensations.”

  5. Juon oran rikanaan ro raar kanaan kōn itok eo an Irooj, ekoba Liai (lale 1 Nipai 1:19), Nephi (lale 1 Nipai 11:31–33; 19:7–8), Jekab (lale Jekab 4:4–6), Benjamin (lale Mosaia 3:5–11, 15), Abinadi (lale Mosaia 15:1–9), Alma (lal Alma 40:2), im Samuel the Lamanite (see Hilamōn 14:12). M̧okta jān an kar Rilo̧mo̧o̧r ļotak ilo Betleem, raar lo en̄taan in pinmuur eo An im tok ālik jerkakpeje eo An.

  6. Pedped ko an rejtake ritōl ro ej aorōk ilo aolepān Kabun̄ eo an Irooj. Juon armej ej rejtak m̧okta jān kōjeno̧lo̧k e n̄an juon kūr ak kapiti n̄an opiij eo ilo priesthood eo.

  7. Doctrine and Covenants 42:11. M̧anit eo kōn rejtake ritōl ro ad kar kōjerbale ilo Eprōļ 6, 1830, ke Kabun̄ in eaar ejaak, im M̧aaj 1836, ke ro uwaan Būreejtōnji eo Kein Kjuon im Doulul eo an Jon̄oulruo Rijilōk ro raar rejtak āinwōt rikanaan ro, rilolo ro, im ribōk revelesōn ro (lale History of the Church, 1:74–77; 2:417).

  8. Bok in Mormon ej kakkōl kōn kauwōtata eļan̄n̄e jej kowaan katak ko an rikanaan. Jān e jej riit bwe “m̧weo ekilep im ļap eaar uteej bōro eo an laļ; im eaar bun̄lo̧k, im bun̄ļo̧kin ļap otem ļap. Im enjeļ eo an Irooj eaar bar kōnono … ba: āindein naaj jepeepļo̧k eo an aolep laļ ko, bwij ko, lo ko, im armej ro, ro renaaj jum̧ae ri jilōk ro an jon̄oulruo an Lam eo.” (1 Nipai 11:36).

  9. Lale Daniel 9:10; Amos 3:7; Doctrine and Covenants 21:1, 4–5; 124:45–46.

  10. Jon 15:16. Laajrak in Tōmak ko ej kalikkare:: “Kimij tōmak bwe juōn armij ej aikuij kir jen Anij, kin kanan, im kin likit ba ko ion jen ro ewōr maron̄ ibeir, n̄on kwalok Gospel eo im kōmōni jerbal in kain̄ ko ie.”

  11. Teachings of Presidents of the Church: George Albert Smith (2011), 64; kar kakobaba. Kout in eaar itok jān juon kōnonon in kweilo̧k jān Elder George Albert Smith ilo 1919. Eaar erom Būreejtōn an Kabun̄ in ilo 1945.

  12. Lale Doctrine and Covenants 1:30, 38.

  13. Lale Doctrine and Covenants 107:27.

  14. 3 Nipai 13:10; bar lale Matu 6:10; Luk 11:2.

  15. N̄e juon Būreejtōn an Kabun̄ in ej mej, Būreejtōnji eo Kein Kajuon ej makunļo̧k im rikakpilōklōk ro rej bōk jikier ilo Doulul eo an Jon̄oulruo Rijilōk ro. Innām Doulul eo an Jon̄oulruo Rijilōk ej tōl aolepān Kabun̄ in m̧ae iien Būreejtōnji eo Kein Kajuon ej bar ejaak. Jej na etan tore in apostolic interregnum. Ilo bwebwenato, kōtaan jab in aetokan jān emān raan n̄an jilu im jimettan iiō.

  16. Aaet, jon̄ak jab in kōn bōk jikin bar juon e kar jab jerbal n̄an kūr eo an Joseph Smith, eo kar kūri moktaļo̦k bwe en rikanaan eo an Jepļaaktok eo im Būreejtōn eo kein kajuon an Kabun̄ in (lale 2 Nipai 3:6–22; bar lale Abraham 3:22–23).

  17. Jejeļā bwe Irooj Make emaron̄ kūrļo̦k kōj n̄an Ippān jabdewōt iien Ej kālet.

  18. Gordon B. Hinckley, “God Is at the Helm,” Ensign, Māe 1994, 54; bar lale Gordon B. Hinckley, “He Slumbers Not, nor Sleeps,” Ensign, Māe 1983, 6.

  19. “Message from President Thomas S. Monson,” Church News, Feb. 3, 2013, 9.

  20. “We Ever Pray for Thee,” Hymns, no. 23.