Joseph Smith
Jān Elder Neil L. Andersen
Jān Doulul eo an Jon̄oulruo Rijilōk ro
Ad Ripinmuur kar kāālet juon em̧m̧aan ekwojajar, juon em̧m̧aan ejim̧we, n̄an tōl Jepļaaktok eo an tarlep in gospel eo An. Eaar kāālet Joseph Smith.
Ilo visōn eo mokta an n̄an Rikanaan Josep Smith ke e kar 17 iiō dettan, juon enjeļ ekar kūr Josep kōn etan im jiron̄ e bwe e, Moronai, kar juon rikwojmeļan kar jilkintok jān im̧aan Anij im bwe Anij eaar wōr juon jerbal n̄an e n̄an kōm̧m̧ane. Ļōmņak kōn ta Josep kar ļōmņake ke enjeļ eo kar jiron̄ e bwe etan enaaj “kar n̄an em̧m̧an im nana ibwilijin aolep laļ ko, armej ro, lo ko.”1 Bōlen ļo̧kjeņan ilo mejān Josep kōnke Moronai kar bar āliji, bwe jim̧or em̧m̧an im nana naaj kar kōnono kōn e ibwilijin aolep armej.2
Men ko rem̧m̧an kōnono kōn Joseph Smith e kar rum̧wij aer itok; kōnono nana e kar m̧ōkaj an ijjino. Joseph eaar je bwe eaar kanooj kōjak bwe juon ļaddik jedao ren watōke juon amrej eo eaar bwe an aorōk n̄an kan̄ōl tok eļap matōrtōr.”3
Ilo an iakwe n̄an Joseph ekar ļapļo̧k, eaar barāinwōt ļapļo̧k akkōjdāt. Ke eaar 38 iiō dettan, juōn jar in 150 em̧m̧aan riuror ro rar kakilmej turin mejāer rar bōk mour eo an.4 Men̄e mour eo an Rikanaan eo e kar jidimkij an jem̧ļo̧k, kōnono kōn em̧m̧an im nana kōn Joseph ejkab itōn ijjino.
Jej aikuj ke bwilōn̄ kōn kōnono nana ņae e? Rijilōk Paul kar kūri elulu im bwebwe.5 Ad Rilo̧mo̧o̧r Jitōnbōro, Nejin Anij, kar kūri mattiia, juon ej idaak wain, im eobrak kōn devil.6
Irooj kar jiron̄ Joseph kōn mājen kajjik eo an:
“Jem̧ļo̧k ko an laļ renaaj kajjitōk kōn etam, ribwebwe renaaj kōņaan bwe en pād ilo kowaan, im hell enaaj illu ņae e;
“Ak ro erreo būruwier, ro remāletlet, im ro erreo m̦wilier, renaaj kappukōt … renaaj ban bōjrak aer kappukōt kōjeram̧m̧an ko jān ium̧win peiūm.”7
Etke Irooj ej kōtļo̧k bwe kōnono nana en lukwo̧rkwo̧re ļo̧k em̧m̧an? Juon un ej bwe jum̧ae ņae men ko an Anij ej kōm̧m̧an bwe rikappukōt m̧ool ro ren bukwelōlō n̄an uwaak ko.8
Joseph Smith ej Rikanaan eo an Jepļaaktok eo. Jerbal in jetōb eo an eaar ijjino kōn waļo̧kļo̧k eo an Jemen im Nejin, ālkin elōn̄ loļo̧k ko an ro jān lan̄. Eaar juon kein jerbal ilo pein Anij ilo bōk m̧aantak jeje ko rekwōjarjar, kwaļo̧ki pedped in katak ko raar jako, im kōjepļaaktok priesthood eo. Aorōk in jerbal eo an Joseph ej aikuji eļapļo̧k jān kōļmenļo̧kjeņ relamwaan; ej aikuji bwe kōj, āinwōt Joseph, jen “kajjitōk ippān Anij.”9 Kajjitōk ko ilo jetōb rej aikuji uwaak ko ilo jetōb jān Anij .
Elōn̄ ian ro rej jurjuriļo̧k jerbal eo an Jepļaaktok eo em̧ool rejjab tōmak bwe ri lan̄ rej kōnono n̄an armej rein ioon laļ. Rej ba epen, bwe piliej gold ko ren kar būktok jān juon enjeļ im ukōti jān kajoor eo an Anij. Jān jab tōmak in, raar m̧ōkaj kowaan naan in kam̧ool eo an Joseph, im jet ejerata em̧ool raar kōnanaik mour eo an Rikanaan eo im riab ņae m̧wilin.
Eļaptata ad būrom̧ōj n̄e juon eo e kar jeļā nae Joseph ej jānliktak jān kar lōke eo an innām ba ņae Rikanaan eo.10
“Ekkatak kōn Kabun̄ in … jān ro em̧ōj aer ilo̧k,” Elder Neal A. Maxwell ekar ba juon iien, “ej āinwōt em̧m̧ao ippān Judas n̄an meļeļe Jisōs. Ro raar ilo̧k iien otemjej rej ba n̄an kōj eļapļo̧k kōn er make jān kōn ta eo raar em̧m̧akūt jān e.”11
Jisōs eaar ba, “Kom̧win iakwe ro ri kōjdate kom̧, … im jar kōn ro rej matōrtōr kom̧.”12 Jen kwaļo̧k jouj n̄an ro me rej kōrraate Joseph Smith, jeļā ilo būruwōd make bwe eaar juon rikanaan an Anij im bōk kaenōm̧m̧an bwe aolep menin kar jān etto kanaan jān Moronai.
Ekōjkan ad uwaake juon eo ej lukkuun kajjitōk me ej n̄urbōktak kōn naan ko rejjab em̧m̧an eaar ron̄ ak riiti kōn Rikanaan Joseph Smith? Kōm ej aolep iien karwainene, aet ilo m̧ool, kajjitōk ko rem̧ool im tenwadik.
N̄an kajjitōk ko kōn mwilin Joseph, jemaron̄ kwaļok naan ko an taujin ro raar lukkuun jeļā kajien im ro kar leļo̧k mour ko aer n̄an jerbal eo eaar jipan̄ kajutake. Jon Taylor, eo kar buki emen kōttan jān jarin riuror eo me e kar m̧an Joseph, eo tokālik kar kwaļo̧k naan kein: “Ij kam̧ool im̧aan Anij, enjeļ ran, im armej, bwe [Joseph] eaar juon em̧m̧aan em̧m̧an, em̧ool, [im] wānōk— … [im] bwe an kar m̧akūtkūt ilo ittūņo im ilobwilej ejej emaron̄ kajitikini—im bwe eaar mour im mej āinwōt juon em̧m̧aan in Anij.”13
Jemaron̄ kakeememej rikappukōt eo em̧ool bwe meļeļe ko ilo Internet ejjeļo̧k juon “m̧ool” ie. Jet meļeļe, jekdo̧o̧n ewi jon̄an aer em̧m̧an, rejjab m̧ool.
Iiō ko ļo̧k iaar riiti juon article ilo Time magazine me kar riboot kōn juon leta kar loe, ļōmņak kar je jān Martin Harris, me eidaptōk ippān bwebwenato eo an Joseph Smith kōn wāween kar loi piliej ko an Bok in Mormon.14
Jet membōr raar ilo̧k jān Kabun̄ in kōnke document in.15
Ekabūrom̧ōjm̧ōj, raar m̧okaj aer ilo̧k. Allōn̄ ko tokālik ro retijem̧ļo̧k re kar lo (im ri riab kar kwaļo̧k bōro) bwe leta eo eaar jab m̧ool.16 Kom̧ maron̄ m̧eļeļe kajjitōk ta eo kwoj ron̄ ilo nuuj ko, bōtaab kwoj aikuj jab pere naan in kam̧ool an rikanaan ro an Anij.
Jemaron̄ kakeememej rikajjitōk eo bwe jet meļeļe kōn Joseph, men̄e re m̧ool, remaron̄ jakim̧aantak ilo aer āl jān ļamļam eo ilo raan ko an im jekjek eo an.
Elder Russell M. Nelson eaar kwaļo̧k menin. Eaar ba: “Iaar jerbal āinwōt juon consultant n̄an kien eo an United States ilo National Center for Disease Control ilo Atlanta, Georgia. Juon iien ke ikar kōttar taxi n̄an bōk n̄a n̄an airport eo ālkin kweilo̧k ko am raar jem̧ļo̧k, iaar kankan eļļo̧k ioon ujooj eo n̄an kakkije ilo okmeņeņe in an det m̧okta jān bar ro̧o̧l n̄an mejatoto in m̧ōļo eo an Utah. … tokālik iaar bōk juon pija ilo mail kar pijaiki jān juon ripija ewōr an pija telephoto lens, pija in ke iaar kakkūje ioon ujooj eo. Ium̧win eaar juon naan, ‘Governmental consultant ilo National Center eo.’ Pija eo eaar m̧ool, naan eo eaar m̧ool, bōtaab m̧ool eo kar kōjerbale n̄an kōmejajaik juon ļōmņak ebōd.”17 Jejjab joļo̧k juon men eo jejeļā bwe em̧ool kōnke juon men eo jej jan̄in meļeļe kake.
Jemaron̄ kakememej rikajjitōk eo bwe Joseph eaar jab make iaan ilo loļo̧k eo an enjeļ ro.
Rikam̧ool ro an Bok in Mormon e kar je: “Kōmij kam̧ool kōn naan in meļeļe, bwe juon enjeļ in Anij eaar wanlaļtak jān lan̄, im … kōm ar jibwi im loi pileij ko.”18 Jemaron̄ kōnono ebar lōn̄ barāinwōt.19
Juon rikajjitōk em̧ool eaikuj lo ajeded an gospel eo kōjepļaaktok āinwōt leen jerbal eo an Irooj kōn Rikanaan eo.
Elōn̄ļo̧k kiiō jān 29,000 jarlepju ko in ri jar im 88,000 mijenede ro rej katakin gospel eo iaolepān laļ in. Milien Armej ro Rekwojarjar ilo Raan-ko Āliktata rej pukōt n̄an ļoor Jisōs Kriast, mour mour ko rem̧m̧an, kea kōn rijeram̧ōl, im leļo̧k iien ko im kapeel ko aer ilo jipan̄ ro jet.
Jisōs ekar ba:
“Wōjke em̧man e ban jebar im e nana leen, barāinwōt wōjke e nana e ban jebar im em̧m̧an leen. …
“…Innām kom̧ naaj jeļā kajjier kōn leir.”20
Kōmeļeļe kein rej kareel bōro, bōtaab rikappukōt eo em̧ool eaikuj jab pedped ioer make n̄an kamōj an kappukōt m̧ool eo.
Kajjojo ritōmak eaikuj juon kappen ilo jetōb kōn mijen ekwōjarjar eo im mwil in Rikanaan Joseph Smith. Men in em̧ool n̄an epepen otemjej. Kajjitōk ko ilo jetōb rej bōk uwaak ko ilo jetōb jān Anij.
Kiiō epaak ke ikar pād ilo East Coast, juon mijenede ej ro̧o̧l jān mission eo an ekar kōnono n̄an eō kōn juon m̧ōttan me eaar pok kōn meļeļe eo eaar bōki kōn Rikanaan Joseph Smith. Erro kar kōnono elōn̄ alen, im mijenede eo ej kab ro̧o̧l āinwōt ekar itōn pere e make āinwōt juon waļo̧k in ekōnono ko.
Mekarta iaar kōjatdikdik emaron̄ kar kōkajoorļo̧k eo m̧ōttan, iaar en̄jake n̄ūrbōktok kōn naan in kam̧ool eo an make. Ro jeiū im jatū, in lewaj n̄an kom̧ juon kakkōl: kom̧ ban kanooj jipan̄ ro jet eļan̄n̄e tōmak eo ami make ejjab dim ilo jikin.
Jet wiik remootļo̧k iaar iuweļo̧k ilo juon baļuun n̄an South America. Flight attendant eo eaar jiron̄ kōm n̄an lale pija in safety eo. “Emaron̄ jab waļo̧k,” kar jiron̄ kōm, “ak eļan̄n̄e mejaoto in ilo baļuun in eoktak, panel ko ilōn̄ in jea eo am enaaj peļļo̧k, kwaļo̧k māj in oxygen ko. Eļan̄n̄e ewaļo̧k, lelōn̄ peim im kanōk māj eo waj n̄an kwe. Likūt māj eo ioon bo̧tūm im lo̧n̄ūm. Kadeļo̧n̄ kein etoto eo ioon bōram̧ im kakoņe māj eo eļan̄n̄e ekkar.” Innām naan in kakkōl in: “Kanooj lale n̄an kakkoņe māj eo am̧ m̧okta jān jipan̄ ro jet.”
Kōnono ko renana kōn Rikanaan Joseph Smith renaaj ļapļo̧k ilo ad em̧m̧akūt m̧aanļo̧k n̄an Itok eo Kein Karuo an Rilo̧mo̧o̧r. M̧ool ko rejimettan im m̧oņ jiddik ko rejjamin dikļo̧k. Enaaj wōr ro uwaan baam̧le ko ami im m̧ōttami renaaj aikuj ami jipan̄. Kiiō ej iien eo n̄an kakkoņkoņ māj in oxygen ko in jetōb ko ami bwe komwin pojak n̄an jipan̄ ro jet me rej kappukōt m̧ool eo.21
Juon naan in kam̧ool kōn Rikanaan Joseph Smith emaron̄ itok ilo wāween ko reukoktak n̄an kajjojo iiad. Emaron̄ itok ilo ami bukwelōlō ilo jar, im kajjitōk ippān Anij n̄an kapene bwe ekar juon rikanaan em̧ool. Emaron̄ itok ilo ami riiti bwebwenato in Visōn Eo Moktata an Rikanaan eo. Juon naan in kam̧ool emaron̄ kōm̧akūt ami ilo ami riiti im bar riiti Bok in Mormon. Emaron̄ itok ilo ami kwaļo̧k naan in kam̧ool eo ami make kōn Rikanaan eo ak ilo ami jutak ilo tampeļ eo im kile bwe kōn Josep Smith kajoor in liāp eo ekwōjarjar kar kōjepļaaktok n̄an laļ in.22 Kōn tōmak im lukkuun kōttōpar, naan in kam̧ool eo ami kōn Rikanaan Joseph Smith naaj kōkajoor e ļo̧k. Kōļapļo̧k dān ko rej buutok n̄an tulik remaron̄ in jet iien rekatutu kōj, bōtaab rejjamin n̄an jidik, kune uruur in tōmak eo ami.
N̄an jodikdik ro rej ron̄jake rainin, ij lewaj juon idajon̄jon̄ ejeno̧lo̧k: Bōk juon kam̧ool am̧ make kōn Rikanaan Joseph Smith. Kōm̧m̧an bwe ainikiōm̧ en jipan̄ kakūrm̧ool naan in kanaan ko an Moronai n̄an kōnono em̧m̧an kōn Rikanaan eo. Errein ej ruo elmakot ko: M̧oktata, pukōt eoon ko ilo Bok in Mormon me kwoj en̄jake im jeļā rej lukkuun m̧ool. Innām kwaļo̧ki ippān baam̧le eo im ro m̧ōttam̧ ilo nokon in jotan an baam̧le, jemeneri, im kūlaj ko an Doulul eo an Likao ro im Jiron̄ ro, kile bwe Joseph Smith eaar juon kein jerbal ilo pein Anij. Eo juon, riiti naan in kam̧ool eo an Rikanaan Joseph Smith ilo Pearl of Great Price ak ilo bok jidikdik in, kiiō ej jeje ilo 158 kajin ko. Komaron̄ loe online ilo LDS.org ak ippān mijenede ro. En̄in ej naan in kam̧ool eo an Joseph make kōn ta eo eaar lukkuun waļo̧k, ron̄jake aolep iien, im kwaļo̧ke ippān ro m̧ōttam̧. Ron̄jake naan in kam̧ool eo an Rikanaan eo ilo kajin eo am̧ make enaaj jipan̄ bōktok kam̧ool eo kwoj pukōte.
Elōn̄ raan ko rem̧m̧an im aiboojoj im̧aan. Būreejtōn Thomas S. Monson eaar ba: “Jerbal in eļap … enaaj etal ilo an wōnm̧aanļo̧k wōt, ukōti im kōjeram̧m̧an mour ko. … Ejjeļo̧k kajoor ilo aolepān laļ in emaron̄ kabōjrak jerbal eo an Anij. Jekdo̧o̧n ta ej itok, jerbal in eļap enaaj wōnm̧aanļo̧k.”23
Ij lewaj n̄an kom̧ aō kam̧ool bwe Jisōs ej Ri Kraist eo, ad Rilo̧mo̧o̧r im Ripinmuur. Ekar kāālet juon em̧m̧aan ekwōjajar, juon em̧m̧aan ejim̧we, n̄an tōl Jepļaaktok eo an tarlep in gospel eo An. Eaar kālet Joseph Smith.
Ij kam̧ool bwe Joseph Smith eaar juon em̧m̧aan em̧ool im em̧m̧an, juon rikaļoor an Irooj Jisōs Kraist. Anij Jemed im Nejin, Jisōs Kraist raar waļo̧k n̄an e. Eaar ukōt Bok in Mormon kōn mennin letok im kajoor an Anij.
Ālkin ad mej, jenaaj kanuij meļeļe kūr ekwōjarjar eo im mijen eo ekwōjarjar an Rikanaan Joseph Smith. Ilo raan eo ejja- ettoļo̧k-jān kiiō, kwe im n̄a im “[ebar lon̄] milien renaaj jeļā ‘Brother Joseph’ bar juon alen.”24 Ilo etan Jisōs Kraist, amen.