“Aaet, Irooj, Inaaj Ļoor Eok”

Jān Elder Eduardo Gavarret

Jen Jiljilimjuonn̄oul eo

Irooj ej kūr kōj kōjerbal elōn̄ naan ko roktak: “Itok n̄an Eō,” “Ļoor eō,” “Etetal Ippa.” Ilo kajjojo waanjon̄ak ej juon kūr n̄an m̧akūtkūt.

“Bwe lo, Irooj ej letok n̄an aolep laļ ko, laļ im lo make, n̄an katakin kōn An innaan.”¹Rainin eoon in ej kakūrm̧ool bar juon alen āinwōt iaar lewaj iien in em̧m̧an n̄an kwaļo̧k en̄jake ko aō ilo kajin eo aō make.

Ekar ilo iiō ņe 1975, im iaar jerbal ilo Uruguay Paraguay Mission āinwōt juon mijenede. Ilo allōn̄ eo aō m̧oktata ilo mijen, mijenede eo ej tōl zone eo eaar kōm̧m̧ane juon ikkure n̄an kwaļo̧k juon katak an gospel. Kajjojo mijenede ilo zone eo kar likwōj mejāer, im kar jiron̄ kōm n̄an ļoor juon iaļ n̄an cultural hall eo. Kōm̧ ar ļoor ainikien juon ritōl, juon ainikien kōm̧ ar ron̄ m̧okta jen am etetal. Kōn menin, kar kakkōļ kōm̧ bwe ilo iaļ eo, kōm̧ naaj ron̄ elōn̄ ainikien ko renaaj kajjieon̄ kapok kōm̧ im kōjebweik kōm̧ jān iaļ in.

Ālkin jet minit am ron̄jake ainikien ko, kōnono, im—ilo ibuļōn̄ men otemjej—juon ainikien eaar ba, “Ļoor eō,” Eaar wōr aō lōke bwe iaar ļoor ainikien eo ejim̧we. Ke kōm̧ ar tōparļo̧k ilo cultural hall eo ilo jikin jar eo, ritōl ro raar kajjitōk ippām̧ n̄an utik m̧ōttan ko jān mejam̧. Ke iaar kōm̧m̧ane, iaar kile bwe ewōr ruo kurub ko im bwe iaar pād ilo kurub eo eaar ļoor ainikien eo ebōd. “Eaar ainikien ļo̧k wōt eo ejim̧we,” iaar ba ippa make.

En̄jake in 39 iiō remo̧o̧tļo̧k eaar wōr kilaan ilo n̄a eto. Iaar ba ippa make, “Ij jamin, bar ļoor ainikien eo ebōd.” Innām iaar ba ippa make, “Aaet, Irooj, Inaaj ļoor Eok.”

Ikōņaan in keidi en̄jake in ippān kūr in ejouj an Rilo̧mo̧o̧r eo n̄an kōj:

“N̄a seperd em̧m̧an, im I jeļā ro Aō.  …

“Aō sip rej ron̄jake aininkiō, im I jeļā er, im rej ļoor Eō.”²

Kūr in n̄an “ļoor E” ej kūr eo epidodo, kajju, im kajoor jemaron̄ in bōke. Ej itok jān ainikien ealikkar ej jab maron̄ pok.

Irooj ej kūr kōj kōjerbali elōn̄ naan ko roktak: “Itok n̄an Eō,” Ļoor Eō,” “Etetal Ippa.” Ilo kajjojo waanjon̄ak ej jab juon kūr n̄an pād waan; ej juon kūr n̄an m̧akūtkūt. Ej kwaļo̧k n̄an aolep armej jān juon eo ej Rikanaan an rikanaan ro, Rūkaki an rūkaki ro, Nejin Anij, Messaia eo.

Kūr eo n̄an “Itok n̄an Eō”

“Itok n̄an Ippa, kom̧ otemjej rej jerbal im ban, im Inaaj kakkijeik kom̧.”³

Kwe eo kwoj jan̄in kar membōr in Kabun̄ in ke kwoj bōk kūr in jān ainikien mijenede ro ilo naan kein, “Kwonaaj ke riiti Bok in Mormon eo? Kwonaaj ke jar? Kwonaaj ke itok im jar? Kwonaaj ke ļoor waanjon̄ak eo an Jisōs Kraist im peptaij jān ro ewōr mālim ippāer?”⁴Ewi wāween am naaj uwaake kajjitōk in rainin?⁵

Ij kūr eok n̄an ron̄jake im bōk ennaan im ba, “Aaet, Irooj, Inaaj ļoor Eok!”

Carlos Badiola im baam̧le eo an, jān Minas, Uruguay, kar katak ippān mijenede ro. Kōn ke elder ro rekar kajjitōk elōn̄ kajjitōk ilo katak ko, raar pepe n̄an kūrtok juon ritūreir eo ejjab membōr—14 iiō rūttoon Norma—n̄an jipan̄ er uwaak. Norma eaar juon rijikuuļ in high jikuuļ eo niknik eaar katak baibōļ ilo iiō in jikuuļ eo. Eaar, bwe n̄e mijenede ro raar kajjitōk juon kajjitōk, Norma eaar uwaak. E eaar juon “rikatak em̧ool.” Katak eo kar katak raan eo ekar kōn Naan in Māletlet.

Ke liin eaar ro̧o̧l n̄an m̧weo imōn ālkin katak eo ippān mijenede ro, Norma eaar jeļā ta eaikuj kōm̧m̧ane. Eaar ba n̄an jinen, “M̧am̧a, jān kiiō iban bar kobe. Milik wōt.” Uwaak in ekar waļo̧k eo ealikkar an kōņaan in bōk kūr eo n̄an ļoor Kraist, āinwōt kar leļo̧k jān mijenede ro.

Jim̧or Carlos Badiola im Norma rekar peptaij. Tokālik, kar ļoor waanjon̄ak eo an Norma, jinen, jemān, im ro jein im jatin raar peptaij. Norma im n̄a kar rūttoļo̧k ippān doon ilo branch in edik ak ekajoor. Tokālik, ke iaar ro̧o̧ltok jān jerbal e juon mijen, kōm̧ ar m̧are. Iaar aolep iien jeļā bwe enaaj pidodo n̄an ļoor Rilo̧mo̧o̧r eo ilo an pād iturājetō.

Juon eo ej membōr in Kabun̄ in im kar bōk kūr in ej kōkāāl e kallim̧ur eo kajjojo wiik n̄an bōk m̧ōttan kwojkwoj eo.⁶M̧ōttan eo juon an kallim̧ur in ekitbuuj kōjparok kien ko; n̄an kōm̧m̧an āindein, kwoj ba, “Aaet, Irooj, Inaaj ļoor Eok!”⁷

Kūr in n̄an “Ļoor Eō”

“Ļoor Eō” kar kūr eo an Irooj n̄an rikien in edik em̧weie. Likao in em̧weie eaar kōjparok kien ko aolepān mour eo an. Ke kar kajjitōk ippān ta eo emaron̄ bar kōm̧m̧ane eļapļo̧k, eaar bōk juon uwaak in kūr in ealikkar: “Itok, … ļoor Eō.”⁸ Mekarta, men̄e kūr in ekar pidodo, ekar jab ejjeļo̧k kaarmejete ippān. Eaar aikuj—jim̧or men kein jokālet im m̧akūtkūt.

Rikanaan Nipai eaar kūr n̄an etal ke eaar kajjitōk: “Im [Jisōs] ej ba n̄an ro nejin armej; Kom̧in ļoor Eō. Kōn menin, ro jeiū im jatū re jitōnbōro, jān maron̄ ke lor Jisōs eļan̄n̄e jej jab kōņaan kōjparok kien ko an Jemān?”⁹

Kūr eo n̄an “itok n̄an Eō,” n̄an ron̄jake Ainikien, im n̄an ļoor eaar ennaan eo an mijenede ro jān jinoin, jipan̄ elōn̄ n̄an ukōt mour ko aer n̄an em̧m̧an.

Lemn̄oul iiō rem̧ootļo̧k mijenede ro raar deļo̧n̄e imōn kōm̧m̧an waj eo an jema n̄an likūt juon waj n̄an kōm̧m̧ane. Āinwōt an mijenede ro rem̧m̧an kijon̄ kōm̧m̧ane, raar bōk aolep iien ko rem̧m̧an n̄an kōnono ippān jema im jinō kōn gospel eo. Jema eaar errā ippān mijenede ro, im jinō eaar errā ilo ennaan eo im kūr eo n̄an ļoor Kraist. Jān raan ņe n̄an kiiō, eaar dāpdeb wōt ilo Kabun̄ in. Eaar ba, “Aaet, Irooj, Inaaj ļoor Eok!”

Ilo am kajjieon̄ itok n̄an E, kwonaaj bōk kajoor eo n̄an kōmeraikļo̧k eddodo ko an mour, men̄e ilo ānbwin ak jetōb, im en̄jake juon oktak em̧m̧an itulowa, eo enaaj jipan̄ eok m̧ōņōņōļo̧k.

Kūr eo n̄an “Etetal Ippa”

Enoch kar kūri n̄an kwaļo̧k gospel eo n̄an armej ro relāj, epen būruwier. Eaar jab en̄jake ke ekkar. Eaar pere n̄e emaron̄ kōm̧m̧ane. Irooj eaar kalur pere ko an im kōkajoorļo̧k tōmak eo an jān kūr in “Etetal Ippa”—juon kūr, ej āinwōt juon jokon an juon armej epilo ak pein juon m̧ōttan, emaron̄ tōl e ilo bun̄tōn nee ko an juon eo ejjab lukkuun jeļā kake. Jān bōk pein Rilo̧mo̧o̧r eo im etetal Ippān, Enoch eaar loe bwe bun̄tōn neen eaar pen im eaar erom juon mijenede eļap im juon rikanaan.¹⁰

Jokālet eo n̄an “itok n̄an Ippa” im “ļoor Eō” ej an juon make. N̄e jej bōk kūr in, jon̄ak in kallim̧ur ko ad ej wanlōn̄ļo̧k, innām bwe jemaron̄ “etetal Ippān.” Jon̄ak in ej ejaake juon jem̧jerā ippān Rilo̧mo̧o̧r eo—leen ad bōk kūr eo kein kajuon.

Norma im n̄a kar kajjojo bōk kūr in n̄an “itok n̄an Ippa” im n̄an “ļoor Eō.” Innām, ippān doon, jipan̄ doon, kōm̧ kar katak n̄an etetal Ippān.

Kijejeto eo im ļōmņak eo n̄an pukōt E im n̄an ļoor E enaaj nōbar eo kōn kōjeram̧m̧an eo jej aikuji.

Āinwōt kar waanjon̄ak eo an kōrā eo, kōn kijejeto eļap, kajieon̄ n̄an un̄ūr nuknuk eo an Rilo̧mo̧o̧r eo¹¹ak āinwōt Bartimaeus em̧m̧aan eo epilo, eo kijejeto eo eaar juon men aorōk ilo kabwilōn̄lōn̄ eo me eaar waļo̧k ilo mour eo an.¹² Ilo waanjon̄ak kein jim̧or kemour ānbwiin im jetōb kar leļo̧k.

Letok peim, un̄ūr kaarmen eo An, bōk kūr eo An, im ba, “Aaet, Irooj, Inaaj ļoor Eok!”—im etetal Ippān.

“Itok n̄an Eō.” “Ļoor Eō,” im “Etetal Ippa” rej kūr ko rekitbuuj kajoor eo eaorōk—n̄an ro otemjej rej būki—n̄an kōm̧m̧ane juon oktak ilo kwe bwe kwonaaj tōl n̄an ba, “[Ij] jab bar itok wōt in kōm̧m̧an nana, ak n̄an kōm̧m̧an em̧m̧an wōt.”¹³

Āinwōt juon waļo̧k in oktak in, kwonaaj en̄jake kōņaan eo ekajoor n̄an jipan̄ ro remōjņo̧, kotak lōn̄ļo̧k pā ko retoto, im kōkajoor ļo̧k bukwie ko raajikukuk.¹⁴

Ta bun̄tōn ko jemaron̄ būki rainin n̄an “etetal Ippān”?

1. Naajdik eo ekōņaan n̄an erom juon rikaļoor an Kraist.¹⁵

2. Jar kōn kōņaan in bwe tōmak eo am ilo E en eddōkļo̧k.¹⁶

3. Bōk jeļāļo̧kjeņ jān jeje ko rekwojarjar, kōmeram iaļ eo im kōkajoorļo̧k am kōņaan n̄an oktak.¹⁷

4. Kālet jokālet eo rainin n̄an m̧akūtkūt im ba, “Aaet, Irooj, Inaaj ļoor Eok!” Jeļā m̧ool eo ej jamin ukōt laļ eo am m̧ae kwoj ukōt jeļāļo̧kjeņ eo am̧ n̄an m̧akūtkūt.¹⁸

5. Kōjparok ilo jokālet eo kwaar kōm̧m̧ani kōn kōjerbal pedped kein raan otemjeļo̧k.¹⁹

Kōm̧m̧an bwe naan ko an rikanaan eo ad ejitōnbōro, Būreejtōn Thomas S. Monson, ren kōllewetak kōj n̄an m̧akūtkūt ilo kōņaan in ad n̄an bōk kūr eo an Rilo̧mo̧o̧r eo. Būreejtōn Monson eaar ba: “Wōn ej Kiin̄ in aiboojoj, Irooj in Inelap eo? E ej ad M̧aajta. E ej ad Rilo̧mo̧o̧r. E ej Nejin Anij. E ej Rijeje an ad Lo̧mo̧o̧r. E ej meram ko, ‘Ļoor Eō.’ E ej katakin, ’Etal, im kōm̧m̧ane menin barāinwōt.’ E ej akweļap, ’Kōjparok kien ko Aō.’ ’’²⁰

Kōm̧m̧an bwe jān kōm̧m̧ane jokālet eo n̄an kōļapļo̧k jon̄ak eo ad ilo kabun̄jar im kallim̧ur n̄an Anij, im uwaak eo ad n̄an kūr eo An maron̄ ron̄ im alikkar: “Aaet, Irooj, Inaaj ļoor Eok!”²¹Ilo etan ekwojarjar Irooj Jisōs Kraist, amen.

Kakeememej ko

1. Alma 29:8.

2. Jon 10:14, 27.

3. Matu 11:28; barāinwōt lale Aiseia 55:3.

4. Lale Preach My Gospel: A Guide to Missionary Service (2004), 31, 195–202.

5. Lale Jerbal 2:37–38.

6. Lale Doctrine and Covenants 20:37, 77–79.

7. Lale Doctrine and Covenants 42:29.

8. Mark 10:21.

9. 2 Nipai 31:10.

10. Lale Moses 6:33–35.

11. Lale Luk 8:43–48.

12. Lale Mark 10:46–52.

13. Mosaia 5:2.

14. Doctrine and Covenants 81:5; barāinwōt lale Aiseia 35:3.

15. Lale Alma 22:15–16; Dallin H. Oaks, “Kōņaan,” Ensign or Liahona, Eprōļ 2011, 21–24.

16. Lale Alma 34:17–27; 37:37.

17. Lale Sam ko 119:105; Hilamōn 3:29.

18. Lale Mosaia 5:5.

19. Ralph Waldo Emerson eaar ba, “Men eo jej kijenmeje ilo kōm̧m̧ane ej erom men eo epidodo n̄an kōm̧m̧ane, ej jab paotokin wōt men eo ej oktak ak bwe kajoor eo ad n̄an kōm̧m̧ane ej ļapļo̧k” (in Heber J. Grant, Gospel Standards, comp. G. Homer Durham [1941], 355).

20. Thomas S. Monson, “Finding Joy in the Journey,” Ensign ak Liahona, Nov. 2008, 88.

21. Lale “Lord, I Would Follow Thee,” Hymns, no. 220.