Kwojkwoj eo im Pinmuur eo

Jān Elder James J. Hamula

Jen Jiljilimjuonn̄oul eo

Kain̄i eo an kwojkwoj eo ej menin aikuj n̄an erom kwojarjar ļo̧k im kwojarjar n̄an kōj kajjojo.

Ilo joten eo m̧okta jān m̧akūtkūt ko ilo Gethsemane im Calvary, Jisōs eaar kakutok Rijilōk ro An āliktata n̄an kabun̄jar. Jikin eo ekar ruum̧ eo ilōn̄ an rikaļoor ro ilo Jerusalem, im tōre eo ekar iien Kwojkwoj in Kijone eo.¹

Im̧aan mejāer m̧ōn̄ā in Kijone eo ilo imminene, ekitbuuj ļaam̧ in katok eo, wain, im pilawā ejab kauwe, kōkkaļļe in lo̧mo̧o̧r eo m̧okta an Israel jān kōm̧akoko im mej² im kōn juon pinmuur eo ilju im jekļaj aikuj in kile.³ Ke kōjota eo eaar epaak an jem̧ļo̧k, Jisōs eaar bōk pilawā, kōjeram̧m̧an e im ruje,⁴ im kar leļo̧k n̄an Rijilōk ro An, im ba, “Bōke, m̧ōn̄ā.”⁵“Men in ānbwinnū eo leļo̧k kōn kom̧; kom̧win kōm̧m̧an men in ilo ememej Eō.”⁶Ilo ejja wāween in wōt, Eaar bōk kab in wain, kōmōjņo̧ik kōn aibōj, kōjeram̧m̧an e, im leļo̧k n̄an ro Ipeļaakin, im ba: “Kab in kallim̧ur eo ekāāl ilo daō,”⁷“eo e to̧o̧r ļo̧k kōn elōn̄ n̄an juurļo̧k jero̧wiwi ko.”⁸“Kom̧win kōm̧m̧ane men in ilo ememej Eō.”⁹

Ilo wāween in emļak, Jisōs eaar jino juon kain̄i ekāāl n̄an armej in bujen ro an Anij. Ejemļo̧k naaj kōto̧o̧rļo̧k bōtōktōk in menin mour ak kar m̧ōn̄ā kanniōk in menin mour ilo karōk an juon katok in pinmuur an juon Kraist eo enaaj itok.¹⁰ Ijjelo̧kin, kōkkaļļe ko kōn kanniōk erub im bōtōktōk eto̧o̧rļo̧k an Kraist eo emōj an itok naaj maron̄ bōke im m̧ōn̄ā ilo ememej in katok in pinmuur eo An.¹¹Bōk koņaad ilo kain̄i in ekāāl enaaj kwaļo̧k n̄an aolep juon kallim̧ur in errā kōn kien ko An. Ro otemjej renaaj kwaļo̧k n̄an aolep juon kallim̧ur in errā im mouri mour eo aer ilo m̧ōņōņō, mej in kanniōk enaaj “eļļā” jān er, im renaaj bōk kam̧ool n̄an mour indeeo.

Ilo awa ko tokālik, Jisōs eaar deļo̧n̄eļo̧k Gethsemane, kar bōke n̄an Calvary, im anjo kar ilo̧k jān lōb an ri Arimatia. Ālkin An ilo̧k jān er, rikaļoor ro retiljek an Jisōs ilo im tūrin Jerusalem raar itok ippān doon raan eo m̧okta ilo wiik n̄an “ruje pilawā”¹²im kar kōm̧m̧ane “pen.”¹³Em̧ool, raar kōm̧m̧ane jab wōt n̄an kakeememej ilo̧k eo an aer Irooj ak n̄an barāinwōt kwaļo̧k kam̧oolol kōn im tōmak ilo Pinmuur eo An ekabwilōn̄lōn̄ n̄an er.

Ekabwilōn̄lōn̄, ke Jisōs eaar loļo̧k rikaļoor ro An ilo Amedka, Eaar barāinwōt jino kwojkwoj eo ilubwilijier.¹⁴Ilo kōm̧m̧an āindein, Eaar ba; “Men in renaaj kōjparok n̄an kōm̧m̧ane iien otemjej”¹⁵im “Im enaaj juon kam̧ool n̄an Jemān bwe kom̧ij kememej Eō iien otemjej.”¹⁶Bar juon alen, ilo jinoin Jepļaaktok in, Irooj ej jino kain̄i eo an kwojkwoj, letok kōmeļeļe ko n̄an kōj ejjeļo̧k oktak jān ro Eaar leļo̧k n̄an rikaļoor ro An m̧okta.¹⁷

Kain̄i in kwojkwoj eo kar ņaetan “juon iaan men ko rekwojarjar im kain̄i ko rekwojarjar ilo Kabun̄ in.”¹⁸Emenin aikuj bwe en lukkuun kwojarjar ļo̧k im kwojarjar n̄an kōj kajjojo. Jisōs Kraist Make eaar jino kain̄i in n̄an kakeememej kōj ta eo Eaar kōm̧m̧ane n̄an pinmuuri kōj im n̄an katakin kōj wāween ad maron̄ kōpooj kōj make n̄an Pinmuur eo An im maron̄ mour ippān Anij bar juon alen.

Jān pilawā in emōj ruje im dibdikdiki, jej kwaļo̧k kam̧ool bwe jej keememej ānbwinin Jisōs Kraist—ānbwin eo kar uprare kōn metak ko, kaen̄tanaan ko im kapo ko otemjejļo̧k,¹⁹juon ānbwin en̄taan eļap kōn metak im An menokadu āinwōt eļap pilin̄lin̄ in bōtōktōk,²⁰juon ānbwin emōj wākare im rub ilo dōbwāāl.²¹Jej kwaļo̧k kam̧ool bwe jej tōmak bwe ejja ānbwin in kar kōbabuki n̄an kakije ilo mej, ekar jerkak jān lōb, jāmin bar juon alen jeļā nan̄inmej, kōt, ak mej.²²Im ilo bōk pilawā n̄an kōj make, jej kile bwe, āinwōt ānbwin ewabanban an Kraist, ānbwinnid naaj kōtļo̧k jān korak ko an mej, anjo jerkak jān lōb eo, im bar bōk ad jetōb ko n̄an indeeo.²³

Kōn juon kab in dān edik, jej kwaļo̧k kam̧ool bwe jej kakeememej bōtōktōkin Jisōs kar to̧o̧rļo̧k im en̄taan ilo jetōb E eaar kijenmeji kōn aolep armej. Jej kakeememej en̄taan eo im An menokadu āinwōt eļap pilin̄lin̄ in bōtōktōk e wōtlo̧k ioon bwidej ilo Gethsemane.²⁴Jej kakeememej kar kakinejnej E kōn bōd ko ad Eaar kijenmeji ilo Pein an depetpet.²⁵Jej kakeememej bōtōktōk in E eaar to̧o̧rļo̧k jān Pein, Neen, im katin tōre eo ilo Calvary.²⁶ Im jej kakeememej jenkwōn Make kōn en̄taan eo An, Eaar ba bwe jej jab jeļā jon̄an kinejnej eo, kar kareel eo, jon̄an eddo eo n̄an kotake.²⁷Ilo ad bōk dān in n̄an kōj make, jej kile bwe bōtōktōk In im en̄taan in pinmuur eo n̄an jerawiwi ko ad im bwe E enaaj kōļļāik wōnāān jerawiwi ko ad ilo ad dāpij im bōk pedped in katak ko im kain̄i ko an gospe eo An.

Wāween in, kōn pilawā im dān, jej kakeememej kōn Pinmuur eo an Kraist n̄an kōj jān mej im jerawiwi. Kōllaajrak eo im̧aantata an pilawā im dān eaorōk. Ilo bōk m̧ōttan pilawā, jej kakeememej kōn iien jerkakpeje eo ad make, eo ej kitbuuj eļapļo̧k jān baj jepļaaktok in ānbwin im jetōb. Jān kajoor in Jerkakpeje eo, kōj aolep naaj jepļaak n̄an im̧aan mejān Anij.²⁸M̧ool in kōm̧m̧an ad jelm̧ae kajjitōk eo eaorōktata an mour ko ad. Kajjitōk eo eaorōktata ejelm̧ae kōj aolep ejjab ia eo jenaaj pād ie, ak ej wōn eo jenaaj mour ippān ālkin mej. Tōre in kōj kajjojo naaj ro̧o̧lļo̧k n̄an im̧aan mejān Anij, ejjab kōj aolep naaj pād wōt Ippān.

Jān mour in, kōj aolep jej erom bwidejdej kōn jerawiwi im bōd.²⁹Enaaj wōr ad ļōmņak ko, naan ko, im jerbal ko renaaj waan.³⁰Ilo tukadu, jenaaj ettoonon. Im Jisōs eaar kalikkar ta wāween ko kōn ettoonon naaj āinwōt im̧aan mejān Anij, ke Eaar ba ejjeļo̧k men ettoonon emaron̄ deļo̧n̄e  im̧aan mejān Anij.³¹M̧ool in kar bōktok n̄an m̧weo n̄an Alma Alma eo Edik eo, ke eaar jelm̧ae juon enjeļ ekwojarjar, kakkure, kawidbwebweik, im ken̄taan jān ettoonon bwe eaar kōņaan in erom “jako im lot jim̧or ilo jetōb im kanniōk, bwe [en] maron̄ in naaj bōkļo̧k eō im̧aan mejān … aō Anij.”³²

Ilo bōk m̧ōttan dān in kwojkwoj eo, jej ekkatak wāween eo jemaron̄ in erreo jān jerawiwi im bōd im jutak im̧aan mejān Anij. Jān kōto̧o̧rļo̧k bōtōktōk In, Jisōs Kraist eaar kaju būruwōn kajjitōk ko kōn ekajet kōn aolep jerawiwi im bōd. Innām E ej letok karreeo eļan̄n̄e enaaj bwe ad tōmak ilo E n̄an ukweļo̧k errā kōn aolep kain̄i im bujen lo̧mo̧o̧r ko, jino ilo peptaij; im bōk Jetōb Kwojarjar. Jān ad bōk Jetōb Kwojarjar, jej erreeo im kwojarjar. Jisōs eaar kalikkar katak in:

“Ejjeļo̧k men ejjab erreo emaron̄ deļo̧n̄ ilo aelōn̄ eo An; … ejjeļo̧k ej deļo̧n̄ ilo An kakkije ijelo̧kin wōt ro raar kwaļ ballier ilo bōtōktōkū. …

“Kiiō en̄in ej kien eo: Kom̧in ukweļo̧k, kom̧ aolep jeban ko an laļ, im itok n̄an Eō im baptais ilo Eta, bwe kom̧in maron̄ kokwojarjar jān bōke Jetōb Kwojarjar, bwe kom̧in maron̄ jutak ilo ejjeļo̧k lipijinjin im̧aō ilo raan eo āliktata.”³³

En̄in ej katak eo an Kraist.³⁴ N̄e jej bōk katak in im mour kaki ilo mour ko ad ekkar n̄an e, jej pād ilo karreeo ilo bōtōktōkin Kraist im erreeo.³⁵

Jān jar in kwojkwoj ko, jej kwaļo̧k ad errā kōn katak in an Kraist im ad kalim̧m̧ur n̄an mour ekkar n̄an e. Ilo kajjitōk eo ad n̄an Anij Jemed Indeeo, jej kwaļo̧k bwe jenaaj “aolep iien keememej” Nejin eaiboojoj. M̧oktata, jej kam̧ool ad “m̧ōņōņō” n̄an keememej. Innām jej kam̧ool bwe jej “kakeememej”. Ilo kōm̧m̧ane menin, jej kōm̧m̧ane kalim̧m̧ur ko n̄an kōjerbal tōmak ilo Jisōs Kraist im ilo Pinmuur eo An kōn kōj jān mej im jerawiwi.

Jej wōnm̧aanļo̧k wōt kwaļo̧k bwe jenaaj “kōjparok kien ko An.” En̄in ej juon kalim̧m̧ur eaorōk n̄an ukweiļo̧k. Eļan̄n̄e ļōmņak ko ad, naan ko ad, ak kōm̧m̧an ko ad raar waan ta raar aikuj in erom ilo raan ko ļo̧k, jej bar kalim̧m̧uri kōj make n̄an kajim̧weikļo̧k mour ko ad Ippān ilo raan ko rej itok.

Eo juon, jej kwaļo̧k bwe “jej m̧ōņōņō in bōk [iood] etan [Nejin].”³⁶En̄in ej juon kalim̧m̧ur eaorōk n̄an bar kalim̧m̧uri kōj make n̄an mālim eo An im n̄an kōm̧m̧ane jerbal eo An, eo ekitbuuj bōk n̄an kōj make aolep kain̄i in lo̧mo̧o̧r ko im bujen ko.³⁷

N̄e jej kalim̧m̧uri kōj make n̄an pedped in katak kein, jej kalim̧m̧ur ilo jar in kwojkwoj ko bwe “Jetōb eo an en pād [ippād].”³⁸Bōk Jetōb eo ekāāl ej juon kōjeram̧m̧an ewāppen, kōnke Jetōb eo ej agent eo ej karreeo im kokwojarjar kōj jān jerawiwi im bōd.³⁹

Ro jeiū im jatū, m̧akūtkūt eo eaorōktata ilo iien im n̄an indeeo ej Pinmuur eo an Jisōs Kraist. E eo eaar kōttōbrak Pinmuur eo kar letok n̄an kōj kain̄i in kwojkwoj eo n̄an jipan̄ kōj jab kakeememej wōt ak barāinwōt bōk aolep kōjeram̧m̧an ko an m̧akūtkūt in eļap an tūriam̧o̧. Bōk koņaad aolep iien im m̧ool ilo kain̄i in ekwojarjar ej jipan̄ kōj wōnm̧aanļo̧k dāpij im mour kōn katak ko an Kraist ālkin peptaij im ilo wāween in jibadōk im kadedeļo̧k jerbal in ekwojarjar. Ilo m̧ool, kain̄i in kwojkwoj in ej jipan̄ kōj niknik n̄an jem̧ļo̧kin im bōk tarlep eo an Jemān ilo ejja wāween eo Jisōs eaar kōm̧m̧ane, jouj kōn jouj.⁴⁰

I kwaļo̧k kam̧ool kōn kajoor eo an Jisōs Kraist n̄an pinmuuri kōj aolep jān mej im jerawiwi im kōn kajoor in kain̄i ko an priesthood eo An, ekitbuuj kwojkwoj eo, n̄an kōpooj kōj n̄an loe mejān Anij, aaet Jemād, im mour.⁴¹ Jen bōk kwojkwoj wiik in tok, im wiik eo tokālik, kōn ikdeleel em̧wilaļ im jibadbad em̧ool, ij jar ilo etan Irooj Jisōs Kraist, amen.

Kakeememej ko

1. Lale Matu 26:17–20; Mark 14:12–17; Luk 22:7–18.

2. Lale Exodus 12; Bōnbōn 28:16–25; Bible Dictionary, “Feasts.”

3. Lale Exodus 13:12–13; Mosaia 2:3–4; Moses 5:5–8.

4. Lale Matu 26:26; Mark 14:22; Luk 22:19; 1 Korint 11:24. Jān wāween in, ke Jisōs eaar jino kwojkwoj eo ilubwilijin Rinipai ro ālkin Jerkakpeje eo An, Ej ruje pilawā, innām kōjeram̧m̧an e (lale 3 Nipai 18:3).

5. Matu 26:26; Mark 14:22; 1 Korint 11:24.

6. Luk 22:19; bar lale 1 Korint 11:24.

7. Luk 22:20; bar lale Matu 26:28; Mark 14:24; 1 Korint 11:25.

8. Matu 26:28.

9. Luk 22:19; bar lale 3 Nipai 18:11.

10. Lale 2 Nipai 11:4; 25:24–25; Jekab 4:5; Alma 34:14; 3 Nipai 9:17, 19–20; Moses 5:5–8.

11. Lale Jon 6:51–57; 1 Korint 11:24–26; Doctrine and Covenants 20:40.

12. Jerbal 20:7.

13. Jerbal 2:42.

14. Lale 3 Nipai 9:19–20; 18:1–11; 20:3–9; 26:13.

15. 3 Nipai 18:6.

16. 3 Nipai 18:7.

17. Lale Doctrine and Covenants 20:75; 27:2; 59:9–12.

18. Teachings of Presidents of the Church: Joseph Fielding Smith (2013), 96. “Ilo aō kar kajjitikin kōn kweilo̧k in kwojkwoj ekwojarjar tata, ekwojarjar tata, iaan aolep kweilo̧k ko an Kabun̄ eo” (Teachings: Joseph Fielding Smith, 95).

19. Lale Alma 7:11.

20. Lale Luk 22:44; Mosaia 3:7; Doctrine and Covenants 19:18.

21. Lale Sam Ko 22:16; Jon 19:33–34; 20:25–27; 3 Nipai 11:14; Doctrine and Covenants 6:37; James E. Talmage, Jesus the Christ, 3rd. ed. (1916), 669.

22. Lale Matu 28:6; Luk 24:6, 39; Jon 20:20; Doctrine and Covenants 76:22–24.

23. Lale Jon 6:51–59; Alma 11:42–44; 40:23; 3 Nipai 27:13–15.

24. Lale Luk 22:44; Mosaia 3:7; Doctrine and Covenants 19:18.

25. Lale Aiseia 53:5; Matu 26:67; 27:26, 29–30; Mark 14:65; 15:15, 19; Luk 22:63–65; Joh 19:1; Moaia 15:5.

26. Lale Matu 27:35; Mark 15:15; Luk 23:33; Jon 19:16, 33–34.

27. Doctrine and Covenants 19:15.

28. Lale Alma 11:42–45; 3 Nipai 27:13–15.

29. Lale Moses 6:55.

30. Lale Matu 5:27–28; 12:36; Jemes 3:1–13; Mosaia 4:29–30; Alma 12:14.

31. Moses 6:57; bar lale 1 Korint 6:9; Epesōs 5:5; 1 Nipai 10:21; 15:33–34; Alma 7:21; 11:37; 40:26; 3 Nipai 27:19; Doctrine and Covenants 1:31–32.

32. Alma 36:15; bar lale eoon 14; Revelesōn 6:15–17; Alma 12:14.

33. 3 Nipai 27:19–20.

34. Lale 2 Nipai 31:2–21; 3 Nipai 11:31–41; 27:13–22; Doctrine and Covenants 76:40–42, 50–54, 69–70.

35. Lale 3 Nipai 27:19; bar lale Revelesōn 1:5–6; 7:14–15; Alma 5:21; 13:11–12; Ether 13:10–11; Moses 6:59–60.

36. Doctrine and Covenants 20:77; Moronai 4:3.

37. Lale Dallin H. Oaks, His Holy Name (1998); Dallin H. Oaks, “Taking upon Us the Name of Jesus Christ,” Ensign, May 1985, 80–83.

38. Doctrine and Covenants 20:77, 79; Moronai 4:3; 5:2.

39. Lale Rom 15:16; 1 Korint 6:11; 2 Nipai 31:17; Alma 5:54; 13:12; 3 Nipai 27:20; Moronai 6:4.

40. Lale Doctrine and Covenants 93:6–20.

41. Doctrine and Covenants 84:22.