Bōro Kuk ilo Lo̧mo̧o̧r
Jān Elder Chi Hong (Sam) Wong
Jān Jiljilimjuonñoul eo
N̄an jipañ Rilo̧mo̧o̧r eo, jej aikuj jerbal ippān doon ilo juon wōt bōro im aenōm̧m̧an. Aolep kajjojo, aolep jerbal, im aolep kūr rej aorōk.
Ekkā ad roñ an Būreejtōn Thomas S. Monson ba, “Diwōjļo̧k im lo̧mo̧o̧r.”1 Juon bwebwenato ilo Kallim̧ur Ekāāl ej itok ñan ļōmņak eo aō. Ej juon pija eo ejejjet kōn ekōjkan an membōr ro im mijinede ro maroñ jerbal ippān doon ilo juon wōt ilo ward ko̧o̧njeļ ko im diwōjļo̧k im lo̧mo̧o̧r. Bwebwenato in ej waļo̧k ilo Mark 2:1–5. Ij lo bwe en̄jake ko Jisōs eaar kōjerbali n̄an katakin kōj jet katak ko ak pedped ko rej iien otemjej kanooj im̧we im pidodo n̄an meļeļe.
Juon iaan ro kōnono kake ilo bwebwenato in ej juon em̧m̧aan eo ekar akā, juon eo ekar jab maroñ m̧akūtkūt n̄e ejjeļo̧k jipan̄. Lein ekōn pād wōt m̧weo, kōttar n̄an lo̧mo̧o̧r.
Ilo tōre in ad, emaron̄ waļo̧k āinwōt in. Emen armej ro raar kakūrm̧ool juon ijjitōn̄ jān bisop eo aer n̄an loļo̧k, ilo m̧weo im̧ōn, juon em̧m̧aan eo eaar nan̄in mej kōn akā. Imaron̄ pijaikļo̧k juon iaer eo ej itok jān Doulul eo an Kōrā, juon jān doulul eo an elder ro, juon jān Aaronic Priesthood eo, im āliktata ak jb diktata, juon mijenede ej jerbal aolep-raan. Ilo juon ward ko̧o̧njeļ eo ej kab dedeļo̧k, ālkin ko̧o̧njeļ ippān doon kōn aikuj ko ilo ward eo, bisop eo eaar leļo̧k ijjitōn̄ ko n̄an “lo̧mo̧o̧r.” Errein raar roe men kar jitōn̄ n̄an jipan̄ em̧m̧aan in en̄taan kōn akā. Raar jab maron̄ kōttar n̄an e n̄an an itok n̄an jar kōn e make. Raar aikuj etal n̄an m̧weo im̧ōn im loļo̧k. Raar aikuj in pukōtļo̧k e, im kōn menin raar ilo̧k. Em̧m̧aan eo kar bōktok n̄an Jisōs.
‟Im rej [itok] n̄an E, im bōktok juon armej e akā, emān ro rej bōktok” (Mark 2:3).
Mekarta, ruum̧ eo eaar kanooj obrak. Raar jab maron̄ deļo̧n̄ļo̧k ilo kōjām eo. Ij m̧ool raar kajieon̄ jabdewōt men remaron̄ kar ļōmņak kake, bōtaab raar jab maron̄ deļo̧n̄ļo̧k. Men ko raar jab meoeo āinwōt kar karōke. Eaar wōr kapen̄pan̄ ko ilo iaļ eo aer ļo̧k an “lo̧mo̧o̧r.” Bōtaab raar jab ebbwer. Rara jab ilo̧k jān em̧m̧aan eo eakā iturin kōjām eo. Raar ko̧o̧njeļ ippān doon n̄an ta eo rej kōm̧m̧ane tok juon—ekōjkan aer maron̄ bōktok em̧m̧aan eo n̄an Jisōs Kraist n̄an kemouri. Raar jerbal n̄an jipan̄ Jisōs Kraist ilo lo̧mo̧o̧r jetōb ko, n̄an er, eaar jab kanooj kōmedodo. Raar itok kōn juon karōk—ejjab juon eo epidodo, ak raar jerbale.
“Im ke re ban kepaak E kōn elap jar eo, rej kapeļļo̧k mōttan kejenwan ikijjien ijo Ej pād ie: im ke emōj aer rupe, rej katolaltak kinien leo e akā ej babu” Mark 2:4)
Raar lelōn̄ļo̧k e n̄an bōro̧o̧j eo. Ļōmņak ejjeļo̧k jikin iuwe inabōj ñan aer tallōñ ie, enaaj kar bōk jidik iien ñan an aolepāer tallōñ ioon bōro̧o̧j eo. Ij ļōmņak emaroñ kar kōm̧m̧an ilo wāween in: likao eo jān ward eo emaron̄ kar tallōn̄ n̄an ioon bōro̧o̧j eo m̧o̧ktata. Āinwōt an likao wōt im obrak kōn kajoor, eaar jab kanooj pen n̄an e. Rūkaki in loļo̧k mōko eo m̧ōttan jān doulul eo an elder ro im mijinede eo ej jerbal aolep raan im kajoor remaron̄in kar kanooj iuun lōn̄ļo̧k jān laļ. Jejtōr eo jān Doulul eo an Kōrā ej kakememej er bwe ren kōkōm̧anm̧an wōt im leļo̧k naan in kōketak. Innām em̧m̧aan ro raar kōpeļļok bōro̧o̧j eo ilo an jejtōr eo leļo̧k naan in kaenōm̧m̧an em̧m̧aan eo ilo an kōttar n̄an kemouri—n̄an maron̄ em̧m̧akūt jān e make im n̄an mour.
Ijjitōn̄ in lo̧mo̧o̧r in kar aikuji aolep ñan jerbal ippān doon. Ilo iien in eļap an aorōk, eaar aikuj bōk kōjeikik eo ewejepedik ñan lelalļo̧k em̧m̧aan eo eakā jān bōro̧o̧j eo. Armej ro emen raar aikuj jerbal ilo juon wōt im ilo jokkuun wōt juon. Ejjab aikuj in kar wōr jepeļļo̧k ibwilijin rein emān. Rej aikuj in kar door laļ tak em̧m̧aan eo eakā ilo ejja jekjek eo wōt. Eļan̄n̄e juon ekar kōtļo̧k to eo em̧ōkajļo̧k jān ro jilu, em̧m̧aan eo emaron̄ in kar wōtlo̧k jān ioon kein babu eo an. Lein ejjab maron̄ kar kōdāpdep kōn e make jān jekjek eo an em̧ōjņo.
N̄an jipan̄ Rilo̧mo̧o̧r eo, jej aikuj jerbal ippān doon ilo juon wōt im ilo jokkuun wōt juon. Aolep kajjojo, aolep jerbal, im aolep kūr. Jej aikuj erom juon wōt ilo ad Irooj Jisōs Kraist.
Āliktata, rinan̄inmej eo, em̧m̧aan eo eaar akā kar door im̧aan Jisōs. “Ke Jisōs ej lo aer tōmak, E ba nan leo e akā, “Nejū, e jako jero̧wiwi ko am. Jisōs eaar tiriam̧o kake im kemouri—ejjab ilo kanniōk wōt ak barāinwōt jetōb: ‟Nejū, e jako jero̧wiwi ko am: (Mark 2:5)“Nejū, e jako jero̧wiwi ko am.” Em̧m̧an ke menin? Jekōņaan ke bwe en waļo̧k āindein n̄an kōj? Aaet emaron̄.
Ewōr ke en ilo mour in kom̧ jeļā ke enañinmej in akā ilo mour in jetōb, juon eo ej kab jepļaaktok ñan Kabuñ in kōn e make? E emaroñ juon iaan ajri ro nejid, juon iaan ro jined im jemād, eo pāleed, ak eo m̧ōttad.
Ilo an lōñļo̧k wōt mijenede ro rej jerbal aolep raan ilo iunit ko an Kabuñ in, enaaj jim̧we n̄an bisop ro im būreejtōn ro an branch n̄an kōjerbal er ilo ko̧o̧njeļ ko an ward im branch eo aer. Bisop eo emaron̄ kūr kajjojo membōr an ward ko̧o̧njeļ eo n̄an itok kōn juon laajrak in etan ro me remaron̄ aikuj jipan̄. Membōr ro an ward ko̧o̧njeļ eo renaaj kanooj ko̧o̧njeļ ippān doon kōn ekōjkan aer maron̄ ilo em̧m̧antata jipan̄. Bisop ro renaaj kanooj ron̄jake n̄an ļōmņak ko im kōm̧m̧ani ijjitōn̄ ko.
Mijinede ro rej jerbal aolep raan rej kein jipan̄ ko rem̧m̧an n̄an ward ko ilo kijejeto ilo lo̧mo̧o̧r kein. Rej likao wōt im obrak kōn kajoor. Rej iakwe n̄an bōk juon laajrak in etan armej ro n̄an jerbal ippāer. Rejeļā ej iien ko rem̧m̧an kein n̄an kapok armej n̄an er. Rej kitarre n̄an kajutak aelōn̄ in kiin̄ eo an Irooj. Ewōr aer naan in kam̧ool ekajoor bwe renaaj eromļo̧k āinwōt Kraist ilo aer bōk kuņaer ilo kijejeto ko kein an lo̧mo̧o̧r.
N̄an kōjem̧ļo̧ke, imaroñ ke kwaļo̧k ñan kom̧ bar juon men eaorōk ettiņo jej lo ilo bwebwenato in. Ebed ilo eoon 5: “Ke Jisos ej lo aer tōmak,”(melele eaorok kar kobaitok). Iaar jab lo men kar moktaļo̧k–tōmak eo aer. Koba in tōmak ko ad ippān donn enaaj barāinwōt jelet em̧m̧an eo an ro jet.
Wōn armej ro Jisōs ej kōnono kaki? Emaron̄ kobain ro emān raar kotak ļeo eakā, ļeo emake, armej ro raar jar kake, armej ro raar ron̄jake kwaļo̧k eo an Jisōs im m̧ōņōņō ilo būruweer bwe en m̧ōkaj an waļo̧k kabwilōn̄lōn̄ eo. Emaron̄ bar kobatok eo pāleer, juon jinen ak jemān, juon nejin m̧aan ak kōrā, juon mijenede, juon būreejtōn an doulul, juon bōreejtōn an Doulul eo an Kōrā, juon bisop, im juon m̧ōttad ettoļo̧k Jemaron̄ aolep jipan̄ doon. Jej aikuj iien otemjej laudin̄din̄ ilo bōk kuņaad ilo pukōt n̄an lo̧mo̧o̧r ro rej pād ilo aikuj.
Ij kam̧ool bwe Jisōs Kraist ej juon Anij in menin bwilōñ. Jisōs Kraist ej iakwe kōj aolep im ewōr ippān kajoor ñan lo̧mo̧o̧r im kemour, jim̧or ilo ānbwin im jetōb. N̄e jej jipañ E ilo jerbal in An n̄an lo̧mo̧o̧ren jetōb ko, jenaaj barāinwōt lo̧mo̧o̧r ilo jekjek in. Ij kam̧ool ilo āt eo Etan ekwojarjar, em̧ool Jisōs Kraist, amen.