Un eo n̄an Kōjatdikdik eo Ad

Jān Būreejtōn Boyd K. Packer

Būreejtōn eo an Doulul eo an Jon̄oulruo Rijilōk ro

Naan in kam̧ool kōn kōjatdikdik eo kōn pinmuur eo ban joñe ak būne. Jisōs Kraist ej un jān kōjatdikdik jab in.

Jet iiō ko remootļo̧k, Sister Packer im n̄a komro ar etal n̄an Oxford University. Kōm kar pukōt ļo̧o̧k ko ļōļļap eo jim̧m̧aō kein kakijilimjuon. Eo kar jeban Christ’s College ilo Oxford, Dr. Poppelwell, eaar jouj n̄an kōm̧m̧an bwe rilale ļo̧o̧k eo an college eo ej bōktok ļo̧o̧k ko. Ilo ļo̧o̧k ko kar iiō eo 1583 kom̧ kar lo etan ļōļļap in etto eo jim̧m̧aō, John Packer.

Iiō eo tok ālik kōm kar bar ro̧o̧l n̄an Oxford n̄an bōkļo̧k juon kōro̧ro aiboojoj in jeje ko rekwojarjar n̄an ļaibrāre eo ilo Christ’s College. Āinwōt eaar jaad abur n̄an Dr. Poppelwell. Bōlen eaar jab ļōmņak bwe kōm kar lukkuun Rikirijin. Kōn menin eaar kūr jāāblen eo an college eo n̄an bōk bok ko.

M̧okta jān liļo̧k jeje ko rekwojarjar n̄an jāāblen eo, iaar kōpeļļo̧k Topical Guide eo im kwaļo̧k n̄an e juon unin kōnono: 18 peij, juon bok ekanooj em̧m̧an, single space, laajraki unin jipan̄ ko n̄an unin kōnono eo kōn “Jisōs Kraist.” Ej juon iaan eoon in jipan̄ ko ilo jeje ko rekwojarjar redipieo kōn unin konono eo kōn Rilo̧mo̧o̧r eo me kar aiini ilo bwebwenato an laļ—juon naan in kam̧ool jān Kallim̧ur M̧okta im Kallim̧ur Ekāāl, Bok in Mormon, Doctrine and Covenants, im Pearl of Great Price eo.

“Mekarta kwon ļoor eoon in jipan̄ kein,” iaar jiron̄ e, “rejet n̄an rejet, lōn̄ im laļ, bok n̄an bok, unin kōnono ālkin unin kōnono—kwonaaj lo bwe rej jokkuun wōt juon, ippān doon kam̧ool kōn kwōjarjar in mijen eo an Irooj Jisōs Kraist—ļotak eo An, mour eo An, katak ko An, Debwāal eo An, Jerkakpeje eo An, im Pinmuur eo An.”

Ālkin kwaļo̧ke n̄an jāāblen eo jet iaan katak ko an Rilo̧mo̧o̧r, mejatoto eo eaar oktak, im eaar kalooj kōm ilo m̧wiin, ekoba juon ro̧n̄ euno eo kar kōm̧m̧ane ilo tōre ko an RiRom.

Iubwilijin eoon in jipan̄ ko kar kōlaajraki ilo Topical Guide eo men in jān Bok in Mormon: Bar Juon Kallim̧ur kōn Jisōs Kraist: “Jej kōnono kōn Kraist, jej kwaļo̧k kōn Kraist, im jej jeje ekkar n̄an kanaan ko ad, bwe ro nejid ren maron̄ jeļā n̄an ia rej maron̄ reilo̧k n̄an jeorļo̧k jerawiwi ko aer.” (2 Nipai 25:26).

Ilo naan ko An make, Rilo̧mo̧o̧r eaar kwaļo̧k, “N̄a iaļ, im m̧ool, im mour. Ejjeļo̧k armej ej itok n̄an Jema, eļan̄n̄e jab kōn Eō” (Jon 14:6).

Im jān Bok in Mormon Ej kwaļo̧k, “Lo, N̄a, ij eo kar kōpooje jān pedped eo an laļ n̄an wiaik armej ro Aō. Lo, N̄a, Jisōs Kraist. … Ilo N̄a aolep armej naaj mour, im bwe indeeo, em̧ool er ro renaaj leke ioon Eta; im renaaj erom m̧aan im kōrā ro nejū” (Ether 3:14).

Eļap an lōn̄, elōn̄ wōt em lōñ eoon in jipan̄ ko jet ilo aolepān jeje ko rekwojarjar rej kwaļo̧k kōn jerbal eo ekwojarjar an Jisōs Kraist āinwōt Ripinmuur eo an aolep ro raar pād ak ro renaaj ļotak tok n̄an mour in.

Kōn Pinmuur eo an Jisōs Kraist aolepādwōj kar lo̧mo̧o̧ren jān Wōtlo̧k eo an armej, eo e kar waļo̧k ke Adam im Iv raar bōk leen wōjke eo kar kamo e ilo Jikin Kallib Iden, āinwōt an kōmlet ilo 1 RiKorint, “Bwe āinwōt ilo Adam ro otemjej rej mej, āindein barāinwōt ilo Kraist ro otemjej re naaj mour” (1 Korint 15:22).

Bok in Mormon ej katakin, “Bwe emennin aikuj bwe pinmuur eo en kar kōm̧m̧an …, n̄e jaab aolep armej reaikuj lukkuun jako; aaet, aolep kar penļo̧k; aaet, aolep raar wōtlo̧k im rej jebwābwe, im aikuj jako ijello̧kin wōt n̄e kōn pinmuur eo, … juon katok indeeo im ejjeļo̧k jem̧ļo̧kin” (Alma 34:9–10).

Jemaron̄ jab mour mour ko reweppān, im ewōr kaje n̄an bōd ko ad, bōtaab m̧okta jān ad kar itok n̄an laļ in, jaar errā n̄an pād iumwin kien ko An im n̄an bōk kaje eo kōn rubi kien kein.

“Bwe otemjej raar jero̧wiwi im rej likjab jān aiboojoj an Anij;

“Kowānōk er, im ejjeļo̧k oņān, ilo An jouj, kōn men in wiaik eo ej ilo Kraist Jisōs” (Ri Rom 3:23–24).

Rilo̧mo̧o̧r eo eaar jerbale Pinmuur eo, eo ej letok juon iaļ n̄an kōj bwe jen erreo. Jisōs Kraist ej Kraist eo eaar jerkakpeje. Jej kabun̄-jar im kile E kōn metak eo Eaar en̄taan kake n̄an kōj aolep im kōn metak eo Eaar dibuki n̄an kajjojo iaad, jim̧or ilo Jikin Kallib Gethsemane im ioon debwāāl eo. Eaar ineek men otemjeļo̧k kōn eļap ettā im kōn juon meļeļe indeeo kōn eddo im utiej eo An ekwōjarjar jān ijo ilan̄.

Ro renaaj ukweļo̧k im eļļo̧k jān jero̧wiwi renaaj lo bwe pein meanwōd eo An ej erļo̧k wōt. Ro rej ron̄jake im wujlepļo̧k n̄an naan ko An im naan ko an ro Rikarejeran renaaj bōk aenōm̧m̧an im meļeļe em̧ool ilo ioļapļap in eļap rupbōro im būrom̧ōj. Tōpar in en̄taan eo An ej n̄an kadeeor kōj jān jelet ko an jero̧wiwi me aolep remaron̄ jeorļo̧k bōd eo aer im en̄jaake kōjatdikdik.

N̄e Eaar jab kadedeļo̧k Pinmuur eo, enaaj kar ejjeļo̧k lo̧mo̧o̧r. Enaaj kar juon laļ epen mour ie eļan̄n̄e jejjab maron̄ in juļo̧k bōd ko ad, eļan̄n̄e jejjab maron̄ n̄an jidik karreoik kōj make im wōnm̧aanļo̧k.

Meanwōd im jouj an Jisōs Kraist rej jab n̄an ro me rej jero̦wiwi ko me rej kōm̧m̧ani ko rebōd ak jero̧wiwi ko me rej likjab n̄an kōm̧m̧an jabdewōt n̄an kajim̧we, bōtaab ej jepoole kallim̧ur in aenōm̧m̧an eo ejjeļo̧k jem̧o̧kin n̄an aolep ro renaaj bōk im ļoor E im katak ko An. An meanwōd ej riuno eo ekajoor, em̧ool armej eo me ekinejnej ak ejjeļo̧k ruōn.

Ejjab etto iaar bōk juon leta jān juon kōrā eo eaar kwaļo̧k ilo an kar dibuk eļap en̄taan ilo mour eo an. Juon bōd eļap, eo eaar jab kalikkare ak e kar nan̄in tipdiki, kar kōm̧m̧ane ņae e. Liin eaar kwaļo̧k bwe eaar alibanban kōn en̄jake ko kōn eļap matōrtōr. Ilo an illu, eaar kwaļo̧k, “Juon ej aikuj ņa wōņāān bōd nana in.” Ilo iien būrom̧ōj im n̄ūrbōktak in eļap, liin eaar je bwe eaar itok n̄an būruwōn juon uwaak em̧ōkaj, “Ewōr juon eo em̧ōj an dedeļo̧k an kōļļāiki.”

Eļan̄n̄e jejjab kile ta en̄taan eo an Rilo̧mo̧o̧r emaron̄ kōm̧m̧ane n̄an kōj, je maron̄ dibuk mour in im ineek ajļo̧k ko bwe jaar kōm̧m̧ane juon men me eaar jab jim̧we ak eaar kōmetak bar juon. Bōd eo me ej itok ippān bōd ko remaron̄ in kwaļi ļo̧k. Eļan̄n̄e jej kappukōt n̄an meļeļe Pinmuur eo An, jenaaj itok n̄an juon kautiej em̧wilaļ n̄an Irooj Jisōs Kraist, kwaļo̧k eo An ilo laļ in, im mijen eo ekwojarjar An āinwōt ad Rilo̧mo̧o̧r.

Kabun̄ eo an Jisōs Kraist im Armej ro Rekwojarjar ilo Raan-ko Āliktata kar kōjepļaaktok n̄an kajeded iaolepān laļ in jeļāļo̧kjeņ eo kōn mour im katak ko an Rilo̧mo̧o̧r. Kweilo̧k in em̧m̧an ej diwōjļo̧k ilo 94 kajin ko kōn satellite n̄an 102 laļ ko ak ej barāinwōt pād ilo Internet n̄an aolep laļ ijo Kabun̄ in ej pād. Ewōr ad 3,000 stake ko. Mijenede ro ad rej jerbal aolep raan etōpar 88,000, im oran membōr an Kabun̄ in emōj an ellā jān 15 milien. Oran kein rej jerbal āinwōt kein kam̧ool bwe dekā eo me kar m̧wijitļo̧k jān toļ eo kōn ejjeļo̧k pā ej dāpil ļo̧k wōt, im naaj āliktata kobrak aolepān laļ in (Lale D&C 65:2).

Bōtaab jekdo̧o̧n ewi ļap in doulul eo an Kabun̄ in ej erom ak ewi lōn̄ in milien ko in membōr ro rej koba tok ilo oran kein, jekdo̧o̧ņ ewi lōn̄ in laļ ko im jikin ko mijenede ro ad rej deļo̧n̄e ak ewi lōn̄ in kajin ko jej kōnono rokoktak, m̧ool in tōprak eo an gospel eo an Jisōs Kraist enaaj jon̄e jān kajoor in jetōb eo an kajjojo ro uwaan. Jej aikuji kajoor in lōke eo me loe ilo būruwōn aolep rikaļoor ro an Kraist em̧ool.

Naan in kam̧ool kōn kōjatdikdik eo an pinmuur eo ej juon men eo me ejjab maron̄ jon̄e ak būne. Jisōs Kraist ej unjān kōjatdikdik jab in.

Jej pukōt n̄an kōkajoor naan in kam̧ool ko an dik im rūtto, m̧are im jeļo̧k pāleen. Jej aikuj n̄an katakin gospel eo an Jisōs Kraist n̄an em̧m̧aan ro, kōrā ro, im ajri ro, ro jān aolep kūl im laļ, rim̧weie im rijeram̧ōl. Jej aikuji rioktak kāal ro im ro ibwilijid rej bwijjin bainiier ro ad. Jej aikuj in pukōtļo̧k ro em̧ōj aer jebwābwe im jipan̄ er n̄an bar ro̧o̧l tok n̄an oror in. Jej aikuj māletlet eo im ļōmņak eo im kajoor ilo jetōb eo an kajjojo. Kajjojo uwaan Kabun̄ in ej juon mōttan eo eaorōk an Kabun̄ in.

“Bwe āinwōt ānbwin e juon wōt, im elōn̄ raan, a aolepen raan ānbwin men̄e re lōn̄ rej juon wōt ānbwin; āindein barāinwōt Kraist.

“Bwe ilo juon Jetōb em̧ōj peptaij kōj ilo juon ānbwin. …

“Bwe ānbwin e jab juon ra, a elōn̄” (1 Korint 12:12–14).

Kajjojo uwaan rej jerbal āinwōt naan in kam̧ool kōn mour im katak ko an Jisōs Kraist. Jej pād ilo tariņae ippān kajoor ko an rijum̧ae eo, im jej aikuji doon im aolepādwōj eļan̄n̄e jenaj aikuj wejepedik ilo jerbal eo ad Rilo̧mo̧o̧r eaar likit n̄an kōj.

Komaron̄ ļōmņak, “Ta imaron̄ kōm̧m̧ane? N̄a ij juon wōt armej.”

Em̧ool Joseph Smith eaar en̄jake an lukkuun make ilo jet iien. Eaarjerkak n̄an an wōj, bōtaab eaar ijjino āinwōt juon laddik 14-iiō dettan eo me eaar wōr juon an kajjitōk: Ewi wōt kabun̄ eo ej aikuj kobaļo̧k n̄an e?” (lale Joseph Smith–History 1:10). Tōmak im naan in kam̧ool eo an Joseph kōn Rilo̧mo̧o̧r eaar eddōkļo̧k āinwōt eo ad eaikuj eddōkļo̧k, “lain im bar lain, naan in kain̄i im bar naan in kain̄i, ijin jidik im ijuweo jidik” (2 Nipai 28:30; bar lale D&C 128:21). Joseph eaar bukwelōlō n̄an jar, im ta men ko rekabwilōn̄lōn̄ raar waļo̧ktok āinwōt tōprak in jar eo im Visōn Eo Motka.

Āinwōt juon iaan Rijilōk ro Jon̄oulruo, ij kwaļo̧k kam̧ool kōn Irooj Jisōs Kraist. Ej mour. Ej ad Ripinmuur im ad Rilo̧mo̧o̧r. “Kin En̄tan eo an Kraist, aolep armij renaj bōk lomor” (Laajrak in Tōmak 1:3). E ej tōl Kabun̄ in an. E ejjab ruwaimejet n̄an ro Rikarejeran. Ilo ad wōnm̧aanļo̧k n̄an ilju im jekļaj kōn lōke elur, An Jetōb enaaj pād ippād. Ejjeļo̧k jem̧ļo̧kin n̄an An kajoor n̄an kōjeram̧m̧an im tōl mour ko an ro rej kapukōt m̧ool im jim̧we eo. Ij kam̧ool kōn E ilo etan Jisōs Kraist, amen.