Kepaakļo̧k Aiboojoj eo an Anij kōn Leke
Jān Elder Jörg Klebingat
Jen Jiljilimjuonn̄oul eo
N̄an bōk Pinmuur eo an Jisōs Kraist ilo am maron̄ jino kōļapļo̧k mour in jetōb eo am̧ rainin eļan̄n̄e kwoj kōnaan ron̄jake im jerbale.
Ilo juon jon̄jon̄ jen 1 n̄an 10, ekōjkan am̧ jon̄e ewi jon̄an mour in jetōb eo am̧ im̧aan Anij? Ewōr ke juon am̧ make kam̧ool bwe kwoj menin leļo̧k eo ekāāl āinwōt juon Armej eo Ekwojarjar ilo Raan-ko Āliktata ebwe n̄an jolete mour indeeo? Komaron̄ ke jiron̄ eok make bwe Jemedwōj Ilan̄ ej m̧ōņōņō ippam̧? Ta ļōmņak ko rej itok n̄an kōļmenļo̧kjeņ eļan̄n̄e kwon kar kōm̧m̧ane juon am̧ make intōrpiu ippān am̧ Rilo̧mo̧o̧r juon minit jān kiiō? En kar ke jerawiwi, pere, im likjab ekakkure paotokum̧, ak kwon kar ke lukkuun m̧ōņōņō? Kwon kar ke ioon ak kalimjōk wōt E? Kwon kar ke pād wōt ilo kōjem eo ak jipadek ļo̧k E?
Men̄e rikapo eo eban bōk jab wānōk eo ro Rekwojarjar rej kajjieon̄ āinwōt am kwaļo̧k tōmak eo am̧ ilo juon wāween enojak im iakwe Anij, ej kōjerbal juon kareel n̄an kōmetak kepaake ikōtaam̧ im Anij. Rikapo eo ejeļā bwe ilo Kraist―kain tōmak eo ej kale kōn būruwōn tiriam̧o kake im kabwilōn̄lōn̄ ko rekajoor―rej etal ippān doon ļo̧k kōn leke an juon make me kwoj kajjieon̄ in kālet jim̧we eo. Kōn un in enaaj pukot kilen an deļo̧n̄e būruwōm̧ n̄an ba riab ko n̄an eok―riab ko bwe Jemedwōj Ilan̄ ej illu ippam̧, bwe Pinmuur eo epen tōpare, bwe ejjeļo̧k unin ad kajjieon̄, bwe ro jet rem̧m̧an ļo̧k jen kwe, bwe kwoj jab erreo, im taujin okoktak ko kōn unin kōnono in enana.
Toon wōt am kōtļo̧k an ainikien kein kūnōōrļo̧k jetōb eo am̧, kwojjab maron̄ kepaak aiboojoj eo an Anij kōn eļap leke. Jekdo̧o̧n ta eo kwoj kōm̧m̧ane, jekdo̧o̧n ta eo kwoj jar kake, jekdo̧o̧n kōjatdikdik ta ko am kōn kabwilōn̄lōn̄, aolep iien enaaj wōr wōt pere eo enaaj kūnōōrļo̧k tōmak eo am̧―ejjab tōmak eo wōt am̧ ilo Anij, ak leke eo ilo kwe make. Mour kōn gospel in ilo jekjek rōt in ejjab kōjak, ak elukkuun kemourur. Ilōn̄in aolep men, ejjab bwe! Kālet eo n̄an oktak ej am̧― im am̧ make.
Ikōņaan kwaļo̧k jiljino elmakwot ko me, eļan̄n̄e eo̧ron̄i, naaj mijaļ ainikien kein im kōjepļaak waj kain aenōm̧m̧an eo im mour in jetōb eo me ej am̧ eļan̄n̄e kwoj kōņaan bōke wōt. Jekdo̧o̧n ewi jon̄ak eo kwoj jon̄e eok jen 1-n̄an-jon̄oul, n̄an bōk Pinmuur eo an Jisōs Kraist, ilo am maron̄ jino kōļapļo̧k mour in jetōb eo am̧ rainin eļan̄n̄e kwoj kōnaan ron̄jake im jerbale. Inaaj peran ilo kōnono, kōtmene n̄an ļōn̄aj im jab ilo kamijak.
1. Bōk eddo kōn mour in jetōb eo am̧ make. Bōk eddo in mour in Jetōb eo am̧ make. Bōjrak am̧ ņa ruom̧ make ak jōkjōk eo kwoj pād ie, bōjrak kapenjak bōd ko, im bōjrak kōm̧m̧an jekpen ko kōn etke kwoj jab maron̄ lukkuun niknik n̄an pokake. Jeļā bwe kwoj “anemkwoj ekkar n̄an kanniōk” im “anemkwoj n̄an kālōt anemkwoj im mour indeeo” (2 Nipai 2:27). Irooj elukkuun jeļā kōm̧m̧an ko am̧, im barāinwōt elukkuun jeļā n̄e kwoj kālet n̄an jab mour kake gospel in. Eļan̄n̄e wāween eo in, kwon m̧ool im kwaļo̧k e, im kajjieon̄ in karbab ilo kōm̧m̧an ko am̧. Mour in jetōb ej ļapļo̧k n̄e kwoj bōk eddo n̄an mour in jetōb eo am make n̄an bōk Pinmuur eo Jisōs Kraist.
2. Bōk eddo kōn mour in kanniōk eo am̧ make. Jetōb eo am̧ ej kobain ānbwinnūm̧ im jetōb (lale D&C 88:15). Naajdik am ilo an kejo̧o̧l ānbwiin, eo ej tampeļ, ekkā an tōl ļo̧k n̄an m̧ōjņo̧ ilo jetōb im adim̧akoko. Eļan̄n̄e kom̧ōjņo̧, kodim̧akoko ilo ānbwinnūm̧ make im komaron̄ kōm̧m̧an jabdewōt kake, innām kōm̧m̧ane! Elder Russell M. Nelson eaar kwaļo̧k bwe jej aikuj kōm̧m̧an “ekkar n̄an ānbwinnūd āinwōt juon tampeļ kōn kōj make” im bwe jej aikuj “kōjparok ad kaidikdik im em̧akūtkū n̄an kejemouruur” ( “ We Are Children of God,” Ensign, Nov. 1998, 87; Liahona, Jān. 1999, 103).
Būreejtōn Boyd K. Packer eaar kwaļo̧k bwe “jetōb im ānbwinnūd rej koba ilo juon lōm̧lōm̧ eo me ānbwinnūd ej erom juon kein jerbal ilo kōļmenļo̧kjeņ eo ad im pedped in paoktok eo ad” (“The Instrument of Your Mind and the Foundation of Your Character,” [Church Education System fireside, feb. 2, 2003], 2; speeches.byu.edu). Kōn menin, jouj im kōjerbal ekajet ta eo em̧m̧an im eļaptata ewi jon̄an am m̧ōn̄ā im ākjeerjaij eo ānbwinnūm̧ eaikuji. Eļan̄n̄e komaron̄e, kālet rainin n̄an jeban e m̧weo m̧ōm̧ make im jino kōmakijkiji, būrookram̧ in ākjeerjaij eo eaitok kitien, ekkar n̄an maron̄ ko am, kobain ļo̧k ippān juon kaidikdik eo ewāmouruur. Mour in jetōb ej kajoor ļo̧k n̄e jetōb eo am kōn jipan̄ eo an Rilo̧mo̧o̧r, eo ej lukkuun tōl pitkokin armej an em̧m̧aan im kōrā.
3.Bōk baļentier, būruwōn pokake en mōttan mour eo am̧. Meļeļe bwe koban iakwe Anij eļan̄n̄e koban barāinwōt pokake kien ko An. Jon̄ak eo an Rilo̧mo̧o̧r ealikkar im epidodo: “Eļan̄n̄e kom̧ij yokwe Eō, kōparok kien ko aō” (Jon 14:15). Pokake ko retinkwadik rej bōk tok kōjeram̧m̧an ko retinkwadik, im kālet men ko renana ilōn̄in men eo enana tata ej bōd. Kwojjab maron̄ aloje juon pija eo enana im kōtmene ke ej em̧m̧an wōt kōnke kwar jab aloje ijo elukkuun nana. Ritōmak eo n̄an kien ko ejjab kowan kien ko jet. Abraham Lincoln eaar ba: “N̄e ij kōm̧m̧an em̧m̧an ij en̄jake m̧ōņōņō, n̄e ij kōm̧m̧an nana, ij būrom̧ōj” (in William H. Herndon and Jesse William Weik, Herndon’s Lincoln: The True Story of a Great Life, 3 vols. [1889], 3:439).
Barāinwōt, kōm̧m̧ani men ko rem̧m̧an n̄an un ko ewōr tokjeir. Irooj, eo eaar “aikuji juon bōro im juon kōļmenļo̧kjeņ in wūjlepļo̧k” (D&C 64:34) im ej juon eo ejeļā ļōmņak ko im kōņaan ko an bōro (laleD&C 33:1), jeļā etke kwoj etal n̄an jar― im n̄e kwoj jade kōn ānbwinnūm̧ ak kabun̄jar ilo m̧ool. Koba al ilo raan in Jabōt, “O Babylon, O Babylon, [I] bid thee farewell” innām pukote ak jurake tok ālik (“Ye Elders of Israel,” Hymns, no. 319). Kememej bwe jerwane men ko an jetōb rejamin lo m̧ōņōņō. Kōm̧m̧an bwe Kabun̄ in im jepļaaktok eo an gospel in en m̧ōttan mour eo am, kālet rainin wōn eo kwoj jerbal n̄an e ilo naan−m̧ae kwonaaj lukkuun mour kake (laleJoshua 24:15). Mour in jetōb ej ļapļo̧k n̄e kwoj lukkuun kajieon̄, n̄an wun ko rejim̧we, n̄an mour juon mour ekwojarjar ilo mour in jab wānōk ko am!
4. Lukkuun kwaļo̧k, ukweļo̧k eo edipio im elukkuun m̧ōkaj. Kōnke Pinmuur eo an Jisōs Kraist elukkuun in wōr tokjeņ, kwoj aikuj mour kake 24/7, bwe ejamin bōjrak. Bōk Pinmuur eo an Jisōs Kraist im ukweļo̧k āinwōt jet men me ej karuwaineneik tok im mour kake kajjojo ekkar n̄an kajjitōk ko an Taktō eo Eļap. Ejaake juon elmakwot in, m̧ōņōņō, ukweļo̧k eo elem̧ōņōņō n̄an kōm̧m̧ani ilo kālet in mour eo am. N̄an kōm̧m̧an āindein, kwon ekkōļ ņae kapo n̄an jutak ņae, im jab kōtļo̧k an laļ in kam̧ōņōņōik eok. Mije māj ko mājami n̄an Rilo̧mo̧o̧r eo, en ļapļo̧k kea kōn ta eo Ej ļōmņak kake kom̧, im kōtļo̧k an jekjek ko waļo̧k. Mour in jetōb ej ļapļo̧k n̄e kwoj baļentier im m̧ōņōņō in ukweļo̧k jen jerawiwi ko reddik im reļļap jim̧or ilo juon iien eo em̧m̧an n̄an bōk Pinmuur eo an Jisōs Kraist.
5. Lukkuun kwaļo̧k, em̧m̧an ilo iien jeorļo̧k bōd. N̄a, Irooj, naaj jeorļo̧k an eo Ij jeorļo̧k an bōd (laleD&C 64:10). Jeorļo̧k an aolep bōd, aolep men otemjeļo̧k, aolep iien otemjeļo̧k, ak kajieon̄ kōm̧m̧an āindein, kōm̧m̧an bwe jeorļo̧k bōd en pād ilo mour eo am̧. Jab dāpij kōjdāt, jab inepata, m̧ōkaj in jeorļo̧k bōd im meļo̧kļo̧k e, im jab ļōmņake bwe kwoj etto ļo̧k jān kien in. Mour in jetōb ej ļapļo̧k n̄e kojeļā ke Irooj ejeļā bwe kwojjab ineek en̄jake ko rekurbaleklek ņae bar jet jetōb.
6.Bōk mālijon̄ ko, apan̄ ko, im “bwilōn̄ ko” rej m̧ōttan mour wabanban in ami. Kememej bwe kwoj pād ijin n̄an idajon̄jon̄ im mālijon̄, n̄an lale eļan̄n̄e [kom̧] naaj kōm̧m̧ani aolep men ko Irooj [ami] Anij enaaj kean̄ kom̧ (laleAbraham 3:25)—im imaron̄ ke kobaiki, “ium̧win aolep kōm̧m̧an.” Milien iaan ro jeid im jatid em̧ōj aer kar ak kar ioon mālijon̄, kōn menin etke kwoj etale? Jet apan̄ rej waļo̧k jen jab pokake eo am make ak jowan. Jet apan̄ rej waļo̧k kōn kōjekdo̧o̧n ro jet ak kōn an laļ in juon laļin jata. N̄e apan̄ kein rej waļo̧k, jiep ko m̧ōttan rikapo eo rej jino ba n̄an eok ke kwar kōm̧m̧an jet men rebōd, bwe ej juon kaje, juon kōklaļ bwe Jemedwōj Ilan̄ ejjab iakwe eok. Jab kōm̧m̧ane! Ijoke, kajieon̄ kwaļo̧k juon mejen ettōn̄ dikdik, reilōn̄ ļo̧k, im ba, “Imeļeļe, Irooj. Ijeļā ta in. Juon tōre in idajon̄jon̄ eō make, ejjab ke?” Innām jem̧jerā Ippān n̄an lukkuun niknik n̄an jem̧ļo̧kin. Mour in jetōb ej ļapļo̧k n̄e kwoj bōk “apan̄ ko im inepata ko remakijkij aer waļo̧k n̄an [mour eo am] kōn ta eo [kwoj] kōm̧m̧ane ejim̧we ” (Glenn L. Pace, “Crying with the Saints” [Brigham Young University devotional, Dec. 13, 1987], 2; speeches.byu.edu).
Ke iaar tōl ilo Ukraine Kyiv Mission, ekkā aō kajjitōk ippān juon iaan sister ro retiljek etke aolep iien epen n̄an e, etke aolep iien ej diplo̧ke men ko reddik. Uwaak eo an eaar juon waanjon̄ok an eo ej ron̄jake ainikien eo ebōd ilo an uwaak, “Bwe en ejjeļo̧k juon enaaj jum̧aik eō.”
Ro jeiū im jatū, aō naan in kōkapilōklōk n̄an sister mijinede in ej aō naan in kōkapilōklōk n̄an kom̧: kile im mije m̧ōjņo̧ ko am, bōtaab jab kōjekdo̧o̧ni, kōnke jet iaer renaaj am m̧ae konaaj ilo̧k jān mour in. Jekdo̧o̧n jekjek rot eo am kiiō, ilo iien eo wōt kwoj kālet m̧ool, m̧ōņōņō, ukweļo̧k kajjojo raan n̄an kajieon̄ in kōm̧m̧an ijo em̧m̧antata ilo kwe, kōn Pinmuur eo an Rilo̧mo̧o̧r, āinwōt an kar, enaaj jepo̧o̧ļ im ļoor eo jabdewōt ijo kwoj etal ļo̧k. Mour ilo wāween in, komaron̄ in lukkuun “aolep iien bōk juon jeorļo̧k in jerawiwi ko am” (Mosaia 4:12) kajjojo awa ilo kajjojo raan, kajjojo jekōn in kajjojo minit, im aaet lukkuun erreeo im kōrbab im̧aan Anij ilo aolep iien otemjeļo̧k.
Iien em̧m̧an ej am, eļan̄n̄e kwoj kōņaan, n̄an itok n̄an jeļā kōn eok make, raanin ak tokālik, bwe kwoj kam̧ōņōņōik Anij jekdoon n̄e elōn̄ am likjab. Ij kam̧ool kōn juon Rilo̧mo̧o̧r eo eiakwe eo ekōņaan bwe jen mour kake kien ko. Ij kam̧ool kōn juon Rilo̧mo̧o̧r eo eiakwe eo ej lukkuun m̧ōņōņō in lutōkļepļep An tiriam̧o kake im jouj. Ij kam̧ool kōn juon Rilo̧mo̧o̧r eo eiakwe eo ej m̧ōņōņō n̄e jej bōk Pinmuur eo An kajjojo raan kōn juon jokne im m̧ōņōņō eo etinkwadik me jej jeļm̧aiki ilo iaļ eo ejim̧we. Ij kam̧ool kōn juon Rilo̧mo̧o̧r eo eiakwe eo ej m̧ōņōņō kōn leke eo am [n̄an] peran ilo im̧aan mejen Anij (laleD&C 121:45). Ilo etan Jisōs Kraist, amen.