M̧ae Iien Jenaaj Bar Lo Doon
Jān Būreejtōn Thomas S. Monson
Jen aolep kejōkļo̧kjeņ kōn m̧ool ko jekar ron̄, im ij kōtmene bwe renaaj jipan̄ kōj erom im ļapļo̧k ad peran āinwōt rikaļoor ro jān ke jekar āinwōt m̧okta jen ke kweilo̧k in eaar jinoe.
Em̧m̧an im kōrā ro jeiū im jatū, em̧ōj ad en̄jake ruo raan ko raiboojoj kōn ennaan ko reim̧we. Būruwōd em̧ōj aer un̄ūr im tōmak ko ad em̧ōj aer kōkajoorļo̧k ilo ad kar bōk Jetōb eo ekar pād ilo m̧wein̄an ko ilo kweilo̧k in. Ilo ad kōjemļo̧ke, jej kam̧olol Jemedwōj Ilan̄ kōn kōjeram̧m̧an ko an rellōn̄ n̄an kōj.
Em̧ōj aer ebōkak im im̧we jen al ko rem̧m̧an kar būktoki ilo m̧wen̄an ko. Jar ko kar kōm̧m̧ani kar kepaakļo̧k kōj n̄an lan̄.
Imaron̄ ke kwaļo̧k būruwōn kam̧m̧olol eo an aolepān kabun̄ in n̄an em̧m̧an ro em̧ōj kōtļo̧k er jen iien jerbal ko aer ilo kar iien kweilo̧k in. Jenaaj emeļo̧ke er. Ijoko koņaer n̄an jerbal eo an Irooj eļap aer eļļap im naaj en̄jake ilo aolepān epepen ko rej itok.
Jen ro̧o̧l n̄an m̧oko im̧ōd kōn juon uwaak ilo buruwōd n̄an ad em̧m̧anļo̧k jidik jen ke jekar m̧okta. Jen jouj ļo̧k jidik im ļapļo̧k ad jeļā koņaad. Jen diwōjļo̧k ilo ad jeļā jipan̄, ejjab wōt n̄an membōr ro ad ak bar āinwōt n̄an ro rejjab jen tōmak in ad. Ilo ad iaieo ippāer, jen kwaļok ad kautiej n̄an er.
Ewōr ro rej apan̄ aolep raan kōn melijjon̄ ko. Jen kobaļo̧k ippāer ilo apan̄ kein aer, barāinwōt pein jipan̄ ko ad. Ilo ad lale doon, jenaaj jeram̧m̧an.
Jen kememej rūtto ro im ro rej pād wōt m̧oko, Ilo ad bōk iien ko ad im loļo̧k er, renaaj jeļā ke ewōr ej iakwe er im eļap aorōk ko aer. Ij kōjatdikdik ke jenaaj ļoor kean̄ eo bwe jen aikuij jipan̄ rim̧ōjņo ro, kotak pā ko rōm̧ōjņo̧, im jipan̄ bukie ko rōm̧ōjņo̧. (lale D&C 81:5). 1
Jen armej in m̧ooļ im mour jim̧we, kajjeon̄ kōm̧m̧ane men eo ejim̧we aolep iien im ilo jabdewōt wāween. Jen lukkuun rikaļoor ro an Kraist eļap aer tōmak, waanjon̄ak in mour erreo, ekōm̧m̧an bwe jen erom “meram ko ilo laļ.”2
Em̧m̧aan im kōrā raņ jeiū im jatū, ij kam̧m̧olol kom̧ kōn jar ko ami n̄an n̄a. Rej kōkajoor eō im kotak eō ilo aō kajjieon̄ kōn aolepān būruwō im aō kajoor n̄an kōm̧m̧ane kōņaan eo an Irooj im jerbal n̄an e im jerbal n̄an kom̧.
Ilo ad ilo̧k jen iien kweilo̧k in, ij kūr ioon kōjeram̧m̧an ko an lan̄ ioomi wōj kajjojo. Ij kōjatdikdik ke kōm ro rōttōļok jen m̧oko m̧ōmi komin jepļaak n̄an ami baam̧le ilo jokne im kōm̧m̧an men otemjej bwe ren em̧m̧an. Jen aolep kejōkļo̧kjeņ kōn m̧ool ko jekar ron̄, im ij kōjatdikdik renaaj, jipan̄ kōj erom rikaļoor ro an eļap aer peran jen ke kweilo̧k in ekar jinoe.
M̧ae iien jenaaj bar lo doon ilo jiljino allōn̄, ij kajjitōk bwe kōjeram̧m̧an eo an Irooj en pād ioomi im, ilo m̧ool, en pād ippād wōj aolep, im ij kōm̧m̧ane men in ilo āt eo etan ekwojarjar—eo ej Jisōs Kraist, ad Irooj im Rilo̧mo̧o̧r—amen.