Karuwainene n̄an Kweilo̧k eo

Jān Būreejtōn Thomas S. Monson

Ilo ad ron̄jake, kōm̧m̧an bwe būruwōd en en̄jake im ad tōmak en eddōkļo̧k.

Ro jeiū im jatū, ij m̧ōņōņō in karuwaineneiktok kom̧ n̄an kweilo̧k in eļap ilaļ in. Jej kobatok ippān doon ilo jikin ko peļaakin laļ in n̄an ron̄jake im katak jān em̧m̧aan im kōrā rein ro jaar rejtak er āinwōt Ritōl ro Routiej im opiija ro reļļap an Kabun̄ in. Raar pukōt jipan̄ jān lan̄ kōn ennaan ko renaaj kwaļo̧ki, im raar en̄jake im̧we kōn ta ko renaaj ba.

Kweilo̧k in ej kōkkaļļeik 90 iiō keememe kadiwōjļo̧k ko ilo retio an kweilo̧k eo eļap. Ilo Kweilo̧k eo ilo Oktoba eo ilo 1924, m̧wein̄an ko rekar diwōjļo̧k ilo retio kar kein kajuon jān KSL eo an kar Kabun̄ in. Kweilo̧k in barāinwōt ej kōkkaļļeik 65 iiō keememe in kadiwōjļo̧k ko ilo taļbejen an kweilo̧k. Ilo kweilo̧k in eļap eaar kōm̧m̧an ilo Oktoba 1949, m̧wein̄an ko rekar kein kajuon pād ilo taļbejen ipeļaakin bukwōn ko ilo Salt Lake ilo taļbejen an KSL.

Jej kile kōjeram̧m̧an kein an kein jerbal kein raan kein ilo aer kōtļo̧k an milien membōr ro an Kabun̄ in alooje ak ron̄jake kweilo̧k eo eļap. M̧wein̄an ko jem̧ļo̧kin wiik in rej diwōjļo̧k imejatoto ilo taļbejen, retio, kebōļ, jetļait, im Intōrnet, ekoba ilo taļboon ko.

Ilo kar allōn̄ ko jiljino rem̧ootļo̧k jān ke jaar iioon doon, juon tampeļ ekāāl eaar aje im juon kar bar aje. Ilo Māe eo Būreejtōn Dieter F. Uchtdorf eaar aje Fort Lauderdale Florida Temple. Juon kōjeram̧m̧an ilo m̧anit em̧m̧anmōn an jodikdik ro kar ikkure kake m̧okta jān iien aje eo. Raan eo juon, ilo Jabōt, Māe 4, tampeļ eo ekar aje ilo jilu m̧wein̄an ko.

Ruo wiik ko rem̧ootļo̧k ikar jeram̧m̧an n̄an bar aje Ogden Utah Temple, m̧oktata kar aje ilo 1972 jān Būreejtōn Joseph Fielding Smith. Juon kōjeram̧m̧an ilo m̧anit eaar bōk jikin raan eo m̧okta jān bar aje eo, ippān elōn̄ jodikdik ro raar bōk koņaer ilo ruo ikkure ko rejenolo̧k kar ikkure kaki, ippān juon kumi in rikkure n̄an kajjojo. Ilo aolep ikkure ko, 16,000 jodikdik ro raar bōk koņaer. Bar aje in eaar bōk jikin raan eo juon, ippān elōn̄ Em̧m̧aan ro Rejitōn Bōro raar bōk koņaer, ippān tok ritōl ro an doulul ko an kōrā ro im būreejtōn eo an tampeļ, rikakpilōklōk ro an, im kōrā ro pāleer.

Ad ekkal tampeļ ej wōnm̧aanļo̧k ilo kajoor. Allōn̄ in laļ Phoenix Arizona Temple eo ekāāl enaaj aje, im iiō in tok, ilo 2015, jenaaj aje ak bar aje diktata ļalem tampeļ ko, im bōlen elōn̄ļo̧k n̄e emaron̄, pedped wōt ioon aer dedeļo̧k.

Āinwōt kar kwaļo̧k ilo Eprōļ, ke aolep tampeļ ko kar kōjjeļļāik m̧oktaļo̧k rej ekkal im aje, enaaj wōr ad 170 tampeļ ko rej jerbal ipeļaakin laļ in. Kōnke jej ļōmņak wōt kōn kijejeto ko ilo kadedeļo̧k tampeļ ko emōj kar kōjjeļļā kaki, ilo kiiō jej jab kōjjeļļā kōn jabdewōt tampeļ ko rekāāl. Bōtaab, ilju im jekļaj, ilo ad etali aikuj ko im lale ia jikin ko, lōn̄ļo̧k in tampeļ ko naaj bar kōjjeļļā kaki iien aer ekkal.

Kabun̄ in ej wōnm̧aanļo̧k im eddōkļo̧k. Kiiō emōj ad eļļā ļo̧k jān 15 milien nōm̧ba ko rekajoor im rej ļapļo̧k. Jerbal in mijenede eo ad ej wōnm̧aanļo̧k wōt im jab likjab. Ewōr ippād ilōn̄ļo̧k jen 88,000 mijenede ro rej jerbal, kwaļo̧k enaan in gospel ilaļ in. Jej bar āliji bwe jerbal in mijenede ej juon eddo an priesthood, im jej rōjan̄ aolep likao ro rerreo im kajoor n̄an jerbal. Jej kam̧oolol kōn jiron̄ ro rej barāinwōt jerbal. Rej kōm̧m̧ane juon jipan̄ em̧m̧anmōn, men̄e rej jab pād ium̧win ejja kien in n̄an jerbal āinwōt likao ro.

Kiiō ij karuwaineneiktok kom̧ n̄an ron̄jake em̧m̧aan ro rejitōn bōro im kōrā ro renaaj bōk koņaer rainin im ilju ilo m̧wein̄an ko an kweilo̧k in ad. Aolep ro kar kajjitōk ippāer n̄an konono rej en̄jake juon eddo eļap ilo kōm̧m̧ane wāween in. Ilo ad ron̄jake, būruwōd en en̄jake im ad tōmak en ļapļo̧k, ilo ettā ij jar ilo etan Jisōs Kraist, amen