Jab Kōjōkdo̧o̧n Men ko Rekwōjarjar
Jān Elder Larry S. Kacher
Jān Doulul eo an Jiljilimjuonñoul
Etale kālet ko am jān kajjitikin eok make kajjitōk in, “Kālet ko rej ke dim im tōt ilo bwidej eo eun̄e an gospel eo an Jisōs Kraist?”
Ro jeiū im jatū, kālet ko jej kōm̧m̧ani ilo mour in eļap aer jelet wāween ad mour indeeo. Ewōr un ko jej loi im ko jejjab loi im rej kōm̧m̧an unin ad kōm̧m̧ani kālet ko ad. Menin ekar waļo̧k im̧weo m̧ōm enañin lalem iiō ko remootļo̧k.
Kōm kar ito itak ippān ro nukum im m̧ōttam iturōkin Oman. Kōm kar lōmņak in kakkije ioon bok ko iaar ilo bārijet in Indian Ocean. Ālkin am bo lok, leddik eo nejim 16 an iiō, Nellie, ear kajjitōk elan̄ñe emaron̄ kar aō lok ñan juon jikin ekapokpok. Ilak lale eļap ņo, iba ñane ke ij iļo̧k imaan, ikar lōmnak enaaj kar lap an aeet.
Jidik iien tokālik ke ij aōō, iar ikkūr lok ñan ippān kōra eo ippa im kajjitōk eļan̄ñe iepake lok bok eo. Kar uwaak eo an, ‟em̧ōj am̧ ļe jāne.” Iaar jaje ke iaar po1 ilo juon aaet im kar kinōōrlok eō ñan lokilmeej.
Iaar jab jeļā ta in kōm̧m̧ane. Men eo de eo imaroñ kar ļōmņake ej bar ro̧o̧l im aaō āneļo̧k. Men eo ebōd tata bwe in kōm̧m̧ane. Iaar eñjake aō ban maroñ bar tōbrak. Aaet eo ekajoor jen aō maroñ im ej kinōōr metoļo̧k wōt eō. Men eo enanaļo̧k bwe kōrā eo ippa eaar tōmak bwe ejimwe kālet eo aō im loor tok eō.
Ro jeiu im jatu, iaar lōmņak juon men eļap enaaj waļo̧k im bwe iban mour im bwe ña, kōnke kālet eo aō, enaaj kar kōm̧m̧an an kōrā eo ippa bar mej. Ālkin aō kate eō im ij tōmak bwe kōn jibañ jen lañ, neem emaroñ kar uñur ioon lūm ijo ekapokpok im kar maroñ bar jeplaak ñan ippān ro mōttam im leddik eo nejim.
Eļap an lōñ aaet ko ilo mour in ilo lal in—jet rōm̧m̧an ak jet rejjab. Būreejtōn Spencer W. Kimball ear katakin bwe ewōr kapo ko rōkajoor ilo mour ko ad im āiierļōk wōt aaet ilojet jejjab loi.2 Kajoor kein rej lukkuun m̧ool. Jejjab aikuj mad jāni.
In ba kōn bar juon kain aaet, aaet jen lañ, eo erom jeram̧m̧an ilo mour e aō. Ikar oktak tok ñan Kabuñ in. Mokta wōt jen aō kar oktaktok, itoklimo eo aō ilo mour ej jikeet ilo aij im, kōn kōņaan eo, iaar emm̧akūtļo̧k ñan Europe ālkin high school ñan kakūrmool ikdeelel eo. Ālkin jet allōñ in aō ped bajjōk, iaar lōmnak bwe iakuj emmakūt. Tōre eo ijjan̄in jelā ta eo ij eñjake, ak iaar kālet bwe in loor e. Ikar itok ñan Provo, Utah, ippān jet mōtta rōmman, āinwōt bar ña, uwaan bar jet kabuñ ko.
Ke ij pād ilo Provo, iaar iion armej ro eļap an oktak ļo̧k mour ko aer jen ña. Iaar kōnan pād ippāer ak ijaje ebajet. Mokta, ikar makoko, ak ejab to iaar lo aenōm̧m̧an im m̧ōņōņō eo iaar jab jelā kake. Iaar jino iakwe aaet in eoktakļo̧k—eo eaar kōm̧m̧an aō maroñ meļeļe kake Jemedwōj Ilan̄ eo ej iakwe im Nejin, Jisōs Kraist.
Iaar peptaij ippān ro mōtta ilo 1972. Iaar ļoor aaet in ekāāl, gospel eo an Jisōs Kraist, eaar letok ial im meļeļe ñan mour eo aō. Bōtaab, ejjab bwe en ejjelok māllejjoñ ko ie. Aolep men raar kāāl ñan ña. Mokta iaar jōbwebwe im pok. Kajjitok im māllejjoñ kar itok jimor jen ro nuku im mōtta.
Ewōr aō kālet n̄an kōm̧m̧ane.Jet iaan kajjitōk ko aer raar ejaak pere im jajeļo̧kjeņ. Kālet eo ekar juon men aorōk. Ia imaron̄ jipadōk ļok n̄an uwaak ko? Elōn̄ ro rekōņaan kabbweer eō kōn bōd in wāween aō makūtkūt—‟aeet” kejokļo̧kjeņ n̄an kinōōr laļļo̧k jān aaet in aenōm̧m̧an me ekar erom unin m̧ōņōņō em̧m̧an. Ealikkar aō ekkatak kōn katak eo, ejjeļo̧k ‟jum̧ae ilo men otemjej” im aorōkin jerbal n̄an n̄a make im im jab meļo̧kļo̧k anemkwoj eo aō n̄an ro jet.3
Ikar kajjitōk ippa make, ‟etke iaikuj oktakļo̧k jen ta eo ej letok aenōm̧m̧an in elap?” Āinwōt an Irooj kakememej Oliver Cowdery, Eaar kakeememej eō bwe Eaar kōnono aenōm̧m̧an n̄an kōlmenļo̧kjeņ eo aō kake men in.4 Ejja en̄jake in eaar waļo̧k ñan ña. Kōn menin, iaar oktak, kōn elōñ ļo̧k unin kalim̧m̧ur, ñan Jemedwōj Ilañ eo ej iakwe, ñan jeje ko rekwojarjar, im ñan ro mōttad jej lōke er.
Ak, ej lōñ wōt kajjitōk ko ijab maroñ uwaaki. Ekōjkan aō uwaaki men ko rejjab alikar rej walok jeni. Ijjelokin ao kōtlok bwe ren kakkure aenōm̧m̧an im m̧ōnōnō eo emōj de an ped ilo mour e aō, iaar lōmnak bwe in dori iumin jet iien, kōjatdikdik kake iien eo an Irooj, enaaj kalikar aolep men. Iaar lo aenōm̧m̧an ilo ennaan eo an ñan Rikanaan Joseph Smith bwe kōj jej ajri ro reddik im jab maron̄e men otemjej kiiō. Jej aikuj eddōk ļo̧k ilo tiriamo im ilo jeļā kōn m̧ool eo.5 Ikar kālet bwe in jab ello̧k jen ta eo ijelā bwe em̧m̧ool im loor wōt aaet eo ijab melele kake—emaroñ “aaet kajoor.” Āinwōt N. Eldon Tanner eaar ba, Iar ekkatak “ewi joñan an kapeel im em̧m̧an lok elan̄ñe armej rej bōk mol eo ealikar ilo gospel in … im bōk kōn tōmak men ko ejab maroñ melele.”6
Melelein ke bwe ejjelok jikin men eo emool jej kajjitūkini? Kajjitōk ippān likao eo ej bukōt aenōmman ilo wōjke ko rekwojarjar bwe ekōnaan jelā ewi wōt kabuñ eo en kopa lok ie. Jibwe Doctorine and Covenants ilo peim, im jelā bwe elōñ wōt men ko rej walok ilo rekoot kein ej tōprakin juon in kabbok eo ettā kake mol eo. Āinwōt an Joseph kar loe, “A elan̄ñe jabdewōt iaami ej aikuj mālōtlōt, en kajjitōk kōn e ippān Anij, eo Ej wūjlep n̄an armej otemjej, im enaaj lelok ñan e.”7Jen ad kajjitok kajjitōk im ilo ad bukōt uwaak jen lañ, jej jelā ‟lain im bar lain, naan in kain̄i im bar naan in kain̄i”8 ilo ad eddōk ļo̧k ilo jeļāļo̧kjeņ im mālōtlōt.
Ejjab kajjitōk eo “Ewōr ke ruum ñan mool, kappok eo etiljōk?” ak “Ia ij bukōt mool ie elañn̄e ej wōr kajjitōk?” “En ke bwe aō mālōtlōt ñan dābij wōt ta eo ijelā bwe emool meñe ewōr jejjojo aō make kajitōk? Ij kamool bwe ewōr jibañ jen lañ–juon wot ejjelā men otemjej—jen jem̧ļo̧kin ñan jinoin. Aolep men Ej loi.9 Jeje ko rekwojarjar rej kamool bwe E ejjab etetal ilo iaļ ko raan keke, barāinwōt jab oktak jen ta eo ekar ba.10
Ilo iaļ eo jej ilo̧k ie ļo̧k ilo mour in jejjab aikuj lōmnak bwe kālet ko ad rejelet wōt kōj. Raan ko ļo̧k, juon likao eaar lotok mweo imō. Ear emman an eñjake kake e make, ak iar jelā ejjab lukkuun bōk konan ilo makūtkūt an kabuñ. Ear jiroñ eō bwe eaar rūttoļo̧k ilo m̧weo gospel eo ej pād ie mae iien jemen ar jab mool ñan jinen, kōm̧m̧an bwe ro jeiu im jatin ren kajitkin Kabuñ im elļo̧k. Buruō ear eddo ilo kōnono ippān baba in edik eo kiiō, ejelet kālet eo an jemen, ej lale ajri in jetōb rein raorōk itulikin gospel eo an Jisōs Kraist.
Bar juon em̧m̧aan ijeļā kajjien, juon membōr ej tōmak ilo Kabun̄ in, kar kajjitōk kōn jet katak. Ijjeļo̧kin kajjitōk ippān Jemedwōj Ilan̄ n̄an uwaak ko, eaar kālet n̄an uwaak pedped wōt ioon bok ko n̄an tōl e. Buruōn eaar oktak n̄an ial eo ebōd ilo an pukōt ta eo āinwōt utiej an armej. An uteij emaron̄ kar kam̧ōņōņōik ro jet, ium̧win jidik iien, bōtaab kar bukweļo̧k jān kajoor ko an lan̄. 11Ijjeļo̧kin pukōt m̧ool eo, ekar jako naan in kam̧ool eo an im kar bōktok ippān tok elōn̄ membōr in baam̧le eo.
Emmaan rein ruo raar lookjak im jako ilo aaet eo ekajoor im kar bōktok elōn̄ ippāer.
Ilo aō bwebwenato, ij kememej LaRue im Louise Miller, jinen im jemen kōrā eo ippa, ro im meñe raar jab kanuuj wōr mweier, raar kalet bwe ren jab wōt katakin katak ko rejim̧we an jepļaaktok in gospel eo n̄an ajri ro nejier ak n̄an mour kake aolep raan in aer mour. Kōm̧m̧ane menin, raar kōjeram̧m̧an ro ineer ippān leen ko an gospel im kōjatdikdik an mour indeeo.
Ilo m̧weo im̧weer, raar ejaake juon jon̄ak ijo me naaj rie priesthood eo, ijo iakwe im m̧ōņōņō rej jab jako, im ijo katak ko jen gospel in ej tōl mour ko aer. Louise im LaRue, erro jimor, kar kwaļo̧k melelen loor joñak in mour eo an Jisōs Kraist. Ro nejier kar alikar aer lo aaet ta ilo mour enaaj letok aenōmman im m̧ōņōņō. Im raar kālet ta eo ekkar. Būreejtōn Kimball eaar katakin, “Eļan̄n̄e jemaron̄ kōm̧m̧ane … juon aaet ekajoor, epen ej to̧o̧rļo̧k n̄an kōttōpar eo ad kōn mour ewāppen, kōj im ajri ro nejid maron̄ bōkļo̧k er m̧aanļo̧k men̄e ilo kitwōn apan̄, būromōj, [im] kapo ko.12
Eaorōk ke kālet ko ad? Rej ke jelet kōj wōt? Jenañin ke kalikar ia jej etal ie ļo̧k ilo aaet in indeeo eo an gospel eo eaar jepļaaktok?
Jen iien ñan iien, ej wōr juon men ej kamijak eō. Naaj kar ta eļan̄n̄e raan eo ilo Jeptōm̧ba eo, ilo aō babu ioon pok ilo Indian Ocean, eļan̄n̄e in kar ba ñan leddik eo nejū, Nellie, “Aet, etal wōt. Aō mōtoļo̧k ñan ijen ekapokpok.” Ak eļan̄n̄e en kar bar ļoor wanjoñak eo aō im jab maroñ ro̧o̧l im aaō enetak? Naaj kar ta ilo aō mour im jelā ke waanjoñak eo aō eaar kōm̧m̧an menin an aaet eo ekajoor kinōōre ļo̧k ñan meto im ejab bar jepļaaktok?
Eaorōk ke aaet kein jej kālet ñan ļoori? Ewōr ke tokjen wanjoñak kein ad?
Emōj an Jemedwōj Ilan̄ kōjeramman kōj kōn menin in letok eo an Jetōb Kwojarjar jen lañ ñan tōl kālet ko ad. Emōj An kalimuuri kōj kōn tōl an jetōb im revelesōn eļan̄n̄e jenaaj mour wānōk. Ij kūr kom bwe komin kōjerbal menin letok in ekwojarjar im etale kālet ko komij kōm̧m̧ani ilo ami kajitikin kom make kajitōk. “Kālet ko aō retōt ke ilo bwidej eo emman an gospel in an Jisōs Kraist.?” Ij kūr kom bwe komin kōman kajiwe ko reminin aikuj, jekdo̧o̧n eddik ak ellap, ñan kam̧ool kōjeram̧m̧an ko jen Jemedwōj Ilan̄ ilo karōk eo An ñan eok im ro kwōj iakwe er.
Ij kamo̧o̧l bwe Jisos Kraist ej ad Rilo̧mo̧o̧r im Ripinmuur. Ij kam̧ool bwe bujen ko jej kōm̧m̧ani Ippān rej kwojarjar im aorōk. Jej aikuj katak n̄an jab ikkure kōn men ko rekwojarjar. 13Kōm̧m̧an bwe jen tiljek wōt ilo etan Jisōs Kraist.