Bok Eo

Jān Elder Allan F. Packer

Jān Jiljilimjuonn̄oul eo

Bwebwenato an baam̧le im jerbal in tam̧peļ reaikuj in lukkuun m̧ōttan kabun̄jar eo ad make.

Āinwōt juon eo 12 an iiō ej scout, ikar bōk juōn menin letok eo eļap aō kar kōņaan im ekar kobatok ippen mweik in scout ko aō. Eaar juon ūlūl eo eddo ninne eo an! Ilo am kar etal n̄an kaam eo ke ej bon̄, ejo̧k marok ke kōm̧ij tōpar ļo̧k ilo kāām eo, kar tutu im pio̧ kōn sino reļļap ilo iaļ eo. Men eo imaron̄ ļōmņake ļo̧k ej kōjo̧ juon kijeek kileplep. Ikar m̧ōkaj im ilo̧k in jerbal im jōke juōn wōjke ekar wōtlok kōn ūlūl eo aō ekaal. Ke ij jōke, iaar inepata kōnke eaar jab em̧m̧an jeke. Ilo aō inepata, iaar lukkuun kate eō. Ikar inepata, ikar ro̧o̧l ļo̧k n̄an kāām eo kōn jejjo wōt ra. Jen meram in kijeek eo an ro jet, Ikar jeļā ta jorrāān eo. kaar tūm̧i māj eo jen ūlūl eo aō. Imaron̄ ripo̧o̧te, ijoke, ājet eo aō eaar ankane ļo̧k kijeek eo. Ilo mije eo aō kōn ankan eo, Iaar pok kōn men ko jet.

Ilo ad jerbal m̧aanļo̧k n̄an mour āinwōt Anij, jej aikuj jerbale aolep men ko im jab m̧ad n̄an mije eo juon ak men ko jet ak men ko rejjab eierļo̧k wōt juon. Pukot aelōn̄ in Anij ej tōl ļo̧k n̄an lan̄lōn̄ im m̧ōņōņō.¹ Eļan̄n̄e emenin aikuj, jej aikuij in mōņōņō in oktak. Oktak ko reddik ekkā aer dikļo̧k aer kōmetak im kakkure jen oktak ko reļļap.

Jem̧aan ļo̧k, Sister Packer im n̄a kar etal n̄an jet iaan laļ ko ilikin. Kōm̧ ar kepooj passport ko im peba ko jet. Kōm̧ ar bōk aolep wā ko, kakōļkōļ ko, visa ko, im jitaam̧ n̄an passport ko am̧. Ke kōm̧ij tōkeāāk ļo̧k ilo jikin eo kōm̧ij jibadek ļo̧k, raar etali peba ko am̧, im ke aolep peba ko am̧ raar dedeļo̧k, kōm ar maron̄ deļo̧n̄.

Karbab n̄an mour āinwōt Anij ej āinwōt kōppopo n̄an deļo̧n̄e bar juon laļ. Kōj kajjojo jeaikuj bōk juon passport ilo mour in Jetōb. Jejjab karōki men ko jej aikuj ļori, ak, kōj kajjojo, jej aikuj aolep kōm̧m̧ani. Karōk in lo̧mo̧o̧r eo epād ie aolep katak ko, kakien ko, kien ko, im kain̄i ko aikuji n̄an aolep armej n̄an karbab n̄an mour āinwōt Anij.² Innem, bwe kōn Pinmuur eo an Jisōs Kraist, aolep armej maron̄ lo lo̧mo̧o̧r.³ Kabun̄ in ej jipan̄ bōtaab eban kōm̧m̧ane n̄an kōj. Karbab n̄an mour āinwōt Anij ej erom ad kōttōpar ilo aolepān mour eo ad.

Kraist eaar kajutak Kabun̄ in An n̄an jipan̄ kōj. Eaar kūr 15 em̧m̧aan ro jej rejetake er āinwōt rikanaan ro, rilolo ro, im ribōk revelesōn ro n̄an tōl Kabun̄ in im katakin armej ro. Būreejtōnji eo Kein Kajuon⁴ im Doulul eo an Jon̄oulruo Rijilōk ro⁵ rej juon wōt ilo kajoor im mālim,⁶ ippān jeban eo an Rijilōk eo kōjeno̧ļo̧k āinwōt Būreejtōn eo an Kabun̄ in. Jiljilimjuonn̄oul ro rej kūr n̄an jipan̄.⁷ Ritōl ro raar jab karōki men ko aikuj ļori n̄an mour āinwōt Anij. Anij eaar karōki! Ritōl rein rej kūr n̄an katakin, kōmeļeļe kakkōļ im barāinwōt kakkōļ bwe jen pād wōt ilo iaļ in.⁸

Āinwōt kōmeļeļeik ilo bok bōk meļeļe eo: “Ilo kakūrm̧ool kōtōpar eo an n̄an jipan̄ kajjojo armej im baam̧le ko n̄an karbōb n̄an mour ijo eutiej tata, kabun̄ eo ej kalimjōk jerbal ko kar kalōti rekwojarjar. Men kein rōkoba jipan̄ membōr ro mour kōn kojepel eo an Jisōs Kraist, kobaik Israel kōn jerbal in mijinede, kejparok ro rejeram̧ōl im ri aikuij, im kōtļo̧k lomo̧r an ro remej kōn ekkal tampeļ ko im kōm̧m̧ani kain̄I ko n̄an ro jet.”⁹ Pedped kein emen im aolep kakien ko jet, kien ko, im kain̄i ko rej menin aikuj im rejjab men bajjōk. Kōn Pinmuur eo an Jisōs Kraist im ilo ad kōm̧m̧ani men kein kajojo, jej būki jitam̧ ko remenin aikuj n̄an passport eo ad ilo mour in Jetōb.

Ilo iien kweilo̧k in jej ekkatak kōn oktak ko me renaaj jipan̄ kōj aolep n̄an em̧m̧an ļo̧k ilo kōppopo.

Baam̧le eo ej io̧ļepen karōk in lo̧mo̧o̧r eo im ilo m̧ool unin ad barāinwōt ņa etan “karōk in m̧ōņōņō eo eļap.”¹⁰ Būreejtōn Boyd K. Packer eaar ba, “Jem̧ļo̧k eo ejjeļo̧k jem̧ļo̧kin indeeo an aolep m̧akūtkūt ilo Kabun̄ in ej bwe juon em̧m̧aan im kōrā eo ippān im ajri ro nejier maron̄ in m̧ōņōņō ilo kapijuknen.”¹¹

Būreejtōn Spencer W. Kimball eaar ba, “Tōprak eo ad, kajjojo im āinwōt juon Kabun̄, naaj pedped wōt ioon tiljek eo ad ilo ad mour kake gospel in ilo baam̧le ko ad.”¹² Tam̧peļ im menmenbwij an baam̧le ej m̧ōttan mour kake gospel in ilo kapijuknen. Eaikuj in juon m̧akūtkūt in baam̧le eļap ļo̧k jen juon m̧akūtkūt an Kabun̄.

Ewōr ekkatak ko rekāāl ilo menmenbwij an baam̧le im jerbal in tam̧peļ jen Būreejtōnji eo Kein Kajuon im Doulul eo an Jon̄oulruo Rijilōk ro.¹³ Am kōm̧m̧an n̄an ekkatak in enaaj kōļapļo̧k lan̄lōn̄ im m̧ōņōņō ilo kom̧ kajjojo im baam̧le eo ami.

Ej ba ilo Doctrine and Covenants bwe raan eo eļap an Irooj epaak tok. Kōn menin, jej aikuj, āinwōt juon kabun̄ im juon armej, im āinwōt Armej ro Rekwojarjar ilo Raan-ko Āliktata, leļo̧k n̄an Irooj juon menin leļo̧k ekwojarjar. Im jej aikuj kwaļo̧k ilo tam̧peļ bok eo An ekwojarjar kōn etan ro remej, me bok eo naaj bōk jen [Irooj]. ¹⁴

“Bok” in enaaj kōpooje ilo aer kōjerbal reko̧o̧t ko ilo Church FamilyTree database eo.

Ij lale im kobaiktok reko̧o̧t ko n̄an database in kōnke ikōņaan etan ro ij iakwe er n̄an pād ilo bok in. Kwoj jab kōņaan ke?

Ilo Doctrine and Covenants section 128 ej ba bwe jejjab maron̄ kōm̧m̧an em̧m̧an ļo̧k elan̄n̄e ejjab rūtto ro ad, im rejjab maron̄ barāinwōt kōm̧m̧an em̧m̧an ļo̧k elan̄e ejjab kōj.¹⁵

Bwebwenato an baam̧le eļap ļo̧k jen menmenbwij, wāween jilkinļo̧k data in menmenbwij an baam̧le, āt ko, raan ko, im jikin ko. Eļap ļo̧k jen ad lōmņak wōt kōn iien ko etto. Menmenbwij an baam̧le ebarāinwōt kobaik kiiō ilo ad ejaake bwebwenato eo ad make. Ekoba ilju im jekļaj ilo ad ejaake bwebwenato eo ad ilju im jekļaj kōn ro ineed. Juon m̧am̧a eo edik, n̄an waanjon̄ok, ej kwaļo̧k bwebwenatoin baam̧le eo an im pija ko ippān ro nejin ej kōm̧m̧ane bwebwenato an baam̧le.

Āinwōt bōk m̧ōttan kwojkwoj eo, pād ilo kweilo̧k ko, riiti jeje ko rekwojarjar, im jar an juōn make, menmenbwij an baam̧le im jerbal in tam̧peļ reaikuj emakijkij in m̧ōttan kabun̄jar eo ad make. Uwaak eo an jodikdik ro ad im ro jet n̄an kanaan ej karwainene emōj an lukkuun im̧we im kalikar ke jerbal in emaron̄ im eaikuj in dedeļo̧k jen aolep membōr ilo jabdewōtiiō.

Āinwōt an Elder Quentin  L. Cook kar ba, “Ewōr [kiiō] ippād katak eo, temple ko, im kein jerbal ko rainin.”¹⁶ Epidodo kōm̧m̧ane jerbal in menmenbwij eo kiiō im jet wōt membōr ro rej kōm̧m̧an bwe en juon men eaorōk. Jerbal in ebōk iien im wūjlepļo̧k, ak aolep remaron̄ kōm̧m̧ane, im wāween eo epidodo keidi n̄an iiō ko rem̧oot ļo̧k.

N̄an jipan̄ membōr ro, Kabun̄ in eaar kobaik reko̧o̧t ko im leļo̧k kein jipan̄ ko bwe jerbal in en maron̄ dedeļo̧k ilo kapijuknen ko ad make ak ward ko ad im tam̧peļ eo. Enan̄in aolepen kapan̄pan̄ ko em̧ōj aer mejal. Jekdo̧o̧n ta lōmņak eo am m̧oktaļo̧k, eoktak kiiō!

Ijoke, ewōr juon menin bōbrae Kabun̄ in joļo̧k. Ej āliklik eo an juon make n̄an kōm̧m̧ane jerbal in. Men eo aikuj i ej juon kelet im jidik kijejeto. Ejjab bōk juon iien eaitok. Jidik wōt iien ilo juōn wāween eo emakijkij naaj bōk tok lan̄lōn̄ eo ilo jerbal in. Bōk kōļmenļo̧kjeņ n̄an jinoe, n̄an ekkatak im kajjitōkin ro jet n̄an jipan̄ eok. Renaaj! Āt ko kwoj pukoti im būki ļo̧k n̄an tam̧peļ naaj reko̧o̧ti ilo “bok in.”¹⁷

Jekdoon kōn lapļo̧k in oran membōr ro rej bōk koņaer, jej lo ke jet wōt membōr in kabun̄ in rej makijkij ilo bōk koņaer ilo kapikot im kōm̧m̧ane kain̄i ko n̄an baam̧le ko aer. ¹⁸Menin ej kūr n̄an juon oktak ilo laajrak in men ko raorōk n̄an kōj.Jab m̧akoko in oktak, bōke! Oktak ej m̧ōttan karōk in m̧ōņōņō eo eļap.

Jerbal in eaikuj in dedeļo̧k, ejjab n̄an em̧m̧an ļo̧k eo an Kabun̄ in ak n̄an ro nukid remej im n̄an kōj make. Kōj im rūtto ro ad remej jeaikuji jitaam̧ passport eo ad ilo mour in Jetōb.

Ippād doon ¹⁹ ilo baam̧le ko ad ilo aolep epepen emaron̄ waļo̧k wōt ilo tam̧peļ ko kōn kain̄i ko an liāp. Bun̄ten ne kein repidodo: pukote wōt etan ro nukud remej im bōk ļo̧k n̄an tam̧peļ. Jet iien komaron̄ jipan̄ ro jet bar kōm̧m̧ane.

Kōn jet men ko rejenolo̧k, aolep―aolep―remaron̄ kōm̧m̧ane!

Ewōr kōjeram̧m̧an ko rej lukkuun waļo̧k ilo jerbal in. Elōn̄ m̧am̧a im baba ro im ritōl ro rej n̄ūrbōktak kōn jekjek ko kiiō an laļ in im ta ko rejelet baam̧le ko im jodikdik ro.

Elder David A. Bednar eaar kallim̧ur: “Ij karwainene rūm̧m̧an ded ro an Kabun̄ in n̄an ekkatak kōn im en̄jake Jetōb in Elijah. … Ij kallim̧ur [bwe] kwonaaj kōjparok jen im̧we ko rekajoor an rikapo eo. Ilo am bōk kūņam̧ im iakwe jerbal in ekwojarjar, kwonaaj jokne ilo em̧m̧an ded eo am im ilo aolepen mour ko am.”²⁰

Ro jeiū im jatū, eiien n̄an jolok ninne eo an ūlūl eo ad im etal im jerbal. Jej aikuj jab kaarmejete mour eo ad ippān Anij ak eo an baam̧le ko ad n̄an ikdelel ko ejelok tokjeer.

En̄in ej jerbal eo an Anij, dedeļo̧k jen membōr ro im ro rejjab membōr barāinwōt, dik im rūtto, em̧m̧aan im kōrā.

Inaaj kilōke ilo kout jen eoon eo im̧aan ilo al nōm 324, ukōte juon wōt naan:

“Jerkak, O [Armej ro Rkwojarjar] an Anij!

Kar dedeļo̧k men ko reddik.

Leļo̧k bōro im jetōb im ļōmņak im kajoor

Jerbal n̄an Kiin̄ an Kiin̄ raņ.²¹

Jisōs Kraist ej Kiin̄ eo! Ij kam̧ool kōn E in āt eo etan Jisōs Kraist, amen.

Kakeememej ko

1. Lale 2 Nipai 2:22–25; 9:18; Mosaia 2:41.

2. Lale Guide to the Scriptures, “Plan of Redemption”; scriptures.lds.org.

3. Laajrak in Tōmak ko 1:3.

4. Lale Doctrine and Covenants 107:22.

5. Lale Doctrine and Covenants 107:23.

6. Lale Doctrine and Covenants 107:24.

7. Lale Doctrine and Covenants 107:25–26.

8. Lale Guide to the Scriptures, “Būreejtōnji eo Kein Kajuon,” “Joun̄ouruo,” “Jiljilimjuonn̄oul”; scriptures.lds.org.

9. Bok in Bōk Meļeļe 2: Tōl Kabun̄ eo (2010), 2.2.

10. Alma 42:8.

11. Boyd K. Packer, “Rikam̧ool eo,” Ensign ak Kweilo̧k eo Eļap, Eprōļ 2014, 55.

12. Spencer W. Kimball, “Living the Gospel in the Home,” Ensign, Māe 1978, 101.

13. Lale Thomas S. Monson, “Kōm̧ōkajļo̧k Jerbal in,” Ensign or Liahona, June 2014, 4–5; Henry B. Eyring, “The Promise of Hearts Turning,” Ensign or Liahona, July 2014, 4–5; Russell M. Nelson, “It All Starts with Love” (video), lds.org/prophets-and-apostles/unto-all-the-world/it-all-starts-with-love; Russell M. Nelson, “Adding ‘Family’ to Family History Work” (video), lds.org/prophets-and-apostles/unto-all-the-world/adding-family-to-family-history-work; Russell M. Nelson, “Generations Linked in Love,” Ensign or Liahona, May 2010, 91–94; Richard G. Scott, “The Joy of Redeeming the Dead,” Ensign or Liahona, Nov. 2012, 93–95; Quentin L. Cook, “Roots and Branches,” Ensign or Liahona, May 2014, 44–48; David A. Bednar, “The Hearts of the Children Shall Turn,” Ensign or Liahona, Nov. 2011, 24–27; Neil L. Andersen, “A Classroom of Faith, Hope, and Charity” (address to Church Educational System religious educators), lds.org/broadcasts; Neil L. Andersen, “Find Our Cousins!” (address at RootsTech Family History Conference, Feb. 8, 2014), lds.org/prophets-and-apostles/unto-all-the-world/find-our-cousins.

14. Doctrine and Covenants 128:24.

15. Doctrine and Covenants 128:18.

16. Quentin L. Cook, Kweilo̧k eo Eļap ak Liahona, Eprōļ 2014, 24.

17. Doctrine and Covenants 128:24.

18. Lale Quentin L. Cook,Kweilo̧k eo Eļap ak Liahona, Eprōļ 2014, 24.

19. Doctrine and Covenants 128:18.

20. David A. Bednar, “The Hearts of the Children Shall Turn,” Ensign or Liahona, Nov. 2011, 26, 27.

21. “Rise Up, O Men of God,” Hymns, no. 324.