Ijeļā Men Kein N̄an Eō Make
Jān Elder Craig C. Christensen
Jen Būreejtōnji eo an Jiljilimjuonn̄oul
Katak ippād make bwe jepļaaktok in gospel eo an Jisōs Kraist ej m̧ool emaron̄ in juon en̄jake eo eļaptata im elem̧ōņōņō ilo mour.
Ro jeiū im jatū jitebōro, jej im̧we kōn waanjon̄ok eo make im jerbal in priesthood eo an Būreejtōn Thomas S. Monson. Jidik iien em̧ootļo̧k, kar kajjitōk ippān jet tikōn ro, “Ta eo eļap ami nōbare Būreejtōn Monson kake?” Juon tikōn eo eaar kwaļo̧k kōn Būreejtōn Monson, ke eaar juon ajri, ke eaar leļo̧k kein ikkure ko nejin n̄an riaikuj eo m̧ōttan. Eo juon eaar kwaļo̧k wāween an Būreejtōn Monson kea kake aolep ro emej pāleen ilo ward eo an. Eo kein kajilu eaar keememej ke eaar kūr āinwōt juon Rijilōk ke eaar em̧m̧an ded im kar kōjeram̧m̧an armej ro ipeļaakin laļ in. Innām juon ļaddik eaar ba, “Men eo eļap aō nōbar Būreejtōn Monson kake ej naan in kam̧ool eo an ekajoor.”
Ilo m̧ool, em̧ōj ad aolep en̄jake naan in kam̧ool eo ejeņo̧ļo̧k an rikanaan eo ad kōn Rilo̧mo̧o̧r Jisōs Kraist im an wūjļepļo̧k n̄an ļoor im̧we ko an Jetōb aolep iien. Ilo kajjojo en̄jake ej kwaļo̧k, Būreejtōn Monson ej karwaineneik kōj n̄an kōļapļo̧k ad mour kake gospel in im n̄an pukote im kōkajoor ļo̧k naan in kam̧ool eo ad make. Keememej ta eo eaar ba jān lo̧katok in jet kweilo̧k ko rem̧ootļo̧k: “Bwe jen erom̧ kajoor im n̄an jutak ņae aolep kajoor ko rej kanōk kōj ilo iaļ eo ebōd ak aolep ainikien ko ko rej rōjan̄ kōj n̄an bōk iaļ eo ebōd … , jej aikuj wōr juon ad make naan in kam̧ool. Men̄e kwoj 12 ak 112— ak pād ikōtaer—kōmaron̄ jeļā kōn kwe make bwe ko̧jpeļ eo an Jisōs Kraist ej m̧ool.”1
Mekarta ennaan in aō enaaj kajju n̄an ro repaak aer 12 im 112, pedped ko ij kwaļo̧ki rej jerbal n̄an aolep. N̄an uwaake enaan eo an Būreejtōn Monson, ij kajjitōk, kajjojo iaad rejeļā ke kōn kōj make n̄e gospel in ej m̧ool? Jemaron̄ ke ba kōn peran ke naan in kam̧ool ko ad rej lukkuun ad make? Inaaj bar kout jān Būreejtōn Monson: “Ij kwaļo̧k bwe juōn naan in kam̧ool ekajoor kōn Rilo̧mo̧o̧r eo ad im ko̧jpeļ eo An naaj … kōjparok eok jān jerawiwi im nana eo peļaakum̧{nb … Eļan̄n̄e kwoj jan̄in kar wōr am̧ naan in kam̧ool kōn men kein, kwon kōm̧m̧an men eo emenin aorōk n̄an bōk juōn. Menin ej aorōk n̄an kwe bwe kwon wōr am̧ make naan in kam̧ool, kōn naan in kam̧ool ko an ro jet naaj kōkajoor eo ilo jidik wōt iien.”2
Ijeļā Men Kein N̄an Eō Make
Katak ippād make bwe jepļaaktok in gospel eo an Jisōs Kraist ej m̧ool emaron̄ in juon en̄jake eo eļaptata im elem̧ōņōņō ilo mour. Jemaron̄ jino pedped e ioon naan in kam̧ool ko an ro jet―āinwōt an likao em̧m̧an de ro kar kōm̧m̧ane, “kōm̧ij jab pere ke ro jinām raar jeļā.”3 Ej juon jikin em̧m̧an n̄an ijjino, bōtaab jej aikuj kalōke jen ijeņ. N̄an kajoor ilo mour kake gospel in, ejjeļo̧k men en eaorōk ļo̧k jen bōk im kōkajoor ļo̧k naan in kam̧ool eo ad make. Jej maron̄ kwaļo̧k, āinwōt kar Alma, “Ijeļā … men kein n̄an eō make.”4
“Im ekōjkan ilo ami kōtmāne bwe ijeļā kōn aer m̧ool?” Alma eaar ba. “Lo, ij ba n̄an kom̧ men kein kar kwaļo̧k n̄an eō jān Jetōb Kwojarjar an Anij. Lo, iaar jitlo̧k im jar elōn̄ raan ko bwe in maron̄ jeļā men kein n̄an eō make. Im kiiō i jeļā make bwe re m̧ool.”5
Ikōņaan Bwe in Lo Men ko Jema Eaar Loi
Āinwōt Alma, Nipai eaar barāinwōt jeļā m̧ool eo n̄an e make. Ālkin ron̄jake an jemān kōnono kōn en̄jake ko an rellōn̄ kōn jetōb, Nipai eaar kōņaan jeļā ta eo jemān eaar jeļā. Menin eaar ļapļo̧k jen kōņaan―eaar juon men eo eaar kwōle im maro kake. Men̄e eaar “inono otem inono” eaar “ļap aō ikdelel n̄an jeļā kōn men ko rettino an Anij.”6 Eaar kanooj kōņaan lo, im ron̄ im jeļā men kein, kōn kajoor eo an Jetōb Kwojarjar.”7
Ke Nipai “eaar jijet im lin̄ōri ilo buru[wōn] kar bōkļo̧k e ilo Jetōb in Irooj … ilo juon to̧l eutiej otem uteej, ijo kar kajjitōk ippān, “ta kwōj kōņaan?” Uwaak eo an epidodo: “Ikōņaan bwe in lo men ko jema eaar loi.”8 Kōn tōmak eo an buruwōn im kijejeto ko an, Nipai eaar jeram̧m̧an kōn juon en̄jake eo ekabwilōn̄kōn̄. Eaar bōk juon kam̧ool kōn lo̧tak, mour, im Dābweel eo an Rilo̧mo̧o̧r Jisōs Kraist; eaar lo itok eo an Bok in Mormon im Jepļaaktok eo an gospel in ilo raan kein āliktata―eaar juon tōprak in ikdeleel eo an n̄an jeļā n̄an e make.9
Irooj eaar kōpooj Nipai kōn en̄jake kein an juon make n̄an dipuk mālijjon̄ im apan̄ ko enaaj jelm̧aiki. Raar kōm̧m̧an bwe en jutak kajoor men̄e ro jet ilo baam̧le eo raar apan̄. Emaron̄ kar kōm̧m̧ani kōnke eaar katak kōn e make im eaar jeļā kōn e make. Kar jeram̧m̧an kōn naan in kam̧ool eo an make.
Kajjitōk kōn E ippān Anij
Einļo̧k wōt Nipai, Rikanaan Joseph Smith eaar barāinwōt “inono otem inono” ke “kōļmenļo̧kjeņ eo an kar im̧we n̄an m̧ool an jetōb. N̄an Joseph, eaar juon tōre eļap, im eaar jepo̧o̧l kōn ennaan ko redaabtōk im kapokpok kōn kabun̄. Eaar kōņaan jeļā kabun̄ eo em̧ool.10 Kar im̧we jen eoon kein ilo Baibōļ: “A eļan̄n̄e jabdewōt iaami ej aikuj mālōtlōt, en kajjitōk kōn e ippān Anij,”11 eaar kōņaan pukot uwaak eo kōn e make n̄an lo juon uwaak. Ilo juon jibbon̄ eaiboojoj ilo jinoin iien jibūriin̄ in 1820, eaar etal n̄an ibūļōn wōjke ko im bukwelōlō im jar. Kōn tōmak eo an im kōnke Anij ewōr juon an jerbal n̄an e ejenolo̧k n̄an kōm̧m̧ane, Joseph eaar bōk visōn eo eaiboojoj an Anij Jemed im Nejin, Jisōs Kraist, im kar jeļā kōn e make ta eo eaikuj kōm̧m̧ane.
Kwoj lo ke en̄jake in an Joseph ilo juon jon̄ak eo komaron̄ mour kake n̄an bōke ak kōkajoor ļo̧k naan in kam̧ool eo am̧ make? Joseph eaar kōtļo̧k an jeje ko rekwojarjar tōl buruwōn. Eaar kōļmenļo̧kjeņ kaki im mour kaki ilo jekjek eo an make. Innām eaar jerbale ta eo eaar ekkatak. Tōprakin eaar visōn eo kein kajuon eaiboojoj―im jabdewōt men eo kar bōk jikin ālkin. Kabun̄ in eaar lukkuun ejaak ioon pedped ko bwe jabdewōt―ekoba ļaddik eo 14 iiō dettan―maron̄ “ kajjitōk kōn e ippān Anij” im bōk juon uwaak n̄an jar eo an.
Kōn Menin Ta in Naan in Kam̧ool?
Ekkā ad ron̄jake an membōr ro an Kabun̄ in ba bwe naan in kam̧ool eo aer kōn gospel in men eo m̧weiier eaorōk. Ej juon menin letok eo ekwojarjar jān Anij me ej itok n̄an kōj kōn kajoor eo an Jetōb Kwojarjar. Elur, pen ilo ad bōke ilo ad ekkatak, jar, im mour kake gospel in. Ej en̄jake ilo Jetōb Kwojarjar ilo an kwaļo̧k kam̧ool eo n̄an jetōb ko ad bwe ta eo jej ekkatak im kōm̧m̧ane ejim̧we.
Jet armej rej kōnono kōn naan in kam̧ool āinwōt kein kune kabōlle tōm̧a―kwōj kune n̄e ej jab kabōlle; elōn̄ am̧ naan in kam̧ool, ak ejjeļo̧k. Ilo m̧ool, juon naan in kam̧ool einļo̧k wōt juon wōjke me ej dipļo̧ke wāween an eddōk ļo̧k im kale. Jet iaan wōjke ko reutiej ioon laļ in maron̄ loi ilo Redwood National Park ilo turear in Amedka. N̄e kwoj jutak ijo wōjke kein rej eddōk ie, emenin kabwilōn̄lōn̄ bwe kajjojo iaer raar eddōk jān juon ine jidikdik. Ejja āinļo̧k wōt naan in kam̧ool eo ad. Men̄e remaron̄ jino kōn juon en̄jake eo edik, rej eddōk im kalle aolep iien kōn naajdik im en̄jake ko.
Ejjab kabwilōn̄lōn̄, innām, ke rikanaan Alma eaar kōmeļeļeik ewi wāween ad kōļapļo̧k juon naan in kam̧ool, eaar kōnono kōn juon ine eo ej oktak n̄an juon wōjke. “Eļan̄n̄e kom̧ij ņa jikin,” eaar ba, “bwe juon ine en maron̄ kalbwini ilo buruōmi, lo, eļan̄n̄e e lukkuun ine eo, ak ine eo em̧m̧an, eļan̄n̄e kom̧ij joļo̧k kōn jab tōmak, … enaaj jino ļapļo̧k ilo kom̧, im n̄e kom̧ij en̄jake an̄in ļapļo̧k kein an, kom̧ naaj jino ba ilo kom̧ make―E eaikuj bwe in ej ine eo em̧m̧an, ak bwe naan eo em̧m̧an, bwe ej jino ļapļo̧k ilo buruō; aaet, ej jino kōmeramļo̧k aō meļeļe, aaet ej jino in kaijoļjoļ n̄an eō.”12
En̄in ej wāween eo emakijkij an juon naan in kam̧ool waļo̧k: kōn kwojarjar, kōmeram̧ļo̧k, kwaļo̧k en̄jake ko me eoiktok kōj bwe naan in Anij ej m̧ool. Ijoke, ilo en̄jake kein rem̧m̧an, rej make wōt ijjino eo. Jerbal eo am̧ n̄an kōkajoorļo̧k naan in kam̧ool eo am̧ ejjan̄in dedeļo̧k―ilōn̄in jabdewōt jerbal in katōk juon wōjke ej dedeļo̧k n̄e juon okar ej juļ. Eļan̄n̄e jenaaj kowaane im jerwane im̧we kein, eļan̄n̄e jejjab naajdiki ilo ekkatak jeje ko rekwojarjar im jar im pukot en̄jake ko kōn Jetōb, en̄jake ko ad renaaj m̧ōjņo im naan in kam̧ool ko ad renaaj m̧ōjņo.
Alma ej likūt ilo wāween in: “Eļan̄n̄e kom̧ij jab kōjparok wōjke eo, im jab ļōmņak kōn kōņin, lo ejjamin naaj le okran, im n̄e bwil jān aļ ej itok im tile, kōnke e ejjeļo̧k okran ej m̧ōņakņakļo̧k, im kom̧ij timwi im joļo̧ke.”13
Ilo aolep jekjek, naan in kam̧ool ko ad renaaj kajoor ļo̧k ilo wāween wōt juon wōjke ej eddōkļo̧k: jidik kōn jidik, ilo wāween eo epen, ilo juon wāween ad kōjparoke im tiljek kake. “A eļan̄n̄e kom̧ naaj ņa kōņin naan eo,” Alma eaar kallim̧ur, “aaet ņa kōņin wōjke eo ke ej jino eddōk, jān tōmak eo ami kōn kijejeto, reim̧aanļo̧k n̄an le eo leen, enaaj le okran; im lo enaaj juon wōjke ej eddōkļo̧k n̄an mour ejjeļo̧k jem̧ļo̧kin.”14
Kiiō Etōreen; Rainin Ej Raan eo
Naan in kam̧ool eo aō make eaar ijjino ke iaar ekkatak im kōļmenļo̧kjeņ kōn katak ko loi ilo Bok in Mormon. Ke iaar bukwelōlō im kajjitōk ippān Anij ilo jar, Jetōb Kwojarjar eaar kam̧ool n̄an eō bwe ta eo iaar riiti ej m̧ool. Kam̧ool in eaar jino ļijur naan in kam̧ool eo aō kōn m̧ool ko jet an gospel in, kōnke, āinwōt an Būreejtōn Monson ba: “N̄e jejeļā bwe Bok in Mormon ej m̧ool, innām em̧ool bwe Joseph Smith eaar lukkuun juon rikanaan im bwe eaar lo Anij Jemed Indeeo im Nejin, Jisōs Kraist. Ebarāinwōt alikkar bwe gospel in eaar jepļaaktok ilo raan kein āliktata kōn Joseph Smith―ekoba jepļaaktok eo jim̧or an Aaronic im Melchizedek Priesthood eo.” 15 Jen tōre eo, eaar wōr aō en̄jake ko rem̧m̧an kōn Jetōb Kwojarjar me raar kalikar tok n̄an eō bwe jepļaaktok in gospel in an Jisōs Kraist em̧ool. Kōn Alma, imaron̄ ba ilo alikkar bwe ijeļā men kein kōn eō make.
Ro m̧ōtta rem̧m̧an ded, kiiō etōreen im rainin ej raan eo n̄an ekkatak ak kapen n̄an kōj make bwe gospel in em̧ool. Kajjojo iaad ewōr juon an jerbal eaorōk n̄an kōm̧m̧ane. N̄an kadedeļo̧k jerbal in, jej aikuj bōk tōmak eo an Alma, Nipai, im Joseph Smtih eo edik n̄an bōke im kōļapļo̧k naan in kam̧ool eo ad make.
Āinwōt tikōn eo iaar kōnono kake m̧okta ļo̧k, ij nōbar Būreejtōn Monson kōn naan in kam̧ool eo an. Ej āinwōt wōjke towering redwood, jekdoon ak naan in kam̧ool eo an Būreejtōn Monson ej kajoor ļo̧k im eddōk ļo̧k aolep iien. Jemaron̄ jeļā kōn kōj make, āinwōt kar Būreejōn Monson, bwe Jisōs Kraist ej ad Rilo̧mo̧o̧r im Ripinmuur eo an laļ, bwe Joseph Smith ej rikanaan eo an Jepļaaktok in, ekoba jepļaaktok in priesthood eo an Anij. Jej kabwijer priesthood eo ekwojarjar. Kōm̧m̧an bwe jen jeļā men kein im jeļā kaki kōn kōj make ej aō jar ilo āt eo ekwojarjar etan Jisōs Kraist, amen.