Itok im Lale

Jān Elder David A. Bednar

Jān Doulul eo an Jon̄oulruo Rijilōk ro

Kabun̄ eo an Jisōs Kraist enaaj aolep iien im aolep iien ej juon kabun̄ ijo membōr ro rej bōk kūņaer ilo jerbal in mijinede.

Ennaan in aō enaaj kaju n̄an kajjojo ro rejjab membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata. Inaaj uwaake juon iaan kajjitōk ko ewōr ami: “Etke Armej ro Rekwojarjar ilo Raan-ko Āliktata rekijon̄ jiron̄ eō kōn ta eo rej tōmake im n̄an karuwaineneik eō n̄an ekkatak kōn Kabun̄ en aer?”

Ij jar bwe Jetōb eo an Irooj enaaj jipan̄ kalikkar aō kōnono, im n̄an ami lukkuun meļeļe, uwaak eo aō n̄an kajjitōk in.

Juon Jerbal Ekwojarjar

Rikaļoor ro retiljek an Jisōs Kraist aolep iien rej im aolep iien renaaj mijinede ro reperan. Juon mijinede ej juon rikaļooran Kraist eo ej kam̧ool kōn E āinwōt Ripinmuur im kwaļo̧k m̧ool ko ilo gospel in An.

Kabun̄ eo an Jisōs Kraist enaaj aolep iien im aolep iien ej juon kabun̄ ijo membōr ro rej bōk kūņaer ilo jerbal in mijinede. Membōr ro kajjojo ilo Kabun̄ in an Rilo̧mo̧o̧r raar bōk juon kallim̧ur n̄an jipan̄ kakūrm̧ool jerbal in ekwojarjar kar letok jān Irooj n̄an Rijilōk ro An, āinwōt an waļo̧k ilo Kallim̧ur Ekāāl:

“Kom̧win ilo̧k, im kōm̧m̧an aolep ri aelōn̄ ko otemjej bwe ren ri kaļora, im peptaij er ilo etan Jema im Nejin im Jetōb Kwōjarjar:

“Im katakin er bwe ren pokake naan ko otemjej I ar jiron̄ kom̧. Im lo, Ij pād ippāmi iien otemjej, n̄an jem̧ļo̧kin laļ. Amen” (Matu 28:19–20).

Armej ro Rekwojarjar rej lukkuun mije eddo in n̄an katakin armej ro ilo aelōn̄ ko kōn Irooj Jisōs Kraist im kōn jepļaaktok in gospel eo An. Jej tōmak ilo ejja kabun̄ eo kar kajutake jān Rilo̧mo̧o̧r etto em̧ōj an bar jepļaaktok n̄an laļ in kōn E ilo raan kein āliktata. Katak ko, pedped ko, mālim eo an priesthood, kain̄i ko, im bujen ko ilo gospel in An rej waļo̧k rainin ilo Kabun̄ in An.

N̄e kōm̧ij karuwaineneik kom̧ n̄an itok ippam̧ n̄an jar ak n̄an katak ippān mijinede ro rej jerbal aolep raan, kōm̧ij jab kajjieon̄ in wiaik eok. Āinwōt membōr ro an Kabun̄ in, kōm̧ij jab bōk wōņāām̧ ak tōprakin jerbal eo am̧. Kōm̧ij jab pukot jon̄an eddōk ļo̧k eo an Kabun̄ in. Im men eo eaorōk tata, kōm̧ij jab kajjieon̄ in kipel eok n̄an tōmak ānwōt kōmij tōmak. Kōm̧ij karuwaineneik eok n̄an ron̄jake m̧ool ko em̧ōj aer jepļaaktok ilo gospel eo an Jisōs Kraist bwe kwon maron̄ ekkatak, kejakļo̧kijen, jar, im itok n̄an jeļā ippam̧ make eļan̄n̄e men kein kōm̧ij kwaļo̧ki ippāmi rej m̧ool.

Jet iaami remaron̄ ba, “Ak em̧ōj aō kadede tōmak ilo Jisōs im ļo̧o̧r katak ko An,” ak “Ijjab lukkuun jeļā eļan̄n̄e elukkuun wōr Anij.” Karuwainene in am̧ n̄an eok ejjab kajjieon̄ kadikļo̧k tōmak eo am ak en̄jake ko am ilo mour. Bōktok men ko kwojeļā bwe rem̧ool, rem̧m̧an, im ilo nōbar―n̄an mālijon̄e ennaan in am. Āinwōt Jisōs ekar kūr ruo iaan rikaļoor ro An n̄an “itok im kom̧ naaj loe” (Jon 1:39), kōn menin kōm̧ij rojan̄ kom̧ n̄an itok im lale eļan̄n̄e jepļaaktok in gospel eo an Jisōs Kraist ekōļap ļo̧k im ekōm̧eram ļo̧k men eo em̧ōj am̧ kar tōmak kadede ke ej m̧ool.

Ilo m̧ool, kōm̧ij en̄jake juon jerbal eo etinkwadik n̄an kwaļo̧k ennaan in n̄an aolep laļ, bwij, lo, im armej. Im en̄in ej lukkuun ta eo kōm̧ij kōm̧m̧ane kōn juon doulul armej rainin elōn̄ ļo̧k jen 88,000 mijinede ro rej jerbal aolep raan ilo elōn̄ļo̧k jen 150 laļ ko ipeļaakin laļ in. Likao im jiron̄ rein rem̧m̧an ded jipan̄ membōr ro ilo Kabun̄ in n̄an kakūrm̧ool ijjitōn̄ in ekwojarjar im jerbal eo ad kajjojo ej n̄an kwaļo̧k gospel eo indeeo an Jisōs Kraist (lale D&C 68:1).

Eļapļo̧k Jen juon Eddo ilo Mour in Jetōb

Bōtaab ikdeleel eo ad n̄an kwaļo̧k ennaan in ejjab ilo tōprakin juon meļeļe kōn jetōbin jerbal. Ak, ikdeleel eo ad n̄an kwaļo̧k gospel eo em̧ōj an jepļaaktok an Jisōs Kraist ippam̧ ej jenok in ewi jon̄an an aorōk m̧ool kein n̄an kōm̧. Ij tōmak emaron̄ em̧m̧an aō kōmeļeļeik etke kōm̧ij pukot mejelan n̄an kōmeļeļeik tōmak ko am n̄an eok kōn juon iien kōrā eo ippa im n̄a kar jelm̧ae elōn̄ iiō ko rem̧ootļo̧k ippān ruo iaan ļaddik ro nejim̧.

Juon jota Susan im n̄a kar jutak iturin wintō eo am ilo m̧weo im̧ōm̧ im lale an ļaddik ro ruo ikkure nam̧ōj. Ilo iien ikkure eo aer, ļaddik eo edik iaan ļaddik ro ruo eaar jorrāān jidik. Kōmar m̧ōkaj in lo ke eaar jab lukkuun jorrāān, im kōm̧ ar lo ke ejjab menin aikuj n̄an leļo̧k jipan̄. Kōm ar kōņaan etale im lale eļan̄n̄e elōn̄ iaan kōnono ko an baam̧le eo am kōn jouj n̄an doon ekar jerbal. Ta eo eaar waļo̧k tokālik ekar kaitoktok limo im lap ekatak jen e.

Ļaddik eo erūtto eaar kaenōm̧m̧an im kanooj jipan̄ ļaddik eo edik ļo̧k n̄an lowan m̧weo. Susan im n̄a kar jutak iturin jikin kōmat eo bwe kōm̧in maron̄ lo ta eo enaaj bōk jikin tokālik, im kōm̧ ar pojak in bōk kūņaam̧ ilo jekjek eo eļan̄n̄e kinej eo enaaj lukkuun nana ak juon idin̄ eo ej tin waļo̧k.

Ļaddik eo erūtto eaar jibwetok juon jea n̄an jikin kōmat eo. Eaar tallōn̄ ļo̧k ioon jea eo, jipan̄ lōn̄tak ļaddik eo jatin n̄an jea eo, eaar kejo̧ dān eo, im lutōke ebwe an ļap jo̧o̧b n̄an kinej eo an ļaddik eo. Eaar kōm̧m̧ane ijo emaron̄ e n̄an lukkuun kwale ļo̧k ettoon ko. M̧akūtkūt eo an ļaddik eo edik n̄an jekjek in emaron̄ waļo̧k ilo wāween kōmeļeļe in jān jeje ko rekwojarjar: “Im enaaj wōr unin aer lam̧ōj, im jan̄, im liejļoļ, im n̄i ļaļlaļ” (Mosaia 16:2). Im ļaddik eo edik eaar lam̧ōj!

Ālkin an karreeo eo dedeļo̧k, kar kōmōrāik pein kōn juon tool. Eaar bōjrak elam̧ōjm̧ōj eo. Ļaddik eo erūtto eaar taļļōn̄ ļōn̄ ļo̧k kauntōr in jikin kōm̧at eo, kōpeļļo̧k juon kōbat, im kar lo juon kūriij in kinej. Jekdoon n̄e kinej ko kinjen ļaddik eo edik eaar jab kilep ak dāpakpak, ļaddik eo erūtto eaar likūt enan̄in aolepen kūriij imejen kinej eo an ļaddik eo. Elam̧ōjm̧ōj eaar jab bar waļo̧k, ļaddik eo edik eaar alikkar an em̧m̧an ippen wāween aer likūt kūrij eo jen eļapļo̧k jen wāween kwal kinej eo kōn joob.

Ļaddik eo erūtto eaar bar jepļaak ļo̧k n̄an kōbat eo ijo eaar lo kūriij eo ie im lo juon bo̧k in tāep in kinej. Innām eaar tāipi aolepān pein ļaddik eo―jān jikolelein pein n̄an būkien. Kōn jerbal in kōm̧adm̧ad eo kar dedeļo̧k, im kōn kūriij eo im rāāp ko ilo jikin kōmat eo, ļaddik ro ruo redik rekar kelaļ tak jān jea eo kōn mejen ettōn̄ dikdik im mejen m̧ōņōņō.

Ta eo tokālik eļap an aorōk. Ļaddik eo eaar jorrāān eaar aeni aolep bwein tāāp ko, kūriij eo epaak an kar maat, im eaar diwōt nam̧ōj ļo̧k. Eaar m̧ōkaj an pukot ļo̧k ro m̧ōttan im jino likūt kūriij im tāāp ilo peier. Susan im n̄a kar bwilōn̄ kōn wāween in, em̧m̧an, im m̧ōkaj in uwaak eo an.

Etke ļaddik eo edik eaar kōm̧m̧an āindein? Jouj im kememej bwe eaar m̧ōkaj im kōņaan leļo̧k n̄an ro m̧ōttan ejja men eo wōt eaar jipan̄ e ke eaar jorrāān. Ļaddik eo edik eaar jab kijerjer, m̧weir, ak kipel n̄an jerbal. Ikdeleel eo an n̄an kwaļo̧k ekar tōprak in juōn men eo eļap an jipan̄ ilo en̄jake an juon armej make.

Eļōn̄ iaad wōj āinwōt rūtto ro ekar waļok ejjab wāween in ilo ad pukot juon jikin kōm̧adm̧ad ak uno ko n̄an joļo̧k metak eo eto ad metak kake, ak jej bōk kapilōk eo me ejipan̄ kōj n̄an jelm̧ae apan̄ ko kōn peran im ioon ļōkabo̧kbo̧k ko kōn kijenmej. Kwaļo̧k n̄an armej ro jet men ko me relukkuun wōr tokjāer n̄an kōj ak men ko raar jipan̄ kōj kaki me ejeja aer waļo̧k.

Ejja jon̄ak in wōt ej kwaļo̧k kam̧ool eo ilo men ko reļļap raorōk an jetōb im tōprak eo an. N̄an waanjon̄ok, juon bwebwenato ilo bōk in jeje ko rekwojarjar ņa etan Bok in Mormon ej kalikar juon ettōņak eo kar bōke jen juon rikanaan etto etan Liai. Ilo io̧ļepen ettōņak eo an Liai ej wōjke in mour―eo ej pinej jenkwan “iakwe eo an Anij” me “ eaar lukkuun ļap kōttōpare jān men ko otemjej” im lukkuun ļap lan̄lōn̄” (1 Nipai 11:22–23; lale barāinwōt 1 Nipai 8:12, 15).

Liai eaar kōmeļeļeik:

“Im ālkin men kein, iaar wōnm̧aanļo̧k im m̧ōn̄ā leen; im iaar lo bwe eaar kanooj tōn̄al, ilōn̄in aolep ko iaar edjon̄i m̧okta. Aaet, iaar lo bwe leen in eaar mouj, ļapļo̧k jān mouj otemjej iaar lo.

“Im ke iaar m̧ōn̄ā leen wōjke eo eaar kobrak aō kōn eļap otem ļap lan̄lōn̄; kōn menin, iaar jino ikidelel bwe baam̧le eo aō en m̧ōn̄ā barāinwōt ” (1 Nipai 8:11–12; kakobaba n̄an katak in).

Menin letok eo ekwojarjar eļap an Anij n̄an ajri ro Nejin ej jerbal in kwaļo̧k eo An ioon lalin, en̄taan in pinmuur eo, im Jerkakpeje eo an Irooj Jisōs Kraist. Leen wōjke eo maron̄ in keidi āinwōt juon kōkaļļein kōjeram̧m̧an ko an Pinmuur eo an Rilo̧mo̧o̧r.

Uwaak eo eim̧we an Liai n̄an bōk m̧ōttan leen wōjke eo im en̄jake lan̄lōn̄ eo eļap eaar juon ikdeleel eo eļap n̄an kwaļo̧k kake im jerbal n̄an baam̧le eo an. Aaet, ke eaar oktaļo̧k n̄an Kraist, eaar barāinwōt oktaļo̧k n̄an ro jet kōn iakwe im kōn jerbal in jipan̄.

Juon iaan bwebwenato ko raorōk ilo Bok in Mormon ej kōmeļeļeik ta eo eaar waļo̧k n̄an juon em̧m̧aan etan Enos ālkin an Anij uwaake jar eo an.

Eaar ba:

“Im aō eaar ean̄den; im iaar bukwelōlō im̧aan aō ri Kōm̧anm̧an, im iaar kūr n̄an e ilo jar ekajoor im akweļap n̄an jetōb eo aō; im aolepān raan eo iaar kūr n̄an e; aaet im ke bon̄on eo eaar itok iaar kotak wōt ainikiō bwe en tōpar lan̄ ko.

“Im eaar itok juon ainikien n̄an eō, im ba: Enos, jerawiwi ko am̧ re jako jān eok, im kwonaaj jeram̧m̧an.

“Im n̄a, Enos, iaar jeļā bwe Anij ejamin riab; kōn menin, aō bōd kar bōkļo̧k.

“Im iaar ba: Irooj, ekōjkan an men in kōm̧m̧an?

“Im Eaar ba n̄an eō: Kōnke tōmak eo am̧ ilo Kraist, eo kwojan̄in kar moktaļo̧k ron̄ ak lo. … Kōn menin, kwon ilo̧k, am̧ tōmak eaar kemour eok.

“Kiiō, ālkin men kein, ke iaar ron̄ naan kein iaar jino en̄jake juon ikdelel n̄an jeram̧m̧an eo an ro jeiū im jatū, ri Nipai ro; kōn menin, iaar lutōkleplep aolepān aō n̄an Anij kōn er ” (Enos 1:4–9; kakobaba in katak).

Ke Enos eaar oktaļo̧k n̄an Irooj “kōn bōro em̧ool” (2 Nipai 31:13), an n̄ūrbōktak kōn baam̧le eo an, ro m̧ōttan, im ro jeran n̄an kōļapļo̧k ejjab kōņaan in wōt.

Jān bwebwenato kein ruo jej ekkatak kaki rej en̄jake ko raorōk ilo mour ko ad make kōn kōjeram̧m̧an ko an Pinmuur eo an Jisōs Kraist m̧okta jen ad leļo̧k lukkuun jerbal in jipan̄ eo me etinkwadik ilo “iaļen m̧ōm̧akūtkūt.” Āinwōt Liai, Enos, im ļaddik ruo reddik ilo bwebwenato eo iaar kwaļo̧ke, kōj āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata kar en̄jake metak in jerawiwi n̄an jetōb eo ad. Jej barāinwōt en̄jake erreeo, aenōm̧m̧an, jetōb in kemour im kōkāāl, im tōl me maron̄ wōt būki kōn ekkatak im mour kake pedped ko ilo gospel eo an Rilo̧mo̧o̧r.

Pinmuur eo an Jisōs Kraist eaar letok erreeo n̄an kōm̧m̧an kwojarjar im erreeo, n̄an kaenōm̧m̧an im kemour kinej ko an jetōb im joļo̧k nana, im kōjparok eo n̄an kōmaron̄ kōj n̄an tiljek ilo iien em̧m̧an im nana jim̧or.

M̧ool ko Repād

N̄an kom̧ baam̧le im ro m̧ōttam̧ ro rejjab membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata, iaar kōmeļeļeik unin pedped ko etke kōm̧ij mijinede.

M̧ool ko repād ilo juon laļ eo me ean̄jiwiwi im ej kowaan m̧ool ko. Juon raan ilju im jeklaj, “bukwe otemjej [naaj] kwaļo̧k bwe Jisōs Kraist e Irooj, n̄an aiboojoj an Anij Jemān” (Pilippai 2:10–11). Jisōs ri Krasit eo ej lukkuun Nejin eo Emake Wōt Nejin Jemed Ilan̄. Āinwōt membōr ilo Kabun̄ eo An, kōm̧ij kam̧ool bwe Ej mour im bwe Kabun̄ eo an em̧ōj an bar jepļaaktok tarlepen ilo raan kein.

Karuwainene in kōm̧ij lewaj n̄an kom̧ n̄an ekatak kake im n̄an idajon̄jon̄e ennaan in am rej tōprak in men ko rem̧m̧an ilo gospel eo an Jisōs Kraist ilo mour ko am. Jet iien kōm̧ij ioon apan̄ ak ijidwewe ak bweralik ļo̧k ilo kōttōpar ko am. Ikdeleel eo ad ej n̄an kwaļo̧k n̄an kom̧ m̧ool ko me relukkuun aorōk n̄an kōm̧.

Āinwōt juon Rikaļooraņ Irooj, im kōn aolepen kajoor in būruwō, Ij kam̧ool kōn m̧ool im kwojarjar eo An. Im ij karuwaineneik kom̧ n̄an “itok im loe” (Jon 1:39), ilo āt eo ekwojarjar etan Jisōs Kraist, amen.