Kwaļo̧k Am̧ Meram
Jān Neill F. Marriott
Rikakpilōklōk eo Kein Karuo ilo Būreejtōnji eo Eutiej an Doulul eo an Jiron̄ ro
Jej aikuj jutak pen ilo tōmak im kotak ainikied n̄an kwaļo̧k katak ko rem̧ool.
Joten in ikōņaan kile ruo eddo ko raorōk jej eddoki: kein kajuon, kobaiktok meram in gospel im m̧ool n̄an mour ko ad, im kein karuo, kwaļo̧k meram eo im m̧ool ippān ro jet.
Kom̧ jeļā ke ewi jon̄an ami aorōk? Kom kajjojo—kiiō— eaorōk im ļap tokjen ilo karōk in lo̧mo̧o̧r eo an Jemedwōj Ilan̄. Ewōr ad jerbal n̄an kōm̧m̧ane. Jejeļā m̧ool eo kōn jepļaaktok eo an gospel eo. Jepojak ke n̄an jojomare m̧ool eo? Jej aikuj mour kake; jej aikuj kwaļo̧k kake. Jej aikuj jutak pen ilo tōmak eo ad im kotak ainikied n̄an kwaļo̧k katak eo em̧ool.
Ilo Jeptōmba 2014 Ensignim Liaona, Elder M. Russell Ballard: ‟Jej aikuj eļapļok kareel in ainikien kōrā ro retōmak. Jaikuji er n̄an ekkatak katak eo im n̄an meļeļe ta jej tōmak kake bwe ren maron̄ kwaļo̧k naan in kam̧ool ko aer kōn jeļā m̧ool eo an men ko otemjeļo̧k.”1
Jejtōr raņ, kom̧ kar kōkajoor tōmak eo aō ilo Jisōs Kraist. Iaar lale waanjon̄ak ko ami, ron̄jake naan in kam̧ool ko ami, im kar en̄jake tōmak eo ami jān Brazil n̄an Botswana! Ewōr kajoor ippāmi n̄an kareel ro ipaļaakūmi jekdoon ia kom̧ij ilo̧k ie ļo̧k. Armej ro ipeļaakūm̧i rej en̄jake—jān baam̧le ko ami n̄an laajrak in armej ro kom̧ij ekkejeļo̧k ippāer ilo cell phone ko ami im jān ro m̧ōttami ilo jikin alooj ko n̄an ro rej jijet iturumi jotenin. Ij errā ippān Jejtōr Harriet Uchtdorf, eo eaar jeik, ‟Komij … kajoor im waanjon̄ak n̄an juon laļ emarok ilo ami kwalo̧k, jān wāween ami mour kōn mour ko ami, bwe ko̧jpeļ eo ej ennaan eo ekam̧ōņōņō.”2
Būreejtōn Thomas S. Monson ekar ba, ‟Eļan̄n̄e kōkņaan leļok juon meram n̄an ro jet, kwoj aikuj kōmeram eok make.”3 Ekōjkan ad dāpij an meram eo em̧ool kabōlbōl ippād? Jet iien Ij en̄jake aō āinwōt juon lait emarok. Ekōjkan Ad kōļapļo̧k ad meram?
Jeje ko rekwojarjar rej katakin, bwe eo ej jen Anij ej meram; eo ej bōke meram eo, im wōnm̧aanļo̧k ippān Anij, ej bōk eļapļok meram.4 Jej aikuj wōnm̧aanļo̧k ippān Anij, āinwōt an jeje ko rekwojarjar ba. Jaikuj etal n̄an unin meram—n̄an Jemedwōj Ilan̄ im Jisōs Kraist. Jemaron̄ barāinwōt etal n̄an tampeļ, jeļā bwe aolep men ilowaan rej jitōn̄ļo̧k Kraist im wujlepļok eo An pinmuur eo An eļap.
Kōļmenļo̧kjeņ kōn wāween an tampeļ jelet peļaakier. Rej kaiboojoj lowaan jikin kein; rej meram jān tōl ko routeej. Etke rej kaiboojoj im meram? Kōnke āinwōt an jeje ko rekwojarjar ba, bwe m̧ool ej meram 5 im tampeļ ko epād m̧ool im kōttōpar an mour indeeo; kom̧ barāinwōt.
Ilo 1877, Būreejtōn George Q. Cannon eaar ba, ‟Aolep tampeļ … kadikļo̧k kajoor eo an Setan ioon laļin.”6 Ij tōmak bwe jekdo̧o̧n ia tampeļ ko rej ekkal ie ioon laļ in, ej iuun likļo̧k marok. Kōttōpar an tampeļ ej n̄an jipan̄ armej leļok n̄an aolep ro nejin Jemedwōj Ilan̄ kajoor eo n̄an jepļaak im mour Ippān. Kōttōpar eo ad ainļo̧k wōt ke m̧okein em̧ōj aji, m̧ōkein im̧ōn Irooj? N̄an jerbal n̄an ro jet im jipan̄ er iuun likļo̧k marok im jepļaak n̄an meram an Jemedwōj Ilan̄?
Jerbal ekwojarjar eo an tampeļ enaaj kōļapļok ad tōmak ilo Kraist, innām jemaron̄ kareel tōmak an ro jet. Ilo ad naajdik jetōb eo jen tampel, jemaron̄ katak m̧ool eo, kajoor eo im kōjatdikdik ilo Pinmuur eo an Rilo̧mo̧o̧r ilo mour ko ad.
Jet iiō rem̧oot ļo̧k baam̧le eo am eaar ioon juon apan̄ eļap. Iaar etal n̄an tampeļ im jar kōn jipan̄. Kar letok n̄an eō juon iien em̧ool. Iaar bōk alikkar in m̧ojņo̧ eo aō, im iaar bwilōn̄. Ilo tōre eo iaar lo juon kōrā euteej buruwōn ej kōm̧m̧ani jerbal ko an ilo wāween eo an make, ejjab ilo wāween an Irooj, im make bōk nōbar kōn jabdewōt toprak ko ej kōm̧m̧ani. Ijeļā bwe iaar kalimjōk eō make. Iaar jar ilo būruō n̄an Jemedwōj Ilan̄ im ba, ‟Ijjab kōņaan āinwōt kōrā eņ, ak ekōjkan aō oktak?”
Kōn jetōbin m̧adenļo̧k ilo tampeļ, kar katakin eō kōn aikuj eo kake juon Ripinmuur. Iaar m̧okaj im reilo̧k n̄an Rilo̧mo̧o̧r Jisōs Kraist im kar en̄jake an en̄taan eo aō mejkunļo̧k im juon kōjatdikdik eļap eaar kobrak būruō. Eaar kōjatdikdik eo aō de eo, im Ij kōnaan depdep wōt Ippān. Eaar alikkar n̄an n̄a bwe armej ilo lukkuun pikitokin ej ‟ri kōjdat n̄an Anij”7 im n̄an armej ilo aer kareel. Ilo tampeļ raan eo iaar katak bwe kōn Pinmuur eo an Jisōs Kraist mejatoto in aō uteij bōro emaron̄ oktak im bwe imaron̄ kōm̧m̧an em̧man. Iaar en̄jake An iakwe im jeļā bwe Emaron̄ katakin eō kōn Jetōb im ukōt eō eļan̄n̄e inaaj wujlepļo̧k aō n̄an E, jab ņooj jabdewōt.
Ij jum̧aik wōt m̧ōjņo̧ e aō, ak Ij leke jipan̄ eo ekwojarjar an Pinmuur. Kōmeļeļe in ekar itok kōnke Iaar deļo̧n̄e tampeļ ekwojarjar, kappukōt aenōm̧m̧an im uwaak. Iaar delo̧n̄e tampeļ eo ilo aō eddo, im Iaar ilo̧k jeļā bwe ewōr aō Rilo̧mo̧o̧r ekajoor. Iaar meraļo̧k im lan̄lōn̄ kōnke Iaar bōk An meram im bōk An karōk n̄an eō.
Likūt ipeļaakin laļ in, tampeļ ko ewōr aer make aorōk eo ejenolo̧k im jin̄a ko itulik, ak itulowaa aolepāer rej koba kōn juon wōt kain meram, kōttōpar, im m̧ool. Ilo 1 Korint 3:16 jej riit, ‟Kom̧ jab jeļā bwe kom̧ tempel an Anij, im Jetōb an Anij ej jokwe ilo kom̧?” Kōj rej barāinwōt leddik ro nejin Anij kar likūt ipeļaakin laļ in, im kōj kajjojo ewōr ad paaktok eo ejenolo̧k im jin̄a itulik, āinwōt tampeļ ko. Kōj barāinwōt ewōr jetōbin meram ippād. Jetōbin meram in ej juon rom̧aak in meram an Rilo̧mo̧o̧r eo. Ro jet renaaj reel kōn meram in.
Ewōr eddo ko ad make ioon laļ in—jān leddik eo, jinen, ritōl, im rikaki n̄an jejtōr, ribōk wōņāān, lio pālele, im elōn̄ļo̧k. Kajjojo rej kareel. Kajjojo eddo renaaj wōr aer kajoor ilo ad romaak kōn m̧ool an gospel im bujen ko an tampeļ ilo mour ko ad.
Elder D. Todd Christofferson ekar ba, ‟Ilo men otemjej, juon jinen emaron̄ kwaļo̧k kareel eo an ejenolo̧k jān ro jet ilo jem̧doon ko jet.”8
Ke ajri ro nejūm rekar dik wōt, iaar en̄jake aō āinwōt rijipan̄ kiaptin eo ippān leo pāleeō David, ilo juon tima, im juon pija in ajri ro nejim 11 āinwōt juon inej in tim̧a ko reddik rej itaak ippām ilo jikin po eo, m̧aanjabpopo n̄an jerak ilomalo in laļ in. David im n̄a kar aikuj bōk im̧we kajjojo raan jān Irooj kōn iaļ eo em̧m̧antata n̄an jerakrōk kōn wa jiddik ko waam.
Raan ko aō rekar obrak kōn men ko imeļokļok in kōm̧m̧ani āinwōt lemlem nuknuk, riiti bok ko n̄an ajri ro, im kōmat kōjota. Jet iien ilo jikin po eo ilo m̧weo im̧ōm, jejjab maron̄ lo kōn men kein redik im relam waan, ekoba jar an baam̧le, ekkatak jeje ko rekwojarjar, im nokon in jota an baam̧ļe, men ko reļļap rej kūrm̧ool. Ak ij kam̧ool bwe jerbal kein ewōr aorōk ko aer indeeo. Lan̄lōn̄ eļap ej itok n̄e wa jiddik kein—ajri ro nejid—rej rūtto ļo̧k n̄an erom kein jerbal ko rekajoor robrak kōn meram an gospel im pojak n̄an pād ilo jerbal in jipan̄ an Anij.9 Jerbal ko ad reddik kōn tōmak im jerbal in jipan̄ rej wāween ad maron̄ wōnm̧aanļo̧k ippān Anij im bōktok meram indeeo im aiboojoj n̄an baam̧le ko ad, ro m̧ōttad, im doulul ko ad. Kom̧ maron̄ bōk kajoor n̄an kareel ro jet!
Kejokļo̧kjeņ kōn kareel eo me tōmak an juon leddik ilo Būraimere emaron̄ kōm̧m̧ane n̄an baam̧le eo an. Tōmak eo an leddik eo nejūm ekōjeram̧m̧an baam̧le eo am ke eaar jako ļaddik eo nejūm̧ edik ilo jikin kaloojoj eo. Baam̧le eo eaar kōkairiir im pukōt e. Āliktata, leddik eo nejūm̧ ratimjuon an iiō eaar etoto ilo peiū im ba, ‟Jinō, jej ke aikuj jar? Ej m̧ool baam̧le eo eaar koba ippān doon ilubwilijin rikappok ro im jar n̄an lo ļaddik eo. Kōm kar loe. N̄an aolep leddik in Būraimere ro ij ba, ‟Jouj wōnm̧aanļo̧k kakeememej jinōmi im jemāmi n̄an jar!”
Jam̧ōr in ekar juon Aō jeramm̧an n̄an pād ilo juon kāām an 900 jiron̄ ro ilo Alaska. Iaar kanuuj reel kōn ta ko rej kōmani. Rekar itok n̄an kāām eo ilo aer pojak ilo mour in jetōb, raar riiti bok in Mormon im kakeememej e ‟Kraist Eo Ej Mour: Naan in Kam̧ool an Jon̄oulruo ro.” Bon̄en eo kein kajilu, aolepān jiron̄ ro 900 rekar jutak ippān doon im kwaļok aolepān ennaan eo.
Jetōb ekar kobrak ruum̧ eo, im iaar kijorjor in kobaļo̧k. Ak iaar jab maron̄. Iaar jab kadedeļo̧k ta eo eaar menin aikuj kakkilōklōk.
Iaar jino katak naan ko ‟Kraist Eo Ej Mour” āinwōt an jejtōr ro kar kōm̧m̧ane, im kōn kareel eo aer eaar ļapļo̧k Aō iminene kōn bujen kwojkwoj n̄an iien otemjej kememej Rilo̧mo̧o̧r eo, āinwōt Aō ālij im bar ālij naan in kam̧ool an Rijilōk ro an Kraist. Kwojkwoj eļapļok meļeļein n̄an eō.
Aō kōjatdikdik ej n̄an leļo̧k n̄an Rilo̧mo̧o̧r juon menin leļo̧k ilo Kūrijm̧ōj in ‟Kraist Eo Ej Mour” kememej im kapen ilō būruō m̧ae Tijem̧ba 25 raan. Ij kōjatdikdik bwe Imaron̄ erom juon kareel n̄an em̧m̧an—āinwōt kar jejtōr ro ilo Alaska n̄an n̄a.
Komaron̄ lo am make ļoor naan ko ilo ‟Kraist Eo Ej Mour?” ‟Ekōņaan bwe jen aolep ļoor waanjon̄ak eo An. Eaar etetal ilo iaļ ko ilo Palestine, kemour rinan̄inmej, kaloļo̧kjeņ ripilo, im kōjerkakpeje rimej.”10
Kōj, jejtōr ro ilo Kabun̄ in, jab etetal ilo iaļ ko an Palestine kemour rinan̄inmej, ak jemaron̄ jar im bōk iakwe an Pinmuur n̄an rinan̄inmej, kōkajoorļo̧k jemjerā.
Men̄e jejjab maron̄ kaloļo̧kjeņ ripilo ilo wāween eo an Rilo̧mo̧o̧r eo, jemaron̄ kam̧ool kōn karōk in lo̧mo̧o̧r n̄an ripilo ilo jetōb. Jemaron̄ kōppeļļo̧k kōļmenļo̧kjeņ ko aer n̄an meļeļe kōn kajoor an priesthood ilo bujen ko indeeo.
Jemaron̄ jab kōjerakpeje rimej āinwōt Rilo̧mo̧o̧r, ak jemaron̄ kōjeram̧m̧an rimej kōn pukōt etāer n̄an jerbal an tampeļ. Innām jenaaj lukkuun kōjerakpeje er jān mej jān laļ an jetōb im leļok n̄an er juon iaļ indeeo.
Ij kam̧ool bwe ewōr juon Rilo̧mo̧o̧r, Jisōs Kraist, im kōn kajoor eo An im meram jenaaj maron̄ iuun likļo̧k marok jān laļ in, kwaļo̧k m̧ool eo jejeļā, im kareel ro jet n̄an itok n̄an E. Ilo etan Jisōs Kraist, amen.