Bwebwenato in wōjke olive eo jān Brad Teare

ḿaaj 16–22

Jekab 5–7

Irooj ej Jerbal Ippād

Jino m̧aanjabpopo eo am̧ n̄an katakin kōn riiti Jekab 5–7 ippam̧ make im ippān baam̧le eo am̧. Ta eo kwaar ekkatak me enaaj lukkuun kōjeraam̧m̧an n̄an ro kwoj katakin? Laajrak in emaron̄ letok n̄an eok bar jet meļeļe ko.

Je En̄jake ko Rej Im̧we Eok

Kajjitōk bwe ren Kwaļo̧k

Ta eo ro uwaan kūlaaj eo rekar loe ilo Jekab 5–7 me ej im̧we er n̄an “jerbal ilo jikin kallib” ijoko rej jokwe ie? (Jekab 5:15).

Katakin Katak ko

Jekab 5

Irooj ej kajjitōk ippān ro Rikarejeran n̄an jerbal Ippān ilo jikin kallib eo An.

• Kōnke bwebwenato in wōjke olive ko raitok im ilo jet kaipokpok, komaron̄ aikuj in jerbal ippān doon āinwōt juon kūlaaj n̄an ejaake juon kōmeļeļe ekadu in bwebwenato eo. N̄an waanjon̄ak, komaron̄ jin̄aiki m̧ōttan ko raorōk an bwebwenato eo ioon boot eo ak ejaake juon karōkan iien ej kwaļo̧k m̧akūtkūt ko (waanjon̄ak, lale pija eo ilo jem̧ļo̧kin laajrak eo). Ro uwaan kūlaaj eo remaron̄ kobaik eoon ko ak kōmeļeļe ko n̄an pija eo im ekōnono kōn ta jet iaan meļeļein kōkkaļļe ko, āinwōt wōjke eo eawiie im wōjke olive ko rawia, Irooj eo an jikin kallib eo, eo karejeran, im leen ko rem̧m̧an im leen ko renana. Ilo ekōnono in, etale eoon 61–75, eo ej kōmeļeļeiki jerbal eo an Irooj ilo raan kein ad. Ewi wāween ad jerbal ilo jikin kallib eo an Irooj? Ewi wāween an eoon kein jelet jerbal eo jej kōm̧m̧ane?

• Naan ko an “Irooj in jikin kallib eo” remaron̄ leļo̧k kaenōm̧m̧an n̄an ro jinen im jemān ajri ro rej jōbwābwe. N̄an waanjon̄ak, ta eo Jekab 5:41, 46–47 ej ļōm̧ake kōn wāween an Jemed ilo Lan̄ en̄jake kōn ajri ro Nejin ro rej jōbwābwe? Ewi wāween An kajjieon̄ lo̧mo̧o̧ren er? (lale eoon 61–75).

• Jekab 5:61–75 ej katakin bwe Irooj ej jerbal ikōjaan ro Rikarejeran ilo jikin kallib eo An. Ro uwaan kūlaaj eo remaron̄ riiti eoon kein ilo kūrub ko reddik im ekōnono kōn en̄jake ko rekar loi bwe Irooj ej jerbal ippān rikarejar ro an n̄an kōm̧akūt m̧aanļo̧k jerbal eo An. Ta kōļmenļo̧kjeņ ko jet ro uwaan kūlaaj eo remaron̄ bar kobaiki jān ennaan eo an Būreejtōn Henry B. Eyring “Irooj ej Tōl Kabun̄ eo An”? (Ensign ak Liaona, Okt. 2017, 81–84).

  

  Jemaron̄ jerbal ippān “Irooj in jikin kallib eo” ijn ioon laļ in.

Jekab 6:3–13

Irooj ej keememej armej ro An ilo iakwe im tūriam̧o̧ kake.

• Itok, Ļoor Eō—N̄an Kajjojo Armej im Baam̧le ko ej kajjitōk ippād n̄an etale Jekab 6:3–5 n̄an ennaan ko Jekab ekar kōņaan in kwaļo̧ki innām pukote ennaan kein ilo bwebwenato in wōjke olive eo (lale Jekab 5). Bōlen ro uwaan kūlaaj eo renaaj jeraam̧m̧an jān aer ron̄jake jān ro me rekar kōm̧m̧ane ikkure eo ak jān kōm̧m̧ane ikkure in āinwōt juon kūlaaj. Remaron̄ in kōllaajrak ioon boot eo m̧ool ko an gospel eo rej loi ilo Jekab 6. Innām, ium̧win kajjojo m̧ool, remaron̄ kōllaajrak eoon ko jān bwebwenato eo ilo Jekab 5 eo ej kōnono ennaan eo. Ewi wāween an ro uwaan kūlaaj eo kar loe ejja ennaan in wōt kar kōmeļeļe ilo mour ko aer make?

• Juon meļeļe in naan eo eddāb ej dāpdep im dim n̄an juon men, epaakeļo̧k, im jab m̧ōk. Komaron̄ kōņaan kwaļo̧k meļeļein ippān ro uwaan kūlaaj eo am̧ im kajjitōk ta kōļmenļo̧kjeņ ko ej leļo̧k n̄an er kōn Jekab 6:5.

Jekab 7:1–23

Jemaron̄ jutak pen n̄e ro jet rej jum̧ae tōmak eo.

• Elōn̄ wōt iaad rekar en̄jake jum̧ae n̄an tōmak eo ad āinwōt Jekab ekar jelm̧ae ke ekar ioon Sherem. Juon wāween n̄an jipan̄ ro uwaan kūlaaj eo m̧aanjabpopo n̄an kain jum̧ae rot in ej bwe ren etale Jekab 7:1–23 n̄an pedped in katak ko me rekar jipan̄ Jekab jutak pen wōt. Ta waanjon̄ak ko jet kōn jutak pen ilo tōmak eo ad im jemaron̄ kwaļo̧ki ippān doon—jān jeje ko rekwojarjar, menmenwij eo ad, ak mour ko ad make? Bōlen ewōr ennaan ko jān ritōl ro an Kabun̄ in me rekar jipan̄ kōj ke ro jet rekar pukot n̄an kōmōjņo̧ik kōj jān tōmak eo ad (lale, n̄an waanjon̄ak, Quentin L. Cook, “Peran ilo Naan in Kam̧ool kōn Jisōs,” Ensign ak Liaona, Okt. 2016, 40–43). Rōjan̄ ro uwaan kūlaaj eo bwe ren kwaļo̧k ennaan ko rekar loe im rejipan̄.

• Ke Jekab ekar jelm̧ae jān Sherem, Sherem ekar kōjatdikdik in kōmōjņo̧ik tōmak eo an, ak tōmak eo an Jekab ekar jab mōjņo̧ (lale Jekab 7:5). Ro uwaan kūlaaj eo remaron̄ in m̧ōņōņō in kōm̧m̧ane bwebwenato eo ikōtaan Jekab im Sherem, kōjerbale Jekab 7:1–23 āiwōt juon script. Ta eo jej ekkatak jān eoon kein kōn kōl im katakin ko an ro rej jum̧ae jerbal eo an Anij? Ta eo jej ekkatak jān Jekab kōn wāween jab ebboļoļ ilo tōmak eo ad?

Jekab 7:24–24

Jemaron̄ lōke ilo Anij.

• RiNipai ro rekar mour ium̧win kamjak in jodik jān Rileman ro. Men̄e jemaron̄ jab jelm̧ae kamjak in tariņae aolep iien, ta kauwōtata ko ilo jetōb jej jelm̧ai? Ta eo jej ekkatak jān uwaak ko an RiNipai ro kōn jekjek eo aer, ej kōmeļeļe ilo Jekab 7:24–25? Komaron̄ in al ak riiti innām ekōnono kōn al ko an Kabun̄ in eo kōjerbal n̄an tariņae ko āinwōt juon meļeļe keidi, ko āinwōt “Onward, Christian Soldiers” ak “Behold! A Royal Army” (Hymns, nos. 246, 251).

Kōketak Ekkatak ilo M̧weo

N̄an rōjan̄ ro uwaan kūlaaj eo n̄an riiti bok in Enōs, ba n̄an er bwe emaron̄ katakin er wāween aer kōm̧m̧ani jar ko aer im eļapļo̧k meļeļeir.

Kōkkōm̧anm̧anļo̧k Ad Katakin

Kōm̧m̧an bwe am̧ katakin en pedped wōt ioon katak ko. Lukkuun lale bwe ekōnono ko an kūlaaj ren pedped ioon katak ko ilo jeje ko rekwojarjar. Komaron̄ kōm̧m̧ane menin ilo am̧ kajjitōk ippān ro uwaan kūlaaj eo n̄an riiti eoon ko innām kwaļo̧k ippān ro jet m̧ool ko rekar loe, barāinwōt en̄jake ippān mour kōn m̧ool ko. (Lale Teaching in the Savior’s Way, 20–21.)