Jeorļo̧k Bōd, jān Greg K. Olsen

M̧aaj 9–15

Jekab 1–4

Kom̧in Kōllaajrak Kom̧ n̄an Anij kōn Pinmuur eo an Kraist

Jekab 1–4 ekitbuuj elōn̄ katak ko me rej jerbal n̄an mour ko ad. Ilo am̧ riiti jebta kein, ļōmņak kōn wāween am̧ maron̄ jipan̄ ro kwoj katakin mour kōn katak ko Jekab ekar katakin.

Je En̄jake ko Rej Im̧we Eok

Kajjitōk bwe ren Kwaļo̧k

N̄an jipan̄ ro uwaan kūlaaj eo kwaļo̧k ippān ro jet en̄jake ko aer jān Jekab 1–4, komaron̄ ajije peba jiddik ko im kajjitōk ippān ro uwaan kūlaaj eo n̄an je juon eoon jān jebta kein me rekar loe ke eļap meļeļein. Likūti peba jiddik ko ilowaan juon ninne, kwaļo̧k jet jān ninne eo, im kajjitōk ippān armej eo ekar jet eoon eo bwe en kwaļo̧k en̄jake ko an.

Katakin Katak ko

Jekab 1:6–8, 15–19; 2:1–11; 4:18

Ritōl ro rewāppen rej jerbal ilo tiljek n̄an em̧m̧anļo̧k eo an jetōb ko.

• Komaron̄ jino juon iien ekōnono kōn jerbal ko retiljek an Jekab ilubwilijin armej ro an ilo am̧ kajjitōk ippān kūlaaj eo bwe ren kwaļo̧k aer en̄jake ko ilo aer kar jeraam̧m̧an jān jerbal in jipan̄ an juon ritōl an Kabun̄ in. Ak ļōmņak in kajjitōk ippān juon ritōl an Kabun̄ in—ekar tōl m̧okta ak juon eo ej tōl kiiō—bwe en kōnono kōn juon iien ekar bōk im̧we n̄an jerbal n̄an juon armej. Ro uwaan kūlaaj eo innām emaron̄ pukot naan ko im meļeļe ko ilo Jekab 1:6–8, 15–19; 2:1–11; im 4:18 ko me rekar jipan̄ kōj meļeļe wāween an kar Jekab en̄jake kōn kūr eo an im armej ro ekar jerbal n̄an er. Ewi wāween am̧ loe an ritōl ro ad kōļapļo̧k kūr eo aer? Ta eo eoon kein rej kwaļo̧k kōn wāween eo jej aikuj rejtake ritōl ro ad?

Āinwōt Jekab, ritōl ro an Kabun̄ in rainin “kōļapļo̧k kūr eo [aer] n̄an irooj.”

Jekab 2:12–21

Jej aikuj kajjieon̄ joļo̧k utiej bōro im pukotļo̧k ro rej pād ilo aikuj.

• Irooj ekar wōr an kakkōļ ko rekajoor n̄an RiNipai ro kōn utiej bōro. N̄an jipan̄ jino juon iien kōnono kōn unin kōnono in, komaron̄ kepaake jejjo ro uwaan kūlaaj eo m̧okta im kajjitōk ippāer n̄an pukot jet wāween ko rikapo eo ej kareel kaki n̄an iakwe m̧weie ilo laļ in ad rainin. Innām kajjitōk ippāer n̄an kwaļo̧k ippān ro uwaan kūlaaj eo ta eo rekar kile. Ro uwaan kūlaaj eo emaron̄ in leiaia n̄an riiti Jekab 2:12–21 im pukot ta eo Irooj ekar katakin kōn waween an aikuj kalimjōk m̧weie ilo m̧weiūk. Innām remaron̄ kōm̧m̧ane im kwaļo̧ke juon peba ekilep eo me ej kareel pedped in katak eo. Leļo̧k iien n̄an ro uwaan kūlaaj eo bwe ren kejōkļo̧kjeņ kajjojo kōn ta eo er remaron̄ kōm̧m̧ane n̄an kōjerbale ta eo rekar ekkatak jān ennaan ko an Jekab.

• Ro uwaan kūlaaj eo am̧ remaron̄ in etale Jekab 2:12–21 im je kajjitōk ko aer make n̄an kobaikļo̧k n̄an laajrak eo an Elder Perry. Ta eo im ennaan eo an Elder Perry ilo “Kein Jipan̄ ko jet” rej kobaiktok n̄an meļeļe kōn katak ko an Jekab?

Jekab 2:23–35

Irooj ej lan̄lōn̄ ilo erreo.

• Elder David A. Elder DavidA. Bednar ekar katakin bwe jej mour “ilo juon laļ me eļapļo̧k an kajjirere kōn kwojarjar eo an ejaak armej im kadikļo̧k aorōk an mour an armej” (“We Believe in Being Chaste,” Ensign ak Liahona, May 2013, 41–44). Ewi wāween am̧ maron̄ jipan̄ ro uwaan kūlaaj eo kōjerbale Jekab 2:23–35 n̄an kadikļo̧k ennaan ko an laļ in kōn erreo? Juon wāween komaron̄ je ioon boot eo ej Ewi wāween an Irooj en̄jake kōn erreo? im kajjitōk ippān ro uwaan kūlaaj eo bwe ren pukot uwaak ko n̄an kajjitōk in. Jet iaer remaron̄ etale Jekab 2:23–35, im ro jet remaron̄ etale kōnono eo an Elder Bednar kar kōnono kaki ilōn̄. Er remaron̄ kōllaajrake ioon boot eo uwaak ko rej loi. N̄an kōnono kōn jon̄ak ko im kōjeraam̧m̧an ko rej ekkejeltok ippān mour kōn kien erreo, komaron̄ etale “Sexual Purity” (For the Strength of Youth, 35–37) ak kōjo̧ juon iaan pija in alooj kein ilo “Kein Jipan̄ ko jet.” Ta kōjeraam̧m̧an ko kōn mour juon mour erreo?

Jekab 4:4–11

RiNipai ro rekar tōmak ilo Jisōs Kraist.

• Jekab ekar kōņaan bwe jen jeļā menin mekarta e im armej ro an ro rekar mour bukwi iiō ko m̧okta jān jerbal in karejar eo an Kraist ilo mour in, rekar jeļā kōn E im relo̧k n̄an E kōn lo̧mo̧o̧r. Ekkar n̄an Jekab 4:4–5, etke RiNipai ro rekar kōjparok kien Moses? Ta eo ewōr ippād rainin im ej jitōn̄ļo̧k jetōb ko ad n̄an Rilo̧mo̧o̧r eo? Ta kōkkaļļe ko ak men ko rekkar Jekab ekar kōjerbale n̄an katakin kōn Jisōs Kraist? (barāinwōt lale Jenesis 22:1–13).

Jekab 4:8–18

Imaron̄ kattoļo̧k pilo ilo jetōb ilo aō mijōk wōt Rilo̧mo̧o̧r eo.

• Ewōr ke jabdewōt armej ilo kūlaaj eo am̧ ej kab m̧ōj an kakkōlkōle mejān n̄e epilo? Eļan̄n̄e ewōr, komaron̄ kajjitōk ippān armej eo bwe en kōmeļeļeiki wāween an taktō eo etale kajoor in mejān. Ro uwaan kūlaaj eo remaron̄ in kwaļo̧k ta eo rej ļōmņak ej meļeļe in pilo ilo jetōb. Ewi wāween an pilo ilo jetōb āinwōt pilo ilo mejād? Kajjitōk ippān ro uwaan kūlaaj eo bwe ren ļōm̧ake kōn wāween ko jemaron̄ in bōk kakkōlkōl eļan̄n̄e jej pilo ilo jetōb. Remaron̄ barāinwōt etale Jekab 4:8–18 im ļōm̧ake jet men ko jemaron̄ in kōm̧m̧ani n̄an kōļapļo̧k ad maron̄ “loe” men ko an jetōb.

• Elder Quentin L. Cook ekar kōllaajrake emān wāween ko me armej remaron̄ “reilo̧k jān kakōļļe eo” ilo raan kein ad (lale “Kein Jipan̄ ko jet”). Ta eo me naan ko an rej kobaiktok n̄an meļeļe eo ad kōn Jekab 4:13–15? Ta meļeļe in menin reilo̧k jān kakōļļe eo? Ewi wāween ad maron̄ lale bwe jen jab reilo̧k jān kakōļļe eo?

Kōketak Ekkatak ilo M̧weo

N̄an im̧we ro uwaan kūlaaj eo n̄an riiti Jekab 5–7, ba n̄an er bwe renaaj loe uwaak ko n̄an kajjitōk in Jekab 4:17 ilo aer lukkuun riiti jebta ko jilu rej pedo tok.

Kein Jipan̄ ko jet

M̧wil ko m̧wilid ņae m̧weie ilo m̧weiūk

Lale Jekab 2:13–19, Elder L. Tom Perry ekar katakin: “Jej aikuj in bōk naan in kapilōk in an Jekab ilo būruwōd. Jej aikuj riiti eoon in āinwōt ekar jeje n̄an kwaļo̧k n̄an kōj ilo raan kein, kōnke ekar. Naan ko an rej aikuj kōm̧m̧an bwe jen kajjitōk kajjitōk in pukot jetōb eo ad make. Kōllaajrak an men kein rejim̧we ke ilo mour ko ad make? Jej ke kowōrļo̧k, m̧oktata im eļaptata, ilo men ko me rej n̄an indeeo ilo piktokier? Ewōr ke juon ad jibadbad n̄an indeeo? Ak em̧ōj ke ad wōtlo̧k ilo aujiid im kowōrļo̧k ilo men ko an laļ in m̧oktata innām meļo̧kļo̧k Irooj?” (“United in Building the Kingdom of God,” Ensign, May 1987, 34).

Pija in alooj ko kōn Erreo (ChurchofJesusChrist.org)

• “I Choose to Be Pure”

• “Chastity: What Are the Limits?”

• “Law of Chastity”

Reilo̧k jān kakōļļe eo

Elder Quentin L. Cook ekar katakin wāween ad maron̄ reilo̧k “jān kakōļļe eo”:

“Jāniji katak ko rem̧ool n̄an katak ko an armej”

“Jet armej rej āinwōt rejook kōn ļam waan eo an ennaan eo an Rilo̧mo̧o̧r eo. Rekōņaan kobaiki ļap in im aaet jalikkar eo n̄an m̧ool eo n̄an kōm̧m̧ane emāletletļo̧k im apan̄ ak eļapļo̧k ekkarļo̧k n̄an jeļāļo̧kjeņ ko rej ejaak kiiō. … Jej reilo̧k jān kakōļļe eo n̄e, jej m̧akoko in bōk m̧ool ko reļam waan an gospel eo kōn ta er.”

“Men ko rejekkar ilo Gospel eo”

“Jej reilo̧k jān kakōļļe eo n̄e jej lelōn̄ļo̧k jabdewōt pedped in katak an jabdewōt armej, jekdo̧o̧n ewi jon̄an an ļap tokjān, n̄an juon waļo̧k eo ej kadikļo̧k kallim̧ur eo n̄an ko jet rej jon̄an aorōkin pedped in katak ko ak n̄e jej bōk juon jekjek eo me ej jum̧ae katak ko an Em̧m̧aan ro Rejitōn Bōro.”

“M̧akūtkūt ko rebwebwe āinwōt juon men ej jāniji n̄an wūjlepļo̧k aolep iien”

“Jet membōr rej kwaļo̧k bwe renaaj kallim̧uri er make kōn laudin̄din̄ eļan̄n̄e renej bōk jet kūr reļļap, ak rejjab loe bwe loļo̧k m̧oko an em̧m̧aan im katakin an kōrā ro [kiiō ņaetan jerbal in karejar] eļap tokjān ak m̧akūtkūt em̧m̧an n̄an rie jerbal in kijejeto eo aer.”

“Lōn̄aj kakien ko ioon katak ko”

“Ro rej kallim̧ur n̄an ļoor kakien ko ilo an ejjeļo̧k jipan̄ ko n̄an katak im pedped in katak eo eļaptata aer pidodo n̄an reilo̧k jān kakōļļe eo” (“Looking beyond the Mark,” Ensign ak Liahona, Mar. 2003, 42–44).