Minerva Teichert (1888-1976), O Amona i luma o le Tupu o Limae, 1949-1951, suauu i luga o le laupapa, 35 15/16 x 48 inisi. Falemataaga mo Faatufugaga a le Iunivesite a Polika Iaga, 1969.

27 Aperila–3 Me

Mosaea 7–10

“I Le Malosiaga o le Alii”

O lenei otootoga e mafai ona avea o se punaoa taua tele, ae e tatau ona faaopoopo i ai, ae e le suia ai, ia musumusuga e te maua a o e suesueina le Mosaea 7–10.

Tusi Faamaumau Ou Lagona Uunai

Valaaulia le Fefaasoaai

Mai lea taimi i lea taimi e mafai ona aoga le talanoaina o se vasega ia faamanuiaga o loo maua e tagata o le vasega a o latou taumafai e fai o latou aiga ma totonugalemu o lo latou aoaoina o le talalelei. O a fuaiupu mai le Mosaea 7--10 na manatunatu loloto i ai tagata o le vasega pe talanoaina i o latou fale i le vaiaso? Na faapefea ona aafia ai o latou olaga?

Aoao Atu le Aoaoga Faavae

Mosaea 7:14--33

Afai tatou te liliu atu i le Alii, faalagolago ia te Ia, ma auauna atu ia te Ia, o le a Ia laveaiina i tatou.

• A o suesueina e tagata o le vasega le Mosaea 7:14--33, e ono musuia i latou i aafiaga o le nuu o Limae, ia salamo ma liliu atu i le Alii mo se laveaiga. Ina ia musuia le talanoaga, e mafai ona e valaaulia se tagata o le vasega e sau sauniuni i le vasega e aotele mai pe na faapefea ona pauu atu le nuu o Limae i le nofopologa. E mafai e nisi ona faasoa mai mea sa latou aoaoina mai ia Limae e uiga i le faatuatua ma le faamoemoe i le Faaola. O le a se mea e mafai ona tatou aoao mai faamanatu a Limae i le ala na laveai ai e le Atua Lona nuu? (tagai i fuaiupu e 19–20). E mafai ona e fai i tagata o le vasega e faasoa mai ni tala faatusi paia po o ni aafiaga patino na musuia ai i latou e faalagolago i le Atua.

• E i ai avanoa o tagata o lau vasega e musuia ai isi e liliu atu i le Atua pe a saisaitia i latou i le agasala pe mafatia foi mai isi puapuaga. Atonu o le a fesoasoani ia i latou le suesue pe na faapefea e Limae ona musuia lona nuu. E mafai ona latou faitau muamua i le faamatalaga o i le Mosaea 7:20--25 o le nofopologa o le nuu o Limae ma mafaufau i se tasi latou te iloa o loo feagai ma le nofopologa i le agasala. Ona mafai lea ona latou faailoa maia upumoni na aoao mai e Limae i le Mosaea 7:18--20, 33 e fesoasoani i lona nuu. E mafai faapefea ona tatou mulimuli i le faataitaiga a Limae a o tatou fautuaina i latou tatou te alolofa i ai e faalagolago i le Atua?

• Ina ia fesoasoani i tagata o le vasega e malamalama atili i le fesoasoani ua tuu mai e le Atua ia i tatou i puapuaga, e mafai ona outou usuina faatasi ma talanoaina le viiga “Faaola o Isaraelu” (Viiga, nu. 5) po o se isi pese e faamatala ai le ala ua laveaiina ai i tatou e le Faaola. O a mea o faaopoopo mai e le Mosaea 7:17–20; Eteru 12:27; ma le 2 Korinito 12:7–10 i lo tatou malamalama? Atonu e mafai e tagata o le vasega ona fefaasoaai aafiaga na laveaiina ai i latou e le Alii, e oo lava i nai auala iti, ona sa latou faaali atu le faatuatua ia te Ia.

Mosaea 7:26–27

Na foafoaina le tagata i le faatusa o le Atua.

• I fuaiupu nei, sa faamalamalama ai e Limae nisi o upumoni na aoao mai e Apinati sa faigata i tagata ona talia. O a ni upumoni e mafai e tagata o le vasega ona faailoa mai i nei fuaiupu? E faapefea e nei upumoni ona aafia le ala tatou te vaai atu ai i le Atua ma i tatou lava?

Mosaea 8:12–19

Ua aumaia e le Alii ia perofeta, tagatavaai, ma talifaaaliga ia manuia ai le tagata.

• Na maua e Amona le avanoa e faamalamalama atu ai ia Limae le matafaioi a se tagatavaai ma molimau atu ai i le taua o perofeta, tagatavaai, ma talifaaaliga. Atonu e te manao e faamanino atu e faapea i o tatou aso, o le Au Peresitene Sili ma le Korama a Aposetolo e Toasefululua e lagolagoina o ni perofeta, tagatavaai ma talifaaaliga. E mafai faapefea ona tatou, pei o Amona, ona tautala atu ma le le fefe e uiga i le manaomia o le i ai o ni perofeta, tagatavaai, ma talifaaaliga? (tagai i le Mosaea 8:13–18). Atonu e mafai e le vasega ona fuafuaina se faasalalauga faaagafesootai i luga o le upega tafailagi o le a fesoasoani i isi e malamalama ai i le matafaioi a se perofeta, tagatavaai, ma talifaaaliga i o tatou aso. O le a le mea na tatou faalogo ai i le konafesi aoao aupito lata mai e mafai ona tatou faasoa atu ia tatou uo, tagata o aiga, ma tuaoi e aoao atu ai i latou e uiga i le manaomia o perofeta?

• O se taunuuga o le faitauina o le Mosaea 8:12–19, atonu e te manao po o isi tagata o le vasega e ta’u atu lau molimau i perofeta, e pei ona sa faia ai e Amona, po o lou lotofaafetai mo faaaliga e ala mai i perofeta, e pei ona sa faia e Limae (tagai Mosaea 8:19).

• O le Perofeta o Iosefa Samita o le tagatavaai o le o loo tu i le ao o lenei tisipenisione (tagai i le MF&&F 21:1). Atonu e te manao e fai i tagata o le vasega e faasoa mai mea latou te aoaoina mai le faamatalaga a Amona e uiga i se tagatavaai (tagai Mosaea 8:13–18 Ona mafai lea ona latou talanoaina auala na avea ai Iosefa o se tagatavaai. (M&C 135:3 and Moses 6:36 e mafai ona fesoasoani tele i lenei talanoaga.)

Mosaea 9:14–19; 10:6–10

E mafai ona tatou faafetaiaia o tatou luitau “i le malosiaga o le Alii.”

• O le fasifuaitau “i le malosiaga o le Alii” e faalua ona ta’ua i talafaamaumau a Senifa o lona nuu ma a latou taua ma sa Lamana—i le Mosaea 9:14–19 ma le 10:6–10. Atonu e mafai e tagata o le vasega ona sailiili i nei fuaiupu ma faasoa mai mea latou te lagona i le uiga o lenei fasifuaitau. “E faapefea ona tatou maua “le malosiaga o le Alii”? Fautuaina tagata o le vasega e faasoa mai ni aafiaga sa latou faafetaia’ia ma le manuia ia luitau i le malosiaga o le Alii.

Mosaea 10:11–17

O a tatou filifiliga e mafai ona tosina ai augatupulaga.

• E mafai ona e valaaulia tagata o le vasega e faitau le leoa le Mosaea 10: 11--17 ma vaavaai mo auala na aafia ai le au sa Lamana i filifiliga ma talitonuga a o latou tuaa. O le a se mea o fautuaina mai i nei mea e uiga i aafiaga o isi ona o a tatou filifiliga? Tatou te mananao faapefea e faamatalaina i tatou lava ma o tatou aiga i se augatupulaga e tasi pe lua foi? Atonu e mafai e tagata o le vasega ona tusi i lalo ni nai mea o le a latou mananao e faaaofia ai i sea faamatalaga.

• O se lesona faitino faigofie—e pei o se laina o tomino—e ono fesoasoani e faapupula ia aafiaga e mafai ona i ai ia tatou fanau ona o filifiliga a tagata. Ona mafai lea ona e valaauina tagata o le vasega e faitau le Mosaea 10:11--17 ma vaavaai pe faapefea e talitonuga ma uiga faaalia o sa Lamana ona matuai aafia i filifiliga na faia e o latou tuaa i seneturi o muamua atu. O le tala a Elder Donald L. Hallstrom, o loo maua i le “Punaoa Faaopoopo,” o se tasi lea faataitaiga e mafai ona e faasoa atu. Atonu e mafai ona mafaufau tagata o le vasega i tala mai o latou olaga po o le talafaasolopito o lo latou aiga e uiga i se tagata amiotonu e toatasi na tosina ai augatupulaga mo le lelei.

Fautuaina le Aoaoina i le Aiga

O le vaiaso lenei sa aoaoina ai e tagata o le vasega e uiga i aafiaga le lelei o filifiliga a sa Lamana i luga o a latou fanau. Tuu atu ia iloa e tagata o le vasega faapea i le Mosaea 11--17 o le a latou faitau ai e uiga i se tagata o lona amiotonu na suia ai olaga o le toatele.

Punaoa Faaopoopo

O a tatou filifiliga e mafai ona aafia ai augatupulaga.

Na faasoa mai e Elder Donald L. Hallstrom le ala na faamanuiaina ai tupulaga i le lumanai ona o le faamaoni o ona matua matutua.

“E toalua le fanau a matua o lo’u tama, o se atalii (o lo’u tama) ma se afafine. … Na faaipoipo [lo la afafine] i le 1946 ma i le fa tausaga mulimuli ane ua ma’itaga. E i ai se faamoemoega faapitoa mo matua i se la tama teine (i lenei tulaga na o le pau lea o le la tama teine) e fanau mo le taimi muamua. E lei i ai se tasi na iloa o loo ia tauaveina se masaga. O le tulaga na faanoanoa ai, na maliliu uma o ia ma le masaga i le taimi na faafanau ai.

“Na nutimomoia loto o matua o lou tama. Ae peitai, o le la faanoanoaga, na vave ai lava ona la liliu atu i le Alii ma Lana Togiola. E aunoa ma le nonofo ai lava ma mafaufau pe aisea ua tupu ai lenei mea ma po o ai tonu e tuuaia, sa la tulimatai atu e ola ai i se olaga amiotonu. E le mauoa matua o lo’u tama; e le lavea i laua i e maualuluga faaleagafesootai; la te lei umiaina lava ni tofiga maualuluga i le Ekalesia—sa na o i laua o ni tagata tuuto o le Au Paia o Aso e Gata Ai. …

“O le faatuatua o Tamamatua o Art ma Tinamatua o Lou, aemaise lava ina ua feagai ma faigata, lea ua aafia ai nei augatupulaga e fa na mulimuli mai. I le faamaoni ma le loloto, na aafia ai lo la atalii (o lo’u tamā) ma lo’u tina ina ua malaia le tama teine lava e toatasi a o’u matua, le la uii, ona o tulaga faigata na mafua mai i le taimi na fanauina ai fanau. I le 34 o ona tausaga, na maliu ai o ia ina ua 10 aso talu lona fanauga, ma tuua ai le fanau e toa 4 , e 10 aso i le 8 tausaga le matutua. Faatasi ai ma le faataitaiga na la vaai i ai i augatupulaga na muamua atu, ma e aunoa ma se faatali—na liliu atu ai ou matua—i le Alii mo se faamafanafanaga” (“Liliu Atu i le Alii,” Ensign po o le Liahona, Me 2010, 78–79).

Faaleleia o Lo Tatou Aoao Atu

Faalogo. “O le faalogo o se faatinoga lea o le alofa. … Ole atu i le Tama Faalelagi e fesoasoani ia te oe e te malamalama ai i mea o loo fai mai ai tagata o lau vasega. Ao e gauai atu ma le faaeteete i a latou savali faaleo pe le faaleoa, o le a e iloa ma malamalama atili i o latou manaoga, o latou atugaluga, ma o latou naunautaiga”(Aoao Atu i le Ala a le Faaola, 34).