Apinati i Luma o le Tupu o Noa, saunia e Andrew Bosley

4--10 Me

Mosaea 11--17

“O Se Malamalama … E Le Mafai ona Faapouliuligia”

Mafaufau i le faataitaiga a Apinati i le aoaoina atu o le talalelei. O le a se mea e te maua i le Mosaea 11-17 e mafai ona fesoasoani ia te oe e avea ai ma faiaoga e sili atu?

Tusi faamaumau Ou Lagona Uunai

Valaaulia le Fefaasoaai

Ina ia mafai e tagata o le vasega ona faasoa mai se mea sa latou aoaoina ia latou suesuega faaletagata lava ia pe faaleaiga o tusitusiga paia, e mafai ona e valaaulia i latou e faamaea le fuaiupu lenei: Afai ou te filifilia se fuaiupu se tasi mai le Mosaea 11–17 e faasoa atu i se ou te alofa i ai, o le .

Aoao atu le Aoaoga Faavae

Mosaea 11–13; 17

E mafai ona tatou tutu atu mo le upumoni, tusa lava pe tatou te tutu na o i tatou.

• E ui ina e le faapea o le a faamata’uina tagata o lau vasega i le oti ona o a latou molimau, e mafai lava ona latou fetaia’i ma tetee ona o o latou talitonuga. Atonu e mafai ona latou maua mea e tutupu po o fuaitau i le Mosaea 11–13 ma le 17 ia e avatu ai ia te i latou le lototoa tele e tutu atu ai mo le upumoni. O le a se mea na avatu ai ia Apinati ma Alema le lototoa e le fefefe ai? E mafai faapefea ona tatou mausali atili ma tutumau i le puipuia o le upumoni? O saunoaga sii o i le “Punaoa Faaopoopo” e mafai ona maua mai ai ni nai manatu.

• Ina ia fesoasoani i lau vasega e aoao mai isi faataitaiga o le puipuia ma le lototele o le upumoni, e mafai ona e tusia le Tagata O E Tutu Atu mo le Upumoni i luga o le laupapa. E mafai ona e amata i le talanoaina o Apinati, valaaulia tagata o le vasega e faasoa mai ni mea na uunaia ai i latou e uiga ia Apinati a o latou faitau e uiga ia te ia i lenei vaiaso. Ona mafai lea ona latou ta’u maia nisi alii ma tamaitai---mai tusitusiga paia, o o latou aiga, po o aafiaga patino---o e ua latou manatu o ni faataitaiga o le tutu atu mo le upumoni. O le a le mea ua musuia i tatou e fai ona o nei faataitaiga?

Mosaea 12:19–37

A tatou suesueina le afioga a le Atua, e manaomia ona tatou faaaoga o tatou loto e malamalama ai.

• A o latou suesueina le Mosaea 12:19--37 i le vaiaso lenei, atonu e i ai ni malamalamaaga o tagata o le vasega po o le a le uiga o le faaaoga o o tatou loto e malamalama ai i le afioga a le Atua. Mafaufau e fai i nisi o i latou e faasoa mai o latou mafaufauga. Pe e mafai foi ona e faaaogaina sina taimi i le vasega e sailiili faatasi ai nei fuaiupu ma talanoaina mea o loo fautuaina mai ai e uiga i le ala e avea ai le suesue o le talalelei ma mea e sili ona taua. Mo se faataitaiga, aisea e taua ai le malamalama i le tulafono a le Atua ma “tausi i ai”? (Mosaea 12:29).

• O le a se mea e mafai e tagata o lau vasega ona aoao mai i le faatusatusaina o eseesega o uiga faaalia ma faiga a faitaulaga a Noa, ma le faiga e tatau ona tatou faaaogaina i a tatou suesuega o le talalelei? Valaaulia i latou e faitau le Mosaea 12:19–37, ma vaavaai mo faitioga na ta’ua e Apinati e uiga i faitaulaga a Noa. Mata o le a se tala a Apinati e uiga i a tatou suesuega o le talalelei i le aso? Fai i tagata o le vasega e faasoa mai mea latou te fai ua fesoasoani ia i latou e faaaoga o latou loto e malamalama ai ma faaopoopo ai se uiga sili atu i lo latou aoaoina o le talalelei.

  

  O suesuega lelei o le talalelei e aofia ai le faaaoga o o tatou loto e malamalama ai.

Mosaea 13:28–15:11

O le faaolataga e ala mai ia Iesu Keriso ma Lana Togiola.

• Ina ia faatalitonuina le aofia masalosalo e uiga i le afio mai o le Mesia, sa sii mai ai e Apinati se valoaga faamomoiloto mai le Isaia (tagai Mosaea 14). E tele nisi auala e mafai e tagata o le vasega ona iloilo lenei mataupu. E mafai ona latou faitauina ni nai fuaiupu i se taimi ma talanoaina, pe e mafai foi ona e vaevaeina le vasega i ni vaega toalaiti e talanoaina ai fuaiupu anoa, e aofia ai vaefaamatalaga, ia maua ai ni malamalamaaga faaopoopo. Fautuaina i latou e faasoa mai mea na latou aoaoina e uiga i le Faaola mai lenei mataupu.

• Pe o malamalama tagata o lau vasega i le uiga faapea o Iesu Keriso “na faamalieina manaoga o le faamasinotonu”? (Mosaea 15:9) Ina ia fesoasoani ia i latou ia maua se malamalama sili atu, e mafai ona e amata i le faitauina faatasi o le “Faamasinotonu” ma le “Alofa Mutimutivale, Alofa” i le Taiala i Tusitusiga Paia (scriptures.ChurchofJesusChrist.org) po o le “Faamasinotonu” ma le “Alofa” i le topics.ChurchofJesusChrist.org. Atonu e mafai ona ofo mai se tasi e tusi se faauigaga puupuu o aitema taitasi i luga o le laupapa. Ona mafai lea ona outou faitauina faatasi le Mosaea 15:1--9 . Na faapefea ona faamalie e Iesu Keriso manaoga o le faamasinotonu? E faapefea ona Ia tuuina mai Lona alofa mutimutivale ia i tatou? O vitio o loo fautuaina mai i le “Punaoa Faaopoopo” o loo faaaogaina tala ma talafaatusa e faamatalatala ai le alofa mutimutivale o le Faaola; o le matamataina o se tasi o nei vitio e ono fesoasoani i tagata o le vasega e mafaufau ai i isi talafaatusa o loo faapupula mai ai le ala na faamalieina ai e Iesu Keriso ia manaoga o le faamasinotonu.

Mosaea 11; 12:33–37; 13:11–26

E tatau ona tusia poloaiga i o tatou loto.

• E mafai ona fesoasoani ia malamalama ai tagata o le vasega i le taua o le “tusia i [o [tatou] loto” o poloaiga e ala i le fesili atu ia i latou pe o le a so latou manatu i le uiga o lenei fasifuaitau. Ona valaaulia lea o i latou e faatusatusa le eseesega o poloaiga na aoao atu e Apinati i le Mosaea 12:33–37 ma le 13:11–26 i agasala na faia e le Tupu o Noa ma lona nuu (tagai Mosaea 11:1–7, 14–15). E faapefea ona ese le “tusia i [o tatou] loto o poloaiga mai le na o na masani i ai? (Mosaea 13:11). E faapefea ona tatou iloa pe ua tusia poloaiga i o tatou loto? O a faataitaiga e mafai ona tatou fefaasoaai ai?

Fautuaina le Aoaoina i le Aiga

Pe ua i ai se taimi na lagonaina ai e tagata o le vasega faapei ona lagona e Apinati---faapea sa lei aoga a latou taumafaiga e faasoa atu le talalelei? Tau atu ia i latou o le Mosaea 18–26 o le a latou faitau ai e uiga i le tele o fua o taumafaiga a Apinati.

Punaoa Faaopoopo

O aoaoga faaperofeta e uiga i le tutu atu mo le upumoni.

Sa aoao mai Peresitene Russell M. Nelson: “O soo moni o Iesu Keriso ua loto e tutu atu, tautatala atu, ma ia ese ai mai tagata o le lalolagi. … E le faigofie pe otometi le avea ma ni soo mamana faapena. O la tatou taulaiga e tatau ona tāmau i le Faaola ma Lana talalelei. E faigata faalemafaufau le taumafai e vaai atu ia te Ia i mafaufauga uma . Ae a tatou faia, ona sosola ese lea o o tatou masalosaloga ma le fefefe” (“Mauaina o le Mana o Iesu Keriso i o Tatou Olaga,” Ensign po o le Liahona, Me 2017, 40–41).

Na saunoa Peresitene Thomas S. Monson: “Tau ina ia tatou lototetele pea ma saunia e tutu mo mea ua tatou talitonu i ai, ma afai e tatau ona tatou tutu na o i tatou i le faagasologa, tau ina ia tatou faia ma le lototele, ua faamalosia e lo tatou iloa, e moni lava e le o tuua na o i tatou pe a tatou tutu faatasi ma lo tatou Tama o i le Lagi” (“Ia Lototele e Tu Na o Oe,” Ensign po o le Liahona, Nov. 2011, 67).

Na aoao mai Peresitene Gordon B. Hinckley: “Na tusi atu Paulo ia Timoteo: ‘Ua le foaiina mai e le Atua ia te i tatou le Agaga e matau ai, a o le Agaga e faamalosi ai, ma alofa ai, ma mafaufau tonu ai. Aua e te ma i le molimau i lo tatou Alii’ (2 Tim. 1:7–8). Ou te faamoemoe o le a tuuina e tagata taitasi o le ekalesia na upu i se mea e mafai ona ia vaai i ai i taeao uma a o ia amataina lona aso. O le a latou aumaia ia i tatou le lototele e tautatala ai, o le a latou aumaia ia i tatou le faatuatua e taumafai ai, o le a latou faamalolosia o tatou talitonuga i lo tatou Alii o Iesu Keriso” (Aoaoga a Peresitene o le Ekalesia: Gordon B. Hinckley [2016], 338).

Vitio e uiga i le faamasinotonu ma le alofa tunoa i luga o le ChurchofJesusChrist.org.

• “Handel’s Messiah: Falepuipui o le Tagata Aitalafu”

• “O Le Puluvaga”

• “Pe a Faatasia le Faamasinotonu, Alofa ma le Alofa Mutimutivale”