“Māe 25–31. Mosaia 29–Alma 4: ‘Raar Dim im Jamin Em̧m̧akūt,’” Itok, Loor Eō—N̄an Kajjojo Armej im Baam̧le ko: Bok in Mormon 2020 (2020)
“Māe 25–31. Mosaia 29–Alma 4,” Itok, Ļoor Eō—Jabōt Jikuuļ: 2020
Alma eo Edik ej Kwaļo̧k Naan, jān Gary L. Kapp
Māe 25–31
Mosaia 29–Alma 4
“Raar Dim im Jamin Em̧m̧akūt”
Ilo raan ko an Alma, juon rūkaki in gospel eo ekar jab ļōmņak “eaar jab em̧m̧anļo̧k jān rikkatak eo; im āindein eaar jon̄aer wōt juon” (Alma 1:26). Ilo am̧ m̧aanjabpopo n̄an katakin, kejōkļo̧kjeņ kōn wāween an pedped in katak in jerbal n̄an eok im kūlaaj eo am̧.
Je En̄jake ko Rej Im̧we Eok
Kajjitōk bwe Ren Kwaļo̧k
Ro uwaan kūlaaj eo remaron̄ kile jekjek ko rejjab āinjuon ikōtaan m̧akūtkūt ko kar kōmeļeļeiki ilo Mosaia 29–Alma 4 im men ko rej waļo̧k ilo laļ in rainin ak mour ko aer. Leļo̧k n̄an er jejjo minit ko n̄an aer etale jebta ko im pukot juon waanjon̄ak. Kajjitōk ippāer n̄an kwaļo̧k ta eo rekar loe juon armej eo ej jijet iturier.
Katakin Katak ko
Jemaron̄ erom̧ juon kareel em̧m̧an ilo jukjukin pād ko ad.
-
Eļan̄n̄e ro uwaan kūlaaj eo renaaj jeraam̧m̧an jān ekōnono kōn wāween kareel jukjukin pād eo kōn em̧m̧an, komaron̄ kajjitōk ippāer n̄an ļōmņak kōn ejja unin kōnono ko me rejelet jukjukin pād eo am̧ im kōllaajrak jet iaer ioon boot eo (jab aikuj lukkuun likūt meļeļe ekōnono ko an unin kōnono kein). Ro uwaan kūlaaj eo remaron̄ etale Alma 2:1–7 n̄an pukot ta unin kōnono eo RiNipai ro rekar jelm̧ae im ta eo rekar kōm̧m̧ane kake. Ta eo emaron̄ kar waļo̧k eļan̄n̄e “armej ro an kabun̄ eo” rekar jab kōm̧m̧an bwe ainikier en maron̄ ron̄? Ta ko jet jej ekkatak kōn citizen ro rem̧m̧an jān bwebwenato in, jān Mosaia 29:26–27, im jān bwebwenato eo ilo “Kein Jipan̄ ko Jet”? Ro uwaan kūlaaj eo remaron̄ ļōmņak kōn juon men eo renaaj kōm̧m̧ane n̄an kareel jukjukin pād eo aer kōn em̧m̧an kōn ļōmņak n̄an juon iaan unin kōnono ko ioon boot eo.
Jemaron̄ kile im joļo̧k katakin ko reriab.
-
Waanjon̄ak eo an Gideon an jum̧ae Nior emaron̄ im̧we kūlaaj eo am̧. Bōlen komaron̄ kajjitōk ippān juon m̧okta bwe en etale bwebwenato eo an Gideon im kwaļo̧ke ippān kūlaaj eo (lale Mosaia 19:1–8; 20:15–22; 22:1–9; im Alma 1:2–9). Pedped wōt ioon etale in, ro uwaan kūlaaj eo am̧ remaron̄ in kōllaajrake jet iaan kadkad in m̧wil ko reim̧we an Gideon. N̄an waanjon̄ak, ke Gideon ekar ron̄ katak ko reriab an Nior, Gideon ekar jutak ņae Nior “kōn naan ko an Anij” (eoon 9) Ilo katak eo aer make, ro uwaan kūlaaj eo remaron̄ in loe eoon ko me rej kalikkar katak ko an Nior loi ilo Alma 1:3–6. Kajjitōk ippāer n̄an kwaļo̧k eoon ko rekar loi. Jejjo eoon ko rej barāinwōt kar elmakoti ilo “Kein Jipan̄ ko Jet.” Ewi wāween ad maron̄ erom̧ āinwōt Gideon ilo ad jojomare m̧ool ko?
-
Katak ko reriab an Nior, kar kōmeļeļeiki ilo Alma 13–6, maron̄ jipan̄ kōj kile kōļ ko me Setan ej kōjerbali n̄an moņe kōj. N̄an waanjon̄ak, e emakijkij an ņoje riab ko an ilowaan m̧ool eo. Ļōmņak in kajjitōk ippān ro uwaan kūlaaj eo n̄an etale Alma 1:3–4 im kalikkari riab ko Setan ekar ba im m̧ool ko ej kōjerbali n̄an kōm̧m̧an bwe ren kareel. Ta jet iaan riab ko rekar peljo ippān m̧ool eo me rej moņe armej ro rainin? Ewi wāween ad jipan̄ baam̧le ko ad im ro jej iakwe er jeļā kōtaan m̧ool im bōd?
-
Ro uwaan kūlaaj eo remaron̄ al ak riiti juon al kōn ettā bōro, āinwōt “Be Thou Humble” (Hymns, no. 130), im ekōnono kōn an ennaan eo oktak jān ennaan eo an Nior ilo Alma 1:2–9. Remaron̄ barāinwōt keidi ta eo Nior ekar katakin kōn rūkaki ro an gospel eo ippān ta eo Alma im ritōl ro jet an Kabun̄ in rekar katakin im kapidodoikļo̧k (lale Alma 1:26; 4:15–20). Ta ikdeelel eo an Nior? Ewi wāween an oktak jān eo an Alma? Rōjan̄ ro uwaan kūlaaj eo n̄an kejōkļo̧kjeņ kōn ikdeelel ko aer make n̄an jerbal ilo Kabun̄ in. Ta eo Alma 1:26 ej kwaļo̧k kōn eddo eo āinwōt rikkatak ro?
Utiej bōro emaron̄ kōm̧m̧an ad “likjab ilo [ad] eddōkļo̧k.”
-
Ekōnono kōn Alma 1 im Alma 4 remaron̄ jipan̄ ro uwaan kūlaaj eo meļeļe wāween an utiej bōro jelet jim̧or kajjojo armej im Kabun̄ in. Komaron̄ ajije kūlaaj eo n̄an ruo kūrub ko im kajjitōk ippān juon kūrub bwe ren ekkatak kōn jekjek eo an Kabun̄ in āinwōt kar kōmeļeļe ilo Alma 1:19–30, ilo ejja iien eo wōt kūrub eo juon rej ekkatak kōn jekjek eo an Kabun̄ in jejjo iiō ko tokālik, kōmeļeļeiki ilo Alma 4:6–15. Kajjitōk ippān kajjojo kūrub n̄an kwaļo̧k ta eo Kabun̄ in im ro uwaan rekar āinwōt ekkar n̄an eoon ko rekar riiti. Remaron̄ karōke ippān doon juon wāween em̧m̧an n̄an kōm̧m̧ane menin—n̄an waanjon̄ak, remaron̄ jin̄aiki juon pija ak kōpooje juon tieta ekadu. Ālkin an kūrub ko kwaļo̧k ippān doon, kajjitōk ippāer bwe ren ekōnono kōn ta eo rekar ekkatak kōn men ko rej jelet utiej bōro ioon Kabun̄ in im ro uwaan im kōjeraam̧m̧an ko an ettā bōro. Ta katak ko bwebwenato kein rej kabwijeri n̄an kōj rainin?
“Naan an Anij” im “lukkuun naan in kam̧ool” remaron̄ ukōt bōro ko.
-
Elōn̄ armej ro remaron̄ keidi ta eo Alma ekar en̄jake ke ekar “lukkuun būrom̧ōj” (Alma 4:15) kōn nana im en̄taan ko an armej ro an. Bōlen ro uwaan kūlaaj eo remaron̄ ļōmņak kōn juon eo rej iakwe rej inepata kake im likūt armej eo ilo kōļmenļo̧kjeņ ilo aer riiti Alma 4:12–20. Ālkin an ro uwaan kūlaaj eo riiti, komaron̄ kajjitōk kajjitōk ko āinwōt kein n̄an jino ekōnono kōn eoon ko: Ta eo ekar bōktok lan̄lōn̄ n̄an armej ro ilo jekjek ko aer reppen? Ta eo meļeļe in “Jetōb an Irooj eaar jab bōjrak jān e” meļeļein n̄an kwe? (Alma 4:15). Ta kaarmejet ko Alma ekar kōm̧m̧ani n̄an jipan̄ armej ro an, im ta kaarmejet ko jet iien kajjitōk tok ippād n̄an kōm̧m̧ani? Ta waanjon̄ak emōj ad loi kōn kajoor eo an “lukkuun naan in kam̧ool”? (Alma 4:19). Ewi wāween ad kwaļo̧k naan in kam̧ool ko ad ilo ad jab kōmeļeļe ak ekajet? Komaron̄ leļo̧k an ro uwaan kūlaaj eo iien n̄an aer jej juon ennaan kōn naan in kam̧ool n̄an ro rej iakwe.
-
Bōlen ro uwaan kūlaaj eo renaaj jeraam̧m̧an jān ekōnono kōn ta meļeļein “lukkuun naan in kam̧ool.” Pija in alooj eo “Apostle Testimony Montage” (ChurchofJesusChrist.org) ewōr ie waanjon̄ak ko rem̧m̧an. Ewi wāween an naan in kam̧ool kein, akko jet jekar ron̄, “kōketak [kōj] ilo ememej ijo [kuņaad]”? (Alma 4:19). Ewi wāween an naan in kam̧ool kein jipan̄ kōj anjo̧ jān utiej bōro im aitwerōk?
Kōketak Ekkatak ilo Mweo
Komaron̄ kōmeļeļeiki n̄an ro uwaan kūlaaj eo bwe ilo Alma 5–7 renaaj riiti “lukkuun naan in kam̧ool” eo an Alma im loe jelet ko an ioon armej ro (lale Alma 4:19).
Kein Jipan̄ ko Jet
“Kōm̧m̧an bwe kareel eo am̧ ren en̄jake.”
Jidik iien ālkin an kar Sister Belle S. Spafford kūr āinwōt Būreejtōn eo Eutiej an Doulul eo an Kōrā ro ilo 1945, ritōl ro an Doulul eo an Kōrā kar kajjitōk ippāer n̄an pād ilo juon kweilo̧k eaorōk an ko̧o̧njeļ an kōrā ilo laļ eo. Ritōl ro routiej an Doulul eo an Kōrā ro rekar membōr in ko̧o̧njeļ in ium̧win elōn̄ iiō ko, ak rekar en̄jake ke ekar jab em̧m̧an aer kōm̧m̧an n̄an er jān ko̧o̧njeļ in. Ālkin ekōnono ippān rikakpilōklōk ro an, Sister Spafford ekar kajjitōkļo̧k ippān Būreejtōn George Albert Smith, Būreejtōn eo an Kabun̄ in, bwe Doulul eo an Kōrā ro rej aikuj in joļo̧k membership eo aer jān ko̧o̧njeļ in.
Ke rej ekōnono kōn kajjitōk eo, Sister Spafford ekar ba, “Kwojeļā, Būreejtōn Smith, ejjeļo̧k juon men jej bōke jān Ko̧o̧njeļ in.”
Tokālik ekar kōmeļeļeiki:
“Būreejtōn eo ekar reitok n̄an n̄a kōn bwilōn̄. Ekar ba, ‘Sister Spafford, kwoj ke aolep iien ļōmņak kōn naan ko kōn ta eo kwoj bōke? Kwoj jab ļōmņak em̧m̧an ke ilo jet iien n̄an ļōmņak kōn naan ko kōn ta eo kwoj aikuj in leļo̧k? Ij tōmak,’ ekar wōnm̧aanļo̧k wōt, ‘kōrā in Mormon ro ewōr juon men ippāer n̄an leļo̧k n̄an laļ in, im bwe rej aikuj barāinwōt ekkatak jān er. Ijjelo̧kin aer joļo̧k membership eo aer, ij kajjitōk bwe kwon bōk jet iaan ro uwaan boot eo am̧ im remaron̄ im bar ro̧o̧l n̄an kweilo̧k in.’
“Innām ekar ba ilo an kwaļo̧k, ‘Make your influence felt’” (Belle S. Spafford, A Woman’s Reach [1974], 96–97).
Sister Spafford ekar pokake naan in kapilōk in. Ekar jerbal ium̧win elōn̄ iiō ko ilo ko̧o̧njeļ eo im āliktata kar kālete āinwōt juon iaan ritōl ro an.
Jeje ko rekwojarjar rej kariab katak ko reriab an Nior.
Kōkōm̧anm̧anļo̧k Ad Katakin
Lale bwe kwoj katakin katak eo em̧ool. “Wōnm̧aanļo̧k kajjitōk ippem make, ‘Ewi waween an ta eo ij katakin naaj jipan̄ ro uwaan kūlaaj eo aō kalōk tōmak ilo Kraist, ukweļo̧k, kōm̧m̧an im kōjparok bujen ko ippān Anij, im bōk Jetōb Kwojarjar eo?” (Teaching in the Savior’s Way, 20).