Kwojjab Meļo̧kļo̧k, jān Jon McNaughton

Juun 1–7

Alma 5–7

“Kom̧ Ar Bōk ke Oktak in Ekajoor ilo Buruōmi?”

Ilo am̧ riiti Alma 5–7, ļōmņak kōn ro uwaan kūlaaj eo am̧ ro rej waanjon̄ak kōn katak ko ilo jebta kein. Ļōmņak kōn wāween ko komaron̄ jipan̄ kakobaik er ilo iien ekōnono eo am̧ ilo Jabōt.

Je En̄jake ko Rej Im̧we Eok

Kajjitōk bwe ren Kwaļo̧k

Leļo̧k jejjo minit ko n̄an ro uwaan kūlaaj eo bwe ren kakeememej ta rekar riiti ilo Alma 5–7 im pukot juon m̧ool renaaj kōņaan kwaļo̧k ilo kūlaaj eo. Innām kajjitōk ippāer bwe ren kwaļo̧ke ippān juon armej ej jijet iturier.

Katakin Katak ko

Alma 5:14–33

Jej aikuj en̄jake—im wōnm̧aanļo̧k n̄an en̄jake—juon oktak in bōro ekajoor.

• Ro uwaan kūlaaj eo kar kajjitōk ippāer bwe ren kejōkļo̧kjeņ kōn kajjitōk kein ilo Alma 5:14–33 ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko. Komaron̄ jino juon ekōnono kōn eoon kein ilo am̧ kajjitōk ippāņ ro uwaan kūlaaj eo n̄an kwaļo̧k ta kajjitōk ko jān eoon kein rekar ļap meļeļeier n̄an er. Innām komaron̄ kajjitōk ippān ro uwaan kūlaaj eo n̄an jerbal ilo kūrub ko n̄an etale Alma 5:14–33 im pukot ta meļeļe n̄an en̄jake juon oktak in bōro kōn Rilo̧mo̧o̧r eo im Pinmuur eo An. Remaron̄ barāinwōt pukōt kōjeraam̧m̧an ko me rej itok jān juon bōro eoktak. Naan ta ko jet kar kōjerbali n̄an kōmeļeļiki oktak in bōro in Alma ej kōmeļeļeiki? (N̄an waanjon̄ak, lale Jon 3:1–7; 2 Korint 5:17; Dale G. Renlund, “Preserving the Heart’s Mighty Change,” Ensign ak Liahona, Nov. 2009, 97–99. Ewi wāween ad dāpij wōt juon oktak in bōro ilo aolepān mour ko ad? (lale Alma 5:26).

  

  Ilo ad oktakļo̧k n̄an Anij, jemaron̄ en̄jake juon “oktak in bōro.”

Alma 5:44–51

Jemaron̄ bōk kam̧ool eo ad make kōn Rilo̧mo̧o̧r eo im gospel eo An jān Jetōb Kwojarjar eo.

• Āinwōt Alma, ro uwaan kūlaaj eo am̧ rekar bōk naan in kam̧ool ko aer make kōn Rilo̧mo̧o̧r eo im gospel eo An. N̄an jipan̄ er ekkatak ta eo Alma ekar kōm̧m̧ane n̄an bōk kam̧ool eo an jān Jetōb eo, komaron̄ ajije m̧ōttan peba ko kōn naan eo Naan in Kam̧ool kar je itulōn̄ in peba eo. Ro uwaan kūlaaj eo remaron̄ in jerbal ruo iaan ruo iaan n̄an etale Alma 5:44–51 im kōjerbal ta eo rekar ekkatak ilo eoon kein n̄an je juon “iiōk” n̄an juon naan in kam̧ool. N̄an waanjon̄ak, “kein iiōk ko” an iiōk eo emaron̄ in m̧ool ko me rej ejaake naan in kam̧ool ko ad. “Naan in kōmeļeļe” ko n̄an iiōk eo emaron̄ in men ko jej aikuji n̄an bōk juon naan in kam̧ool. (Lale ennaan eo jān Elder Dieter F. Uchtdorf ilo “Kein Jipan̄ ko Jet” n̄an ļōmņak ko jet.) Ta “kiin iiōk ko” im “kōmeļeļe ko” remaron̄ kobaiktok n̄an iiōk eo aer jān en̄jake ko ad make ak en̄jake ko an ro jet ilo jeje ko rekwojarjar? Kajjitōk ippān ro rej leiaia bwe ren kwaļo̧k ta eo rekar ekkatak im ta eo rej kōm̧m̧ane n̄an karuwaineneiktok Jetōb Kwojarjar eo n̄an an kam̧ool kōn m̧ool eo aer.

Alma 6

Jej aiintok doon āinwōt Armej ro Rekwojarjar n̄an ron̄jake naan ko an Anij im n̄an kōm̧m̧ane jerbal eo An.

• N̄an kakeememej ro uwaan kūlaaj eo kōn aorōk in aiintok doon āinwōt juon ānbwinnin Armej ro Rekwojarjar, komaron̄ kajjitōk ippāer n̄an pijaiki ilo kōļmenļo̧kjeņ juon armej eo rejeļā bwe ej en̄jake bwe pād im uwaan juon kabun̄ ejjab menin aikuj. Ta eo remaron̄ kwaļo̧k jān Alma 6 n̄an katakin armej in kōn jet iaan kōjeraam̧m̧an ko jān ad pād im uwaan juon kabun̄? Ewi wāween ad maron̄ em̧m̧anļo̧k ad kōttōbrak jibadbad in an aiintok in Alma ekar kōmeļeļeiki?

Alma 7:7–16

Rilo̧mo̧o̧r eo ekar bōk ioon Make jerawiwi ko ad, metak, im en̄taan.

• Emaron̄ lōn̄ armej ro ilo kūlaaj eo am̧ me relukkuun kōņaan jeļā ta eo Alma 7:7–16 ej katakin—me Rilo̧mo̧o̧r eo ekar bōk ioon Make jab n̄an baj jeorļo̧k jerawiwi ko ad ak barāinwōt metak ko ad, en̄taan ko, nan̄inmej ko, im m̧ōjņo̧ ko. Ewi wāween am̧ jipan̄ er loe menin? Bōlen komaron̄ kōm̧m̧ane juon jaat ioon boot eo ippān naan ko raorōk ilōn̄tata Ta eo Rilo̧mo̧o̧r eo ekar en̄taan kake im Etke Ekar en̄taan. Kūlaaj eo emaron̄ in kadedeļo̧k jaat eo ālkin riiti Alma 7:7–16. Emaron̄ barāinwōt jipan̄ n̄an ļōmņak kōn men ko jet Rilo̧mo̧o̧r eo ekar en̄taan kaki ilo tōre in mour eo An (lale waanjon̄ak ko ilo “Kein Jipan̄ ko Jet”)

• Ālkin ekōnono kōn ta eo Alma ekar katakin ilo Alma 7:7–16, bōlen ro uwaan kūlaaj eo remaron̄ in kwaļo̧k en̄jake ko ke Jisōs ekar jipan̄ er, eo me meļeļein bwe Ekar jipan̄ er (lale “Kein Jipan̄ ko Jet” n̄an waanjon̄ak in wāween ko Jisōs ej jipan̄ kōj). Komaron̄ in barāinwōt kwaļo̧k kout in jān Būreejtōn Dallin H. Oaks: “Ad Rilo̧mo̧o̧r eaar kwaļo̧k bwe E eaar ‘wanlaļļo̧k ilaļ in men otemjej’ (K&B 88:6). … Em̧ool jemaron̄ ba bwe an wanlaļtak ilaļ in aolep, ejejjet An pād n̄an kotak kōj im letok n̄an kōj kajoor eo jej aikuji n̄an niknik ilo en̄taan ko ad. Jemaron̄ wōt kajjitōk” (“Strengthened by the Atonement of Jesus Christ,” Ensign ak Liahona, Nov. 2015, 64).

• Alma ekar kwaļo̧k bwe itok eo an Ripinmuur eo “eļapļo̧k an aorōk jān” jabdewōt men. Bōlen ro uwaan kūlaaj eo remaron̄ pijaiki ilo kōļmenļo̧kjeņ bwe er rej pād ilo juon iien ekōnono ilo kūlaaj in bwebwenato eo kōn m̧akūtkūt ko raorōktata. Ta eoon ko jān Alma 7 renaaj kwaļo̧ki n̄an rie kajjitōk in an Alma ilo eoon 7? Ta naan in kapilōk eo an Alma ekar ba n̄an armej ro an me remaron̄ in jipan̄ kōj m̧aanjabpopo n̄an itok eo an Rilo̧mo̧o̧r eo?

Kōketak Ekkatak ilo Mweo

N̄an rōjan̄ ro uwaan kūlaaj eo an n̄an riiti Alma 8–12, komaron̄ in kwaļo̧k ippāer bwe jebta kein rej kwaļo̧k bwebwenato an ruo em̧m̧aan ro. Juon ejjeļo̧k an itok limo ņan Kabun̄ eo im juon ekar rijojomar eo ebanban, ak erro jim̧or rekar erom̧ rijojom̧ar ro reperan an tōmak eo.

Kein Jipan̄ ko jet

Bōk naan in kam̧ool ko ad make.

Elder Dieter F. Uchtdorf ekar letok laajrak in jon̄ak in eoon kein n̄an “bōk juon am̧ make naan in kam̧ool ekar tōt ilo kam̧ool eo an Jetōb Kwojarjar eo”:

“Kein Kajuon: Ikdeelel n̄an tōmak. Bok in Mormon eo ej kōketak kōj: ‘Elan̄n̄e [kwe] naaj ruj im ļujur ami, em̧ool n̄an juon mālejjon̄i naan ko aō, im kōjerbal juon pilin̄ in tōmak, aaet, … em̧ool eļan̄n̄e kom̧ maron̄ kōņaan wōt tōmak’ (Alma 32:27). … Anij ej kallim̧uri kōj jipan̄ eo ekwojarjar aaet eļan̄n̄e wōt jej ikdeelel in tōmak, ak ej aikuj in juon ikdeelel em̧ool im jab bajjōk kōņaan.

“Kein Karuo: Pukote jeje ko rekwojarjar. N̄e ewōr kajjitōk ko; katak kaki; pukōti ilo jeje ko rekwojarjar uwaak ko. Bar juon alen, Bok in Mormon eo ewōr ie naan in kapilōk ko rem̧m̧an n̄an kōj: ‘Eļan̄n̄e [kwe] kwoj leļo̧k jikin, bwe juon ine en maron̄ eddōk ilo būruwōm̧’ jān tiljek katak naan ko an Anij, ine eo em̧m̧an ‘enaaj jino ļapļo̧k ilo kom̧’ eļan̄n̄e kom̧ naaj jab jum̧ae kōn jab tōmak. Ine in em̧m̧an enaaj ‘ļapļo̧k ilo [buruwōm̧]’ im ‘kōmeramļo̧k [am̧] meļeļe’ (Alma 32:28).

“Kein Kajilu: Kōm̧m̧ane anilaan Anij; kōjparok kien ko. … Jej aikuj in itok n̄an Kraist im ļoor katak ko An. Rilo̧mo̧o̧r ekar katakin: ‘Naan in katak eo Aō, e jab Aō, a an Eo ear jilkintok Eō. Eļan̄n̄e jabdewōt armej e kōņaan kōm̧anm̧an ankilaan, e naaj jeļā kōn naan in katak eo’ [Jon 7:16–17; italics added]. …

“Kein Kemān: Kejōkļo̧kjeņ, jitlo̧k, im jar. N̄an bōk jeļāļo̧kjeņ jān Jetōb Kwojarjar eo, jej aikuj in kajjitōk ippān Jemedwōj Ilan̄ kōn men eo [lale Alma 5:45–46; Moronai 10:3–4]” (“The Power of a Personal Testimony,” Ensign ak Liahona, Nov. 2006, 38–39).

Ta eo Jisōs Kraist ekar en̄taan kake?

• Kapo (lale Matu 4:1–10)

• Kwōle im maro (lale Matu 4:2; Jon 19:28).

• Mej an juon eo jej iakwe (lale Matu 14:10–13)

• Jojoļāār (lale Matu 26:55-56)

• Kajirere (lale Matu 27:29–31, 39–44)

• Jeramōļ (lale Luk 9:58)

• Liaakeļo̧k (lale Mark 14:43–46)

• Metak eļapļo̧k jān jabdwōt armej emaron̄ en̄taan (lale Luk 22:39–44; Mosaia 3:7; K&B 19:16–19)

Ta en̄taan ko jet Rilo̧mo̧o̧r eo ekar en̄jaki?

Ewi wāween an Jisōs Kraist jipan̄ kōj?

• Jeorļo̧k jerawiwi ko ad im kōm̧akūt aolep ajļo̧k (lale Inōs 1:5–6)

• Kapidodoik būruwōn ro jet (lale Mosaia 21:15)

• Kōkajoorļo̧k kōj n̄an ineek edodo ko ad (lale Mosaia 24:14–15)

• Kōmour kōj jān m̧ōjņo̧ ko ad (lale 3 Nipai 17:6–7)

• Kōm̧m̧an bwe men ko rem̧ōjņo̧ ren kajoor im kaenōm̧m̧an kōj (lale Ether 12:27–29)

• Jipan̄ kōj loe jorrāān ko wāween ko (lale K&B 121:7–10)

Ilo wāween rot ko jet Jisōs ekar jipan̄ kōj?

Kōkōm̧anm̧anļo̧k Ad Katakin

Kōkōm̧anm̧anļo̧k āinwōt juon rūkaki āinwōt Kraist. Āinwōt juon rūkaki, eaorōk n̄an kejōkļo̧kjeņ kōn wāween ko komaron̄ jipan̄ rūkkatak ro kalōk tōmak ilo Jemedwōj Ilan̄ im Jisōs Kraist. Ļōmņak in kōjerbale kajjitōk ko n̄an etale eok make ilo peij 37 in Teaching in the Savior’s Way n̄an im̧we eok.