Ammōn im Kiin̄ Lamonai, jān Scott M. Scott

Juun 22–28.

Alma 17–22

“Inaaj Kōm̧m̧ane Eok Kein Jerbal ilo Peiū”

Mokta jān am̧ jipan̄ ro jet loi m̧ool ko ilo jeje ko rekwojarjar, kwoj aikuj in loe m̧ool ko kōn eok make. Riiti Alma 17–22 ippān ro uwaan kūlaaj eo am̧ ilo kōļmenļo̧kjeņ eo am̧.

Je En̄jake ko Rej Im̧we Eok

Kajjitōk bwe ren Kwaļo̧k

N̄an leļo̧k n̄an ro uwaan kūlaaj eo juon iien em̧m̧an n̄an kwaļo̧k juon men eo rekar ekkatak ippāer make ak katak an baam̧le, komaron̄ kajjitōk ippāer n̄an kālet juon armej kar kōmeļeļeiki ilo Alma 17–22 im kadedeļo̧k jentōj eo āinwōt an ellaajrak : “Abish ekar katakin eō ” ak “Lamonai ekar katakin .”

Katakin Katak ko

Alma 17:1–4

Tōmak eo ad ej kajoorļo̧k ilo ad tiljek pukot n̄an jeļā m̧ool eo.

• Ro uwaan kūlaaj eo remaron̄ kar ron̄ ruo alen aorōk in imminene ko relam̧ waan an gospel eo. Alma 17: 1–4 emaron̄ jipan̄ er loe jelet eo ekajoor ej waļo̧k ilo imminene ko remaron̄ waļo̧k ilo mour ko ad. Komaron̄ kajjitōk ippān jimettan in kūlaaj eo n̄an etali eoon kein kōn ta eo ļaddik ro nejin Mosaia rekar kōm̧m̧ani im jimettan eo juon n̄an pukot tōprak ko kōn ta eo rekar kōm̧m̧ani. Ta eo waļo̧k ko jān kōm̧m̧ani men kein ilo mour ko ad?

• N̄an juon ekōnono eo em̧wilaļļo̧k kōn jet iaan imminene ko me rekar kōkajoorļo̧k ļaddik ro nejin Mosaia, komaron̄ je ioon boot eo Etale Jeje ko Rekwojarjar, Jar, im Jitlo̧k. Innām ro uwaan kūlaaj eo remaron̄ in pukot eoon ko me rej katakin kōn kōjeraam̧m̧an ko me rej itok jān katak jeje ko rekwojarjar, jar, im jitlo̧k (the Topical Guide ak Unin Tōl eo n̄an Jeje Ko Rekwōjarjar emaron̄ bar jipan̄). Er remaron̄ kar je ioon boot eo ta eo rej loe im kwaļo̧k ippān ro jet ļōmņak ko jet kōn wāween n̄an kōkōm̧anm̧anļo̧k katak jeje ko rekwojarjar, jar, im jitlo̧k ilo juon wāween ej kepaakļo̧k er n̄an Anij.

Alma 17–18

Iakwe eo ad emaron̄ jipan̄ ro jet m̧aanjabpopo n̄an bōk gospel eo.

• Elōn̄ wāween ko n̄an kwaļo̧k gospel eo, im aolepāer rej wājabdik eļan̄n̄e iakwe ej wun eo. Bōlen ro uwaan kūlaaj eo remaron̄ in kalikkar eoon ko ilo Alma 17–18 me rej kwaļo̧k ewi wāween an Ammōn ikdeelel kōn iakwe n̄an kwaļo̧k gospel eo. Ta m̧ool ko jet kōn kwaļo̧k gospel eo jej ekkatak jān waanjon̄ak eo an? Ro uwaan kūlaaj eo remaron̄ kwaļo̧k en̄jake ko ilo wāween eo lukkuun iakwe ekar kōmeraikļo̧k būruwōn juon armej im kōtļo̧k an ļapļo̧k aer m̧ōņōņō in ron̄jake ennaan eo an gospel eo. Ennaan eo jān Būreejtōn Dallin H. Oaks ilo “Kein Jipan̄ ko Jet” remaron̄ barāinwōt jipan̄ ro uwaan membōr ro meļeļe aorōk in lukkuun lale kijejeto ko ad rej pedped ioon iakwe.

An Ammōn Lo̧mo̧o̧ren Menin Mour ko an Kiin̄ eo, jān Minerva K. Teichert

Alma 18–22

Katakin im ekkatak m̧ool ko an gospel eo ilo wājabdik emaron̄ tōlļo̧k n̄an oktak in bōro.

• Ke Ammōn im Aron rekar loe an Kiin̄ Lamonai im jemān lōke er, rekar maron̄ jipan̄ er meļeļe m̧ool ko an gospel eo. Bōlen enaaj lukkuun jipan̄ eļan̄n̄e ro uwaan kūlaaj eo rekar kōm̧m̧ane juon laajrak in m̧ool ko Ammōn ekar katakin Lamonai (lale Alma 18:24–39) im keidi ippān juon laajrak in m̧ool ko Aaron ekar katakin jemān Lamonai (lale Alma 22:1–16). Jimettan in kūlaaj eo emaron̄ jerbale juon laajrak ilo an eo jimettan eo juon jerbale laajrak eo juon. Etke meļeļe m̧ool kein remaron̄ kar tōl Lamonai im jemān n̄an tōmak im lōke ilo Jemedwōj Ilan̄ im Nejin, Jisōs Kraist?

• Bwebwenato ko kōn an Aron im Ammōn rej katakin Kiin̄ Lamonai im jemān ej letok juon iien eļap n̄an ekōnono wājabdik katakin im ekkatak gospel eo. Ta pedped in katak ko ro uwaan kūlaaj eo rej kile? (lale, n̄an waanjon̄ak, Alma 18:24–28 im Alma 22:7–13). Ta pedped in katak ko rej loe ilo waanjon̄ak eo an Kiin̄ Lamonai im jemān? (lale, n̄an waanjon̄ak, Alma 18:25–31; 22:17–18).

• N̄an ekkatak kōn wāween an katak ko an gospel eo maron̄ kareel mour ko ad, ro uwaan kūlaaj eo remaron̄ etale Alma 18:40–41; 20:1–15; im Alma 22:15–18, 25–27 n̄an lale ewi wāween an Kiin̄ Lamonai im jemān kar en̄jake im m̧akūtkūt ālkin aer kar meļeļe m̧ool ko an gospe eo im kar oktaktok. Ewi wāween an m̧ool kein jipan̄ kōj itok n̄an Kraist? Ta eo jemaron̄ kōm̧m̧ane n̄an jipan̄ kōj make im ro jej iakwe meļeļe im mour kōn m̧ool kein?

Alma 19–22

Naan in kam̧ool ko ad remaron̄ in wōr juon aer kareel ekajoor ioon ro jet.

• Ilo iien aer katak ippāer make kōn Alma 19–22, ro uwaan remaron̄ kejōkļo̧kjeņ kōn wāween ko raorōk ejelet juon naan in kam̧ool an juon armej emaron̄ jelet ro jet. Kōketak er n̄an kwaļo̧k ta eo rekar ekkatak. Ta bwebwenato ko ilo Alma 19–22 rej kwaļo̧k kōn kijejeto ko ad make n̄an kwaļo̧k gospel eo? Bwebwenato eo an Būreejtōn Gordon B. Hickley ilo “Kein Jipan̄ ko Jet” remaron̄ jipan̄ kwaļo̧k meļeļe in.

• Ta jet iaan waanjon̄ak ko rem̧m̧an komaron̄ kwaļo̧ki n̄an kōmeļeļeiki ta eo emaron̄ waļo̧k n̄e jej kwaļo̧k naan in kam̧ool ko ad ippān ro jet? Waanjon̄ak ko rem̧m̧an rej dōkā jiddik ko rej kōm̧m̧an an̄in ņo̧ reddik ilo juon reba ak iij (yeast) ej jipan̄ pilawe eo iuwe. Ālkin etale jet waanjon̄ak ko an armej ro rej kwaļo̧k naan in kam̧ool ko aer ilo Alma 19–22, ro uwaan kūlaaj eo remaron̄ kwaļo̧k ewi wāween an kar jelet er kōn naan in kam̧ool ko an ro jet.

Kōketak Ekkatak ilo M̧weo

Komaron̄ kajjitōk ippān ro uwaan kūlaaj eo eļan̄n̄e rekar kōļmenļo̧kjeņ kōn wāween aer kōm̧m̧an bwe oktaktok eo aer en dim im wōnm̧aanļo̧k wōt. Ilo Alma 23–29, renaaj riiti kōn juon kūrub in armej ro rekar bōk gospel eo im “raar jamin bun̄” (Alma 23:6).

Kein Jipan̄ ko Jet

Kwaļo̧k gospel eo kōn iakwe.

Būreejtōn Dallin H. Oaks ekar kwaļo̧k juon katak eaorōk ekar ekkatak jān juon an en̄jake ke ekar āinwōt juon likao:

“ Ikar bōk juon ijjitōn̄ n̄an loļo̧k juon membōr ejjab niknik, juon eo eļap an tōprak ilo mour im elōn̄ iiō rūttoļo̧k jān n̄a. Ikar reilo̧k n̄an m̧akūtkūt ko aō, ikar kile bwe ekar jab lukkuun ļap aō iakwe in kea kōn em̧m̧aan in ikar loļo̧k. Ikar m̧akūtkūt ekkar n̄an eddo eo, kōn juon ikdeelel n̄an riboote 100 bōjāān ilo loļo̧k ko aō. Juon jota, jem̧ļo̧kinļo̧k juon allōn̄, ikar kūrļo̧k ilo taļboon im kajjitōk ippān elan̄n̄e eo m̧ōtta im n̄a maron̄ kar ilo̧k in loļo̧k e. Ekar kōnanaik ilo an uwaake eō juon katak ij jāmin meļo̧kļo̧k.

“Jaab, ijjab tōmak ikōņaan bwe kom̧ro en itok joteenin,’ ekar ba. ‘Imōk. Em̧ōj aō kōm̧m̧an aō nuknuk n̄an aō kiki. Ij riit, im ijjab kōņaan kabūņōņō bwe kwon maron̄ riboote 100 bōjāān ilo loļo̧k ko am̧ allōn̄ in. Uwaak in ej kōmetak eō wōt kōnke ikar jeļā bwe ekar en̄jake ikdeelel eo aō enana.

“Ij kōjatdikdik bwe ejjeļo̧k juon armej jej kepaake kōn juon kajjitōk n̄an ron̄jake ennaan eo an jepļaaktok eo an gospel eo ej en̄jake bwe jej jerbal kōn jabdewōt un ko im jab kōn juon iakwe em̧ool n̄an er im juon kōņaan enana n̄an kwaļo̧k juon men kōm̧ jeļā eaiboojoj” (“Sharing the Gospel,” Ensign, Nov. 2001, 8).

Kareel ko ad emakijkij jab jeļā kaki.

Būreejtōn Gordon B. Hinckley ekar keidi juon bwebwenato eo me juon mijenede ekar reboot n̄an mijen būreejtōn eo an ilo jem̧ļo̧kin jerbal in jipan̄ eo an. Mijenede eo ekar ba:

“Ejjan̄in lōn̄ tōprak in jerbal eo aō. Ikar kakkure waan iien eo aō im jāān ko an jema. Ekar juon iien ewaan. … Ikar peptaiji juon wōt armej ilo ruo iiō ko kar pād ijo. Ekar juon ļaddik jon̄oul ruo an iiō ilo jikin eo ejjeļo̧k kobbaer ilo Tennessee.”

Mijen būreejtōn eo ekar pepe n̄an etale wāween an ļaddik in pād me mijenede in ekar peptaiji. Ekar rūttoļo̧k, m̧are, im em̧m̧akūt n̄an Idaho. Ajri ro nejin rekar etal n̄an mijen ko aer, im ajri ro nejier rekar etal n̄an mijen ko aer. Mijen būreejtōn eo ekar etal n̄an Idaho im ekar kajjitōk ippān membōr ro kōn baam̧le in kōn mijen ko aer. Tokālik ekar ba, “Ikar loe bwe, āinwōt tōprak in peptaij eo an ļaddik in edik ilo jikin ko ejjeļo̧k kobbaer ilo Tennessee jān mijenede eo ekar ļōmņak ejjeļo̧k an tōprak, elōn̄ļo̧k jān 1,100 armej ro rekar itok n̄an Kabun̄ in” (Teaching of Gordon B. Hinckley [1997], 360–61).

Kōkōm̧anm̧anļo̧k Ad Katakin

Kōm̧m̧an iien n̄an an rikkatak ro kwaļo̧k. “N̄e rikkatak ro rej kwaļo̧k ta eo rej ekkatak, rejjab en̄jake wōt Jetōb eo im kōkajoorļo̧k naan in kam̧ool ko aer, ak rej barāinwōt rōjan̄ ro jet uwaan kūlaaj eo n̄an pukot m̧ool ko ippāer make. … Kōjparok iien n̄an an rijikuuļ ro kwaļo̧k ilo aolep katak—ilo jet wāween, komaron̄ pukot bwe ekōnono kein rej katak ko” (Teaching in the Savior’s Way, 30).