Pija in Alma im Amulek ke rekar diwōjļo̧k jān kabuuj, jān Andrew Bosley

Juun 15–21

Alma 13–16

“Deļo̧n̄ ilo Kakkije eo an Irooj”

Oktak eo ejjeļo̧k jem̧ļo̧kin ej aikuji eļapļo̧k jān juon katak an Jabōt eim̧we juon kōttan juon wiik. Kōketak ro uwaan kūlaaj eo n̄an pukot en̄jake ko an jetōb ippāer make ilo aolepān wiik eo.

Je En̄jake ko Rej Im̧we Eok

Kajjitōk bwe ren Kwaļo̧k

Ta eo emaron̄ im̧we ro uwaan kūlaaj eo n̄an kwaļo̧k ippān doon en̄jake ko aer ilo katak im mour kōn gospel eo? Bōlen komaron̄ kajjitōk ippāer n̄an kwaļo̧k juon ļōmņak rekar loe ilo Alma 13–16 me ekar lujur er ak rekar jab ļōmņak kake m̧okta. Ilo aer kwaļo̧k, kajjitōk ippāer ewi wāween aer en̄jake ļōmņak in ekāāl im enaaj kōm̧m̧ane juon oktak ilo mour ko aer.

Katakin Katak ko

Alma 13:1–19

Kain̄i ko an Priesthood rej jipan̄ ajri ro nejin Anij bōk lo̧mo̧o̧r kōn Jisōs Kraist.

• jet iien ro uwaan kūlaaj eo am̧ emaron̄ in loe juon men eo ej kam̧wilaļļo̧k aer kautiej n̄an priesthood eo ilo aer kar ekkatak Alma 13 Kajjitōk ippāer n̄an kwaļo̧k ta eo rekar loe. Kom̧ maron̄ barāinwōt riiti ippān doon eoon 2 im 16 im kajjitōk juon kajjitōk āinwōt “Ewi waween an priesthood eo im kain̄i ko an jipan̄ eok ‘reim̧aanļo̧k n̄an Nejin [Anij] kōn pinmuur’?’ Ej jipan̄, juon laajrak in kain̄i ko maron̄ loe ilo True to the Faith, 109–10.

  

  Kain̄i ko an Priesthood eo rej jipan̄ kōj reilo̧k n̄an Jisōs Kraist kōn pinmuur.

• Elōn̄ armej ro ilo Ammōnaia rekar ļoor Nior, eo ekatak katakin ļōmņak ko reiab kōn eddo ko an pris ro. N̄an jipan̄ ro uwaan kūlaaj eo ekkatak kōn piktokin eo em̧ool an priesthood eo, komaron̄ kajjitōk ippāer n̄an keidi wāween an Nior kalimjōk ta eo pris ro rej aikuj in kōm̧m̧ani (lale Alma 1:3–6) ippan ta eo Alma ekar katakin (lale Alma 131–12). Ilo wāween ta katak ko an Nior ejjeļo̧k oktakier n̄an an laļ in kalimōje kōn kajoor im ritōl ? Ewi wāween an oktak katak ko an Alma?

• Riiti Alma 13:1–19 emaron̄ tōlļo̧k n̄an juon ekōnono kōn ad “m̧aanjabpopo jān ļon̄tak ko an laļ in” kōn eddo ko ad ilo jerbal eo an Irooj. Ta eo Alma 13:3 ej ļōmake kōn wāween eo jej aikuj lale ak kepaake eddo kein? (lale barāinwōt K&B 138:56).

Alma 13

Irooj ej kajjitōk ippād n̄an deļo̧n̄e ilo kakkije eo An.

• Alma ekar katakin bwe priesthood eo ej jipan̄ kōj “deļo̧n̄ ilo kakkije eo an Irooj” (Alma 13:16). N̄an jino juon ekōnono kōn ļōmņak in, kwoj aikuj kajjitōk ippān ro uwaan kūlaaj eo n̄an riiti Alma 13:6, 12–13, 16, im 29 im kwaļo̧k ippān doo ta eo eoon kein rej katakin kōn “kakkije ilo eo an Irooj.” Remaron̄ barāinwōt kallikare kadkad in mour ko an armej ro rekar “deļo̧n̄ ilo kakkije eo an Irooj.” Ta eo jemaron̄ kōm̧m̧ani n̄an en̄jake kakkije eo an Irooj ilo mour ko ilo mour in?

Alma 14

Ilo iien māllijon̄ ko im kabūrom̧ōjm̧ōj, jej aikuj lōke Irooj.

• Alma 14 emaron̄ erom juon wāween em̧m̧an n̄an kōnono kōn wāween ad maron̄ uwaak ilo tiljek n̄e kōj ak ro jej iakwe rej jelm̧ae kakkure jān ro jet ak mālijjon̄ men̄e jej kajjieon̄ in wāppen. Komaron̄ jino ilo am̧ kajjitōk ippān ro uwaan kūlaaj eo n̄an pijaik ilo kōļmenļo̧kjeņ bwe rej rikōm̧m̧an nuuj ro rej riboot kōn juon m̧akūtkūt ilo Alma 14. Kain kajjitōk rot maron̄ kajjitōk ippān Alma ak Amulek kōn m̧akūtkūt in? N̄an waanjon̄ak, “Etke Irooj ej kōtļo̧k am̧ im ro jet ejim̧we mour ko aer en̄taan?” ak “Ta naan in kōkpilōklōk eo ewōr ippem n̄an ro rej jelm̧ae mālijjon̄ ko reppen?” Pedped wōt ioon ta eo jej jeļā jān Alma 14, ewi wāween an Alma ak Amulek kar uwaake kajjitōk kein?

• Elōn̄ iaad remaron̄ keidi juon me n̄an wāween an kar Amulek en̄jake ke ekar kam̧ool en̄taan eo an armej ro retiljek an Ammōnaia: “barāinwōt [metak]” (Alma 14:10), im jej kōņaan bwe jemaron̄ kōm̧m̧ane juon men kake. Ta eo jej ekkatak jān ta eo Alma ekar ba ilo kain jekjek in? (lale Alma 14:8–13). Komaron̄ kwaļo̧k ennaan eo jān Būreejtōn Spencer W. Kimball ilo “Kein Jipan̄ ko Jet.” Bōlen ro uwaan kūlaaj eo remaron̄ kwaļo̧k ilo tukaduin lukkuun ennaan eo an Būreejtōn Kimball ilo naan ko aer make.

Alma 15:16, 18

Mour in rikaļoor eaikuji kaarmejete.

• Unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko ej kwaļo̧k tok laajrak in ta ko Amulek ekar ebbeer jāni im ta ko ekar būki ke ekar nōbar gospel eo. Ro uwaan kūlaaj eo remaron̄ naaj m̧ōņōņō in kwaļo̧k laajrak in ta eo rekar ejaake, ak remaron̄ kōm̧m̧ani laajrak kien ilo kūlaaj. Eoon kein remaron̄ in jipan̄: Alma 10:4–5; 15:16, 18; 16:13–15; im 34:8. Etke Amulek ekar m̧ōņōņō in kōm̧m̧an kain kaarmejet rot in? Etke jej m̧ōņōņō in kōm̧m̧an āindein? Ewi wāween ad maron̄ ļoor waanjon̄ak eo an Alma, eo “ekar kōkajoorļo̧k [Amulek] ilo Irooj”?

Alma 16:1–10

Naan ko an rikanaan ro renaaj kūrm̧ool.

• Alma 16 ej letok waanjon̄ak ko an juon armej eo ekar lōke juon rikanaan im kōn armej ro rekar jab. N̄an jipan̄ ro uwaan kūlaaj eo ekkatak jān waanjon̄ak kein, komaron̄ je ioon boot eo ruo naan raorōk ilōn̄tata ioon boot eo: Zoram im Armej in Ammōnaia. Ro uwaan kūlaaj eo remaron̄ riiti Alma 16:1–10 im je ium̧win kajjojo naan ko raorōk ilōn̄tata ioon boot eo im meļe ko me rej kōmeļeļeiki m̧wil eo an armej rein ņae naan ko an rikanaan Alma. Ta eo jej kōm̧m̧ane n̄an kwaļo̧k n̄an Jemedwōj Ilan̄ bwe ewōr ad tōmak ilo naan ko an rikanaan ro remour?

Kōketak Ekkatak ilo M̧weo

Ļōmņak in kajjitōk ippān ro uwaan kūlaaj eo eļan̄n̄e rekar kōņaan n̄e remaron̄ kar em̧m̧anļo̧k aer kwaļo̧k gospel eo. Riiti Alma 17–22 emaron̄ im̧we er kōn ļōmņak ko n̄an jipan̄ er kōttōbrak kōttōbar in.

Kein Jipan̄ ko Jet

Anij ejjab aolep iien bōbrae kabūrom̧ōjm̧ōj.

Būreejtōn Spencer W. Kimball juon iien ekar kwaļo̧k an ļōmņak kōn elōn̄ iaan kabūrom̧ōjm̧ōj ko jeban kōmeļeļeiki me rekar waļo̧k ilo laļ in:

“Irooj emaron̄ ke kar bōbrae kabūrom̧ōjm̧ōj kein? Uwaak eo ej, aaet. Irooj eo ekajoor bōtata, kōn aolep kajoor n̄an peek mour ko ad, ej lo̧mo̧o̧ren kōj jān metak, bōbrae jān aolep jorrāān ko jān idin̄, … aaet [kōjparok kōj] jān mej, eļan̄n̄e enaaj. Ak E ejjamin naaj. …

“Eļan̄n̄e aolep nan̄inmej ko jej jar kaki rej jako, eļan̄n̄e aolep ro riwenōk kar kōjparoki im rinana kar kakkuri, aolepān būrookraam̧ in an Jemān enaaj kar jab waļo̧k im pedped in katak eo an gospel eo, anemkwoj in kālet, enaaj kar jem̧ļo̧k. Ejjeļo̧k armej enaaj aikuj in mour jān tōmak. …

“… Eļan̄n̄e rekar kiili kōjem̧ ko kōn būrom̧ōj im liajļōļ, jemaron̄ joļo̧k ro m̧ōttad reļļap im rijjipan̄ ro ad. En̄taan emaron̄ in kōm̧m̧an bwe armej ro rekwojarjar an armej ro ilo aer ekkatak kijenmej, inem̧m̧an, im kōjparok er make. …

“… Ij kam̧oolol bwe aaet jān priesthood eo imaron̄ kōmour aolep rinan̄inmej ro. Imaron̄ kōmour ro rej aikuj mej. Imaron̄ joļo̧k en̄taan an armej ro rej aikuj en̄taan. Ij mijak inaaj kabūrom̧ōj kōttōbar eo an Anij.

“Ekar ke likjab aō kajoor, im aaet likjab visōn im meļeļe, imaron̄ kar lo̧mo̧o̧r Abinadai jān urur in kijeek ko ke ekar til ilo joor eo, im ilo kōm̧m̧ane menin emaron̄ kar pen aō kōjorāān e. Ekar mej kōn mōrō ilo jojomar tōmak eo an im im ekar etal bōk juon nōbar kōn jojomar tōmak eo an—mour ijo eutiejtata.

“Inaaj kōņaan kōjparok Paul jān kakkure ko ņan e eļan̄n̄e kajoor eo aō ekar jab likjab. Inaaj kar m̧ool kōmour “kinej ilo ānbwin.’ [2 Korint 12:7.] Im ilo kōm̧m̧ane menin imaron̄ kar bōbrae būrookraam̧ eo an Irooj. …

“Ij mijak bwe ikar pād ilo Jikin Kalbuuj Carthage ilo Juun 27, 1844, imaron̄ ukōt iaļen joot ko me rekar daiļ ānbwinnin Rikanaan Josep Smith im Patriak [Hyrum Smith]. Imaron̄ kar lo̧mo̧o̧ren er jān en̄taan im metak, ak luuji er n̄an mej eo ej jojomar tōmak eo im nōbar. …

“Kōn kain kajoor in ban peeke, em̧ool in kar en̄jake n̄an kōjparok Kraist jān en̄taan ilo Gethsemane, kōnanaik, kalōklōk eo ioon bōran, kōm̧m̧an ko n̄ane ilo court, ak jorrāān in ānbwin. Imaron̄ kar jipan̄ n̄an kinej ko An im kōmour er, leļo̧k n̄an e dān emōļo ijjelo̧kin benkō. Imaron̄ kar lo̧mo̧o̧ren E jān en̄taan im mej, im jako n̄an laļ in kōn katok in pinmuur eo An. …

“Ilo mejān kakkure in ekabūrom̧ōjm̧ōj jej aikuj in likūt ad lōke ilo Anij, jeļā bwe mekarta likjab ko ad ilo lale jibadbad ko An naaj likjab” (Teachings of Presidents of the Church: Spencer W. Kimball [2006], 14–17, 20).

Kōkōm̧anm̧anļo̧k Ad Katakin

Kajjitōk niknik ilo ekkatak. “N̄e jej pojak n̄an katakin, ijjelo̧kin ļōmņak, ‘Ta eo inaaj katakin?’ kajjitōk ippam̧ make, ‘Ta eo ro uwaan kūlaaj eo aō renej kōm̧m̧ane n̄an ekkatak?” (Teaching in the Savior’s Way, 29).