13–19 Iulai

Alema 32–35

“Toto Lenei Afioga i o Outou Loto”

E tusa lava pe ua faafia ona e faitau i le Alema 32-35, toe faitau i ai ao e sauni e aoao atu. Ia mataala i manatu fou mai le Agaga.

Tusifaamaumau Ou Lagona Uunai

Valaaulia le Fefaasoaai

Ina ia fesoasoani i tagata e faasoa mai mea na latou aoaoina mai le faitauina o le Alema 32-35 i le fale, e mafai ona e tuuina atu ni nai minute e iloilo ai nei mataupu ma tusi i le laupapa soo se aoaoga po o ni autu na latou maua. Talanoa o se vasega, pe aisea e taua ai nei aoaoga po o autu.

Aoao Atu le Aoaoga Faavae

Alema 32:1–16

E mafai ona tatou filifili ia lotomaualalo.

• Ina ia taitaia se talanoaga e uiga i le lotomaualalo e pei ona aoao mai i le Alema 32:1-16, e mafai ona e amata i le valaaulia o tagata o le vasega e faaigoa mai ni aafiaga na e mafai ona faalotomaualalo ai se tagata o le (Alema 32:2-5 ua tuuina mai se tasi o faataitaiga). Atonu e i ai ni tagata o le vasega e ono naunau e faasoa mai o latou lava aafiaga i le aoaoina o le lotomaualalo. E mafai faapefea ona avea o se faamanuiaga le “faalotomaualaloina” (Alema 32:12)? O faamatalaga e uiga i le lotomaualalo i le “Punaoa Faaopoopo” e mafai foi ona uunaia ai se talanoaga. E mafai foi ona outou faitau le Mataupu Faavae ma Feagaiga 112:10 pe usu se viiga e uiga i le lotomaualalo, e pei o le “Ia E Lotomaualalo” (Viiga, nu. 69), o se vasega.

Alema 32:17-43; 33

Tatou te faaaogaina le faatuatua ia Iesu Keriso e ala i le totoina ma tausia Lana afioga i o tatou loto.

• Tatou te mafaufau i nisi taimi i le tapuai ua na o ni mea tatou te faia i ni tulaga aloaia e pei o se falelotu (tagai Alema 32:5, 9, 11), ae o le faamatalaga a Alema i le tapuai e sili atu le lautele. Mo se faataitaiga, na ia aoao mai o le atiina ae ma le faaaogaina o le faatuatua ia Iesu Keriso o se tulaga taua o le tapuai lena e mafai ona tupu i fafo mai se tulaga aloaia. Ina ia fesoasoani i lau vasega ia malamalama i lenei mataupu faavae, e mafai ona e tusia se ata o se fatu ma se laau i le laupapa ma talanoaina fesili e pei o nei: O le a le mea e suitulaga ai le fatu? (tagai Alema 32:28; 33:22–23). E mafai faapefea na tatou totoina le fatu—po o se molimau ia Iesu Keriso ma Lana Togiola—i o tatou loto ma tausia lelei? (tagai Alema 32:36–43; 33). O a ni aafiaga e mafai ona tatou faasoa atu lea na aumaia ai e a tatou taumafaiga ia mulimuli i le Faaola ni fua e sili ona pele? E faapefea e aoaoga a Alema ona uunaia le ala tatou te tapuai atu ai i le Tama Faalelagi ma Iesu Keriso?

• O le “faataitaiga” na faamatalaina e Alema e fesoasoani ai i sa Sorama e atiae le faatuatua ia Iesu Keriso e mafai foi ona fesoasoani ia i tatou e aoao ai pe moni isi mataupu faavae. Ina ia fesoasoani ia malamalama i le faataitaiga a Alema, e mafai ona outou talanoa po o le a se faataitaiga. Atonu e i ai se tasi i le vasega na faia se faataitaiga muamua ma e mafai ona fesoasoani i lenei faamatalaga. O le a le faamoemoega o se faataitaiga? O faapefea ona tali tutusa se faataitaiga i mea ua valaaulia e Alema tagata e fai i le Alema 32:26–36? Atonu e mafai e tagata o le vasega ona fefaasoaai ni auala eseese na latou “faataitai” ai i le afioga a le Atua. Na faapefea ona oo ina latou iloa “ua lelei le afioga [a le Atua]”? (Alema 32:28).

• O le a se tala e mafai ona ta’u e Alema i se tasi ina ia maua ai pe faamalosia ai se molimau ia Iesu Keriso? Ina ia suesueina lenei fesili, e mafai ona e vaevae le vasega i ni vaega se lua. E mafai e le tasi vaega ona faitau le Alema 32:26-36 ia iloa ai po o le a le tala e ono fai atu e Alema i se tasi o loo taumafai e maua se molimau, ae o le isi vaega e mafai ona faitau le Alema 32:36-43 e iloa ai po o le a se tala na te ono fai atu i se tasi ua vaivai lana molimau. Ona mafai lea e se tagata se toatasi mai vaega taitasi ona feauauai e suitulaga ia Alema ma faatino pe faapefea ona fesoasoani i se tasi ia maua pe faamalosia se molimau.

Alema 31:13–23; 33:2–11; 34:17–29

E mafai ona tatou tapuai i le Atua i le tatalo, i soo se taimi ma soo se mea.

• E mafai ona e fesoasoani i le vasega e faatusatusa aoaoga a Alema ma Amoleka e uiga i le tatalo ma le tapuai ma manatu sese o sa Sorama. E mafai e tagata o le vasega ona iloilo le Alema 31:13--23 ma lisi i le laupapa mea na talitonu i ai sa Sorama e uiga i le tatalo ma le tapuai. Ona mafai lea ona latou vaai mo upumoni i le Alema 33:2–11 ma le 34:17–29 na e ese mai nei talitonuga. O a mea o aoao mai e nei fuaiupu ia i tatou i le ala e mafai ai ona tatou faaleleia a tatou tatalo ma la tatou tapuai?

• E mafai ona e uunaia se talanoaga e uiga i le tatalo e ala i le tusia o upu e pei O ai? O le a? O a fea? O fea? Aisea? ma le E faapefea? i le laupapa. E mafai e tagata o le vasega ona suesue le Alema 33:2--11 ma le 34:17–29 e sue ai tali i nei fesili e faatatau i le tatalo. Mo se faataitaiga, e mafai ona latou tali i fesili e pei o nei: O fea e mafai ona tatou tatalo ai? O a mea e mafai ona tatou tatalo ia maua? E mafai foi ona latou maua tali i upu o se viiga e uiga i le tatalo, e pei “Pe na Faia Sau Tatalo?” po o “Le Itula o Talosaga” (Viiga, nu. 75, 77). E mafai faapefea ona faaleleia a tatou tatalo?

Alema 34:9-17

O le Togiola a lo tatou Faaola “e le gata ma e faavavau.”

• Na faaaoga e Amoleka upu “le gata” ma le “faavavau” i ni nai taimi e faamatala ai le taulaga a Iesu Keriso na fai e togiola ai mo a tatou agasala. E mafai ona e valaaulia tagata o le vasega e sue nei upu i le Alema 34:9-14 ona sue lea i se lomifefiloi. O a auala e le gata ai ma faavavau le taulaga a le Faaola? (tagai Eperu 10:10; 2 Nifae 9:21; Mosaea 3:13). E tusa ai ma le Alema 34:15–17, O a mea e tatau ona tatou faia e maua ai faamanuiaga o le taulaga a le Faaola? O le a le uiga o le “maua le faatuatua e salamo ai”? (Alema 34:17).

Alema 34:32-35

“Aua le faatuai le aso o lo outou salamo”

• O se tala faatusa pei o lenei e mafai ona fesoasoani i tagata o le vasega e mafaufau loloto ai i le matautia o le faatuai o lo tatou salamo: valaaulia i latou e vaai faalemafaufau faapea ua latou maua se valaaulia e auai i se gaoioiga lena e manaomia ai le aoaoina ma sauniuniga mo ni tausaga e saunia ai, e pei o le tauvaga i le Olimipeka po o se faafiafiaga faamusika (filifili se mea e taua i lau vasega), ae o lenei gaoioiga o le a faia taeao. Talanoa ma le vasega pe aisea atonu o le a latou le manuia ai i le gaoioiga e tusa lava pe latou te faaaluina le aso atoa lenei e saunia ai. E faapefea ona fesootai lenei faataitaiga i lapataiga a Amoleka i le Alema 34:32–35? Aisea e ono lamatia ai le faatuai o a tatou taumafaiga ia salamo pe suia? Valaaulia tagata o le vasega e mafaufau loloto pe o a mea e mafai ona latou faia e “saunia ai mo le faavavau” (fuaiupu 33) ma faia fuafuaga ia faia loa e aunoa ma le faatuai.

Fautuaina le Aoaoina i le Aiga

Ina ia musuia tagata o le vasega e faitau le Alema 36-38 i le vaiaso lenei, e mafai ona e ta’u atu ia i latou faapea o Alema na “faanoanoa tele i le amioletonu a lona nuu,” o lea na ia faapotopoto ai ona atalii ma aoaoina i latou “e faatatau i mea e uiga i le amiotonu” (Alema 35:15–16). O nai isi mataupu o le Alema ua tuuina mai ai se tala i mea na uunaia ai Alema e aoao atu i ona atalii.

Punaoa Faaopoopo

O le a le uiga ia lotomaualalo?

“O le lotomaualalo o le mafai lea ona iloa ma le agaga faafetai lou faalagolago atu i le Alii —o le malamalama lea o loo i ai ia te oe se tulaga manaomia faifai pea o Lana fesoasoani. … E le o se faailoga o le vaivai, palaai, po o le fefe; o se faailoga o lou iloa o le mea e taoto ai lou malosiaga atoa ” (Faamaoni i le Faatuatua [2004], 100).

Na faamatala mai e Elder Quentin L. Cook: “Pe a tatou mafaufau moni i le Atua le Tama ma Keriso le Alo, po o ai i La’ua, ma mea ua La ausia mo i tatou, e faatumulia i tatou i le migao, maofa, lotofaafetai, ma le lotomaualalo. … O le lotomaualalo e aofia ai le lotofaafetai mo o tatou mau faamanuiaga ma fesoasoani mai le lagi. O le lotomaualalo e le o se ausiaga iloga pe o se faatoilaloina o ni luitau maoae. O se faailoga o le malosi faaleagaga. O le mauaina o le mautinoa le leoa faapea e mafai ona tatou faalagolago i le Alii i lea aso ma lea aso o lea itula foi ma lea itula, e auauna atu ia te Ia, ma ausia ai Ona faamoemoega.” (“O le Faavavau i Aso Uma,” Ensign po o le Liahona, Nov. 2017, 52, 54).

Mau e uiga i le faatuatua.

• 1 Korinito 12:9

• Eperu 11:1–6

• Iakopo 2:14–18

• Eteru 12:6

• Moronae 7:33; 10:11

• Mataupu Faavae ma Feagaiga 63:9–11

Faaleleia o Lo Tatou Aoao Atu

Taulai atu i mau. E ui e tele punaoa faaopoopo na e mafai ona faaleleia se talanoaga, manatua o tusitusiga paia o punaoa o aoaoga faavae. Fesoasoani i tagata e sue upumoni i tusitusiga paia. (Tagai Aoao Atu i le Ala a le Faaola,21.)