O Aneti-Nifae-Liae o Loo Tanumia a Latou Auupega o le Taua, saunia e Jody Livingston

29 Iuni–5 Iulai

Alema 23–29

Latou te “Lei Pauu Ese Lava”

Ao e faitauina le Alema 23-29, manatua ina ia mafai ona fesoasoani i isi e aoao upumoni i nei mataupu, e te manaomia le i ai o ni ou lava aafiaga anoa i upumoni.

Tusifaamaumau Ou Lagona Uunai

Valaaulia le Fefaasoaai

E mafai ona e valaaulia tagata o le vasega e tusi i le laupapa fuaiupu na tulagaese ia i latou i le taimi o la latou suesuega patino pe faaleaiga. Faaalu ni nai minute e valaaulia ai ni nai tagata e talanoaina se upumoni na latou aoaoina mai fuaiupu na latou tusia.

Aoao Atu le Aoaoga Faavae

Alema 23–25; 27

O lo tatou liua ia Iesu Keriso ma Lana talalelei ua suia ai o tatou olaga.

• I le avea ai o ni soo o Iesu Keriso, o loo tatou tauivi uma lava ia faalolotoina lo tatou liua. Atonu o le tala i Aneti-Nifae-Liae e mafai ona uunaia ai i latou e te aoaoina ia latou taumafaiga e faia lenei mea. Atonu e mafai ona e amata i le tusia i le laupapa o se fesili faapea: O le a le uiga o le ia liua? po o le O a ituaiga o suiga e tutupu i olaga o tagata pe a latou liua? E mafai e tagata o le vasega ona vaai mo tali i nei fuaitau: Alema 23:6–7, 17–18; 24:17–19; 25:15–16; ma le 27:26–30. E mafai foi ona latou faasoa mai ni manatu mai isi fuaiupu na latou faitauina i le Alema 23-25 ma le 27. E mafai foi e tagata o le vasega ona maua ni tali aoga i nei fesili i le savali a Elder David A. Bednar “Liua i le Alii” (Ensign po o le Liahona, Nov. 2012, 106–9; tagai foi “Punaoa Faaopoopo”). O a suiga na fai e Aneti-Nifae-Liae o se taunuuga o lo latou liua? E faapefea ona uunaia i tatou e la latou faataitaiga e faateleina ai lo tatou liua ia Iesu Keriso ma Lana talalelei?

• E mafai faapefea ona e musuia tagata o le vasega e tuuese soo se tu masani lava ma tanumia a latou auupega o le fouvale, e pei ona faia e Aneti-Nifae-Liae? Mafaufau e iloilo faatasi le Alema 23:5-7. O a nisi o tu masani lelei ua fesoasoani le talalelei ia i tatou ia atiina ae? O a ni mea e ono suitulaga ai “auupega o … fouvale” a sa Lamana i o tatou aso? E mafai faapefea ona tatou “tanumia loloto i latou i le eleele”? (Alema 24:17). Valaaulia tagata o le vasega e mafaufau loloto po o a ni tu masani leaga po o auupega o le fouvale latou te manaomia ona tuu ese ina ia mafai ona latou ola ia sili atu le atoatoa i le talalelei.

Alema 24:7–16

E ala i le Togiola a Iesu Keriso, e mafai ai ona faamagaloina i tatou pe a tatou salamo.

• Afai e uunaia oe e fai se talanoaga a le vasega e uiga i le salamo, o le tala o Aneti-Nifae-Liae i le Alema 24 o se faataitaiga musuia e faaaoga. E mafai ona e tofia tagata taitoatasi o le vasega i se fuaiupu e faitau mai le Alema 24: 7-16 ma fesili ia i latou e tusi i le laupapa se mea na latou aoao mai la latou fuaiupu e uiga i le salamo. Ona mafai lea ona latou suesue mau nei e sue ai nisi manatu e uiga i le salamo: Isaia 53:5–6; 2 Nifae 2:6–8; ma le Mosaea 5:2.

Alema 24:13–15; 26; 29

E aumaia e le talalelei le olioli.

• I le Alema 23-29, o le upu “olioli” e 24 taimi e maua ai, ma avea ai nei mataupu o se nofoaga lelei e aoao ai pe faapefea e le ola ai i le talalelei—ma le faasoaina atu—ona aumaia le olioli. E mafai ona e vaevae le vasega i ni vaega ma fai atu i vaega taitasi e iloilo nisi o fuaiupu nei, ma vaavaai pe aisea na olioli ai Amona, atalii o Mosaea, ma Alema: Alema 24:13–15; 26:12–22; ma le 29:1–17. E mafai e tagata o le vasega ona lisi mea na latou maua i le laupapa. O a mea ua tatou aoao mai nei fuaiupu i le ala e aumai ai e le talalelei le olioli ia i tatou?

• Na aoao mai Peresitene Russel M. Nelson: “Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia. O Ia o le puna o le olioli uma” (Olioli ma le Ola ai Faaleagaga,,” Ensign po o le Liahona, Nov. 2016, 82). Atonu e mafai e tagata o le vasega ona fefaasoaai i aafiaga na fesoasoani ia i latou e malamalama ai i le moni o upu a Peresitene Nelson.

• Na maua e Alema ma Amona le olioli tele i le faasoaina atu o le talalelei. E mafai ona e valaaulia tagata o le vasega e sue fuaiupu i le Alema 26 ma le 29 e mafai ona uunaia se tagata talavou e auauna faamisiona—pe uunaia ai soo se tasi e faasoa atu le talalelei i isi. Tuu atu i tagata o le vasega se taimi e fuafua ai se mea e mafai ona latou faia e faasoa atu ai le talalelei. Valaaulia i latou e faatino a latou fuafuaga, ma i se vasega i le lumanai e mafai ona e uunaia i latou e talanoa e uiga i a latou taumafaiga.

• Ina ua fesoasoani Alema i isi ia salamo, na ia manatua ai le agalelei o le Atua (tagai Alema 29:10-13). Atonu e mafai ona e tuu atu i tagata o le vasega e suesue nei fuaiupu ma lisi mea na manatua e Alema. O le a se mea e faamanatu mai ai ia i tatou le agalelei o le Atua? O faapefea ona tatou vaaia le agalelei o le Atua i o tatou olaga?

Alema 26-27

E mafai ona avea i tatou ma mea faigaluega i aao o le Atua.

• Ina ia fesoasoani i tagata o le vasega e suesue le uiga o le avea “ma mea faigaluega i aao o le Atua” (Alema 26:3), e mafai ona e faaali atu ni ituaiga eseese o mea faigaluega po o masini. E mafai foi ona e valaaulia tagata o le vasega e aumai ni mea faigaluega o loo latou faaaogaina. E mafai faapefea ona aoga nei mea faigaluega? E faapefea ona pei i tatou o ni mea faigaluega i le galuega a le Atua? E mafai ona e valaaulia tagata o le vasega e faailoa mai auala na avea ai Amona ma ona uso faifeautalai o ni mea faigaluega i aao o le Atua (mo se faataitaiga, tagai Alema 26:1–5, 11–12). O a ni manatu e mafai ona tatou maua mai i le Mataupu Faavae ma Feagaiga 4 e uiga i le avea ma mea faigaluega i Ona aao? E mafai foi e tagata o le vasega ona faasoa mai ni aafiaga i se taimi na latou lagona ai le olioli lena e oo mai i le avea ma mea faigaluega i aao o le Atua.

Fautuaina le Aoaoina i le Aiga

O le tele o na lava manatu sese e taitaiesea fanau a le Atua i le aso na taatele foi i aso o Alema. Tau atu i tagata o le vasega faapea i le Alema 30-31 o le a latou vaai ai pe na faapefea ona tali atu Alema i nei aoaoga sese.

Punaoa Faaopoopo

Faaliliuina i le Alii.

Sa aoao mai Elder David A. Bednar:

“O le ute lava o le talalelei a Iesu Keriso e manaomia ai se suiga faavae ma le mausali i a tatou amioga lea e mafai e ala i le Togiola a le Faaola. O le liua moni e aumaia ai se suiga i lou talitonuga, o lou loto, ma le olaga e talia ai ma usitai atu i le finagalo o le Atua (tagai Galuega 3:19; 3 Nifae 9:20) ma e aofia ai se tautinoga maua’i e avea ma soo o Keriso.”

Ina ua uma ona sii mai le Alema 23:6–8, na faaauau e Elder Bednar ona faamatalaina:

“O elemene taua o loo faamatalaina i nei fuaiupu: (1) o le malamalama o le upumoni, lea e mafai ona faamatalaina o se molimau, ma (2) faaliliuina i le Alii, lea ua ou malamalama i ai o le liua lea i le Faaola ma Lana talalelei. O lea, o le tuufaatasiga mamana o le molimau ma le liuaina i le Alii e fua mai ai le tumau ma le mausali ma maua mai ai le puipuiga faaleagaga.

“Sa lei pauu ese lava i latou ma ua lafoai “auupega o lo latou fouvale, sa latou le toe tau faasaga i le Atua.” O le faataatia ese o “auupega o le fouvale” e pei o le manatu faapito, faamaualuga, ma le le usiusitai e tele atu mea e manaomia ai nai lo le na o le talitonu ma le iloa. O le talitonuga maumaututu, lotomaualalo, salamo, ma le usiusitai e ta’imua i le lafoaiina o a tatou auupega o le fouvale. Pe o tatou umiaina pea ni auupega o le fouvale lea e taofia ai i tatou mai le liua i le Alii? Afai o lea, ua tatau nei loa ona tatou salamo.

“Matau sa lei liua sa Lamana i faifeautalai sa aoaoina i latou, pe o polokalama maoae a le Ekalesia. E lei faaliliuina i latou i uiga o o latou taitai, po o le faasaoina o le talatuu faaleaganuu po o uputuu a o latou tama. Sa faaliliuina i latou i le Alii—ia te Ia o le Faaola ma Lona paia ma le aoaoga faavae—ma sa latou lei pauu ese lava” (“Liua i le Alii,” Ensign po o le Liahona, Nov. 2012, 107–9).

Faaleleia o Lo Tatou Aoao Atu

Saili e aoao mai ou taitai. “O ou taitai perisitua ma ausilali e mananao e fesoasoani ia te oe ia manuia. Fesili mo la latou fautuaga ao e taumafai e faaleleia oe o se faiaoga ma mafaufau loloto i manaoga o i latou e te aoaoina” (Aoao Atu i le Ala a le Faaola,5).