Amona ma le Tupu o Lamonae, saunia e Scott M. Snow

22–28 Iuni

Alema 17–22

“O Le a Avea Au o se Meafaigaluega i Lau Afio”

A o lei mafai ona e fesoasoani i isi ia maua upumoni i mau, e manaomia lou mauaina o upumoni mo oe lava. Faitau le Alema 17–22 ma e mafaufau i tagata o lau vasega.

Tusi Faamaumau Ou Lagona Uunai

Valaaulia le Fefaasoaai

Ina ia maua e tagata o le vasega se avanoa e faasoa mai ai se mea sa latou aoaoina ia latou suesuega faaletagata lava ia pe faaleaiga, e mafai ona e valaaulia i latou e piki se tagata o faamatala mai i le Alema 17–22 ma faamaea se fuaiupu e pei o lenei: “Na aoaoina au e Apiso ” po o le “Na aoaoina au e Lamonae .”

Aoao Atu le Aoaoga Faavae

Alema 17:1–4

E faamalolosia lo tatou faatuatua pe a tatou saili ma le filiga ia iloa le upumoni.

• Atonu ua faalogo soo tagata o le vasega i le taua o mausa faigofie o le talalelei. Alema 17:1--4 e mafai ona fesoasoani ia i latou e vaai ai i le aafiaga mamana o nei mausa e mafai ona i ai i o tatou olaga. E mafai ona e fai atu i le afa o le vasega e sailiili i fuaiupu nei mo mea na faia e atalii o Mosaea ma le isi afa e sailiili mo taunuuga o mea sa latou faia. O le a le taunuuga o le faia o nei mea i o tatou olaga?

• Mo se talanoaga e loloto atu e uiga i nisi o mausa sa faamalolosia ai atalii o Mosaea, e mafai ona e tusia i le laupapa le Sailiili i Tusitusiga Paia, Tatalo, ma le Anapogi. E mafai e tagata o le vasega ona sailiili mo ni mau o loo aoao mai ai e uiga i faamanuiaga e maua mai le suesueina o tusitusiga paia, tatalo, ma le anapogi (o le Taiala mo Autu po o le Taiala i Tusitusiga Paia e mafai ona fesoasoani). E mafai ona latou tusia i luga o le laupapa mea latou te maua ma fefaasoaai le tasi ma le isi ia manatu e uiga i le ala e faaleleia ai a latou suesuega o tusitusiga paia, tatalo, ma le anapogi i se ala e faalatalata atili atu ai i latou i le Atua.

Alema 17–18

E mafai ona fesoasoani lo tatou alolofa i isi e saunia ai e maua le talalelei.

• E tele ala e faasoa atu ai le talalelei, ma o na ala uma e sili atu ona lelei pe a faaosofia e le alofa. Atonu e mafai e tagata o le vasega ona faailoa mai fuaiupu o i le Alema 17–18 o loo faaalia mai ai le ala na faaosofia ai Amona ona o le alofa e faasoa atu le talalelei. O a isi upumoni e uiga i le faasoa atu o le talalelei ua tatou aoao mai lana faataitaiga? Atonu e mafai e tagata o le vasega ona faasoa mai aafiaga na faamalulu ai e le alofa faamaoni se loto o se tasi ma faatagaina ai o ia e talia gofie le savali o le talalelei. E mafai ona fesoasoani le saunoaga a Peresitene Dallin H. Oaks i le “Punaoa Faaopoopo” i tagata o le vasega e malamalama ai i le taua o le faamautinoaina o a tatou taumafaiga o loo faavae i le alofa.

Ua Faasaoina e Amona Lafu a le Tupu, saunia e Minerva K. Teichert

Alema 18–22

O le aoao atu ma le aoaoina lelei o upumoni e mafai ona taitaiina atu ai i se suiga o le loto.

• Na maua loa lava e Amona ma Arona le faatuatuaga o le Tupu o Lamonae ma lona tama, sa la mafai ona fesoasoani ia i la’ua e malamalama i upumoni e tatau ai o le talalelei. Atonu o le a fesoasoani pe afai e faia e tagata o le vasega se lisi o upumoni sa aoao atu e Amona ia Lamonae (tagai Alema 18:24–39) ma faatusatusa i se lisi o upumoni na aoao atu e Arona i le tama o Lamonae (tagai Alema 22:1–16). E mafai ona galulue le afa o le vasega i le tasi lisi a o galulue le isi afa i le isi lisi. Aisea atonu o le malamalama i nei upumoni na taitaiina ai Lamonae ma lona tama e talitonu ma faalagolago i le Tama Faalelagi ma Lona Alo, o Iesu Keriso?

• O tala ia Arona ma Amona o aoaoina atu o le Tupu o Lamonae ma lona tama ua maua ai se avanoa lelei e talanoaina ai le atoatoaga o le aoao atu ma le aoao mai o le talalelei. O a mataupu faavae o le aoao atu e matauina e tagata o le vasega? (tagai, mo se faataitaiga, Alema 18:24–28 ma le Alema 22:7–13). O a mataupu faavae o le aoaoina mai ua latou mauaina i faataitaiga a le Tupu o Lamonae ma lona tama? (tagai, mo se faataitaiga i le, Alema 18:25–31; 22:17–18).

• Ina ia aoaoina e uiga i le ala e mafai ai e le aoaoga faavae o le talalelei ona tosinaina o tatou olaga, e mafai e tagata o le vasega ona sailiili le Alema 18:40–41; 20:1–15; ma le Alema 22:15–18, 25–27 e iloa ai lagona o le Tupu o Lamonae ma lona tama ma le faataunuuina ina ua malamalama i upumoni o le talalelei ma liua ai. E mafai faapefea e nei upumoni ona fesoasoani ia i tatou e o mai ai ia Keriso? O a mea e mafai ona tatou faia e fesoasoani ai ia i tatou lava ma e e pele ia i tatou ia malamalama ma ola ai i nei upumoni?

Alema 19–22.

E mafai e a tatou molimau ona i ai se faatosinaga loloto i isi.

• I le taimi o a latou suesuega faaletagata lava ia o le Alema 19–22, atonu na mafaufau loloto ai tagata o le vasega i le aafiaga loloto e mafai e se molimau a se tagata ona i ai i luga o isi. Fautuaina i latou e faasoa mai mea sa latou aoaoina. O a mea o fautua mai e tala o i le Alema 19–22 e uiga ia tatou taumafaiga faaletagata lava ia e faasoa atu le talalelei? E mafai e le tala a Peresitene Gordon B. Hinckley o loo i le “Punaoa Faaopoopo” ona fesoasoani e faamamafa atu le itu lea.

• O a ni nai talafaatusa lelei e mafai ona e faasoa mai e faapupula ai mea e mafai ona tutupu pe a tatou faasoa atu a tatou molimau i isi? O ni faataitaiga e mafai ona i ai o se ‘ili’ili e faia ni galugalu i se vaituloto po o se fefete e fesoasoani i le paluga ia fefete. A uma ona iloilo ni nai faataitaiga o tagata sa faasoa atu a latou molimau i le Alema 19–22, e mafai e tagata o le vasega ona faasoa mai pe na faapefea ona latou aafia i molimau a isi.

Fautuaina le Aoaoina i le Aiga

E mafai ona e fesili i tagata o le vasega pe i ai se taimi na latou taumanatunatu ai pe faapefea ona faia ia mausali ma tumau lo latou liuga. I le Alema 23-29, o le a latou faitau ai e uiga i se vaega o tagata sa taliaina le talalelei ma “sa lei pauu ese lava” (Alema 23:6).

Punaoa Faaopoopo

Faasoa le talalelei ona o le alofa.

Sa faasoa mai e Peresitene Dallin H. Oaks se lesona taua sa ia aoaoina mai sona aafiaga o se alii talavou:

“Sa tofi au e asiasi i se tagata o le au paia sa lei toaga mai, o se polofesa faamanuiaina e tele tausaga e matua ai ia te au. I le toe tepa i tua i a’u taga sa fai, ua ou iloa ai sa matuai itiiti lava so’u popolega alofa mo le alii sa ou asia. Sa ou faia ona o le tiute, ma se naunautaiga ia 100 pasene la’u lipoti i a’u faiaoga o aiga. I se tasi afiafi, ua lata i le faaiuga o le masina, sa ou telefoni ai e fesili pe mafai ona ma o atu ma la’u soa i le taimi lava lea ma asia o ia. O lana tali faasea sa aoaoina ai au i se lesona e le mafai ona galo.

“‘E leai, ou te le talitonu ou te manao lua te o mai i lenei afiafi,’ sa ia fai mai ai. ‘Ua ou le lava. Ua uma ona fai o’u ofumoe. O lea ou te faitautusi, ma ou te le manao e toe faalavelave mai ina ia mafai ona e lipoti atu ua 100 pasene au asiasiga i aiga i lenei masina.’ O lena tali o loo tuia ai pea au aua sa ou iloa na ia lagonaina lava le manatu faapito na faaosofia ai au.

“Ou te faamoemoe e leai se tasi tatou te o atu i ai ma se valaaulia e faalogo i le savali o le talalelei toefuataiina o lagona faapea o loo tatou faatinoina ona o se isi lava mafuaaga e ese mai se alofa faamaoni mo i latou ma se naunautaiga e le manatu faapito e faasoa atu se mea ua tatou iloa e taua” (“Sharing the Gospel,” Ensign, Nov. 2001, 8).

O la tatou faatosinaga e tele lava ina le iloa.

Sa faamatalaina e Peresitene Gordon B. Hinckley se tala na lipoti atu e se faifeautalai i lona peresitene o le misiona i le faaiuga o lana auaunaga. Sa fai mai le faifeautalai:

“E lei i ai ni fua o la’u galuega. Na ou faamaimauina lo’u taimi ma tupe a lo’u tama. O se ma’imauga o le taimi. … Sa na o le toatasi le tagata na ou papatisoina i le lua tausaga sa ou i ai iinei. O se tamaitiiti e sefulu-ma le-lua tausaga i le vaega maotua o Tennessee.”

Sa tonu i le peresitene o le misiona e mata’itu taualumaga o le tamaitiiti sa papatiso e lenei faifeautalai. Sa ola a’e o ia, faaipoipo, ma siitia atu i Idaho. Na o lana fanau i misiona, ma sa o foi a latou fanau i misiona. Sa malaga le peresitene o le misiona i Idaho ma sa fesili i tagata o lena aiga e uiga ia latou misiona. Mulimuli ane sa ia faapea mai, “Sa ou mauaina faapea, o le taunuuga o le papatisoga o lena tamaitiiti laitiiti i le nuu maotua o Tennessee e se faifeautalai o le sa manatu sa ia toilalo, e silia ma le 1,100 tagata ua o mai i le Ekalesia” (Aoaoga a Gordon B. Hinckley [1997], 360–61).

Faaleleia o Lo Tatou Aoao Atu

Faaavanoa se taimi e fefaasoaai ai le au aoao. “A faasoa atu e tagata aoao mea na latou aoaoina, e le gata ina latou lagona le Agaga na faamalosia a latou lava molimau, ae latou te uunaia isi tagata o le vasega ia iloa upumoni mo i latou lava. … Tuu ese se taimi mo tagata aoga e faasoa ai i lesona uma—i nisi tulaga, e te mafai ona e iloa ai o nei talanoaga o lesona lava” (Aoao atu i le ala a le Faaola, 30).