‘8–14 Iuni. Alema 8–12: O Le a Afio Mai Iesu Keriso e Togiola Lona Nuu,” Sau, Mulimuli Mai ia te A’u—Mo Le Aoga Sa: Tusi a Mamona 2020 (2020)
“8–14 Iuni. Alema 8–12,” Sau, Mulimuli Mai ia te A’u—Mo le Aoga Sa: 2020
Aoao Atu Aoaoga Faavae Moni, saunia e Michael T. Malm
8–14 Iuni
Alema 8–12
O Le a Afio Mai Iesu Keriso e Togiola Lona Nuu
Amata lau tapenapenaga e aoao atu i le suesueina o le Alema 8–12. Ona iloilo lea o le otootoga lenei mo ni manatu faaopoopo o le a uunaia ai tagata o le vasega e faasoa mai mea sa latou aoaoina ia latou suesuega.
Tusi Faamaumau Ou Lagona Uunai
Valaaulia le Fefaasoaai
Tuu atu i tagata o le vasega ni nai minute e toe manatunatu ai ia latou suesuega faaletagata lava ia pe faaleaiga o tusitusiga paia i lenei vaiaso. Na faapefea e a latou suesuega ona aafia ai filifiliga sa latou faia i le vaiaso? Valaaulia nisi o tagata o le vasega e faasoa mai o latou manatu.
Aoao Atu le Aoaoga Faavae
O a tatou taumafaiga e faasoa atu le talalelei e ono manaomia ai le sogasoga ma le onosai.
-
E toatele tagata e faigata ia i latou ona faasoa atu le talalelei—aemaise pe a latou lagona le teenaina, e pei ona sa i ai Alema. O le faataitaiga a Alema e mafai ona fesoasoani ia i latou e faatuatua i le Atua ma maua ai le lototoa e faaauau ai ona faasoa atu a latou molimau i isi. Mafaufau i fesili nei mo talanoaga: O le a se mea ua tatou aoao mai le savali a le agelu ia Alema i le Alema 8:15? O le a se mea o i le tali atu a Alema i le savali, o loo maua i le Alema 8:14--32, e musuia ai i tatou e faasoa atu pea lava pea le talalelei pe a tatou feagai ma le teenaina? O le a se fautuaga e mafai ona tatou tuu atu i se tasi sa taumafai e faasoa atu le talalelei ae sa teenaina? E mafai foi ona fesoasoani le fautuaga a Elder Jeffrey R. Holland o loo i le “Punaoa Faaopoopo” i lenei talanoaga.
-
O le tala ia Alema ma Amoleka o loo faapupula mai ai le taua o taumafaiga a tagata o le au paia i le galuega faafaifeautalai. O a mea o aoao e le vasega mai le Alema 8:19–30 e uiga i le sootaga i le va o tagata o le au paia i le lotoifale ma faifeautalai faamisiona? (tagai foi i le Alema 10:1–12).
Atafono a aiga e toaluaO le faasoa atu o le talalelei ia i latou tatou te alolofa i ai e mafai ona avea o se aafiaga fiafia tele.
E faamasinoina e le Atua Ana fanau e tusa ai ma le malamalama ma le poto ua latou maua.
-
O loo i ai se lapataiga matuia i nei fuaiupu i tagata uma o le Ekalesia—o le taimi lava tatou te maua ai le malamalama ma le poto, e faamoemoeina ai foi i tatou e teu faapelepele i ai, faafailele, ola ai, ma faaaoga e faamanuia ai isi. Ina ia fesoasoani i tagata o le vasega e suesueina lenei faamoemoega, e mafai ona e fai atu ia i latou e faitau ia aoaoga a Alema o i le Alema 9:18--30 ma faasoa mai savali latou te mauaina e uiga i le tiutetauave ua ia i latou ona o mea ua latou iloa. Aisea e ono tele atu ai le tausalaina pe a tatou agasala faasaga i le malamalama tele? Tuu atu se taimi mo tagata o le vasega e mafaufau loloto ai i mea e mafai ona latou faia ina ia faamaoni atili ai i le malamalama ma le poto ua latou maua. E mafai ona e fautua atu latou te faitauina le Mataupu Faavae ma Feagaiga 50:24 a o latou mafaufau loloto.
O le fuafuaga a le Atua o se fuafuaga o le togiola.
-
E mafai ona e amataina se talanoaga e uiga i lenei aoaoga faavae i le valaaulia o se tagata o le vasega e tusi se ata o le fuafuaga o le togiola i luga o le laupapa. E mafai ona e vaevaea vaega o le Alema 11–12 i tagata o le vasega ma valaaulia i latou e vaavaai mo upumoni o le a latou faaopoopo i le atatusi. Mo se faataitaiga, o le a le mea e togiolaina mai ai i tatou i le fuafuaga a le Atua? (tagai i le Alema 11:38–45). Ua faamanuiaina faapefea o tatou olaga ona o le iloaina o nei upumoni e uiga i le fuafuaga o le togiola?
-
Ina ia fesoasoani i tagata o le vasega e faasoa mai mea o loo aoao mai e le Alema 11–12 e uiga i le fuafuaga o le togiola, e mafai ona e tusia ulutala nei i luga o le laupapa: O Le Pau, O Le Togiola, Salamo, Maliu, Toetu, ma le Faamasinoga: E mafai e tagata o le vasega ona filifili se tasi o nei autu ma sailiili i le Alema 11--12 mo upumoni ua latou aoao i ai. Valaaulia tagata o le vasega e tusi ia upumoni latou te mauaina, faatasi ai ma mau faasino, i lalo o le ulutala talafeagai i luga o le laupapa. I le avea o se vasega, talanoaina pe faapefea e le iloaina o nei upumoni ona aafia ai o tatou olaga ma faaiuga tatou te faia.
-
E mafai ona manuia tagata o lau vasega mai se talanoaga e taulai i le Alema 12:31–32, lea na aoao atu ai e Alema e faapea ina ua mavae le Pau, sa tuu atu e le Atua ia Atamu ma Eva ia poloaiga—ae na o le taimi ua uma ona aoao atu ia i laua Lana fuafuaga. E faapefea e le iloaina e uiga i le fuafuaga ona aafia ai le ala tatou te vaai atu ai pe lagona e uiga i poloaiga? Atonu e mafai ona e talanoa e uiga i ni poloaiga patino, mo se faataitaiga, e faapefea e le iloaina e uiga i le fuafuaga a le Atua ona fesoasoani ia i tatou e tausi ia paia le Aso Sapati pe usitai i le tulafono o le legavia?
-
Atonu e fesili nisi o tagata o le vasega e uiga i le Alema 11:26--39, lea na fai mai ai Amoleka e na o le tasi le Atua. O mau nei o loo faamanino mai ai pe faapefea e sui auai o le Aiga Atua ona “tasi le Atua” a o avea foi lava o ni tagata eseese: Ioane 17:20–23; 2 Nifae 31:21; ma le 3 Nifae 19:29. E mafai foi ona fesoasoani le saunoaga lea mai ia Elder Jeffrey R. Holland: “Matou te talitonu e tasi i Latou i itu iloga uma ma le faavavau e le mafai ona oo i ai se manatu vagana ai le talitonuga ia i Latou e toatolu peresona ua fusia faatasi i se aano e tasi” (“O Le Atua Moni e Toatasi ma Iesu Keriso o le na Ia Auina Mai,” Ensign po o le Liahona, Nov. 2007, 40).
Afai o le a tatou le faamaaaina o tatou loto, e mafai ona tatou maua isi mau afioga a le Atua.
-
O se tasi o savali na aoao soo mai e Alema ma Amoleka o le ala e aafia ai po o le a le tele o upumoni e mafai ona tatou maua mai le Alii ona o tulaga o o tatou loto. Ina ia fesoasoani i tagata o le vasega ia iloa le moni o lenei mataupu faavae, e mafai ona e valaaulia i latou e faitau le Alema 12:9--14 i ni paga po o ni vaega toalaiti ma talanoaina taunuuga o le i ai o se loto maaa. (E mafai foi ona e fai atu ia i latou e faitau le Alema 8:9–11; 9:5, 30–31; ma le 10:6, 25.) O le a le uiga o le i ai o se loto e malu? (tagai i le Ieremia 24:7; Alema 16:16; Helamana 3:35). E fesoasoani faapefea le i ai o se loto e malu ia i tatou e malamalama atili ai i le afioga a le Atua?
-
Na aoao mai Alema e faapea pe a tatou faamaaa o tatou loto, tatou te maua le “vaega itiiti” o le afioga a le Atua (Alema 12:10). Atonu e mafai e tagata o le vasega ona fefaasoaai aafiaga mai tusitusiga paia e faapupula ai lenei mataupu faavae. E faapefea e le Alii ona faamaluluina o tatou loto ina ia mafai ai ona tatou aoao pea mai ia te Ia? O a ni aafiaga faaletagata lava ia e mafai ona tatou fefaasoaai ai?
-
Ina ia fesoasoani i tagata o le vasega ia malamalama i le faauigaga o le i ai o se loto e malu, e mafai ona e faasoa atu ni nai faataitaiga o loo lisi mai i le “Punaoa Faaopoopo.”
Fautuaina le Aoaoina i le Aiga
Ina ia musuia tagata o le vasega e faitau le Alema 13–16 i le vaiaso lenei, e mafai ona e ta’u atu ia i latou o le a latou iloa pe na faapefea ona faataunuuina upu a Alema i olaga o Seseroma ma le nuu o Amonaea.
Punaoa Faaopoopo
Fai se filifiliga lototoa.
Na tuuina mai e Elder Jeffrey R. Holland le faamalosiauga lenei ia i latou o e agaleagaina ona o le faasoa atu po o le puipuia o le talalelei:
“Afai e te lei faia, o le a i ai se aso e valaauina ai oe e puipuia lou faatuatua pe atonu foi e onosaia ni sauaga patino ona o oe o se tasi o Le Ekalesia a Iesu Keriso o le Au Paia o Aso e Gata Ai. O taimi faapea o le a manaomia uma ai le lototele ma le amio solia mai ia te outou.
“… Atonu tou te mafaufau pe e aoga lo outou tutu atu e puipui ma le lototoa amioga mama i le aoga maualuga po o le alu i se misiona ae na o le ulagia ai o ou talitonuga sili ona pele po o le tetee atu i le tele o mea i le olaga lea o nisi taimi e ulagia ai se olaga tuuto faalelotu. Ioe, e aoga …
“Uo, ae maise lava au uo talavou, ia maua le alofa. O le alofa mama faaKeriso e tafe mai le amiotonu moni e mafai ai ona suia le lalolagi. …
“Ia faamalosi. Ola ma le faamaoni i le talalelei e tusa lava pe e le o ola ai isi o siomiaina outou. Puipui o outou talitonuga ma le amio solia ma le agaalofa, ae ia puipuia” (“O Le Tau—ma Faamanuiaga—o le Avea ma Soo,” Ensign po o le Liahona, Me 2014, 6–9).
Na faamaluluina o latou loto.
O saunoaga nei o konafesi aoao o loo aumaia ai ni faataitaiga o tagata na faamaluluina o latou loto e le Alii:
-
O le tala i le aiga o Hatfield i le savali a Peresitene Russell M. Nelson, “O Le Tau o le Mana o le Perisitua” (Ensign po o le Liahona, Me 2016, 66–69).
-
O le tala ia Harold Gallacher i le savali a Peresitene Thomas S. Monson “O le Valaauga Paia o le Auauna Atu” (Ensign po o le Liahona, Me 2005, 55).
-
O le tala ia Tavita i le savali a Peresitene Dieter F. Uchtdorf “Aoao mai ia Alema ma Amoleka” (Ensign po o le Liahona, Nov. 2016, 73–74).
Faaleleia o Lo Tatou Aoao Atu
Vaai e ala atu i fofoga o le Atua. Taumafai e vaai atu i tagata o lau vasega e faapei ona silasila i ai le Atua, ma o le a faaali atu e le Agaga ia te oe o latou taua ma gafatia paia. A e faia o lenei, o le a taiala oe i au taumafaiga e fesoasoani ia i latou (tagai Aoao Atu i le Ala a le Faaola, 6).