Mo Faamanuiaga o le Saolotoga, saunia e Scott M. Snow

3–9 Aokuso

Alema 43-52

“Tutumau Mausali i le Faatuatua ia Keriso”

E ese mai le iloiloina o gaoioiga iinei, saili au lava musumusuga ao e suesue ma le agaga tatalo i le Alema 43-52 ma mafaufau e uiga i le ala e fesoasoani ai i tagata o le vasega ia iloa aoaoga faavae ua aoaoina mai ai.

Tusifaamaumau Ou Lagona Uunai

Valaaulia le Fefaasoaai

Ina ia valaaulia tagata o le vasega e faasoa mai mea ua latou aoaoina mai le Alema 43-52, e mafai ona e fesili ia i latou pe faapefea ona latou tali atu i se tasi e faapea mai, “Ou te le iloa lava pe faapefea e taua o loo faamatala mai i le Tusi a Mamona ona fesootai i lou olaga.”

Aoao Atu le Aoaoga Faavae

Alema 43-52

O taua i le Tusi a Mamona o loo aoaoina i tatou e uiga ia tatou taua e faasaga i le tiapolo.

• I a latou suesuega taitoatasi ma faaleaiga i lenei vaiaso, e mafai e tagata o le vasega ona mafaufau loloto pe faamaumau o latou manatu e uiga i le ala na puipuia ai ma le manuia e sa Nifae i latou lava e faasaga i sa Lamana ma le ala na osofaia ai e sa Lamana sa Nifae. Afai e fai e tagata o le vasega lenei mea i le fale, valaaulia i latou e faasoa mai mea na latou maua. Pe mafai foi ona e tuu atu i tagata o le vasega se taimi e sue ai nei manatu i le taimi o le vasega e faaaoga ai mau e pei ona maua i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Ao faasoa mai e tagata o le vasega mea ua latou maua, uunaia i latou e talanoaina pe faapefea ona tatou mafai ona mulimuli i le faataitaiga a sa Nifae i le puipuia o i tatou lava e faasaga i le tiapolo ma le ala e mafai ai ona tatou iloaina osofaiga faaleagaga a Satani ia i tatou.

Alema 46:11–22

Afai tatou te lototoa i le puipuia o lo tatou faatuatua, e mafai ona tatou uunaia isi ia faatuatua.

• E mafai faapefea ona e fesoasoani i tagata o le vasega e mulimuli i le faataitaiga a Moronae i le puipuia ma le lototoa lo latou faatuatua i le talalelei toefuataiina a Iesu Keriso? E mafai e tagata o le vasega ona faitau le Alema 46:11–22 ma faailoa mai mea na faia e Moronae ma mea na ia aoao atu na uunaia ai ona tagata ia sili atu le faatuatua. E mafai ona e tusia mea nei i le laupapa i lalo o le autu Faataitaiga a Moronae. Ona mafai lea ona e fesili atu i tagata o le vasega e mafaufau loloto i faatinoga a Moronae ma fautua mai mea e mafai ona tatou faia i aso nei e puipuia ai o tatou talitonuga. E mafai ona e tusia o latou manatu i lalo o le autu Puipuia ma le Lototoa le Talalelei i Aso Nei. O a upumoni ma mataupu autu na aoao mai talu ai nei e lo tatou perofeta ia i tatou e tatau ona tatou aoao atu ma puipuia?

• E mafai faapefea ona e fesoasoani i tagata o le vasega e faaaoga mea na fai e Moronae i le tagavai o le saolotoga i o latou lava olaga? Valaaulia i latou e faitau le Alema 46:11-22 ma faailoa mai upumoni na aoao mai e Moronae ma fai atu i ona tagata ia lagolagoina. O a upumoni ma mataupu autu ua faamamafa mai e o tatou taitai o le Ekalesia i o tatou taimi? (E mafai ona e iloiloina nisi o na vaega i le Mo le Malosi o le Autalavou, “O le Aiga: O se Folafolaga i le Lalolagi,” po o savali talu ai nei o le konafesi aoao.) O a ni luitau ua tatou maua i le puipuia o o tatou talitonuga i le lalolagi i aso nei? O le a se mea ua tatou aoaoina mai le faataitaiga a Moronae? Tuu atu i tagata o le vasega le avanoa e fatu ai se latou lava tagavai o le saolotoga e mafai ona faamanatu ia i latou ia ola ma le lototoa ma puipui o latou talitonuga.

  

  Minerva K. Teichert (1888–1976), Defense of a Nephite City, 1935, oil on masonite, 36 x 48 inches. Falemataaga o Faatufugaga a le Iunivesite a Polika Iaga

Alema 47

E faaosoosoina ma faaseseina i tatou e Satani i sina mea itiiti i lea taimi ma lea taimi.

• E mafai ona aoga i lau vasega le suesueina o le Alema 47, lea e faaalia ai le ala e tutusa ai le taufaasese a Amalekia i mea o loo fai e Satani e faasese ai i tatou. E mafai ona e amata i le fai atu i se tasi e aotele mai le tala o loo maua i le Alema 47. Ina ia faaopoopo le fiafia mai, e mafai ona e valaaulia ni tagata se toalua o le vasega e mafaufau faapea o i laua o Amalekia ma Leoneti ma faamatala mai le tala. O le a le mea na fai e Amalekia e faamanatu mai ai ia i tatou mea o loo fai e Satani e faaosooso ma faasese ai i tatou? Uunaia tagata o le vasega e vaai i fuaiupu faapitoa ao latou talanoaina lenei fesili. O le upusii i le “Punaoa Faaopoopo” o loo i ai se isi faataitaiga o le ala e faasese ai i tatou e Satani. O le a se fautuaga e mafai ona tatou tuu atu i le tasi ma le isi e fesoasoani ia i tatou ia mataala ai i le ala e faaosoosoina ai i tatou e Satani i le aso? O le a se mea e mafai ona tatou faia e puipuia ai i tatou lava?

Alema 48: 7--17

Ao tatou tauivi ia faatuatua e pei o Moronae, o le a avea atili i tatou faapei o le Faaola.

• O se talanoaga e uiga i uiga o Moronae e mafai ona musuia ai tagata o le vasega ia tauivi e mulimuli i lana faataitaiga. E mafai ona e amata i le faaali atu o se ata o Moronae, e pei o loo i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Ona valaaulia lea o tagata o le vasega e sailiili le Alema 44:3–4 ma le 48:7–13 ma tusi i le laupapa upu ma fuaitau e faamatala ai Moronae. Ona mafai lea ona outou faitau faatasi le Alema 48:17 ma talanoaina pe na faapefea e uiga o Moronae, e pei o i latou o loo lisiina i le laupapa, ona faatagaina o ia e faatoilalo le faatosinaga a Satani ma avea atili ai e pei o Iesu Keriso. E mafai faapefea ona avea atili i tatou e pei o Moronae?

Alema 48:7–9; 49:1–9; 50:1–6

E mafai ona tatou faamalolosia i tatou lava ma o tatou aiga e faasaga i le fili.

• Atonu e aoga i tagata o lau vasega le faalogo o talanoa isi e uiga i le ala e mafai ai ona latou puipuia i latou lava ma o latou aiga e faasaga i taufaasese ma faaosoosoga a Satani. Ina ia uunaia se talanoaga, e mafai ona outou faitau faatasi le Alema 48:7–9; 49:1–9; ma le 50:1–6. Ao tatou mafaufau e uiga i lo tatou manaomia o puipuiga faaleagaga e faasaga i le agasala, o a mea ua tatou aoao mai taumafaiga a sa Nifae e puipui i latou lava? E mafai faapefea ona tatou fausia ni puipuiga faaleagaga e puipuia ai i tatou lava ma o tatou aiga e faasaga i le agasala ma faatosinaga leaga? Fautuaina tagata o le vasega e faasoa mai ni manatu na aoga mo i latou. Aisea e taua ai le “le taofia [e Moronae] le faia o sauniuniga”? (Alema 50:1).

Fautuaina le Aoaoina i le Aiga

O le tasi ala e uunaia ai tagata o le vasega e faitau le Alema 53-63 o le tau atu ia i latou faapea o le tala i nei mataupu e mafai ona uunaia ai i latou ma o latou aiga ia sili atu le usiusitai ma atiina ae ai se faatuatua e sili atu le malosi.

Punaoa Faaopoopo

O taunuuga o le gauai atu i faaosoosoga laiti.

Ina ia aoao atu faapea “ e ulufale mai agasala mamafa i o tatou olaga, a o tatou gauai muamua atu i nai faaosoosoga laiti,” na faasoa mai e Peresitene Spencer W. Kimball lenei tala faatusa:

“[O se] kamela ma lona matai sa malaga atu i le toafa ae oo mai loa ma se matagi malosi. Sa faavave ona faatu e le tagata malaga lona faleie ma maulu loa lava i totonu, ma tapunipuni ia laufaleie e puipui ai o ia mai le maini o le oneone o loo feula mai e le matagi malosi. Sa tuu i fafo le kamela, ma a o fesasaa’i foi i lona tino, o ona mata, ma puisu le oneone lea e lelea mai le matagi, sa oo ina le mafai ona tatali e ia ma sa oo ai lava ina faatoga atu i lona matai, pe mafai ona ulu atu i le faleie.

“Ua na o au lava e ofi i le faleie,” o le tala lea a le tagata malaga.

“Ae a pe a tuu atu tau lava o si o’u isu i totonu ina ia ou le manavaina ai se ea e tumu i le oneone?” sa talosaga atu ai le kamela.

“Oi, atonu e mafai ona e faia lena mea,” sa tali atu ai le tagata malaga, ma sa ia tatalaina faavaitiiti se laufaleie ma sa tuu mai i ai i totonu le isu umi o le kamela. Sa manaia lava le faalogo a le kamela i lea taimi! Ae lei umi ae vaivai le kamela ona o le maini o oneone i ona mata ma taliga…:

“Ua matua maini lava le tau o oneone i lo’u ulu. E mafai ona tuu atu na o lo’u ulu i totonu?”

Sa toe faapea atu foi le tagata malaga, e leai se mea e afaina ai pe afai e te malie i lea tulaga, aua e mafai ona tuu le ulu o le kamela i le avanoa o loo i le tumutumu o le faleie lea na te le o faaaogaina. O lea na tuu ai loa le ulu o le kamela i totonu, ma sa faapea ona faamalieina ai le meaola—ae mo sina taimi puupuu.

“Na o o’u lima lava i luma,” sa ia toe talosaga atu ai, ma sa malie foi i ai le tagata malaga ma e lei pine ae tuu atu i totonu tauau ma lima o le kamela i le faleie. Mulimuli ane, i le faiga lava lea o le aioi atu ma talia, sa iu ai ina oo atu i totonu o le faleie le tino atoa o le kamela. Ae ua le ofi ai le toalua i totonu, ma o lea na a’a ai loa i fafo e le kamela le tagata malaga i le afa ma le matagi malosi” (Aoaoga a Peresitene o le Ekalesia: SpencerW. Kimball [2006], 106--7).

Faaleleia o Lo Tatou Aoao Atu

O lou valaauga ua musuia. “O lou valaauga e aoao atu e sau mai le Alii. … Ua vaetofia oe i lalo o le taitaiga a i latou e umia ki o le perisitua; o le mea lea, e ia te oe aia tatau i faaaliga faaletagata lava ia e te manaomia ina ia manuia ai. O nei faamanuiaga o oe e anaina a o e sailia, tumau i le faatuatua, ma taumafai e ola agavaa” (Aoao Atu i le Ala a le Alii, 5).