Funa e, Se a Le Mea E Te Tagi Ai? saunia e Mark R. Pugh

27 Iulai–2 Aokuso

Alema 39-42

“O le Fuafuaga Sili o le Fiafia”

O aoaoga a Alema i le Alema 39-42 e oa i aoaoga faavae ma e faamanino mai ai upumoni taua. Ao e suesueina nei mataupu, mafaufau loloto po o fea upumoni e mafai ona sili ona aoga i lau vasega ma po o a mea e mafai ona e faia e fesoasoani ai ia i latou ia iloa nei upumoni.

Tusifaamaumau Ou Lagona Uunai

Valaaulia le Fefaasoaai

Ina ia tuuina atu i tagata o le vasega se avanoa e faasoa ai o latou lagona ma manatu e uiga i le Alema 39-42, e mafai ona e valaaulia i latou e iloilo faapuupuu nei mataupu ma sue se mea ua fai mai Alema pe na faia foi ua uunaia ai i latou.

Aoao Atu le Aoaoga Faavae

Alema 39

O agasala o feusuaiga o se mea inosia lea i fofoga o le Alii.

• O a mea e mafai ona tatou aoao mai le tala i le aafiaga o Korianetona i le agasala ma le salamo? Atonu e mafai e tagata o le vasega ona faitau le Alema 39:1–14, o nisi o i latou e sailia mea sese na fai e Korianetona, ao isi e sailia po o a mea atonu na taitai atua o ia i le agasala, ao isi e saili mo fautuaga a Alema na tuuina atu ia te ia. A o latou faasoa mai mea ua latou maua, e mafai ona latou talanoaina pe faapefea ona latou aloese mai le faia o mea sese faapena.

• A soli e tagata agasala feusuai, e masani ona latou maua ni lagona o le lotovaivai po o le faanoanoa ma e mafai ona latou lagonaina ua leai so latou aoga tele. O a mataupu faavae i le Alema 39-42 ua uunaia tagata o le vasega ia lagonaina le faamoemoe lena e taitai atu i le salamo? O le faasoaina atu o le fuaitau a Sister Joy D. Jones i le “Punaoa Faaopoopo” e mafai ona fesoasoani i tagata o le vasega ia malamalama i le eseesega i le va o le agavaa ma lo tatou aoga i le silafaga a le Atua. (Tagai foi Lynn G. Robbins, “Seia Fitugafulu ni Fitu,” Ensign po o le Liahona, Me 2018, 21–23.)

• O se vaega o la outou talanoaga, atonu e aoga mo tagata o le vasega ona talanoaina tulaga faatonuina a le Alii e faatatau i le ola mama. Atonu e sili atu le aoga i la outou talanoaga pe a faatotonugalemu i mataupu faavae nai lo i se lisi o mea e fai ma mea e aua le faia. Mo se faataitaiga, atonu e mafai ona e valaaulia tagata o le vasega e faailoa mai mataupu faavae na aoaoina ai e Alema Korianetona i le Alema 39. Ma le isi, e mafai ona latou iloilo le “Mama Aiai i Feusuaiga” i le Mo le Malosi o le Autalavou faatasi ma fesili e pei o nei i le mafaufau: “Afai e te otootoina uma lenei fautuaga i se mataupu faavae se tasi, o le a lena mataupu faavae?” po o “O a mataupu faavae ua e maua iinei e fesoasoani ia te oe ia ola i le tulafono o le Legaviā?” E mafai foi e tagata o le vasega ona iloilo lenei vaega i le Mo le Malosi o le Autalavou, ma vaavaai mo faamanuiaga o le ola i le tulafono o le legaviā ma taunuuga o le le usitai i lenei tulafono. E faapefea ona ese nei mataupu faavae mai mea o loo aoaoina e le lalolagi? E faapefea e nei mataupu faavae ona aafia ai le ala tatou te mafaufau ai e uiga i le tulafono o le legaviā? Atonu e aoga i lau vasega le faitauina o le fuaitau a Sister Wendy Nelson i le “Punaoa Faaopoopo” ao latou taliina nei fesili.

• O nisi taimi e faigofie le talitonu faapea o a tatou filifiliga e le aafia ai isi—faapea o a tatou agasala e lilo. O le a le mea na aoao ai e Alema ia Korianetone i le Alema 39:11-12 e uiga i le taunuuga o ana flifiliga? Valaaulia tagata o le vasega e mafaufau loloto po o ai e ono aafia i filifiliga latou te faia, lelei ma le leaga foi. E mafai foi ona latou faasoa mai pe na faapefea e faatinoga ma faataitaiga a isi ona fesoasoani ia i latou e filifili le mea sao.

Alema 40–42

O le Togiola a Iesu Keriso ua mafai ai le fuafuaga o le laveaiina.

• Na aoao e Alema Korianetona i upumoni tatou te manaomia uma lava e malamalama i ai, e aofia ai upumoni e uiga i le faamoemoega o le olaga, le lalolagi o agaga, toetu, ma le faamasinoga. Mafaufau e filifili se tasi o aoaoga a Alema ma tuu atu i tagata o le vasega ni minute se lua e suesue ai le Alema 40-42 (taitoatasi pe ini paga) ma tusi i lalo le tele o upumoni e uiga i lena autu e mafai ona latou maua. Ona mafai lea ona faasoa mai e tagata o le vasega i le tasi ma le isi po o le vasega mea na latou maua. E mafai ona outou toe faia lenei mea mo isi autu pe a lava le taimi. Aisea na taua ai nei upumoni faapitoa mo le atalii o Alema o Korianetona ia malamalama i ai?

• O faamatalaga a Alema i le tulaga o agaga pe a uma lenei olaga e mafai ona uunaia ai mafaufau o le vasega i le taua o le o mai i le Faaola ma salamo i a tatou agasala i lenei olaga. E mafai ona e tusia le Amiotonu (Salamo) ma le Amioleaga (Le salamo) i le laupapa ma valaaulia tagata o le vasega e suesue le Alema 40:11-26 ma lisi i le laupapa upu po o fuaitau na faaaoga e Alema e faamatala ai le tulaga o nei vaega taitasi o tagata pe a latou feoti. E mafai faapefea e nei aoaoga ona uunaia i tatou ia salamo? Mo nisi faamatalaga e uiga i le mea e tupu i le lalolagi o agaga, tagai 1 Peteru 3:18–20; 4:6 ma le Mataupu Faavae ma Feagaiga 138:29–37.

• O le a le mea e oo i mafaufau o tagata o lau vasega pe a latou faalogo i upu “toefuatai” po o le “toefuataiga”? Valaaulia i latou e suesue le Alema 41 pe na faapefea ona faaaoga e Alema nei upu. O le a le uiga o lana saunoaga? O le a le mea o le a toefuataiina ia i tatou? Aisea e mafai ai ona aoga le vaai i le fuafuaga a le Tama Faalelagi o se “fuafuaga o le toefuataiga”? (fuaiupu 2).

• O nisi o tagata o lau vasega e ono faasoa mai le fesili lena e foliga mai na i ai i le mafaufau o Korianetona—pe amiotonu pe fetaui foi le faapea o se Atua alofa o le a faasalaina Ana fanau? (tagai Alema 42:1). Atonu e mafai ona e fai i tagata o le vasega e mafaufau loloto i le ala o le a latou tali atu ai i lenei fesili ma sue mo tali i le Alema 42: 7-26.

• Afai e te lagona o le a talafeagai, atonu o le a aoga i tagata o lau vasega le sueina o se fuaiupu i le Alema 42 e mafai ona latou faamatalaina i se ata po o se faailoga faigofie lea e faamatalaina pe aisea tatou te manaomia ai le Togiola a le Faaola. E mafai e tagata o le vasega ona faasoa mai mea na latou tusia, ma e mafai e isi tagata o le vasega ona taumafai e sue le fuaiupu e suitulaga ai. Ona mafai lea ona latou talanoaina le mea na latou aoaoina e uiga i le taua o le taulaga a le Faaola.

  

  E mafai ona tatou maua se molimau ia Iesu Keriso o lo tatou Faaola.

Punaoa Faaopoopo

Ua tele lava le taua o o tatou agaga.

Na aoao mai Sister Joy D. Jones:

“Se’i o’u faasino atu le manaomia ona tuueseese o upu taua nei e lua: taua ma le agavaa. E le tutusa upu ia e lua. O le taua faaleagaga o lona uiga o le faatauaina o i tatou lava i le auala o loo faatauaina ai i tatou e le Tama Faalelagi, ae le o le auala e faataua ai e le lalolagi i tatou. Sa fuafuaina lava lo tatou taua ae tatou te lei o mai i lenei lalolagi. “E le mafuatia le alofa o le Atua ma o le a tumau pea e faavavau.”

“I le isi itu, e ausia le agavaa e ala i le usiusitai. Afai tatou te agasala, e faaitiitia lo tatou agavaa, ae le faaitiitia ai lava lo tatou taua! E faaauau pea ona tatou salamo ma tauivi pea ina ia faapei o Iesu faatasi ma lo tatou taua. E pei ona aoao mai Peresitene Polika Iaga: “O le mea sili ona itiiti, le agaga sili ona maualalo ua i ai nei i le fogaeleele … , e tutusa le taua ma lalolagi.” E tusa lava po o le a, e i ai lava lo tatou taua i le silafaga a lo tatou Tama Faalelagi” (“O Le Taua le Mafuatiaina,” Ensign po o le Liahona, Nov. 2017, 14).

O le vaai a le lalolagi i le alofa militino e le tutusa ma le silafaga a le Atua.

Na faatusa e Sister Wendy Nelson le vaai a le lalolagi i fesootaiga feusuai—“feusuaiga faalelalolagi”—i le mea na ia taua o le “alofa militino i le faaipoipoga ua faauuina e le Atua”:

“I le feusuaiga faalelalolagi, e taga lava soo se mea. I le alofa militino i le faaipoipoga, o le tausia lelei e manaomia e aloese ai mai soo se mea ma mea uma—mai le gagana i le musika i tifaga—na e faatiga i le Agaga, lou agaga, po o le agaga o lou toalua.

“Ao tumu feusuaiga faalelalolagi i le tuinanau ma faaleaoga ai le alofa, o le alofa militino i le faaipoipoga e faatupuina atili ai le alofa.

“O feusuaiga faalelalolagi e faaleagaina ai alii ma tamaitai ma o latou tino, ao le alofa militino o le faaipoipoga e faamamaluina alii ma tamaitai ma faamaualugaina le tino o se tasi o taui sili o le olaga faitino.

“I feusuaiga faalelalolagi, e lagona e tagata taitoatasi o loo faaaogaina i latou, sauaina, ma iu lava ina lagonaina le tuuatoatasi. I le alofa militino, e lagona e taitoalua le sili atu o le lototasi ma le alofagia, e sili atu le faatagata matua ma le malamalama.

“O feusuaiga faalelalolagi e paaa ma e iu ina faaleagaina ai le sootaga. O le alofa militino i le faaipoipoga e faamalosia faaipoipoga. Na te lagolago, faamalolo, ma faamamaina olaga o taitoalua ma a latou faaipoipoga. …

“O feusuaiga faalelalolagi e oo ina avea o se faananauga atoa lava ona e le faataunuuina lava ona folafolaga. O le alofa militino o le faaipoipoga na faauuina e le Atua e mamalu ma o le a faaauau pea ona faavavau mo tane ma ava e tausia-feagaiga” (“Love and Marriage” [worldwide devotional, Jan. 8, 2017], broadcasts.ChurchofJesusChrist.org).

Faaleleia o Lo Tatou Aoao Atu

Saunia mamao. “Ao e mafaufau loloto pe faapefea e mataupu faavae o loo e aoaoina ona faamanuia ai tagata o lau vasega, o manatu ma musumusuga o le a oo mai i le gasologa o lou olaga i aso uma—ao e alu atu i le galuega, faia feau i le fale, pe fegalegaleai ma aiga ma uo. Aua le mafaufau i sauniuniga faaleagaga o se mea e te faaavanoaina se taimi e fai ai, ae o se mea e te faia e le aunoa” (Aoao Atu i le Ala a le Faaola,12).