dua ribu nga agtutubo a mannakigubat

Dua Ribu nga Agtutubo a Mannakigubat ni Arnold Friberg

Agosto 10–16

Alma 53–63

“Nataginayon babaen ti Datdatlag a Bilegna”

Bayat ti panagsukisokmo kadagiti kapanunotan iti panangisuro iti daytoy a balabala, panunotem maipapan no ania ti maaramatto iti klasem, ket ibagay wenno baliwam dagiti aktibidad tapno maipaay dagiti kasapulan dagiti miembro ti klase.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Tapno mayallukoy dagiti miembro ti klase a mangibinglay no ania ti nasursuroda manipud iti Alma 53–63, mabalinmo nga idawat kadakuada a basaenda biit dagiti kapitulo ket sapulenda ti bersikulo a mabalinda nga ibinglay iti maysa a tao a maipaspasango kadagiti karit. Awisem ida a mangibinglay kadagitoy a bersikulo iti maysa a tao iti ruar ti klase.

icon iti panangisuro

Isuro ti Doktrina

Alma 53:17–21; 56:43–48, 55–56; 57:20–27; 58:39–40

Bayat ti panangaramattayo iti pammati ken panagtalek iti Dios, papigsaennatayonto.

• Mabalinmo nga inayon ti pangpasayaat iti panaglilinnawag iti klasem maipapan kadagiti mannakigubat ni Helaman babaen ti panangaramat no ania ti nasursuro dagiti miembro ti klase iti pagtaengan. Maysa a wagas tapno maaramid daytoy ket mangawis kadagiti miembro ti klase a mangibinglay kadagiti kababalin dagiti agtutubo a mannakigubat a makaawis iti imatangda (sumagmamano kadagitoy ti masarakan iti Alma 53:17–21; 56:45–48; 57:20–21, 26–27; 58:40). Kasano a nakatulong dagitoy a kababalin kadagiti agtutubo a mannakigubat kadagiti pannakirangetda? Kasano a makatulongda kadatayo kabayatan dagiti naespirituan a pannakirangettayo? Mabalin met a mangibinglay dagiti miembro ti klase kadagiti estoria maipapan kadagiti “agtutubo a mannnakigubat” iti agdama nga aldaw.

• Nalabit a namnamaen dagiti nagannak iti klasem a mapapigsanto dagiti annakda ti pammatida kas kadagiti agtutubo a mannakigubat ni Helaman. Tapno matulongan a masursuruan dagiti nagannak ken masakbayan a nagannak iti klasem manipud iti estoriada, mabalinmo ti mangbukel iti maysa a panel dagiti sumagmamano nga indibidual a makaibinglay kadagiti kapanunotan maipapan iti panangparnuay iti pammati kadagiti ubbing. Idawatmo kadagitoy a miembro ti panel a basaenda a nasapsapa ti Alma 56:47–48 ken 57:20–27 ken agsagana a mangibinglay kadagiti nalawag a pannakaammo ken pannakaawat [insights] maipapan no ania ti nangtulong a mangpapigsa iti pammati dagiti agtutubo a mannakigubat. Mangted kadagiti miembro ti klase iti oras a mangibinglay kadagiti nalawag a pannakaammo ken pannakaawatda [insights] bayat ti panangidatag dagiti miembro ti panel kadagiti kapanunotanda. Dagiti dadduma pay a resources a mabalin a mangpapintas iti daytoy a panaglilinnawag ket mangiraman kadagiti balikas ni Sister Joy D. Jones iti “Dagiti Nainayon a Resources” ken iti mensahe ni Presidente Russell M. Nelson “A Plea to My Sisters” (Ensign wenno Liahona, Nob. 2015, 95–97). Iti gibus ti panaglilinnawag, mabalinmo nga ikkan dagiti miembro ti klase iti sumagmamano a minuto a mangutob kadagiti saludsod kas iti sumaganad: Asino ti mabalin nga agpannuray iti pammaneknekmo? Ania ti masaom ken maaramidmo a mangpapigsa kadakuada?

dagiti annak a Nephite a kadua ti inada

Dagiti Bannuar (Sinuruan dagiti Innada), ni Liz Lemon Swindle

Alma 58:1–12, 30–37; 61

Mabalintayo a pilien a panunoten ti kasayaatan maipapan iti dadduma ken saan a mapasakitan.

• Ti reaksion ni Helaman idi saan nga umaw-awat dagiti buyotna iti tulong ket mabalin a nabileg a pagwadan para kadatayo no mariknatayo a nagbidduttayo. Tapno mayallukoy ti panaglilinnawag maipapan iti pagwadanna, mabalinmo nga awisen ti maysa a miembro ti klase nga umay a nakasagana a manggupgop iti kasasaad ni Helaman ken dagiti rason a saan a pinatgan ti gobierno dagiti kasapulanna (kitaen iti Alma 58:1–9, 30–37; 61:2–8). Mabalinmo nga isurat iti pisarra Sungbat ni Helaman ken Dadduma pay a mabalin a sungbat. Kalpasanna awisem ti klase a mangsukisok iti Alma 58:1–12 ken 30–37 ket isurat iti baba ti tunggal paulo dagiti panangiladawan ti no ania ti napanunot, naisao, ken naaramid ni Helaman kas sungbat iti kasasaadna ken, iti kasupadina, no ania koma ti napanunot, naisao, wenno naaramidna. Ania ti maaramidtayo a mangsurot iti pagwadan ni Helaman no mariknatayo a nagbiddut wenno nabaybay-antayo?

• Idi dinillaw ni Moroni ni Pahoran iti Alma 60, mabalin a pinili koma ni Pahoran ti mapasakitan. Ketdi insungbatna nga isu ket “saan a makagura” ken “[naragsakan] iti kadakkel ti panagpuspuso ni [Moroni]” (Alma 61:9). Tapno matulongan dagiti miembro ti klase a masursuro ti pagwadan ni Pahoran, mabalinmo nga idawat kadakuada a mangipapan a nakiddaw kadakuada a mangisurat iti maysa nga artikulo para iti magasin ti Simbaan a maaramat ti pagwadan ni Pahoran iti Alma 61 tapno isuro maipapan no kasano a maliklikan ti panangpasakit dagiti dadduma. Kalpasanna mabalinmo a bingayen dagiti miembro kadagiti grupo ket idawat kadakuada a mangbasa iti Alma 61:3–14 ket ilista dagiti sumaganad a punto a mabalinda nga iraman kadagiti artikuloda. Makatulong pay ti balakad ni Elder David A. Bednar iti “Dagiti Nainayon a Resources.”

Alma 60:7–14

Addaantayo iti pagrebbengan a mangitag-ay dagiti adda iti aglawlawtayo.

• Insurat ni Moroni a pangsungbatento ti Dios ni Pahoran no ammona a binay-anna dagiti kasapulan dagiti buyot a Nephite. Ibilang ti panangawis kadagiti miembro ti klase a mangbasa iti Alma 60:7–14 nga aggigiddan, ket kalpasanna idawat kadakuada a mangpanunot iti maysa a tao nga am-ammoda a mabalin nga agkasapulan ken makarikna a nabaybay-an. Ania ti maaramidtayo tapno agbalintayo a mannakaammo ken maipaaytayo dagiti kasapulan ti dadduma? Kasano a naipaayen dagiti dadduma dagiti kasapulantayo, agraman dagiti agserserbi a kakabsattayo a lallaki ken babbai?

Alma 62:39–41, 48–51

Nasken a laglagipentayo ti Apo kabayatan dagiti panawen ti panagrigat ken panagrang-ay.

• Dagiti reaksion dagiti Nephite iti agpada a narigat ken narang-ay a panawen (kitaen iti Alma 62:39–41, 48–51) ket mangipakita a mabalintayo a pilien ti agbalin a napakumbaba no mapaspasarantayo ti panagrigat ken panagrang-ay. Mabalinmo nga awisen dagiti miembro ti klase a mangbasa kadagitoy a bersikulo ket ibinglayda no ania ti pakaawisan iti imatangda. Mabalinmo nga awisen ida a mangilawlawag iti kapanunotanda iti kada paris sakbay ti panangkiddaw iti sumagmamano a mangibinglay iti sibubukel a klase.

icon iti panagsursuro

Yallukoy ti Panagsursuro iti Pagtaengan

Tapno maparegta ti panagessem iti Helaman 1–6, mabalinmo nga ilawlawag iti klase a kadagitoy a kapitulo nagbalin a nadangkes dagiti Nephite ket nagbalin a nalinteg dagiti Lamanite. Daytoy a panagsinnukat iti akem ket mangipaay kadagiti napapateg a leksion para kadatayo kadagitoy napeggad nga ud-udina nga aldaw.

resources icon

Dagiti Nainayon a Resources

Panamagbalin kadagiti annaktayo nga ad-adda a mannakabael a mangsupring iti basol.

Imbinglay ni Sister Joy D. Jones, Primary General President, dagiti sumaganad a tulbek iti panangpatanor iti “kaputotan ti tattao a mannakabael a mangsupring iti basol”:

“Tapno mangrugi, … nasken a tulongantayo dagiti [annaktayo] a mangammo nga awan duadua nga isuda dagiti annak a lallaki ken babbai ti managayat a Nailangitan nga Ama ken adda nadiosan a namnamaenna kadakuada.

“Maikadua, ti pannakaawat iti doktrina ti panagbabawi ket kasapulan iti panagbalin a managsupring iti basol. Ti panagbalin a managsupring iti basol saanna a kaipapanan ti panagbalin nga awanan iti basol, ngem kayatna a sawen ti panagbalin a nga agtultuloy nga agbabawi, agannad, ken agbalin a nalinteg. Nalabit a ti panagbalin a managsupring ti basol sumangbay a kas maysa a bendision manipud iti agtultuloy a panangliklik iti basol. …

“… Ti maikatlo a tulbek iti panangtulong kadagiti ubbing nga agbalin a managsupring iti basol ket panangrugi no ubbingda pay unay tapno siaayat nga isuro kadakuada dagiti kangrunaan a doktrina ken pagbatayan iti ebanghelio—manipud kadagiti nasantuan a kasuratan, ti Pagannurotan ti Pammati, ti Para iti Pigsa dagiti Agtututbo buklet, dagiti kanta iti Primary, dagiti himno ken dagiti bukodtayo a pammaneknek—a mangiturongto kadagiti annak iti Mangisalakan. …

“… Ti panangtulong kadagiti ubbing a makaawat, agaramid, ken agtungpal kadagiti sagrado a katulagan ket sabali pay a tulbek. … Ti panangisuro kadagiti annak nga agaramid kadagiti simple a kari no ubbingda pay ket mangpabileg kadakuada nga agtungpal kadagiti nasantuan a katulagan no agbalinda a nataengan” (“A Sin-Resistant Generation,” Ensign wenno Liahona, Mayo 2017, 88–89).

No kasano a maliklikan ti panagrikna a napasakitan.

Iti mensahena nga “And Nothing Shall Offend Them” (Ensign wenno Liahona, Nob. 2006, 89–92), inted ni Elder David A. Bednar ti sumaganad a balakad:

• Ammuen a ti pannakapasakit ket maysa a pili. “Ti mamati a ti maysa a tao wenno maysa a banag ti mabalin a mangiparikna kadatayo a napasakitan, makagura, nasaktan, wenno nasakit iti nakem ket mangpabassit iti karbengantayo a pumili iti nasayaat ken mangbalbaliw kadatayo nga agbalin a banag a pagtignayan. Nupay kasta, gapu ta addaantayo iti karbengan a pumili, addaankayo ken addaanak iti bileg nga agtignay ken pumili no kasano ti panangrespondetayo iti makapasakit wenno makapasaem a kasasaad.”

• Kumita iti Mangisalakan. “Ti Mangisalakan Isu ti kaindaklan a pagwadan no kasano ti isusungbattayo kadagiti mabalin a makapasakit a pasamak wenno kasasaad” [kitaen iti 1 Nephi 19:9].

• Agbalin a mannakaawat kadagiti pagkapsutan dagiti dadduma. “Maysa kadagiti kadakkelan a pakakitaan iti bukodtayo a naespirituan a panagdur-as ket naipalgak iti no kasano ti panagrespondetayo kadagiti pagkapsutan, ti awan padasna, ken ti mabalin a makapasakit a tignay dagiti dadduma.”

• Makisarita a direkta. “No sawen ken aramiden ti maysa a tao ti maysa a banag nga ibilangtayo a makapasakit, ti umuna nga obligasiontayo ket agkedked a mapasakitan ket kalpasanna makisarita a nalimed, napudno, ken direkta iti dayta nga indibidual. Ti panangusar iti daytoy a wagas ket mangawis iti inspirasion manipud iti Espiritu Santo ken mangipalubos kadagiti panangduadua a malawlawagan ken ti pudno a panggep tapno maawatan.”

Panangpadur-as iti Panangisurotayo

Agusar kadagiti padas iti pagtaengan. Gapu ta ti pagtaengan ti sentro ti pagsursuruan iti ebanghelio, ibilangmo no kasano a mausar dagiti padasmo iti siled ti klase iti no ania ti mapaspasamak idiay. Kas pagarigan, mabalinmo a balbaliwan ti adu nga aktibidad iti Umaykayo, Sumurot Kaniak—Para kadagiti Indibidual ken Pamilia nga usarem iti klasem tapno mapatibker ti bukod ken sangapamiliaan a panagadal dagiti miembro ti klase.