Babai, Apay nga Agsangitka? ni Mark R. Pugh

Hulio 27–Agosto 2.

Alma 39–42

“Ti Naindaklan a Plano ti Ragsak”

Dagiti pannursuro ni Alma iti Alma 39–42 ket nabaknang iti doktrina ken mangilawlawag kadagiti napapateg a kinapudno. Kabayatan ti panagadalmo kadagitoy a kapitulo, utobem no ania dagiti kinapudno a mabalin a kapatgan iti klasem ken no ania ti maaramidmo a makatulong kadakuada a mangtakuat kadagitoy a kinapudno.

Isuratmo Dagiti Impresionmo

Yawis ti Panagbibinninglay

Tapno mangted iti gundaway kadagiti miembro ti klase a mangibinglay iti kapanunotan ken dagiti nauneg a pannakaammo ken pannakaawatda [insights] maipapan iti Alma 39–42, mabalinmo nga awisen ida a mangrebyu iti apagbiit kadagitoy a kapitulo ket mangsapul iti maysa a banag a kinuna wenno inaramid ni Alma a nakaawis iti imatangda.

Isuro ti Doktrina

Alma 39

Makarimon iti imatang ti Apo ti basol a mainaig iti seks.

• Ania ti masursurotayo manipud iti pakaammuan maipapan iti padas ni Corianton iti basol ken panagbabawi? Nalabit a mabalin a basaen dagiti miembro ti klase ti Alma 39:1–14, sumagmamano kadakuada ti agsuksukisok iti inaramid a biddut ni Corianton, agsuksukisok dagiti dadduma no ania ti nangiturong kenkuana nga agbasol, ken agsuksukisok dagiti dadduma pay iti balakad nga inted ni Alma kenkuana. Bayat ti panangibinglayda no ania ti nakitada, mabalinda nga ilawlawag no kasano a maliklikantayo ti panagaramid kadagiti isu met la a biddut.

• No agaramid dagiti tao kadagiti basol a mainaig iti seks, masansan a mariknada ti kinaawan namnama wenno pannakaupay ken makarikna nga awananda unay iti pateg. Ania dagiti pagbatayan iti Alma 39–42 a mangparegta kadagiti miembro ti klase tapno mariknada ti namnama a mangiturong iti panagbabawi? Ti panangibinglay iti palawag ni Sister Joy D. Jones iti “Dagiti Nainayon a Resources” ket makatulong kadagiti miembro ti klase a makaawat iti paggidiatan ti pannakaikari ken ti pategtayo iti imatang ti Dios. (Kitaen met iti Lynn G. Robbins, “Until Seventy Times Seven,” Ensign wenno Liahona, Mayo 2018, 21–23.)

• Kas paset ti panaglilinnawagyo, mabalin a makatulong nga ilawlawag dagiti miembro ti klase dagiti pagrukodan ti Apo maipanggep iti kinadalus iti dayaw. Mabalin nga ad-adda a makatulong ti panaglilinnawagyo no maipamaysa daytoy kadagiti pagbatayan imbes nga iti listaan dagiti aramiden ken saan nga aramiden. Kas pagarigan, mabalinmo nga awisen dagiti miembro ti klase a mangilasin kadagiti pagbatayan nga insuro ni Alma ken ni Corianton iti Alma 39. Kas mainayon, mabalinda nga irebyu ti “Kinatarnaw iti Dayaw” iti Para iti Pigsa dagiti Agtutubo nga addaan kadagiti saludsod kas kadagitoy iti panunot: “No nasken a gupgopem amin daytoy a balakad iti maysa a pagbatayan, ania koma daytoy?” wenno “Ania dagiti pagbatayan a masarakam ditoy a mangtulong kenka nga agtungpal iti linteg ti kinadalus iti dayaw?” Mabalin pay nga irebyu dagiti miembro ti klase daytoy a benneg iti Para iti Pigsa dagiti Agtutubo, a mangsapsapul kadagiti bendision ti panagtungpal iti linteg ti kinadalus iti dayaw ken dagiti bunga ti panagsukir iti daytoy a linteg. Kasano a maigiddiat dagitoy a pagbatayan iti no ania ti isuro ti lubong? Kasano nga apektuan dagitoy a pagbatayan ti wagas a panagpanunottayo maipapan iti linteg ti kinadalus iti dayaw? Mabalin a pagimbagan ti klasem babaen ti panangbasa iti palawag ni Sister Wendy Nelson iti “Dagiti Nainayon a Resources” bayat ti panangsungbatda kadagitoy a saludsod.

• No dadduma nalaka a patien a saan nga apektuan dagiti pilitayo dagiti dadduma—ta pribado dagiti basoltayo. Ania ti insuro ni Alma ken ni Corianton iti Alma 39:11–12 maipapan iti epekto dagiti pilina? Awisem dagiti miembro ti klase a mangutob no asino ti mabalin a maapektuan dagiti pili nga ar-aramidenda, agpada a nasayaat ken dakes. Mabalinda pay nga ibinglay no kasano a nakatulong kadakuada dagiti tignay ken pagwadan dagiti dadduma iti panagpilida iti umno.

Alma 40–42

Ti Pannubbot ni Jesucristo ti mamagbalin a posible ti plano ti pannakasubbot.

• Insuro ni Alma ken ni Corianton dagiti kinapudno a nasken a maawatantayo amin, agraman dagiti kinapudno maipapan iti panggep ti biag, ti lubong ti espiritu, panangungar, ken panangukom. Ibilang ti panangpili iti maysa kadagiti pannursuro ni Alma ken panangted kadagiti miembro ti klase iti dua a minuto nga agsukisok iti Alma 40–42 (saggaysa wenno kada paris) ket isuratda kas iti kaadu dagiti kinapudno maipapan iti topiko a masarakanda. Kalpasanna mabalin nga ibinglay dagiti miembro ti klase iti tunggal maysa wenno iti klase no ania ti nasarakanda. Mabalinda nga uliten daytoy a proseso para iti dadduma pay a topiko no ipalubos ti oras. Apay a napateg dagitoy a naipangruna a kinapudno tapno maawatan ti anak ni Alma a ni Corianton?

• Dagiti panangiladawan ni Alma iti kasasaad dagiti kararua kalpasan daytoy a biag ket makaawis iti panunot dagiti miembro ti klase ti kinapateg ti yaay ti Mangisalakan ken ti panangibabawi kadagiti basbasoltayo iti daytoy a biag. Mabalinmo nga isurat ti Nalinteg (Agbabawi) ken Nadangkes (Saan nga Agbabawi) iti pisarra ket awisem dagiti miembro ti klase nga agsukisok iti Alma 40:11–26 ket ilista iti pisarra dagiti balikas wenno ragup ti balikas nga inusar ni Alma a mangiladawan iti kasasaad ti tunggal maysa kadagitoy a grupo ti tattao kalpasan ti ipapatayda. Kasano a maparegtanatayo nga agbabawi dagitoy a pannursuro? Para iti ad-adu pay maipapan no ania ti mapasamak iti lubong ti espiritu, kitaen iti 1 Pedro 3:18–20; 4:6 ken Doktrina ken Katulagan 138:29–37.

• Ania ti sumangbay iti panunot dagiti miembro ti klasem no mangngeganda dagiti balikas a “naisubli” wenno “pannakaisubli”? Awisem ida a mangsukisok iti Alma 41 no kasano nga inusar ni Alma dagitoy a balikas. Ania ti kayatna a sawen kadagitoy? Anianto ti maisubli kadatayo? Apay a mabalin a makatulong a makita ti plano ti Nailangitan nga Ama kas maysa a “plano ti pannakaisubli”? (bersikulo 2).

• Mabalin nga ibinglay ti sumagmamano a miembro ti klasem ti saludsod a kasla adda iti panunot ni Corianton—nainkalintegan wenno nasayaat kadi a dusaen ti manangayat a Dios dagiti annakna? (kitaen iti Alma 42:1). Nalabit a mabalinmo nga idawat kadagiti miembro ti klase nga utobenda no kasano a sungbatanda daytoy a saludsod ket agsukisok para kadagiti sungbat iti Alma 42:7–26.

• No mariknam a maitutop daytoy, mabalin a pagimbagan dagiti miembro ti klasem manipud iti panangsapul iti maysa a bersikulo iti Alma 42 a mailadawanda iti simple a drowing wenno simbolo a mangilawlawag no apay a kasapulantayo ti Pannubbot ti Mangisalakan. Mabalin nga ibinglay dagiti miembro ti klasem no ania ti indrowingda, ket mabalin a padasen ti dadduma pay iti klase a mangsapul iti bersikulo a mangibagi iti daytoy. Kalpasanna mabalinda nga ilawlawag no ania ti nasursuroda maipapan iti kinapateg ti sakripisio ti Mangisalakan.

  

  Makaawattayo iti pammaneknek maipapan ken ni Jesucristo kas Mangisalakantayo.

Dagiti Nainayon a Resources

Dakkel ti pateg dagiti kararuatayo.

Insuro ni Sister Joy D. Jones:

“Bay-andak a mangilawlawag iti kasapulan a panamaggidiat iti dua a napapateg a balikas: pateg ken pannakaikari. Saanda nga agpada. Ti naespirituan a pateg kayatna a sawen ti mangipateg iti bagbagitayo iti wagas a panangipateg ti Nailangitan nga Ama kadatayo, saan nga iti panangipateg ti lubong kadatayo. Naikeddeng ti pategtayo sakbay nga immaytayo ditoy daga. ‘Awan patinggana ti ayat ti Dios ket agibturto daytoy iti agnanayon.’

“Iti sabali a bangir, magun-od ti pannakaikari babaen ti panagtungpal. No agbasoltayo, bumassit ti pategtayo, ngem ditayo kaano man maawanan iti pateg! Agtultuloytayo nga agbabawi ken agkagumaan nga agbalin a kas ken ni Jesus nga agtalinaed ti pategtayo. Kas iti insuro ni Presidente Brigham Young: ‘Ti kabassitan, ti kababaan iti klase nga espiritu nga adda itan iti daga … ket ti pateg dagiti lubong.’ Ania man dayta, kanayon nga adda pategtayo iti imatang ti Nailangitan nga Amatayo” (“Value beyond Measure,” Ensign wenno Liahona, Nob. 2017, 14).

Ti pannirigan ti lubong iti kinasinged ket saan a maipada iti pannirigan ti Dios.

Inggidiat ni Wendy Nelson no kasano ti pannirigan ti lubong kadagiti relasion a seksual—“nailubongan a seks”—iti inawaganna iti “intimasia iti kallaysa nga inordenan ti Dios”:

“Iti nailubongan a seks, maaramid ti ania man a banag. Iti intimasia iti kallaysa, adda napalaus a panagannad tapno maliklikan ti ania man a banag ken amin a banag—manipud iti panagsasao agingga iti musika agingga iti pelikula—a mangpasakit iti Espiritu, ti espiritum, wenno ti espiritu ti asawam.

“Idinto a naderrep ti nailubongan a seks ken mangpatay iti ayat, ti intimasia iti kallaysa ti mangparnuay iti ad-adu pay nga ayat.

“Ti nailubongan a seks ti mangibaba iti dayaw dagiti lallaki ken babbai ken dagiti bagida, idinto ta ti intimasia iti kallaysa ti mangdayaw kadagiti lallaki ken babbai ken mangrambak iti bagi kas maysa kadagiti dadakkel a gunggona ti mortal a biag.

“Iti nailubongan a seks, marikna dagiti indibidual ti pannakausar, pannakaabuso, ken kangrunaanna naledleddang. Iti intimasia iti kallaysa, marikna dagiti assawa nga ad-adda a nakaykaysa ken maay-ayatda, ad-adda a mataraonan ken maawatan ida.

“Ti nailubongan a seks ti mangperdi ken iti kamaudianan mangdadael kadagiti relasion. Ti intimasia iti kallaysa ti mangpatibker kadagiti panagdenna dagiti agassawa. Daytoy ti mangsuporta, mangpaimbag, ken mangpasagrado iti biag dagiti agassawa ken ti panagdennada kas agassawa. …

“Ti nailubongan a seks ket agbalin a naan-anay a nalabes a pannakaseknan gapu ta di kaano man ipatungpal daytoy dagiti karina. Ti intimasia iti ti kallaysa nga inordenan ti Dios ket nagloriaan ken agtultuloyto iti agnanayon para kadagiti agassawa nga agtungtungpal iti katulagan” (“Love and Marriage” [worldwide devotional, Ene. 8, 2017], broadcasts.ChurchofJesusChrist.org).

Panangpadur-as iti Panangisurotayo

Agsagana iti nasapsapa. Kabayatan ti panangutobmo no kasano a bendisionanto dagiti pagbatayan ti ebanghelio nga isursurom dagiti miembro ti klasem, umayto dagiti ideya ken impresion iti unos ti inaldaw a panagbiagmo—kabayatan ti panagbiahem a mapan iti trabahom, panangaramidmo kadagiti trabaho iti balay, wenno pannakipulapolmo iti kapamilia wenno gagayyem. Saanmo a panunoten ti naespirituan a panagsagana a kas maysa a banag a pagbubosam iti oras no di ketdi kas maysa a banag a kanayonmo nga ar-aramiden” (Panangisuro iti Wagas ti Mangisalakan, 12).