lalaki nga agkarkararag

Panangiladawan ni Joshua Dennis

Hulio 20–26

Alma 36–38

Kumitaka iti Dios ken Agbiag

Bayat ti panagsaganam a mangisuro, laglagipem a nalabit nga addaan napapateg a padas dagiti miembro ti klase iti Alma 36–38. Ania ti maaramidmo a mangpadur-as kadagita a padas?

Isuratmo Dagiti Impresionmo

icon iti panagbibinninglay

Yawis ti Panagbibinninglay

Maysa a wagas a pangallukoy kadagiti miembro ti klase a mangibinglay no ania ti nasursuroda kadagiti nasantuan a kasuratan ket ti panangbingay iti klase iti tallo a grupo ket dutokan ti tunggal grupo iti maysa a kapitulo manipud iti Alma 36–38. Awisem ti tunggal grupo a mangsapul ken mangibinglay iti makaparegta a bersikulo manipud iti kapituloda.

icon iti panangisuro

Isuro ti Doktrina

Alma 36

Mabalin a mayanaktayo iti Dios no agpakumbaba ken agbabawitayo.

• Mabalin a masdaaw ti sumagmamano a miembro ti klasem no apay nga awananda idi iti makasagid rikna a padas iti pannakapasurot kas iti padas ni Alma. Mabalin a makatulong kadakuada no ibinglaymo ti insuro ni Elder David A. Bednar: “Para iti adu kadatayo, ti pannakapasurot [conversion] ket agtultuloy a proseso ken saan a maminsan laeng pasamak nga agbanag manipud iti nabileg wenno makasagid rikna a padas” (“Converted unto the Lord,” Ensign wenno Liahona, Nob. 2012, 107–8). Nupay saan a gagangay ti sumagmamano a banag maipapan iti padas iti pannakapasurot ni Alma, ti padasna ti mangisuro kadagiti prinsipio a kasapulantayo amin tapno mayaplikar iti bukodtayo nga agtultuloy a pannakapasurot wenno kumbersion. Mabalinmo nga awisen dagiti miembro ti klase a mangsukisok iti Alma 36 tapno mangsapul kadagitoy a prinsipio ken mangilista kadagitoy iti pisarra. Ania pay ti nakatulong kadatayo nga agbalin nga ad-adda a napasurot iti ebanghelio ni Jesucristo?

• Inusar ni Alma ti ragup ti balikas a “nayanak iti Dios” a mangiladawan iti pannakapasurotna. Tapno matulongan dagiti miembro ti klase a maawatanda daytoy a konsepto, mabalinmo nga awisen ida a mangbasa kadagiti sumaganad a bersikulo a saggaysa wenno kada paris, a mangsapsapul no ania ti kayat a sawen ti mayanak iti Dios: 1 Juan 4:7; Mosiah 5:7; 27:25–26; and Alma 5:14; 22:15. Paibinglay kadagiti miembro ti klase no ania ti nasursuroda. Kalpasanna mabalinda a sukisoken iti Alma 36, a mangsapsapul kadagiti sungbat iti daytoy a saludsod: Kasano ti rikna ken tignay dagiti tao no nayanakda iti Dios? Tapno matulongan dagiti miembro ti klase a mangutob no kasano ti pannakayanakda iti Dios, mabalinmo nga ibinglay ti palawag ni Presidente Ezra Taft Benson a masarakan iti “Dagiti Nainayon a Resources.”

Alma 37

Nataginayon dagiti nasantuan a kasuratan “para iti nainsiriban a panggep.”

• Nalabit a ti panagadal kadagiti balikas ni Alma bayat ti panangtedna kadagiti sagrado a kasuratan iti anakna a ni Helaman ket makatulong kadagiti miembro ti klase a mangibinglay no kasano a nariknada ti bileg dagiti nasantuan a kasuratan iti biagda. Allukoyen ida a mangrebyu iti Alma 37 tapno mangsapul kadagiti mensahe nga inted ni Alma ken ni Helaman maipapan kadagiti nasantuan a kasuratan (kitaen nangnangruna kadagiti bersikulo 1–19 ken 43–47). Kasano a maipakitatayo a sagrado kadatayo dagiti nasantuan a kasuratan? Kasano a maisurotayo, kas ken ni Alma, dagiti patpatgentayo a “salimetmetanda amin dagitoy a banag a sagrado”? (Alma 37:2). Kasano a dagiti nasantuan a kasuratan ket “mangipakita iti bileg ti [Dios]” kadatayo? (Alma 37:14).

• Maysa a wagas a pakasursuruan maipapan kadagiti bendision ti kaadda dagiti nasantuan a kasuratan ket ti panangadal no ania ti kinuna ni Alma iti Alma 37 maipapan kadagiti sagrado a kasuratan ken dadduma pay a banag nga intalekna ken ni Helaman. Mabalinmo ti mangilista iti pisarra dagiti sagrado a banag: dagiti pinanid ni Nephi ken dagiti pinanid a gambang (Alma 37:2–20), dagiti duapulo-ket-uppat a pinanid ni Ether ken dagiti parayulog [interpreter] (Alma 37:21–37), ken ti Liahona (Alma 37:38–47). Mabalin a basaen dagiti miembro ti klase dagitoy a bersikulo tapno masursuro ti maipapan iti tunggal maysa kadagitoy a banag. Iti ania a wagwagas a mabalin a palawaen dagiti nasantuan a kasuratan dagiti lagiptayo? (kitaen iti Alma 37:8). Ania ti masursurotayo manipud kadagiti balikas ni Alma maipapan kadagiti bendision ti kaadda dagiti nasantuan a kasuratan iti biagtayo iti agdama?

  babai nga agbasbasa kadagiti nasantuan a kasuratan

  Suruandatayo dagiti nasantuan a kasuratan no kasano a sumurot iti Dios.

Alma 37:6–7, 41–42

“Babaen dagiti babassit ken gagangay a banag agbalindanto a dadakkel a banag.”

• Tapno maisuro maipapan kadagiti “babassit ken gagangay a banag” iti aramid ti Dios, nangted ni Alma iti dua a pagarigan: dagiti nasantuan a kasuratan ken ti Liahona (kitaen iti Alma 37:6–7, 41–42; kitaen met iti 1 Nephi 17:41). Kalpasan ti panangrebyu kadagitoy a pagarigan, nalabit a mabalin nga ibinglay dagiti miembro ti klase dagiti pagarigan manipud iti bukodda a biag dagiti babassit ken gagangay a banag iti aramid ti Dios. Mabalin a kayatmo a kasarita ti maysa wenno dua a miembro ti klase a nasapsapa ket paitugotmo kadakuada ti maysa a bassit a banag iti klase ken nakaisangbay kadagiti dadakkel a banag iti biagda. Mabalinmo nga ibinglay ti palawag manipud ken ni Presidente Dallin H. Oaks iti “Dagiti Nainayon a Resources.” Tapno matulongan a mayaplikar dagiti miembro ti klase daytoy a prinsipio, mabalinmo a damagen dagiti saludsod kas iti sumaganad: Apay a no dadduma mapaaytayo nga aramiden dagiti babassit ken gagangay a banag? Kasano a maparegtatayo ti bagbagitayo ken dagiti pamiliatayo a mangparmek iti daytoy nga ayo?

Alma 37:38–47

Dagiti balikas ti Dios ti makaiwanwan kadatayo iti inaldaw.

• Ti panangidilig iti balikas ti Dios iti Liahona ti makaparegta kadagiti miembro ti klase nga agbalin a napaspasnek ken agtultuloy iti panagbasa kadagiti nasantuan a kasuratan. Tapno maiwanwan ti panaglilinnawag maipapan iti daytoy, mabalin nga awisem dagiti miembro ti klase a mangbasa iti Alma 37:38–47 iti kada paris, a mangsapsapul kadagiti pagpadaan ti Liahona ken ti balikas ti Dios. Mabalinmo a kariten ida a mangsapul iti kapada iti tunggal bersikulo. Kalpasanna mabalinmo nga isurat ti tunggal numero ti bersikulo iti pisarra ket paisuratmo kadagiti miembro ti klase dagiti pagpapadaan a nasarakanda a sumaruno kadagiti numero. Ania ti isingasing daytoy a pagpapadaan maipapan no ania ti nasken a pamay-antayo iti panagadaltayo iti nasantuan a kasuratan?

Alma 38

Ti panangibinglaytayo kadagiti pammaneknektayo maipapan ken ni Jesucristo ket makapapigsa kadagiti ay-ayatentayo.

• Dagit balikas ni Alma iti anakna a ni Shiblon ti mangted iti napintas a pagwadan no kasano a papigsaen ken allukoyentayo dagiti ay-ayatentayo iti panagbiag iti ebanghelio. Nalabit a mabalin a basaen dagiti miembro ti klase daytoy a kapitulo ket ilasin no kasano a pinapigsa ni Alma ni Shiblon. Alma 38 ket ababa—mabalinmo nga ikeddeng a basaen daytoy kas maysa a klase. Kalpasanna, mabalin nga ibinglay dagiti miembro ti klase dagiti binatog a masarakanda a napateg wenno nangted kadakuada kadagiti kapanunotan para iti panangpapigsa kadagiti bukodda a miembro ti pamilia ken gagayyem.

icon iti panagsursuro

Yallukoy ti Panagsursuro iti Pagtaengan

Napanunot kadin dagiti miembro ti klase no kasano ti mangbalakad iti maysa nga ipatpateg a nakaaramid iti nadagsen a biddut? Ilawlawag a makitadanto a makatulong dagiti nalawag a pannakaammo ken pannakaawat [insights] iti Alma 39–42.

resources icon

Dagiti Nainayon a Resources

Ti pannakapasurot [conversion] ket maipada iti baro a pannakayanak.

Insuro ni Presidente Ezra Taft Benson: “No naipasangotayon iti daytoy naindaklan a panagbalbaliw, a naisangbay babaen laeng ti pammati ken ni Jesucristo ken babaen ti panagtrababo ti Espiritu kadatayo, kasla nagbalintayon a baro a parsua. Ngarud, maipada ti panagbalbaliw iti baro a pannakayanak. Rinibribu kadakayo ti nakapadasen iti daytoy a panagbalbaliw. Natallikudamon dagiti biag ti basol, no dadduma nauneg ken nadagsen a basol, ken babaen ti panangaramat iti dara ni Cristo iti biagmo, ket nagbalin a nadalus. Awanen ti ayom nga agsubli kadagiti daan a wagasmo. Kinapudnona maysaka a baro a tao. Daytoy ti kayat a sawen ti panagbalbaliw ti puso” (“A Mighty Change of Heart,” Ensign, Okt. 1989, 4).

Dagiti babassit ken gagangay a banag.

Insuro ni Presidente Dallin H. Oaks:

“Naipalagip kaniak ti bileg dagiti babassit ken gagangay a banag babaen ti maysa a banag a nakitak iti pannagnak iti bigat. … Ti napuskol ken natibker a sementado a pangnaan [ket] agbirbirrin. Daytoy kadi ti resulta ti maysa a dakkel ken napigsa a pannakapuersa? Saan, daytoy a panagbirri ket gapu ti nabayag, bassit a panagdakkel ti maysa kadagiti ramut nga agkarkarayam manipud iti kaabay a kayo. …

“Ngarud daytoy ti nabileg nga epekto dagiti babassit ken gagangay a banag a naisuro kadatayo kadagiti nasantuan a kasuratan ken dagiti sibibiag a propeta. Ibilang ti panagadal iti nasantuan a kasuratan a naisuron kadatayo nga aramatentayo iti inaldaw a panagbiagtayo. Wenno ibilang dagiti bukod a kararag ken nakaparintumeng a panagkararag ti sangapamiliaan a masansan nga ar-aramiden dagiti napudno a Santo iti Ud-udina nga Aldaw. … Nupay kasla babassit ken gagangay ti tunggal maysa kadagitoy nga ar-aramiden, iti agangay agresultada iti nabileg ken naespirituan a pannakapareta ken panagdur-as. Mapasamak daytoy gapu ta tunggal maysa kadagitoy a babassit ken gagangay a banag ket mangawis iti panangkadkadua ti Espiritu Santo, ti Agpampaneknek a manglawlawag kadatayo ken mangtarabay kadatayo iti kinapudno” (“Small and Simple Things,” Ensign wenno Liahona, Mayo 2018, 90).

Panangpadur-as iti Panangisurotayo

Awisem dagiti agad-adal nga agsisinnuroda. No mangted dagiti miembro ti klase iti pammaneknek wenno mangibinglay kadagiti nalawag a pannakaammo ken pannakaawat [insights], mabalin a kabaelanda a tulongan wenno paregtaen ti sabali pay a miembro ti klase iti wagas a mabalin a saanda a kabaelan nga aramiden. (Kitaen iti Panangisuro iti Wagas ti Mangisalakan, 30.)