“Hulio 13–19. Alma 32–35: ‘Imulayo Daytoy a Balikas iti Puspusoyo,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Hulio 13–19. Alma 32–35,” Umaykayo, Sumurot Kaniak—Para iti Sunday School: 2020
Hulio 13–19
Alma 32:25
“Imulayo Daytoy a Balikas iti Puspusoyo”
Saan a nasken no namin-anon a binasam ti Alma 32–35, basaem manen daytoy bayat ti panagsaganam a mangisuro. Agbalinka a nakasagana kadagiti baro a nalawag a pannakaammo ken pannakaawat [insights] manipud iti Espiritu.
Isuratmo Dagiti Impresionmo
Yawis ti Panagbibinninglay
Tapno matulongam dagiti miembro ti klase a mangibinglay no ania ti nasursuroda manipud iti panangbasa iti Alma 32–35 iti pagtaengan, mabalinmo nga ikkan ida iti sumagmamano a minuto a mangrebyu kadagitoy a kapitulo ken isurat iti pisarra dagiti ania man a tema wenno topiko a nadlawda. Kas maysa a klase, paglilinnawagan no apay a napateg dagitoy a tema wenno topiko.
Isuro ti Doktrina
Mapilitayo ti agbalin a napakumbaba.
-
Tapno maiturong ti panaglilinnawag maipapan iti panagpakumbaba kas naisuro iti Alma 32:1–16, mabalinmo a rugian babaen ti panangawis kadagiti miembro ti klase a mangibagada kadagiti padas a mabalin a mangpakumbaba iti maysa a tao (Alma 32:2–5 ti mangted iti maysa a pagarigan). Mabalin a sumagmamano a miembro ti klase ti agtallugod a mangibinglay kadagiti bukodda a padas iti panangsursuro iti panagpakumbaba. Kasano a ti panagbalin a “managpakumbaba” (Alma 32:12) ket maysa a bendision? Dagiti palawag maipapan iti panagpakumbaba iti “Dagiti Nainayon a Resources” ket mabalin a makatulong a mangpapintas iti maysa a panaglilinnawag. Mabalinyo pay a basaen ti Doktrina ken Katulagan 112:10 wenno kansionen ti maysa a kanta wenno himno maipapan iti panagpakumbaba kas iti “Be Thou Humble” (Hymns, no. 130), kas maysa a klase.
Aramatentayo ti pammati ken ni Jesucristo babaen ti panangimula ken panangtaraon iti balikasna iti puspusotayo.
-
No dadduma panunotentayo ti agdaydayaw laeng kas paset dagiti banag nga ar-aramidentayo kadagiti pormal a setting kas iti maysa a pasdek ti simbaan (kitaen iti Alma 32:5, 9, 11), ngem nasaksakup ti panangilawlawag ni Alma iti panagdayaw. Kas pagarigan, insurona a ti panangpadur-as ken panangaramat iti pammati ken ni Jesucristo ket napateg a kita ti panagdayaw a mabalin a maaramid iti ruar ti pormal a setting. Tapno matulongan ti klasem a maawatanda daytoy a prinsipio, mabalinmo ti mangidrowing iti ladawan ti maysa a bukel ken maysa a kayo iti pisarra ket paglilinnawagan dagiti saludsod kas iti sumaganad: Ania ti ibagi ti bukel? (kitaen iti Alma 32:28; 33:22–23). Kasano a maimulatayo ti bukel—wenno pammaneknek maipapan ken ni Jesucristo ken ti Pannubbotna—iti puspusotayo ken taraonan daytoy? (kitaen iti Alma 32:36–43; 33). Ania dagiti padas a maibinglaytayo a dagiti panagkagumaantayo a mangsurot iti Mangisalakan ket nangyeg iti napateg a bunga? Kasano a makaimpluensia dagiti pannursuro ni Alma iti wagas a panagdayawtayo iti Nailangitan nga Ama ken ni Jesucristo?
-
Ti “pamadasan” nga inladawan ni Alma a makatulong kadagiti Zoramite a mangpatibker iti pammatida ken ni Jesucristo ket makatulong met kadatayo a mangsursuro a pudno dagiti dadduma pay a pagbatayan ti ebanghelio. Tapno matulongan a maawatan ti klase ti pamadasan ni Alma, mabalinmo nga isarita ti maipapan iti pamadasan. Mabalin nga adda maysa a tao iti klase a nakaaramiden iti pamadasan idi ket makatulong iti daytoy a panangilawlawag. Ania ti panggep ti maysa a pamadasan? Kasano a maipada ti maysa a pamadasan iti inyawis ni Alma kadagiti tao nga aramidenda iti Alma 32:26–36? Nalabit a mabalin ti mangibinglay dagiti miembro ti klase iti nadumaduma a wagas a “nakapadasanda” iti balikas ti Dios. Kasano a naammuanda a “nasayaat ti balikas [ti Dios]”? (Alma 32:28).
-
Ania ti mabalin a sawen ni Alma iti maysa a tao nga agtarigagay a manggun-od wenno mangpapigsa iti pammaneknek maipapan ken ni Jesucristo? Tapno masukisok daytoy a saludsod, mabalinmo a bingayen ti klase iti dua a grupo. Mabalin a basaen ti maysa a grupo ti Alma 32:26–36 tapno mangikeddeng no ania ti mabalin a sawen ni Alma iti maysa a tao a mangpadpadas a manggun-od iti pammaneknek, ken mabalin a basaen ti sabali pay a grupo ti Alma 32:36–43 tapno mangikeddeng no ania ti mabalin a sawenna iti maysa a tao a kimmapsuten ti pammaneknekna. Kalpasanna mabalin nga agsinnublat ti maysa a tao manipud iti tunggal grupo iti panangibagi ken ni Alma ken panangyakem no kasano a matulongan ti maysa a tao a manggun-od wenno mangpapigsa iti maysa a pammaneknek.
Alma 31:13–23; 33:2–11; 34:17–29
Madayawtayo ti Dios iti kararag, iti ania man a kanito ken iti sadino man a lugar.
-
Mabalinmo a tulongan ti klase a pagdasigen dagiti pannursuro da Alma ken Amulek maipapan iti kararag ken panangdayaw kadagiti palso a kapanunotan dagiti Zoramite. Mabalin nga irebyu dagiti miembro ti klase ti Alma 31:13–23 ket ilista iti pisarra no ania ti pinati dagiti Zoramite maipapan iti kararag ken panagdayaw. Kalpasanna mabalinda a sapulen dagiti kinapudno iti Alma 33:2–11 ken 34:17–29 a maidasig kadagitoy a kannawidan. Ania ti isuro kadatayo dagitoy a bersikulo maipapan no kasano a mapasayaattayo dagiti kararagtayo ken ti panagdayawtayo?
-
Mabalinmo a yallukoy ti panaglilinnawag maipapan iti kararag babaen ti panangisurat kadagiti balikas kas iti Asino? Ania? Kaano? Sadino? Apay? ken Kasano? iti pisarra. Mabalin a sukisoken dagiti miembro ti klase ti Alma 33:2–11 ken 34:17–29 tapno mangsapul kadagiti sungbat kadagitoy a saludsod maipanggep iti kararag. Kas pagarigan, mabalinda a sungbatan dagiti saludsod kas kadagitoy: Sadino ti mabalin a pagkararagantayo? Ania ti mabalin nga ikararagantayo? Mabalin pay a masarakanda dagiti sungbat kadagiti balikas ti maysa a himno maipapan iti kararag, kas iti “Did You Think to Pray?” wenno “Sweet Hour of Prayer” (Hymns, nos. 140, 142). Kasano a mapasayaattayo dagiti kararagtayo?
Ti pangsubbot a sakripisio ti Mangisalakan ket “agnanayon ken awan patinggana.”
-
Inusar ni Amulek ti balikas nga “agnanayon” ken “awan patinggana” iti adu a gundaway a mangiladawan iti sakripisio nga inaramid ni Jesus a mangsubbot kadagiti basbasoltayo. Mabalinmo nga awisen dagiti miembro ti klase a mangsapul kadagitoy a balikas iti Alma 34:9–14 ket kalpasanna sapulen dagitoy iti maysa a diksionario. Iti ania a wagas nga agnanayon ken awan patinggana ti sakripisio ti Mangisalakan? (kitaen iti Hebreo 10:10; 2 Nephi 9:21; Mosiah 3:13). Maibatay iti Alma 34:15–17, ania ti nasken nga aramidentayo tapno umawat kadagiti bendision ti sakripisio ti Mangisalakan? Ania ti kayat a sawen ti “mangaramat iti pammatiyo iti panagbabawi”? (Alma 34:17).
“Saanyo nga itantan ti aldaw ti panagbabawiyo.”
-
Ti analohia kas iti sumaganad ket makatulong kadagiti miembro ti klase a mangutob kadagiti pagpeggadan ti panangitantan iti panagbabawitayo: awisen ida a mangipapan a nakaawatda iti maysa nga imbitasion a makiraman iti maysa a pasken nga agkasapulan kadagiti tawen ti panagsanay ken panagsagana, kas iti maysa a salisal iti Olympic wenno pabuya iti musika (mangpili iti maysa a banag a napateg iti klasem), ngem maangayto daytoy a pasken iti kabigatanna. Paglilinnawagan iti klase no apay a nalabit a saanda nga agballigi iti pasken uray no bubosenda ti nabati pay nga oras iti panagsagana ita nga aldaw. Kasano a mainaig daytoy a pagarigan kadagiti pammallaag ni Amulek iti Alma 34:32–35? Apay a mabalin a napeggad ti panangitantan kadagiti panagkagumaantayo nga agbabawi ken agbalbaliw? Awisem dagiti miembro ti klase a mangutob no ania ti mabalinda nga aramiden tapno “agsagana para iti agnanayon” (bersikulo 33) ken agplano a mangaramid iti daytoy a saan nga itantan.
Yallukoy ti Panagsursuro iti Pagtaengan
Tapno maparegta dagiti miembro ti klase a mangbasa iti Alma 36–38 iti daytoy umay a lawas, mabalinmo nga ilawlawag a ni Alma “nagladingit gapu iti kinamanangbasol dagiti taona,” isu nga inummongna dagiti annakna a lallaki ket insurona kadakuada “maipanggep kadagiti banag a maipapan iti kinalinteg” (Alma 35:15–16). Dagiti sumaruno a sumagmamano a kapitulo ti Alma ket mangted iti pakaammuan no ania ti nangparegta ken ni Alma nga isuro kadagiti annakna a lallaki.
Dagiti Nainayon a Resources
Ania ti kayat a sawen ti agpakumbaba?
“Ti agpakumbaba ket mangbigbig a siyayaman iti panagpannuraymo iti Apo—tapno maawatan nga agtultuloy a kasapulam ti tulongna. … Saan daytoy a tanda ti kinakapsut, kinasadut, wenno panagbuteng; daytoy ti panangipakita nga ammom no sadino ti pagsadagan ti pudno a pigsam” (Napudno iti Pammati [2004], 86).
Inlawlawag ni Elder Quentin L. Cook: “No talaga nga utobentayo ti Dios nga Ama ken ni Cristo nga Anak, no asinoda, ken no ania ti naipatungpalda a mangipaay kadatayo, daytoy ti mangpunno kadatayo iti panagraem, panagsiddaaw, panagyaman, ken panagpakumbaba. … Iraman pay ti panagpakumbaba ti panagbalin a managyaman kadagiti nawadwad a paraburtayo ken nadiosan a tulong. Ti panagpakumbaba ket saan a dakkel a balligi a pakabigbigan wenno uray pay panagparmek iti maysa a dakkel a karit. Daytoy ti tanda ti naespirituan a panagdur-as. Daytoy ti kaadda iti naulimek a panagtalek nga iti inaldaw ken iti inoras makapagpannuraytayo iti Apo, makapagserbi Kenkuana, ken makaipatungpal kadagiti panggepna” (“The Eternal Everyday,” Ensign wenno Liahona, Nob. 2017, 52, 54).
Dagiti nasantuan a kasuratan maipapan iti pammati.
Panangpadur-as iti Panangisurotayo
Ipamaysa wenno agpokus kadagiti nasantuan a kasuratan. Idinto ta adu dagiti pangsuplemento a pagadawan wenno resources a mabalin a mangpapintas iti maysa a pananglilinnawag, laglagipem a dagiti nasantuan a kasuratan ti paggapuan ti doktrina. Tulongam dagiti miembro a mangsapul kadagiti kinapudno kadagiti nasantuan a kasuratan. (Kitaen iti Panangisuro iti Wagas ti Mangisalakan, 21.)