Ipakita ti Amin a Banag nga Adda Dios (da Alma ken Korihor), ni Walter Rane

Hulio 6–12

Alma 30–31

“Ti Saguday ti Balikas ti Dios”

Kalpasan ti panangbasam iti Alma 30–31 ken panagdawat iti inspirasion para iti bukodmo a biag, dumngegka kadagiti pannignay maipapan no ania dagiti mensahe a mangparabur kadagiti miembro ti klasem.

Isuratmo Dagiti Impresionmo

Yawis ti Panagbibinninglay

No mariknam nga agkedked dagiti miembro ti klase a mangibinglay, mabalinmo nga ikkan ida iti sumagmamano a minuto a mangrebyu iti Alma 30–31 wenno iti ania man a naisuratda iti panagadalda iti pagtaengan iti daytoy a lawas. Kalpasanna mabalinda nga ibinglay iti kapareha wenno iti klase ti maysa a nabileg a mensahe a nasarakanda.

Isuro ti Doktrina

Alma 30:6–31

Padasen ti kabusor nga allilawennatayo iti palso a doktrina.

• Bayat ti panangibilangmo kadagiti kasapulan ti klasem, makatulong kadi a maawatanda ti paggidiatan dagiti kinapudno ti ebanghelio ken dagiti kinapalso ni Satanas no agusarka iti banag nga adalen [object lesson]? No kasta, mabalinmo ti mangipakita kadakuada iti sumagmamano a sinsinan a banag, kas iti ay-ayam a kuarta wenno ay-ayam a taraon, a kagiddan ti agpaypayso a kuarta wenno agpaypayso a taraon. Kasano a maibagatayo a saan nga agpaypayso dagiti sinsinan a banag? Kalpasanna mabalin ti klase a mangilasin kadagiti palso a pannursuro ni Korihor iti Alma 30:6–31. Ania ti mabalin a manggargari maipapan kadagitoy a pannursuro? Ania ti idiaya kadatayo dagiti kinapudno ti ebanghelio a saan a maidiaya dagiti palso a pannursuro ni Satanas? Mangawis kadagiti miembro ti klase a mangibinglay no ania ti nakatulong ken ni Alma tapno mailasinna ti pudno a doktrina ken palso a doktrina (kitaen iti Alma 30:32–54). Ania dagiti dadduma pay a wagas a natakuatan dagiti miembro ti klase a makatulong?

• Tapno matulongan a masursuruan dagiti miembro ti klase no kasano a saluadanda dagiti bagida manipud kadagiti epekto ti palso a doktrina, mabalinmo nga irebyu ti pannakailadawan ti anti-Cristo iti balabala iti daytoy a lawas iti Umaykayo, Sumurot Kaniak—para kadagiti Indibidual ken Pamilia. Ania kadagiti bersikulo iti Alma 30:6–31 ti mangipakita a maibagay ken ni Korihor daytoy a pannakailadawan? Ania kadagiti pannursurona ti maipada kadagiti palso a pannursuro iti panawentayo? (kitaen iti Alma 30:12–18, 23–28). Kasano a maliklikantayo ti pannnakaallilaw kadagitoy a pannursuro?

Alma 30:39–46

Ipaneknek ti amin a banag maipapan iti Dios.

• Gapu ta agbibiagtayo iti lubong a maipada idi ken ni Alma, a nangisuruan ti sumagmamano a tao nga awan ti Dios, mabalin a makatulong ti pammaneknek ni Alma iti Alma 30:39–44 kadagiti miembro ti klasem. Mabalinmo nga awisen ida a mangbasa kadagitoy a bersikulo ken mangilista iti pisarra kadagiti kinapudno ken pakakitaan nga inted ni Alma a mangipaneknek nga adda Dios. Ania dagiti dadduma pay a pammaneknektayo a sibibiag ti Dios? Kas paset ti panaglilinnawag, ibilangmo ti panagibinglay iti palawag ni Presidente M. Russell Ballard iti “Dagiti Nainayon a Resources.” Mabalinmo pay ti mangawis iti maysa a tao nga umay a nakasagana a mangkanta iti maysa a himno maipapan iti kinasayaat ti Dios, kas iti “How Great Thou Art” (Hymns, no. 86), wenno mabalinyo a kantaen ti himno nga aggigiddan.

• Bayat ti pannakisarita ni Alma ken ni Korihor, nailasinna a ni Korihor “inwaksina ti Espiritu ti Dios ket awan ti lugarna [kenkuana]” (Alma 30:42). Ibilang ti papangidawat kadagiti miembro ti klase a mangsukisok iti Alma 30:39–46, a mangsapsapul iti dadduma pay a reperensia iti Espiritu Santo. Ania ti papel nga akmen ti Espiritu Santo iti panangipaneknek kadatayo iti kinapudno ti Dios ken ni Jesucristo? Kasano a matulongantayo dagiti tao nga addaan duadua wenno saludsod nga agkalikagum a manggun-od iti kinapudno babaen iti Espiritu Santo?

  

  Sanguen ni Korihor ni Alma, ni Robert T. Barrett

Alma 31

Addaan ti balikas ti Dios iti bileg a mangiturong kadagiti tao iti kinalinteg.

• Adda kadi dagiti miembro ti klasem a makaibinglay iti padas idi ti “saguday ti balikas ti Dios” (Alma 31:5) ket nakatulong kadakuada ken ti maysa a tao nga am-ammoda a namagbalbaliw iti biagda? Mabalin a kayatmo a kasao a nasapsapa dagiti miembro ti klase tapno makapagsaganada a mangibinglay kadagiti padasda. Allukoyem ida a mangibinglay kadagiti bersikulo manipud iti Alma 31 a mayaplikar kadagiti padasda. Mabalin a mangibinglay dagiti dadduma pay a miembro ti klase kadagiti wagas nga addaan ti balikas ti Dios iti “nabileg nga ibungana iti panunot[da]” (Alma 31:5). Mabalin a mairanud dagiti miembro manipud iti panagbasa iti dadduma pay a nasantuan a kasuratan a mangipaneknek maipapan iti bileg ti balikas ti Dios (kitaen iti “Dagiti Nainayon a Resources” para iti sumagmamano a pagarigan).

• Bayat ti panangadal dagiti miembro ti klasem iti Alma 31 daytoy a lawas, mabalin a naparegtada iti pagwadan ni Alma iti panangikararaganna dagiti Zoramite. Ibilangmo ti panagsaludsod kadakuada no ania ti nasursuroda manipud iti daytoy a kapitulo maipapan iti panagtulong kadagiti miembro ti pamilia wenno gagayyem a pimmanaw iti dana ti ebanghelio wenno mangikarkarigatan iti pammatida. Mabalinmo pay nga idawat kadakuada a mangsukisok iti Alma 31 a sangkamaysa ket ilistada iti pisarra dagiti banag a nadlawda maipapan ken ni Alma a nakatulong iti panangispalna kadagiti Zoramite. Kasano a mausartayo ti balikas ti Dios nga ad-adda pay kadagiti panagkagumaantayo a mangispal kadagiti dadduma? (Para kadagiti nainayon a nalawag a pannakaammo ken pannakaawat [insights], mabalinmo nga ibinglay ti adaw ni Elder Jeffrey R. Holland iti “Dagiti Nainayon a Resources.”)

• Ania ti masarakan dagiti miembro ti klase iti Alma 31:30–38 a makatulong kadagiti agladingit iti basbasol dagiti dadduma kas iti inaramid ni Alma?

Yallukoy ti Panagsursuro iti Pagtaengan

Saludsoden kadagiti miembro ti klase no ania a doktrina wenno pagbatayan ti ebanghelio a maisuroda a mangsuppiat kadagiti kinapalso a natakuakan ni Alma kadagiti Zoramite. Isaritam kadakuada a bayat ti panangbasada iti Alma 32–35 matakuatandanto no kasano nga inusar ni Alma ti balikas ti Dios a pangtulong kadagiti Zoramite a mangkita iti kasapulan a balbaliwan.

Dagiti Nainayon a Resources

Dagiti nasantuan a kasuratan maipapan iti bileg ti balikas ti Dios.

• 2 Timoteo 3:15–17

• Hebreo 4:12

• 1 Nephi 15:23–24

• 2 Nephi 31:20; 33:4–5, 10

• Jacob 2:8

• Helaman 3:29–30

• Joseph Smith—Mateo 1:37

Ipakita timin a banag nga adda Dios.

Insuro ni Presidente M. Russell Ballard a dagiti “agnanayon a pakakitaan” nga inted ni Alma para iti kaadda ti Dios ket “agtultuloy a mangipaneknek kadatayo iti agdama” (kitaen iti Alma 30:44):

“Kinuna dagiti astronaut a mangbuybuya iti daga manipud iti law-ang nga anian a di nakapappapati a kinapintasna ken kasla sibibiag daytoy. Insurat ti Senador iti Estados Unidos a ni Jake Garn ti padasna iti law-ang: ‘Imposible kaniak a mailadawanko ti kinapintas ti daga. Makapabitek, makapasiddaaw ken makaparegta, a naespirituan a padas a magbuya iti daga manipud iti law-ang bayat ti panagdaliasat iti tangatang iti maminduapulo-ket-lima a kaalisto ti aweng. Naimatangak pay ti kinasipnget ti law-ang ket makitak dagiti binilbilion a bituen ken galaksi a minilmilion ti kaadayona a lawagda. Kasta unay ti kadakkel ti lubong ta imposible a maawatan. Ngem naawatak ti ima ti Dios iti amin a banag. Nariknak ti kaaddana iti unos ti pito nga aldawko iti law-ang. Ammok a pinarsua ti Dios daytoy a daga ken ti lubong. … Ammok a sibibiag ti Dios ken isu ti Namarsua kadatayo amin’ (surat ken ni M. Russell Ballard, 3 Marso 1988)” (“God’s Love for His Children,” Ensign, Mayo 1988, 58).

Panangtaraon iti dadduma iti balikas ti Dios.

Insuro ni Elder Jeffrey R. Holland:

“Pudno kadi a tartaraonantayo dagiti agtutubotayo ken dagiti baro a miembrotayo iti wagas a mangtulongto kadakuada no sumangbay dagiti pakarikutan ti biag? Wenno ik-ikkantayo kadi ida iti napintas a kapanunotan—nga awan pudno a naespirituan a pategna? … Kabayatan ti narigat a panawen ti lamiis sumagmamanon a tawen ti napalabas, nadlaw ni Presidente Boyd K. Packer nga adu a bilang dagiti ugsa ti natay iti panagbisin idinto a nabsog dagiti boksitda iti garami. Iti napudno nga aramid a panangsaranay, nangted iti kasla tulong dagiti ahensia idinto a ti pudno a tulong ti kasapulan. Makauppapay ta pinakanda dagiti ugsa ngem saanda a tinaraonan ida. …

“Awan duadua a saan a nalaing ni Satanas kadagiti pannursurona; apay a nasken kadatayo? Isursurotayo man dagiti annaktayo iti pagtaengan wenno agtaktakdertayo iti sanguanan dagiti dumdumngeg iti simbaan, ditayo koma iti kaano man nga aramiden a narigat a maammuan ti pammatitayo. … Mangtedka kadagiti balakad a maibatay iti nasantuan a kasuratan. Isurom ti naipalgak a doktrina” (“A Teacher Come from God,” Ensign, Mayo 1998, 26–27).

Panangpadur-as iti Panangisurotayo

Tulongam dagiti agad-adal a mangtakuat kadagiti kinapudno para iti bagbagida. Maysa kadagiti akemmo kas maysa a mannursuro ti mangiwanwan kadakuada a mangtakuat kadagiti kinapudno iti nasantuan a kasuratan. Ad-adda a maawatan ken ipategda dagiti pagbatayan no masarakanda dagitoy a pagbatayan para iti bagbagida imbes a panangdengngegda laeng iti mannursuro a mangisarita maipapan kadagitoy.