Ikali dagiti Anti-Nephi-Lehi dagiti Armasda a Pakigubat, ni Jody Livingston

Hunio 29–Hulio 5

Alma 23–29

“Pulos a Dida Nagikay”

Bayat ti panagbasam iti Alma 23–29, laglagipem a tapno matulongam a makasursuro dagiti dadduma kadagiti kinapudno kadagitoy a kapitulo, nasken a maaddaanka mismo iti napapateg a padpadas kadagiti kinapudno.

Isuratmo Dagiti Impresionmo

Yawis ti Panagbibinninglay

Mabalinmo nga awisen dagiti miembro ti klase a mangisurat iti pisarra dagiti bersikulo a napateg kadakuada kabayatan ti bukod wenno sangapamiliaan a panagadalda. Bubosen ti sumagmamano a minuto a panangawis iti sumagmamano a tao a mangilawlawag iti maysa a kinapudno a nasursuroda manipud kadagiti bersikulo nga insuratda.

Isuro ti Doktrina

Alma 23–25; 27

Ti pannakapasurottayo ken ni Jesucristo ken iti ebangheliona ti mangbalbaliw iti biagtayo.

• Kas disipulo ni Jesucristo, agkagkagumaantayo amin a mangpauneg iti pannakapasurottayo. Nalabit ti estoria dagiti Anti-Nephi-Lehi ti makaallukoy kadagiti sursuruam iti panagkagumaanda a mangaramid iti daytoy. Mabalinmo nga irugi babaen iti panangisurat iti pisarra ti maysa a saludsod kas iti sumaganad: Ania ti kaipapanan ti mapasurot? wenno Ania dagiti kita ti panagbalbaliw a mapasamak iti biag dagiti tao no napasurotda? Mabalin a sapulen dagiti miembro ti klase dagiti sungbat kadagitoy a binatog iti: Alma 23:6–7, 17–18; 24:17–19; 25:15–16; ken 27:26–30. Mabalin a kabaelanda nga ibinglay dagiti nalawag a pannakaammo ken pannakaawat [insights] manipud kadagiti dadduma a bersikulo a nabasada iti Alma 23–25 ken 27. Mabalin a makita pay dagiti miembro ti klase a makatulong a mangsarak iti sungbat dagitoy a saludsod iti mensahe ni Elder David A. Bednar “Converted unto the Lord” (Ensign wenno Liahona, Nob. 2012, 106–9; kitaen met iti “Dagiti Nainayon a Resources”). Ania dagiti panagbalbaliw nga inaramid dagiti Anti-Nephi-Lehi kas bunga ti pannakapasurotda? Kasano a maparegtanatayo ti pagwadanda a mangpauneg iti pannakapasurottayo ken ni Jesucristo ken iti ebangheliona?

• Kasano a maparegtam dagiti miembro ti klase a mangikkat iti ania man a palso a tradision ken mangikali kadagiti armasda iti panagalsa, kas iti inaramid dagiti Anti-Nephi-Lehi? Ibilang ti panagrebyu iti Alma 23:5–7 nga aggigiddan. Ania dagiti sumagmamano a nasayaat a tradision a pakatulongan ti ebanghelio a padur-asentayo? Ania dagiti “armas ti … yaalsa” dagiti Lamanite a mangibagi iti panawentayo? Kasano a maikalitayo ida iti nauneg iti daga”? (Alma 24:17). Awisem dagiti miembro ti klase a mangutob no ania dagiti palso a kannawidan wenno armas ti yaalsa a kasapulanda a tallikudan tapno makapagbiagda a naan-anay iti ebanghelio.

Alma 24:7–16

Babaen ti Pannubbot ni Jesucristo, mabalintayo a mapakawan no agbabawitayo.

• No mariknam a maparegtaka a maaddaan iti panaglilinnawag iti klase maipapan iti panagbabawi, ti pakasaritaan dagiti Anti-Nephi-Lehi iti Alma 24 ket makaparegta a pagarigan nga usaren. Mabalinmo a dutokan ti tunggal miembro ti klase a mangbasa iti maysa a bersikulo manipud iti Alma 24:7–16 ket idawatmo kadakuada a mangisurat iti pisarra iti maysa a banag a masursuroda manipud iti bersikuloda maipapan iti panagbabawi. Kalpasanna mabalinda a sukisoken dagiti sumaganad a nasantuan a kasuratan a mangsapul kadagiti mainayon a nalawag a pannakaammo ken pannakaawat [insights] maipapan iti panagbabawi: Isaias 53:5–6; 2 Nephi 2:6–8; ken Mosiah 5:2.

Alma 24:13–15; 26; 29

Mangisangbay ti ebanghelio iti rag-o.

• Iti Alma 23–29, makita ti balikas a “rag-o” iti 24 a gundaway, a mangaramid kadagitoy a kapitulo a nasayaat a lugar a pakasursuruan no kasano a ti ebanghelio—ken panangibinglay iti daytoy—ket mangisangbay iti rag-o. Mabalinmo a bingayen dagiti miembro ti klase iti kada grupo ket idawat iti tunggal grupo a mangrebyu iti sumagmamano a bersikulo, a mangsapsapul kadagiti gapu no apay a nagrag-o ni Ammon, dagiti annak a lallaki ni Mosiah, ken ni Alma: Alma 24:13–15; 26:12–22; ken 29:1–17. Mabalin nga ilista iti pisarra dagiti miembro ti klase no ania ti nasarakanda. Ania ti masursurotayo manipud kadagitoy a bersikulo maipanggep iti no kasano a mangisangbay ti ebanghelio iti rag-o kadatayo?

• Insuro ni Presidente Russell M. Nelson: “No ti pokus dagiti biagtayo ket ti plano ti Dios iti pannakaisalakan … ken ni Jesucristo ken ti ebangheliona, mariknatayo ti rag-o ania man ti mapaspasamak—wenno saan a mapaspasamak—iti biagtayo. Umay ti rag-o manipud ken gapu Kenkuana. Isuna ti paggapuan ti amin a rag-o” (“Joy and Spiritual Survival,” Ensign wenno Liahona, Nob. 2016, 82). Nalabit a mabalin nga ibinglay dagiti miembro ti klase dagiti padas a nakatulong kadakuada a makaawat iti kinapudno dagiti balikas ni Presidente Nelson.

• Nakasarak da Alma ken Ammon iti naindaklan a rag-o iti panangibinglay iti ebanghelio. Mabalinmo nga awisen dagiti miembro ti klase a mangsarak kadagiti bersikulo iti Alma 26 ken 29 a mabalin a mangparegta iti maysa nga agtutubo nga agserbi iti mision—wenno mangparegta iti asino man a mangibinglay iti ebanghelio iti dadduma. Ibilangmo ti panangted iti sumagmamano a minuto iti panagplano dagiti miembro ti klase iti maysa a banag a mabalinda nga aramiden a mangibinglay iti ebanghelio. Awisem ida nga agtignay kadagiti planoda, ken iti masakbayan a klase mabalinmo nga allukoyen ida nga agsarita maipapan kadagiti panagkagumaanda.

• Idi tinulongan ni Alma dagiti dadduma a makapagbabawi, naipalagip kenkuana ti kinaimbag ti Dios (kitaen iti Alma 29:10–13). Nalabit a mabalinmo ti mangted iti sumagmamano a minuto kadagiti miembro ti klase tapno adalenda dagitoy a bersikulo ken ilista no ania ti nalagip ni Alma. Ania ti mangipalagip kadatayo iti kinaimbag ti Dios? Kasano a naimatangantayon dagiti kinaimbag ti Dios iti biagtayo?

Alma 26–27

Makapagbalintayo a ramit kadagiti ima ti Dios.

• Tapno matulongan dagiti miembro ti klase a mangsukisok no ania ti kayat a sawen ti “ramit dagiti ima ti Dios” (Alma 26:3), mabalinmo ti mangi-display iti nadumaduma a kita ti instrumento wenno ramit. Mabalinmo met ti agpaitugot kadagiti miembro ti klase iti sumagmamano a ramit nga usarenda. Kasano a makatulong dagitoy a ramit? Kasano a maipadatayo kadagiti ramit iti aramid ti Apo? Mabalinmo nga awisen dagiti miembro ti klase a mangilasin kadagiti wagas a nakapagbalin a ramit kadagiti ima ti Dios ni Ammon ken dagiti padana a misionario (kitaen, kas pagarigan iti, Alma 26:1–5, 11–12). Ania dagiti nalawag a pannakaammo ken pannakaawat [insights] ti magun-odtayo manipud iti Doktrina ken Katulagan 4 maipapan iti panagbalin a ramit kadagiti imana? Mabalin pay nga ibinglay dagiti miembro ti klase dagiti padasda a nakarikna iti rag-o a sumangbay manipud iti panagbalin a ramit kadagiti ima ti Dios.

Yallukoy ti Panagsursuro iti Pagtaengan

Adu kadagiti isu met laeng a palso a kapanunotan a mangyaw-awan kadagiti annak ti Dios iti agdama ti gagangay iti panawen ni Alma. Isaritam kadagiti miembro ti klase nga iti Alma 30–31 makitadanto no kasano a sinungbatan da Alma ken dagiti dadduma pay dagitoy a palso a pannursuro.

Dagiti Nainayon a Resources

Napasurot iti Apo.

Insuro ni Elder David A. Bednar:

“Ti pudno a kaipapanan ti ebanghelio ni Jesucristo ket iramanna ti kangrunaan ken manayon a panagbalbaliw iti mismo a kinataotayo a maaramid a posible babaen ti Pannubbot ti Mangisalakan. Ti pudno a pannakapasurot ket mangisangbay iti panagbalbaliw kadagiti kannawidan, puso, ken biag ti maysa a tao nga umawat ken makitunos iti pagayatan ti Dios (kitaen iti Dagiti Aramid 3:19; 3 Nephi 9:20) ken iramanna ti nalaing a panagkumit nga agbalin a maysa a disipulo ni Cristo.”

Kalpasan ti panangadawna iti Alma 23:6–8, intuloy ni Elder Bednar nga inlawlawag:

“Nailadawan ti dua a dadakkel nga elemento kadagitoy a bersikulo: (1) ti pannakaammo iti kinapudno, a mabalin a maipatarus a kas pammaneknek, ken (2) napasurot iti Apo, a maawatak nga agbalin a mapasurot iti Mangisalakan ken iti ebangheliona. Ngarud, ti nabileg a panagtipon ti agpada a pammaneknek ken pannakapasurot iti Apo ket nagbunga iti kinatibker ken kinatalingenngen ken nangipaay iti naespirituan a pannakasalaknib.

“Pulos a dida nagikay ket indissoda ‘dagiti armasda iti yaalsa, ket saandan a binusor pay ti Dios.’ Ti panangipakni kadagiti naipatpateg nga ‘armas ti yaalsa’ kas iti kinamanagimbubukod, kinatangig, ken kinasukir ket agkasapulan iti ad-adda pay ngem iti panamati ken pannagammo laeng. Ti natibker a pammati, panagpakumbaba, panagbabawi, ken kinamanagtulnog ket nasken a mapasamak nga umuna sakbay ti panangtallikud kadagiti armastayo iti panagalsa. Tagtagikuaentayo kadi pay dagiti armastayo iti panagalsa a manglapped kadatayo iti Apo? No kasta, ngarud masapul nga agbabawitayo itan.

“Madlaw a saan a napasurot dagiti Lamanite kadagiti misionario a nangisuro kadakuada wenno kadagiti napipintas a programa ti Simbaan. Saanda a napasurot iti personalidad dagiti dadauloda wenno panangtaginayon ti natawid a kultura wenno dagiti kannawidan dagiti ammada. Napasurotda iti Apo—Kenkuana kas Mangisalakan ken iti kinadios ken doktrinana—ket saanda a natnag iti kaano man” (“Converted unto the Lord,” Ensign wenno Liahona, Nob. 2012, 107–9).

Panangpadur-as iti Panangisurotayo

Agpatarabayka kadagiti lidermo. Kayatdaka a tulongan nga agballigi dagiti lidermo iti priesthood ken auxiliary. Dawatem ti balakadda kabayatan ti panangikarigatam nga agbalin a nalaing kas maysa a mannursuro ken kabayatan ti panangutobmo kadagiti kasapulan dagiti sursuruam” (Panangisuro iti Wagas ti Mangisalakan, 5).