Da Ammon ken Ari Lamoni, ni Scott Snow

Hunio 22–28

Alma 17–22

“Aramidenkayo a Ramit”

Sakbay a matulongam dagiti dadduma a mangtakuat kadagiti kinapudno kadagiti nasantuan a kasuratan, kasapulam ti mangtakuat kadagiti kinapudno para iti bagim. Basaem ti Alma 17–22 a kaduam iti panunotmo dagiti miembro ti klasem.

Isuratmo Dagiti Impresionmo

Yawis ti Panagbibinninglay

Tapno maikkam dagiti miembro ti klase iti gundaway a mangibinglay iti maysa a banag a nasursuroda iti bukod wenno sangapamiliaan a panagadalda, mabalinmo nga awisen ida a pumili iti maysa a tao a nailadawan iti Alma 17–22 ket leppasen ti maysa a binatog kas iti sumaganad: “Insuronak ni Abish ” wenno “Insuronak ni Lamoni .”

Isuro ti Doktrina

Alma 17:1–4

Mapapigsa ti pammatitayo bayat ti sipapasnek a panagkalikagumtayo a mangammo iti kinapudno.

• Nalabit a namin-adun a nangngegan dagiti miembro ti klase ti kinapateg dagiti gagangay a galad iti ebanghelio. Makatulong kadakuada tiAlma 17:1–4 a mangkita iti nabileg nga epekto dagitoy a galad iti panagbiagda. Mabalinmo nga idawat iti kagudua ti klase a mangsukisok kadagitoy a bersikulo iti no ania ti inaramid dagiti lallaki nga annak ni Mosiah ken ti sabali pay a kagudua a mangsukisok kadagiti bunga ti no ania ti inaramidda. Ania dagiti bunga ti panangaramid kadagitoy a banag iti biagtayo?

• Para iti naun-uneg pay a panangilawlawag iti sumagmamano kadagiti galad a nagpapigsa kadagiti lallaki nga annak ni Mosiah, mabalinmo nga isurat iti pisarra Panangsukisok kadagiti Nasantuan a Kasuratan, Panagkararag, ken Panagayuno. Kalpasanna mabalin nga agsukisok dagiti miembro ti klase kadagiti nasantuan a kasuratan a mangisuro maipapan kadagiti bendision a sumangbay manipud iti panagadal iti nasantuan a kasuratan, panagkararag, ken panagayuno (mabalin a makatulong (ti Topical Guide wenno Pangiwanwan iti Nasantuan a Kasuratan ket mabalin a makatulong). Mabalinda nga isurat iti pisarra no ania ti masarakanda ken mangibinglay iti tunggal maysa kadagiti kapanunotan maipapan iti no kasano a mapadur-as ti panagadalda iti nasantuan a kasuratan, panagkararag, ken panagayuno iti wagas a mangyas-asideg kadakuada iti Dios.

Alma 17–18

Ti ayat ti makatulong kadagiti dadduma nga agsagana nga umawat iti ebanghelio.

• Adu dagiti wagas a pakaibinglayan iti ebanghelio, ket nasamsamay amin dagitoy no ti ayat ti mangparegta. Nalabit a mabalin nga ilasin dagiti miembro ti klase dagiti bersikulo iti Alma 17–18 a mangipakita no kasano a pinaregta ti ayat ni Ammon a mangibinglay iti ebanghelio. Ania dagiti dadduma pay a kinapudno maipapan iti panangibinglay iti ebanghelio a masursurotayo manipud iti pagwadanna? Mabalin a kabaelan dagiti miembro ti klase ti mangibinglay kadagiti padas a nakaluknengan napudno nga ayat iti puso ti maysa a tao ken nangpalugod kenkuana nga agbalin nga ad-adda pay nga umawat iti mensahe ti ebanghelio. Ti palawag ni Presidente Dallin H. Oaks iti “Dagiti Nainayon a Resources” a mangtulong a mangipaawat kadagiti miembro iti kinapateg ti panangpennek a mabuangay iti ayat dagiti panagkagumaantayo.

Isalakan ni Ammon dagiti Arban ti Ari, ni Minerva K. Teichert

Alma 18–22

Ti panangisuro ken panagsursuro a nasamsamay kadagiti kinapudno ti ebanghelio ket mabalin nga agbanag iti panagbalbaliw ti puso.

• Apaman a nagun-od da Ammon ken Aaron ti panagtalek ni Ari Lamoni ken ti amana, kabaelanda a tinulongan a mangipaawat kadakuada dagiti napapateg a kinapudno ti ebanghelio. Nalabit a makatulong no inlista dagiti miembro ti klase dagiti kinapudno nga insuro ni Ammon ken ni Lamoni (kitaen iti Alma 18:24–39) ken indasigda daytoy iti listaan dagiti kinapudno nga insuro ni Aaron iti ama ni Lamoni (kitaen iti Alma 22:1–16). Mabalin nga itrabaho ti kagudua ti klase ti maysa a listaan idinto nga itrabaho met ti sabali pay a kagudua ti maysa pay a listaan. Apay a ti pannakaawat kadagitoy a kinapudno ket mabalin a nangiturong kada Lamoni ken ti amana tapno mamati ken agtalekda iti Nailangitan nga Ama ken ti Anakna, ni Jesucristo?

• Dagiti pakaammuan maipapan kada Aaron ken ni Ammon a mangisisursuro ken ni Ari Lamoni ken ti amana ket mangted iti naindaklan a gundaway a mangilawlawag iti nasamay a panangisuro ken panagsursuro iti ebanghelio. Ania dagiti pagbatayan ti panangisuro a madlaw dagiti miembro ti klase? (kitaen, kas pagarigan, iti Alma 18:24–28 ken Alma 22:7–13). Ania dagiti pagbatayan ti panagsursuro a masarakanda kadagiti pagwadan ni Ari Lamoni ken ti amana? (Kitaen, kas pagarigan, iti Alma 18:25–31; 22:17–18).

• Tapno masursuro maipapan iti no kasano a makaimpluensia ti doktrina ti ebanghelio iti biagtayo, mabalin a sukisoken dagiti miembro ti klase ti Alma 18:40–41; 20:1–15; ken Alma 22:15–18, 25–27 tapno ammuen no kasano ti narikna ni Ari Lamoni ken ti amana kalpasan a naawatanda dagiti kinapudno ti ebanghelio ket napasurotda. Kasano a makatulong kadatayo dagitoy a kinapudno nga umasideg ken ni Cristo? Ania ti maaramidtayo tapno makatulong iti bagbagitayo ken kadagiti ipatpategtayo tapno maawatan ken agtungpaltayo kadagitoy a kinapudno?

Alma 19–22

Dagiti pammaneknektayo ket nabileg a makaimpluensia kadagiti dadduma.

• Kabayatan ti bukod a panagadalda iti Alma 19–22, mabalin nga inutoben dagiti miembro ti klase ti makaimpluensia unay nga epekto ti pammaneknek ti maysa a tao kadagiti dadduma. Allukoyem ida a mangibinglay no ania ti nasursuroda. Ania ti isingasing dagiti pakaammuan iti Alma 19–22 maipapan kadagiti bukodtayo a panagkagumaan a mangibinglay iti ebanghelio? Insarita ni Presidente Gordon B. Hinckley iti “Dagiti Nainayon a Resources a mangyunay-unay iti daytoy a punto.

• Ania dagiti sumagmamano a nasayaat nga analohia a mabalinmo nga ibinglay a mangiladawan no ania ti mabalin a mapasamak no ibinglaytayo dagiti pammaneknektayo kadagiti dadduma? Dagiti mabalin a pagarigan ket dagiti babassit a bato a makaaramid iti babassit a dalluyon iti taaw wenno ti lebadura a makatulong iti yaalsa ti masa [dough]. Kalpasan ti panangrebiyu iti sumagmamano a pagarigan dagiti tao a mangibingbinglay kadagiti pammaneknekda iti Alma 19–22, mabalin nga ibinglay dagiti miembro ti klase no kasano nga inaringan ida dagiti pammaneknek dagiti dadduma.

Yallukoy ti Panagsursuro iti Pagtaengan

Mabalinmo a saludsoden kadagiti miembro ti klase no inarapaapda kadin no kasano nga aramiden nga agtultuloy ken managibtur ti pannakapasurotda. Iti Alma 23–29, basaendanto maipapan iti maysa a grupo dagiti tao a nangawat iti ebanghelio ken “pulos a dida nagikay” (Alma 23:6).

Dagiti Mainayon a Resources 

Ibinglayyo ti ebanghelio nga addaan iti ayat.

Imbinglay ni Presidente Dallin H. Oaks ti napateg a leksion a nasursurona manipud iti maysa a padasna kas maysa nga agtutubo:

“Nadutokanak a sumarungkar iti saan nga aktibo a miembro, maysa a naballigian a propesional nga in-inauna ngem siak iti adu a tawen. Iti pananglagipko kadagiti tignayko, naamirisko a sangkabassit laeng ti naayat a pannakaseknak iti tao a sinarungkarak. Inaramidko gapu ta pagrebbengak, nga addaan iti tarigagay nga agreport iti 100 a porsiento iti home teaching. Maysa a sardam, ti dumani gibus ti bulan, tinawagak iti telepono tapno saludsodek no mabalinkami iti kompanionko ti mangsarungkar kenkuana. Ti makababalaw a sungbatna ti nangisuro kaniak iti leksion a diak malipatan.

“‘Saan, diak mamati a kayatko nga umaykayo iti daytoy a sardam,’ kinunana. ‘Nabannogak. Nakapellesakon iti kawes a pagturogko. Agbasbasaak, ken diak kayat ti masinga tapno laeng makapagreportka iti 100 a porsiento iti home teaching iti daytoy a bulan.’ Malagipko pay laeng dayta a sungbat gapu ta ammok a nariknana ti managimbubukod a pangguyugoyko.

“Sapay koma ta awan tao nga awisentayo a dumngeg iti mensahe ti naisubli nga ebanghelio a makarikna nga ar-aramidentayo iti ania man a gapu malaksid iti napudno nga ayat para kadakuada ken ti saan a managimbubukod a tarigagay a mangibinglay iti maysa a banag nga ammotayo a napateg” (“Sharing the Gospel,” Ensign, Nob. 2001, 8).

Masansan a saan a maipakaammo ti impluensiatayo.

Insarita ni Presidente Gordon B. Hinckley ti estoria a nangipadamagan ti maysa a misionario iti mission presidentna iti panaggibus ti serbisiona. Kinuna ti misionario:

“Awan dagiti ti ania man a bunga dagiti aramidko. Sinayangko ti panawenko ken ti kuarta ni tatangko. Maysa daytoy a panangsayang iti panawen. … Nabuniagak ti maysa laeng a tao kabayatan ti dua a tawen a kaaddak ditoy. Dayta ti agtawen iti sangapulo-ket-dua nga ubing iti adayo a lugar ti Tennessee.”

Inkeddeng ti mission president ti mangsubaybay iti ubing a lalaki a binuniagan daytoy a misionario. Dimmakkel, nagasawa, ken immakar iti Idaho. Napan nagmision dagiti annakna, ken napan dagiti annakda iti mision. Nagbaniaga ti mission president iti Idaho ket nagsaludsod kadagiti miembro dayta a pamilia maipapan kadagiti misionda. Idi agangay kinunana, “Natakuatak a, kas bunga ti panagbuniag dayta maysa a bassit nga ubing a lalaki iti adayo a lugar ti Tennessee babaen ti maysa a misionario a nangipagarup a saan a nagballigi, nasurok a 1,100 a tattao ti immay iti Simbaan” (Teachings of Gordon B. Hinckley [1997], 360–61).

Panangpadur-as iti Panangisurotayo

Mangilatang iti oras a makaibinglay dagiti agad-adal. “No ibinglay dagiti agad-adal no ania ti nasursuroda, saanda laeng a marikna ti Espiritu ken mapapigsa dagiti bukodda a pammaneknek, no di ketdi maallukoyda pay dagiti miembro ti klase a mangtakuat kadagiti kinapudno para iti bagbagida. … Mangilatang iti oras a pakaibinglayan ti estudiante iti tunggal adalen—iti sumagmamano a gundaway, matakuatam a dagitoy a pananglilinnawag ket ti adalen” (Panangisuro iti Wagas ti Mangisalakan, 30).