Ni Jesus a nakaiggem iti maysa a karnero

Saanka a Nalipatan, ni Jon McNaughton

Hunio 1–7

Alma 5–7

“Limmansad Kadi iti Pusoyo Daytoy Naisangayan a Panagbalbaliw?

Bayat ti panangbasam iti Alma 5–7, panunotem maipapan kadagiti miembro ti klasem a mangipagwadan kadagiti pannursuro kadagitoy a kapitulo. Ibilangmo dagiti wagas a pakatulongam a mangiraman kadakuada iti panaglilinnawagyo iti Domingo.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Mangted iti sumagmamano a minuto a lagipen dagiti miembro ti klase no ania ti nabasada iti Alma 5–7 ken mangsapul iti kinapudno a kayatda nga ibinglay iti klase. Kalpasanna idawat kadakuada a mangibinglay iti daytoy iti maysa a tao a nakatugaw iti asideg.

icon iti panangisuro

Isuro ti Doktrina

Alma 5:14–33

Nasken a mapadasantayo—ken agtultuloy a makarikna—iti naisangayan a panagbalbaliw ti puso.

• Naawis dagiti miembro ti klase a mangutob kadagiti saludsod iti Alma 5:14–33 iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Mabalinmo nga irugi ti panangilawlawag kadagitoy a bersikulo babaen ti panangidawat kadagiti miembro ti klase a mangibinglay no ania kadagiti saludsod manipud kadagitoy a bersikulo ti napateg kadakuada. Kalpasanna mabalinmo nga awisen dagiti miembro ti klase nga agtrabaho iti kada grupo a mangrebyu iti Alma 5:14–33 ken mangtakuat no ania ti kayat a sawen ti mangpadas iti panagbalbaliw iti puso babaen ti Mangisalakan ken ti Pannubbotna. Mabalinda pay a sapulen dagiti bendision a sumangbay manipud iti nagbalbaliw a puso. Ania dagiti dadduma pay a metapora a nausaren a pangiladawan iti panagbalbaliw nga iladawan ni Alma? (Kas pagarigan, kitaen iti Juan 3:1–7; 2 Taga Corinto 5:17; Dale G. Renlund, “Preserving the Heart’s Mighty Change,” Ensign wenno Liahona, Nob. 2009, 97–99. Kasano a mapagtalinaedtayo ti panagbalbaliw iti puso iti unos ti panagbiagtayo? (kitaen iti Alma 5:26).

  babai nga agkarkararag iti abay ti katre

  No umasidegtayo iti Dios, makapadastayo iti “panagbalbaliw iti puso.”

Alma 5:44–51

Makagun-odtayo iti bukodtayo a pammaneknek maipapan iti Mangisalakan ken ti ebangheliona babaen ti Espiritu Santo.

• Kas ken ni Alma, nakagun-od dagiti miembro ti klasem iti bukodda a pammaneknek maipapan iti Mangisalakan ken ti ebangheliona. Tapno matulongan ida a makasursuro no ania ti inaramid ni Alma nga umawat iti pammaneknekna babaen ti Espiritu, mabalin a mangipasaka kadagiti pedaso ti papel nga addaan iti balikas a Pammaneknek a naisurat iti rabaw. Mabalin a makapagtrabaho iti kada paris dagiti miembro ti klase a mangrebyu iti Alma 5:44–51 ken no ania ti masursuroda kadagitoy a bersikulo a mangisurat iti putahe(recipe) para iti maysa a pammaneknek. Kas pagarigan, dagiti “paglaok” ti putahe (recipe) ket mabalin a dagiti kinapudno a pakabuklan dagiti pammaneknektayo. Dagiti “pangiturong” para iti recipe ket mabalin a dagiti banag a nasken nga aramidentayo tapno magun-od ti maysa a pammaneknek. (Kitaen iti mensahe manipud iti Elder Dieter F. Uchtdorf iti “Dagiti Nainayon a Resources” para iti sumagmamano a pagarigan.) Ania dagiti “paglaok” ken “pangiturong” a mainayonda manipud iti bukodda a padas wenno dadduma pay a padas kadagiti nasantuan a kasuratan? Awisem ti kada paris tapno iburayda no ania ti nasursuroda ken no ania dagiti ar-aramidenda tapno maawis ti Espiritu Santo nga mamaneknek iti kinapudno kadakuada.

Alma 6

Agguummongtayo kas Sasanto a dumngeg iti balikas ti Dios ken agaramid iti trabahona.

• Tapno ipalagip kadagiti miembro ti klase maipapan iti kinapateg ti panaguummong a sangkamaysa kas maysa a ragup dagiti Santo, mabalinmo nga awisen ida a mangipapan a marikna ti maysa a tao nga am-ammoda a saan a kasapulan ti pannakaikameng iti maysa a simbaan. Ania ti mabalinda nga ibinglay manipud iti Alma 6 a mangisuro iti daytoy a tao maipapan iti sumagmamano kadagiti bendision ti pannakaikameng iti maysa a simbaan? Kasano a nasaysayaat a maipatungpaltayo dagiti panggep ti panaguummong nga inladawan ni Alma?

Alma 7:7–16

Inawat ti Mangisalakan iti Bagina dagiti basol, saem, ken rigattayo.

• Mabalin nga adda dagiti tao iti klasem nga agkasapulan unay a mangammo no ania ti isuro ti Alma 7:7–16 —nga inawat ti Mangisalakan iti Bagina saan laeng dagiti basoltayo no di ketdi pay dagiti saem, rigat, sakit, ken pagkurangantayo. Kasano a matulongam ida a mangtakuat iti daytoy? Nalabit a mabalinmo ti mangaramid iti maysa a tsart iti pisarra nga addan kadagiti paulo nga Ania ti Sinagaba ti Mangisalakan ken Apay a Nagsagaba Isuna. Mabalin a leppasen iti klase ti tsart kalpasan ti panangbasa iti Alma 7:7–16. Mabalin pay a makatulong a panunoten dagiti dadduma pay a banag a sinagaba ti Mangisalakan kabayatan ti panagbiagna (kitaen dagiti pagarigan iti “Dagiti Nainayon a Resources”).

• Kalpasan ti panangilawlawag no ania ti insuro ni Alma iti Alma 7:7–16, nalabit a mabalin nga ibinglay dagiti miembro ti klase dagiti padas idi sinaranay ida ti Mangisalakan, a kayatna a sawen a tinulonganna ida (kitaen iti “Dagiti Nainayon a Resources” para kadagiti pagarigan dagiti wagas a pakasaranayan kadatayo ni Jesus). Mabalinmo pay nga ibinglay ti sumaganad nga adaw manipud ken ni Presidente Dallin H. Oaks: “Impalgak ti Mangisalakan ti ‘panagpababana kadagiti amin a banag’ (D&K 88:6). … Mabalin pay nga isaotayo a ti panagpababa iti amin a banag, Isu ket naan-anay a naipuesto a mangitag-ay kadatayo ken mangted kadatayo iti pigsa a kasapulantayo nga agibtur kadagiti rigattayo. Nasken nga agsaludsodtayo laeng” (“Strengthened by the Atonement of Jesus Christ,” Ensign wenno Liahona, Nob. 2015, 64).

• Impakdaar ni Alma a ti yaay ti Mannubbot “ti napatpateg ngem” iti ania man a banag. Nalabit a mabalin nga ipapan dagiti miembro ti klase nga addada iti history class a mangilawlawag kadagiti kapatgan a pasamak ti pakasaritaan. Ania dagiti bersikulo manipud iti Alma 7 a maibinglayda a mangsuporta iti sao ni Alma iti bersikulo 7? Ania ti balakad ni Alma nga intedna kadagiti taona a makatulong kadatayo nga agsagana para iti yaay ti Mangisalakan?

icon iti panagsursuro

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti Alma 8–12, mabalinmo nga ibinglay kadakuada a dagitoy a kapitulo ti mangisalaysay iti estoria maipapan iti dua a lallaki. Maysa ti saan nga interesado iti Simbaan ken maysa ti naregget a mangidaddadanes, ngem agpadpada a nagbalin a natured nga agsalsalaknib iti pammati.

resources icon

Dagiti Mainayon a Resources 

Pananggun-od kadagiti bukodtayo a pammaneknek.

Inted ni Elder Dieter F. Uchtdorf ti sumaganad a pagtuladan iti nasantuan a kasuratan para iti “panangawat iti bukod a pammaneknek a nagramut iti saksi ti Espiritu Santo”:

“Umuna: Agtarigagay a mamati. Allukoyennatayo ti Libro ni Mormon: ‘No riingen ken bangonen[yo] dagiti pampanunotyo, uray no padasenyo dagiti balikasko, ken tibnokanyo iti bassit a pammati, … uray no diyo tarigagayan ti ad-adu a panamati’ (Alma 32:27). … Ikari ti Dios kadatayo ti nadiosan a tulong uray no addaantayo laeng iti tarigagay a mamati, ngem nasken nga agbalin a maysa a napudno ken saan nga aginkukuna a tarigagay.

“Maikadua: Sukisokenyo dagiti nasantuan a kasuratan. Maaddaan kadagiti saludsod; adalen dagitoy; agsukisok kadagiti nasantuan a kasuratan para kadagiti sungbat. Manen, addaan ti Libro ni Mormon iti napintas a balakad para kadatayo: ‘No ikkan[yo] ti bukel iti lugar a pakaimulaanna iti pusoyo’ babaen ti napasnek a panagadal iti balikas ti Dios, ti nasayaat a bukel ket ‘mangrugi nga agtubo iti barukongyo’ no saanyo a pagkedkedan nga awanan iti pammati. Daytoy nasayaat a bukel ti ‘mangpadakkel iti kararua[yo]’ ken ‘mangsilaw iti panunot[yo]’ (Alma 32:28).

“Maikatlo: Aramiden ti pagayatan ti Dios; tungpalen dagiti bilin. … Nasken nga umasidegtayo ken ni Cristo ken surotentayo dagiti pannursurona. Insuro ti Mangisalakan: ‘Saanko a kukua ti doktrinak, no di ket kukua dayta nangibaon kaniak. No asino man a tao ti agaramid iti pagayatanna; maam-ammonanto ti maipapan iti doktrina’ [Juan 7:16–17; nainayon ti nagiray a balikas]. …

“Maikapat: Agutob, agayuno, ken agkararag. Tapno umawat iti pannakaammo manipud iti Espiritu Santo, nasken nga idawattayo iti Nailangitan nga Ama daytoy [kitaen iti Alma 5:45–46; Moroni 10:3–4]” (“The Power of a Personal Testimony,” Ensign wenno Liahona, Nob. 2006, 38–39).

Ania ti sinagaba ni Jesucristo?

• Pannulisog (kitaen iti Mateo 4:1–10)

• Bisin ken waw (kitaen iti Mateo 4:2; Juan 19:28)

• Ipupusay ti maysa nga ipatpateg (kitaen iti Mateo 14:10–13)

• Panangisardeng wenno panangtallikud (kitaen iti Mateo 26:55–56)

• Pananglais (kitaen iti Mateo 27:29–31, 39–44)

• Kinapanglaw (kitaen iti Lucas 9:58)

• Panangliput (kitaen iti Marcos 14:43–46)

• Saem a nakarkaro pay a mabalin a sagabaen ti asino man (kitaen iti Lucas 22:39–44; Mosiah 3:7; D&K 19:16–19)

Ania dagiti sabali pay a rigrigat a napasaran ti Mangisalakan?

Kasano a tulongannatayo ni Jesucristo?

• Mamakawan kadagiti basoltayo ket mangikkat iti basol (kitaen iti Enos 1:5–6)

• Mangpalukneng iti puspuso dagiti dadduma (kitaen iti Mosiah 21:15)

• Mangpapigsa kadatayo a mangibaklay kadagiti dagensentayo (kitaen iti Mosiah 24:14–15)

• Mangagas kadatayo kadagiti sakittayo (kitaen iti 3 Nephi 17:6–7)

• Mangaramid a napigsa dagiti nakapsut a banag ken mangliwliwa kadatayo (kitaen iti Ether 12:27–29)

• Mangtulong kadatayo a makakita kadagiti rigat iti pannirigan (kitaen iti D&K 121:7–10)

Iti ania a sabali pay a wagas a nakatulongan ni Jesus kadatayo?

Panangpadur-as iti Panangisurotayo

Dumur-as a mannursuro a kas ken ni Cristo. Kas maysa a mannursuro, napateg nga utobem maipanggep kadagiti wagas a mabalin a pakatulongam kadagiti agad-adal a mangpapigsa iti pammati iti Nailangitan nga Ama ken ni Jesucristo. Ibilangmo nga usaren dagiti saludsod iti panangamiris iti bagi iti panid 37 ti Panangisuro iti Wagas ti Mangisalakan a mangparegta kenka.