Ladawan da Alma ken Amulek, a maisalsalakan manipud iti pagbaludan, ni Andrew Bosley

Hunio 15–21

Alma 13–16

“Sumrek iti Paginanaan ti Apo”

Ti manayon a panagbalbaliw ket agkasapulan iti ad-adu ngem iti makaparegta nga adalen iti Sunday School iti maminsan ti makalawas. Allukoyem dagiti miembro ti klase nga agkalikagumda a manggun-od iti bukod a naespirituan a padas iti makalawas.

Isuratmo Dagiti Impresionmo

Yawis ti Panagbibinninglay

Ania ti mabalin a mangiparikna kadagiti miembro ti klase a mangibinglay iti tunggal maysa kadagiti padasda iti panagsursuro ken panagbiag iti ebanghelio? Nalabit a mabalinmo nga awisen ida a mangibingnglay iti nauneg a pannakaammo ken pannakaawat [insight] a nasarakanda iti Alma 13–16 a namagsiddaaw kadakuada wenno dida impagarup kasakbayanna. Bayat ti panangibinglayda, saludsodem kadakuada no kasano ti panagriknada a mangidumdumanto daytoy baro a pannakaammo ken pannakaawat iti biagda.

Isuro ti Doktrina

Alma 13:1–19

Dagiti ordinansa ti priesthood ti mangtulong kadagiti annak ti Dios nga umawat iti pannakasubbot babaen ken ni Jesucristo.

• Mabalin a nasarakan ti sumagmamano a miembro ti klasem ti maysa a banag a nangpauneg iti panagyamanda iti priesthood bayat ti panagadalda iti Alma 13. Awisem ida a mangibinglay no ania ti nasarakanda. Mabalin met nga aggigiddan a basaenyo dagiti bersikulo 2 ken 16 ken agsaludsod kas iti “Kasano a tulongannakayo ti priesthood ken dagiti ordinansana a kumita iti Anak [ti Dios] para iti pannakasubbot’?” No makatulong, masarakan ti listaan dagiti ordinansa iti Napudno iti Pammati, 109–10.

  

  Dagiti ordinansa ti priesthood ti mangtulong kadatayo a mangkita ken ni Jesucristo para iti pannakasubbot.

• Adu a tao iti Ammonihah dagiti pasurot ni Nehor, a nangisuro kadagiti palso a kapanunotan maipapan iti akem dagiti saserdote. Tapno matulongan dagiti miembro ti klase a mangsursuro kadagiti pudno a kababalin ti priesthood, mabalinmo nga idawat kadakuada a mangidasig ti pannirigan ni Nehor iti no ania ti nasken nga aramiden dagiti saserdote (kitaen iti Alma 1:3–6) iti no ania ti insuro ni Alma (kitaen iti Alma 13:1–12). Ania dagiti wagas a pakaipadaan dagiti pannursuro ni Nehor kadagiti pannirigan ti lubong maipapan iti bileg ken panangidaulo? Kasano a maigiddiat dagiti pannursuro ni Alma?

• Ti panangbasa iti Alma 13:1–19 ket mabalin a mangiturong iti panaglilinnawag maipapan iti panagbalin a “naisagana manipud iti pamuon ti lubong” para kadagiti pagrebbengan iti aramid ti Apo. Ania ti isingasing ti Alma 13:3 maipapan ti wagas a nasken nga ikikita wenno yaasideg kadagitoy a pagrebbengan? (kitaen met iti DkK 138:56).

Alma 13

Awisennatayo ti Apo a sumrek iti paginanaanna.

• Insuro ni Alma a tulongannatayo ti priesthood a “makastrek iti paginanaan ti Apo” (Alma 13:16). Tapno mairugi ti panaglilinnawag maipapan iti daytoy a kapanunotan, mabalinmo nga idawat kadagiti miembro ti klase a mangbasa iti Alma 13:6, 12–13, 16, ken 29 ken mangibinglay no ania ti isuro dagitoy a bersikulo maipapan iti “paginanaan ti Apo.” Mabalinda pay nga ilasin no ania dagiti kababalin dagiti tao a “sumrek iti paginanaan ti Apo.” Ania ti maaramidtayo a mangpadas iti paginanaan ti Apo kabayatan ti mortal a panagbiagtayo?

Alma 14

Kadagiti panawen ti pannubok ken trahedia, nasken nga agtalektayo iti Apo.

• Mabalin a maysa a gundaway tiiAlma 14 a tapno paglilinnawagan no kasano a sumungbattayo a sipupudno no maipasangotayo wenno dagiti ipatpategtayo iti pannakaidadanes wenno pannubok uray no ikarkarigatantayo ti agbalin a nalinteg. Mabalin a rugian babaen ti panangawis kadagiti miembro ti klase a mangipapan nga isuda dagiti journalist a mangirepreport iti maysa a pasamak iti Alma 14. Ania dagiti kita ti saludsod a mabalin damagenda ken ni Alma wenno Amulek maipapan iti pasamak? Kas pagarigan, “Apay nga impalubos ti Apo kenka ken dadduma pay a nalinteg a tattao nga agsagaba?” wenno “Ania ti ibalakadmo kadagiti agsagsagaba iti naririgat a pannubok?” Maibatay iti no ania ti ammotayo manipud iti Alma 14, kasano a masungbatan da Alma wenno Amulek dagitoy a saludsod?

• Kaaduanna kadatayo ti mabalin a kasla makarikna iti pannakarikna ni Amulek idi nasaksianna ti panagsagaba dagiti napudno a tao ti Ammonihah: nasaktan[kami] met” (Alma 14:10), ket tarigagayantayo nga aramiden ti maysa a banag maipapan iti daytoy. Ania ti masursurotayo manipud iti no ania ti kinuna ni Alma iti daytoy a situasion? (kitaen iti Alma 14:8–13). Mabalinmo nga ibinglay ti palawag manipud ken ni Presidente Spencer W. Kimball iti “Dagiti Nainayon a Resources.” Nalabit a mabalin a gupgopen dagiti miembro ti klase ti kangrunaan a mensahe iti palawag ni Presidente Kimball iti bukodda a balikas.

Alma 15:16, 18

Agkasapulan iti sakripisio ti kinadisipulo.

• Iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing iti panangilista no ania ti insuko ni Amulek ken no ania ti nagun-odna idi inawatna ti ebanghelio. Nalabit nga agtallugod dagiti miembro ti klase a mangibinglay iti listaan nga inaramidda, wenno mabalin nga aramidenda dagitoy a listaan iti klase. Makatulong dagitoy a nasantuan a kasuratan: Alma 10:4–5; 15:16, 18; 16:13–15; ken 34: 8. Apay a nagtallugod ni Amulek nga aramiden dagiti kasta a sakripisio? Apay a natallugodtayo a mangaramid iti kasta? Kasano a masurottayo ti pagwadan ni Alma, a “nangpapigsa ken ni [Amulek] iti Apo”?

Alma 16:1–10

Maipatungpalto dagiti balikas dagiti propeta.

• Mangted tiAlma 16 kadagiti pagarigan ti maysa a tao a nagtalek iti maysa a propeta ken dagiti tao a saan a nagtalek. Tapno matulongan dagiti miembro ti klase a makasursuro manipud kadagitoy a pagarigan, mabalinmo nga isurat dagiti dua a paulo iti pisarra: Zoram ken Tattao iti Ammonihah. Mabalin a basaen dagiti miembro ti klase ti Alma 16:1–10 ket isurat iti tunggal paulo dagiti balikas ken ragup dagiti balikas a mangiladawan iti ugali dagitoy a tao kadagiti balikas ni propeta Alma. Ania ti ar-aramidentayo a mangipakita iti Nailangitan nga Ama nga addaantayo iti pammati kadagiti balikas dagiti sibibiag a propeta?

Yallukoy ti Panagsursuro iti Pagtaengan

Ibilangmo ti panagsaludsod kadagiti miembro ti klase no tinarigagayanda a nagbalinda koma a nalalaing iti panangibinglay iti ebanghelio. Mabalin a paregtaen ida ti panagbasa iti Alma 17–22 iti kapanunotan a makatulong kadakuada a mangipatungpal iti daytoy a tun-oyen.

Dagiti Nainayon a Resources

Saan a kanayon a malapdan ti Dios ti trahedia.

Naminsan nga insao ni Presidente Spencer W. Kimball maipapan kadagiti kasla di mailawlawag a trahedia a mapaspasamak iti lubong:

“Nalapdan koma kadi ti Apo dagitoy a trahedia? Ti sungbat ket, Wen. Ti Apo ket mannakabalin, addaan iti amin a bileg a mangkontrol iti biagtayo, mangisalakan kadatayo iti saem, manglapped iti amin nga aksidente, … uray pay [mangsaluad kadatayo] manipud iti patay, no aramidenna. Ngem dinanto aramiden. …

“No naagasan ti amin a masaksakit nga inkararagantayo, no nasalakniban dagiti amin a nalinteg ken nadadael dagiti nadangkes, naawan koma ti kaes-eskan ti sibubukel a programa ti Ama ken naigibus koman ti kangrunaan a pagbatayan ti ebanghelio ken ti kinawaya nga agpili. Awan koma ti tao nga agbiag babaen ti pammati. …

“… No iserratayo dagiti ridaw iti liday ken rigat, nalabit a ditayo mairaman dagiti kapatgan a gagayyem ken dagiti umaw-awat iti paraburtayo. Ti panagsagaba ket mamagbalin kadagiti tao a sasanto kabayatan ti pannakasursuroda iti panaganus, naunday a panagsagaba, ken panagtalek iti bagi. …

“… Agyamanak nga uray babaen ti priesthood diak mapaimbag ti amin a masakit. Mabalinko nga agasan dagiti tao a nasken a matay. Mabalinko a pagin-awaen dagiti tao nga agsagsagaba a nasken nga agsagaba. Mabutengak amangan no mapaayko dagiti panggep ti Dios.

“No addanak koma iti awan patinggana a bileg, ngem limitado ti pannirigan ken pannakaawatko, naisalakanko koma ni Abinadi iti pannakaipuruak iti gumilgil-ayab nga apuy idi napuoran, ket iti panangaramid iti daytoy, nalabit a di maisublin ti panangdadaelko kenkuana. Natay a martir ket napan iti gunggona ti maysa a martir—ti pannakaitan-ok.

“Nalabit a diak koma nasalakniban ni Pablo a maibusor kadagiti mangay-ay-ay kenkuana no awan pagpatinggaan ti bilegko. Nalabit nga awan duadua a naagasak koma ti ‘siit iti lasag[na].’ [2 Taga Corinto 12:7.] Ket iti panangaramidko, nalabit a napaayko koma ti programa ti Apo. …

“Mabutengak a naipupok koma iti Pagbaludan ti Carthage idi Hunio 27, 1844, mabalin a nalapdak koma dagiti bala a nanglussok iti bagi ni Propeta [Joseph Smith] ken ni Patriarka a [Hyrum Smith]. Nalabit a naisalakanko koma ida manipud iti panagsagaba ken panagtutuok, ngem napukaw ida iti ipupusay ken gunggona ti martir. …

“Iti kasta saan a di mapengdan a bileg, awan duadua a nariknak koma a salaknibak ni Cristo manipud iti panagtutuok idiay Getsemani, dagiti insulto, ti nasiit a korona, dagiti panangab-abi iti korte, dagiti sugat iti bagi. Inagasak koma dagiti sugatna ket napaimbagko dagitoy, nga intedko koma kenkuana ti nalamiis a danum imbes a suka. Nalabit nga insalakanko koma manipud iti panangsagaba ken ipapatayna, ken napukaw iti lubong ti pangsubbot a sakripisiona. …

“Iti pannakaipasangona iti nalawag a trahedia nasken agtalektayo iti Dios, nga ammotayo nga iti baet ti limitado a pannirigantayo saanto a mapaay dagiti panggepna” (Teachings of Presidents of the Church: Spencer W. Kimball [2006], 14–17, 20).

Panangpadur-as iti Panangisurotayo

Mangyawis iti napasnek a panagadal. “No agsaganaka a mangisuro, imbes a pampanunotem ti, ‘Anianto ti aramidek tapno makaisuro?’ saludsodem iti bagim, ‘Anianto ti aramiden dagiti miembro ti klasek tapno makasursuroda?’” (Panangisuro iti Wagas ti Mangisalakan, 29)