Ni Alma nga agikaskasaba

Panangisuro iti Pudno a Doktrina, ni Michael T. Malm

Hunio 8–14

Alma 8–12

Umayto ni Jesucristo a Mangsubbot kadagiti Taona

Irugim ti panagsaganam a mangisuro babaen ti panangbasam iti Alma 8–12. Kalpasanna irebyum daytoy a balabala para kadagiti nayon pay a kapanunotan a mangallukoyto kadagiti miembro ti klase a mangibinglay no ania ti nasursuroda iti panagadalda.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Mangted kadagiti miembro ti klase iti sumagmamano a minuto a mangutob iti bukod wenno sangapamiliaan a panagadalda iti daytoy a lawas. Kasano nga inaringan ti panagadalda dagiti pili nga inaramidda kabayatan ti lawas? Awisem ti sumagmamano a miembro ti klase a mangibinglay kadagiti kapanunotanda.

icon iti panangisuro

Isuro ti Doktrina

Alma 8

Mabalin nga agkasapulan dagiti panagkagumaantayo a mangibinglay iti ebanghelio iti panagtultuloy ken panaganus.

• Adu a tao ti marigatan a mangibinglay iti ebanghelio—nangnangruna no nariknada ti pannakaumsi, kas iti naaramid ken ni Alma. Ti pagwadan ni Alma ti makatulong kadakuada nga agtalek iti Dios ken maaddaan iti tured a mangituloy iti panangibinglay kadagiti pammaneknekda kadagiti dadduma. Ibilangmo dagitoy a panaglilinnawagan a saludsod: Ania ti masursurotayo manipud iti mensahe ti anghel ken ni Alma iti Alma 8:15? Ania ti maipapan iti reaksion ni Alma iti mensahena, a masarakan iti Alma 8:14–32, a mangparegta kadatayo nga agtultuloy iti panangibinglay iti ebanghelio no mapadasantayo ti saan a maawat? Ania ti balakad nga itedtayo iti maysa a tao a nangpadas a nangibinglay iti ebanghelio ngem saan a naawat? Inted ni Elder Jeffrey R. Holland iti “Dagiti Nainayon a Resources” iti daytoy a pagsasaritaan.

• Ipakita ti estoria da Alma ken Amulek no kasano ti kinapateg dagiti panagkagumaan dagiti miembro iti aramid ti misionario. Ania ti masursuro dagiti miembro ti klase manipud iti Alma 8:19–30 maipapan iti pakainaigan dagiti lokal a miembro ken dagiti full-time a misionario? (kitaen met iti Alma 10:1–12).

  panagkita ti dua a pamilia

  Mabalin a naragsak a padas ti panangibinglay iti ebanghelio kadagiti ay-ayatentayo.

Alma 9:18–30

Ukomen ti Dios dagiti annakna maibatay iti lawag ken pannakaammo nga adda kadakuada.

• Adda napasnek a pammallaag iti amin a miembro ti Simbaan kadagitoy a bersikulo—naminsan nga inawattayon ti lawag ken pannakaammo, manamnama nga ipategtayo daytoy, taripatuentayo daytoy, agbiagtayo iti daytoy, ken usarentayo daytoy a mangbendision kadagiti dadduma. Tapno matulongan dagiti miembro ti klase a mangamiris iti daytoy a namnamaen, mabalinmo nga idawat kadakuada a mangbasa kadagiti pannursuro ni Alma iti Alma 9:18–30 ken mangibinglay kadagiti mensahe a masarakanda maipapan iti pagrebbenganda iti no ania ti ammoda. Apay a mabalin nga adda nakarkaro a pannakakondena no agbasoltayo a maibusor iti napigpigsa a lawag? Mangilatangka iti oras para kadagiti miembro ti klase a mangutob no ania ti maaramidda tapno napudpudno iti lawag ken pannakaammo nga inawatda. Mabalinmo nga isingasing a basaenda ti Doktrina ken Katulagan 50:24 bayat ti panangutobda.

Alma 11–12

Ti plano ti Dios iti plano ti pannakasubbot.

• Mabalinmo a rugian ti panangilawlawag iti daytoy a doktrina babaen ti panangawis iti maysa a miembro ti klase a mangidrowing iti dayagram ti plano ti pannakasubbot iti pisarra. Kalpasanna mabalinmo a bingayen dagiti benneg ti Alma 11–12 kadagiti miembro ti klase ket awisem ida a mangsapul kadagiti kinapudno a kayatda nga inayon iti dayagram. Kas pagarigan, ania ti plano ti Dios a pakasubbotantayo? (kitaen iti Alma 11:38–45). Kasano a ti panangammo kadagitoy a kinapudno maipapan iti plano ti pannakasubbot ket mangparabur iti biagtayo?

• Tapno matulongan dagiti miembro ti klase a mangibinglay no ania ti isuro kadakuada ti Alma 11–12 maipapan iti plano ti pannakasubbot, mabalinmo nga isurat dagiti sumaganad a paulo iti pisarra: Ti Pannakatnag, Ti Mannubbot, Panagbabawi, Ipapatay, Panagungar, ken Panangukom. Mabalin dagiti miembro ti pumili iti maysa kadagitoy a topiko ken mangsukisok iti Alma 11–12 kadagiti kipapudno a masursuroda maipapan iti daytoy. Awisem dagiti miembro ti klase a mangisurat kadagiti kinapudno a masarakanda, addaan iti reperensia ti nasantuan a kasuratan, iti baba ti maitutop a paulo iti pisarra. Kas maysa a klase, paglilinnawagan no kasano a mangimpluensia ti pannakaammo kadagitoy a kinapudno iti biagtayo ken dagiti pangngeddeng nga aramidentayo.

• Mabalin a pagsayaatan dagiti miembro ti klasem manipud iti panaglilinnawag a maipamaysa iti Alma 12:31–32, a nangisuruan ni Alma kalpasan ti Pannakatnag, inikkan ti Dios da Adan ken Eva kadagiti bilin—ngem kalpasan laeng ti panangisurona kadakuada iti planona. Kasano nga aringan ti pannakaammo iti plano ti wagas a panangkita wenno panangriknatayo maipapan kadagiti bilin? Nalabit a mabalinmo nga isarita maipapan iti sumagmamano a nalawag a bilin; kas pagarigan, kasano a ti pannakaammo maipapan iti plano ti Dios ket makatulong kadatayo a mangngilin a nasantuan iti aldaw ti Sabbath wenno agtungpal iti linteg ti kinadalus ti dayaw?

• Mabalin nga adda saludsod dagiti sumagmamano a miembro ti klase maipapan iti Alma 11:26–39, a nagkunaan ni Amulek nga adda maysa laeng a Dios. Dagiti sumaganad a nasantuan a kasuratan ti mangilawlawag no kasano a “maymaysa a Dios” dagiti kameng ti Kinadios [Godhead] idinto a nagsisinada a parsua: Juan 17:20–23; 2 Nephi 31:21; ken 3 Nephi 19:29. Daytoy a palawag manipud ken Elder Jeffrey R. Holland ket makatulong pay: “Mamatikami a maymaysada iti tunggal napateg ken agnanayon nga aspekto a di maipagarup malaksid ti panamati Kadakuada a tallo a persona a napagkakadua iti maysa a pakabuklan” (“The Only True God and Jesus Christ Whom Thou Hast Sent,” Ensign wenno Liahona, Nob. 2007, 40).

Alma 12:9–14

No saantayo a patangkenen dagiti pusotayo, makaawattayo iti ad-adu pay a balikas ti Dios.

• Maysa kadagiti mensahe nga insuro da Alma ken Amulek iti sumagmamano a gundaway ket no kasano nga impluensiaan ti kasasaad dagiti puspusotayo no kasano ti kaadu dagiti kinapudno a maawattayo manipud iti Apo. Tapno matulongan dagiti miembro ti klase a mangtakuat iti kinapudno daytoy a pagbatayan, mabalinmo nga awisen ida a mangbasa iti Alma 12:9–14 iti kada paris wenno babassit a grupo ket paglilinnawagan dagiti bunga ti kaadda ti natangken a puso. (Mabalin pay nga idawatmo kadakuada a mangbasa iti Alma 8:9–11; 9:5, 30–31; ken 10:6, 25.) Ania ti kayat a sawen ti maaddaan iti nalukneng a puso? (kitaen iti Jeremias 24:7; Alma 16:16; Helaman 3:35). Kasano a tulongannatayo ti nalukneng a puso a maawatan a nasaysayaat dagiti balikas ti Dios?

• Insuro ni Alma a no patangkenentayo dagiti pusotayo, umawattayo iti “basbassit a paset” ti balikas ti Dios (Alma 12:10). Nalabit a mabalin nga ibingay dagiti miembro ti klase dagiti padas manipud kadagiti nasantuan a kasuratan a magiladawan iti daytoy a pagbatayan. Kasano a paluknengen ti Apo ti puspusotayo tapno makapagtultuloy nga agsursuro iti ad-adu pay manipud Kenkuana? Ania dagiti bukod a padas a maibinglaytayo?

• Tapno matulongan dagiti miembro ti klase a makaawat no ania ti kayat a sawen ti maaddaan iti nalukneng a puso, mabalinmo nga ibinglay ti sumagmamano kadagiti pagarigan a nakalista iti “Dagiti Nainayon a Resources.”

icon iti panagsursuro

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti Alma 13–16 iti daytoy a lawas, mabalinmo nga isarita kadakuada a maammuandanto no kasano a natungpal dagiti balikas ni Alma iti biag ni Zeezrom ken dagiti tao ni Ammonihah.

resources icon

Dagiti Mainayon a Resources

Situtured nga itakderan ti kinapudno.

Inted ni Elder Jeffrey R. Holland ti sumaganad a panangparegta kadagiti saan a natrato a nasayaat gapu iti panangibinglay wenno panangsalaknibda iti ebanghelio:

“No diyo pay napadasan, maysa nga aldaw matakuatanyonto mismo a naawagankayo a mangsalaknib iti pammatiyo wenno nalabit nga ibturanyo ti bukod a pannakaabuso gapu laeng ta maysakayo a miembro ti Ti Simbaan ni Jesucristo dagiti Santo iti Ud-udina nga Aldaw. Agkasapulan dagiti kasta a kanito iti tured ken panagdayaw iti biangyo.

“… Mabalin a masdaawkayo no napateg met laeng ti agtured a mangitakder iti dayaw iti haiskul wenno iti ipapan iti mision tapno laeng maumsi dagiti kapatgan a pammatiyo wenno mangikarigatan a maibusor iti adu a banag iti kagimongan a no dadduma manguyaw iti tao nga agbibiag a sipapasnek iti relihionna. Wen, napateg daytoy. …

“Gagayyem, nangnangruna dagiti agtutubo a gayyemko, ipapusoyo. Ti natarnaw nga ayat a kas ken ni Cristo nga agay-ayus manipud iti pudno a kinalinteg ket makapagbalbaliw iti lubong. …

“Agbalinkayo a napigsa. Agbiagkayo iti ebanghelio a sipupudno uray no saan nga agbibibiag iti daytoy dagiti dadduma iti aglawlawyo. Salaknibanyo dagiti pammatiyo iti pammadayaw ken panangngaasi, ngem salaknibanyo dagitoy” (“The Cost—and Blessings—of Discipleship,” Ensign wenno Liahona, Mayo 2014, 6–9).

Napalukneng dagiti puspusoda.

Mangted dagiti sumaganad a mensahe ti sapasap a komperensia kadagiti pagarigan dagiti tao a pinalukneng ti Apo dagiti puspusoda:

• Ti estoria ti Pamilia Hatfield iti mensahe ni Presidente Russell M. Nelson “The Price of Priesthood Power” (Ensign wenno Liahona, Mayo 2016, 66–67).

• Ti estoria ni Harold Gallacher iti mensahe ni Presidente Thomas S. Monson “The Sacred Call of Service” (Ensign wenno Liahona, Mayo 2005, 55).

• Ti estoria ni David iti mensahe ni Presidente Dieter F. Uchtdorf “Learn from Alma and Amulek” (Ensign wenno Liahona, Nob. 2016, 73–74).

Panangpadur-as iti Panangisurotayo

Matmatam dagiti mata ti Dios. Ikarigatam ti kumita kadagiti miembro ti klasem a kas iti panangkita ti Dios kadakuada, ket ipakitanto kenka ti Espiritu dagiti nadiosan a pateg ken potensialda. No aramidem daytoy, matarabaykanto kadagiti panagkagumaanmo a makatulong kadakuada (kitaen iti Panangisuro iti Wagas ti Mangisalakan, 6).