“Mayo 25–31. Mosiah 29–Alma 4: ‘Natibkerda ken Saan a Maisin,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Mayo 25–31. Mosiah 29–Alma 4,” Umaykayo, Sumurot Kaniak—Para iti Sunday School: 2020
Alma nga Ub-ubing nga Agikaskasaba, ni Gary L. Kapp
Mayo 25–31
Mosiah 29–Alma 4
“Natibkerda ken Saan a Maisin”
Iti aldaw ni Alma, saan a maibilang ti mannursuro ti ebanghelio “a saan a nalalaing ngem dagiti adalan; ket ngarud agpapadada amin” (Alma 1:26). Bayat ti panangisaganam a mangisuro, utobem no kasano a mayaplikar daytoy a pagbatayan kenka ken iti klasem.
Isuratmo Dagiti Impresionmo
Yawis ti Panagbibinninglay
Mabalin a nadlaw dagiti miembro ti klasem dagiti pagpapadaan dagiti pasamak a nailadawan iti Mosiah 29–Alma 4 ken dagiti banag a mapaspasamak iti lubong iti agdama wenno iti bukodda a biag. Ikkam ida iti sumagmamano a minuto a mangrebyu kadagiti kapitulo tapno mangsapul iti maysa a pagarigan. Awisem ida a mangibinglay no ania ti nasarakanda iti maysa a tao a nakatugaw iti asideg.
Isuro ti Doktrina
Makapagbalintayo a positibo nga impluensia kadagiti komunidadtayo.
-
No pagsayaatan dagiti miembro ti klase ti matulongan iti panangilawlawag no kasano nga impluensiaan ti kagimongan para iti pagimbagan, mabalinmo nga awisen ida a mangpanunot iti sumagmamano nga isyu a pakaipasanguan iti komunidadyo ket ilistam ti sumagmamano iti pisarra (liklikan ti detalyado a panaglilinnawag kadagitoy nga isyu). Mabalin nga irebyu dagiti miembro ti klase ti Alma 2:1–7 tapno ammuen no ania ti isyu a pakaipaspasanguan dagiti Nephite ken no ania ti inaramidda maipapan iti daytoy. Ania ti mabalin koma a napasamak no saan nga impangngeg “dagiti tao ti simbaan” dagiti timekda? Ania pay ti masursurotayo maipapan iti panagbalin a naimbag a makipagili manipud iti daytoy a pakaammuan, manipud iti Mosiah 29:26–27, ken manipud iti estoria iti “Dagiti Nainayon a Resources”? Mabalin a kayat dagiti miembro ti klase ti mangpanunot iti maysa a banag nga aramidendanto a mangimpluensia iti komunidadda para iti pagsayaatan no maipanggep kadagiti isyu iti pisarra.
Mailasin ken maliklikantayo dagiti palso a pannursuro.
-
Mabalin a makaparegta iti klasem ti pagwadan ni Gideon a mangkedkedked ken ni Nehor. Nalabit mabalinmo a saludsoden iti maysa a tao iti nasapsapa tapno magrebyu iti pakasaritaan ni Gideon, ket mangibinglay iti daytoy iti klase (kitaen iti Mosiah 19:1–8; 20:15–22; 22:1–9; ken Alma 1:2–9). Maibatay iti daytoy a panangrebyu, mabalin nga ilista dagiti miembro ti klase ti sumagmamano a makaparegta a kababalin ni Gideon. Kas pagarigan, idi mangngegan ni Gideon dagiti palso a pannursuro ni Nehor, nadaeran ni Gideon ni Nehor “babaen dagiti balikas ti Dios” (bersikulo 9). Iti bukod a panagadalda, mabalin a nasarakan dagiti miembro ti klase dagiti nasantuan a kasuratan a mangpaneknek a palso dagiti pannursuro ni Nehor, a masarakan iti Alma 1:3–6. Awisem ida a mangibinglay kadagiti nasantuan a kasuratan a nasarakanda. Sumagmamano a nasantuan a kasuratan ti naisingasing pay iti “Dagiti Nainayon a Resources.” Kasano a makapagbalintayo nga ad-adda a kas ken ni Gideon iti pangsalaknibtayo iti kinapudno?
-
Dagiti palso a pannursuro, a nailadawan iti Alma 1:3–6, ket makatulong kadatayo a mangilasin kadagiti taktika ni Satanas nga usaren a mangallilaw kadatayo. Kas pagarigan, masansan nga ilemmengna dagiti kinaulbodna iti kinapudno. Ibilangmo ti panangawis kadagiti miembro ti klase a mangsukisok iti Alma 1:3–4 ket ilasinmo dagiti kinaulbod nga imbaga ni Satanas ken dagiti kinapudno nga inusarna tapno maaramid a makagargari dagitoy. Ania dagiti sumagmamano a kinaulbod a nailaok iti kinapudno a mangallilaw iti tao iti agdama? Kasano a matulongantayo dagiti pamilia ken ipatpategtayo a mangilasin iti kinapudno ken biddut?
-
Mabalin a basaen wenno kantaen dagiti miembro ti klase ti maysa a himno maipapan iti kinapakumbaba, ket paglilinnawagan no kasano a maigidiat ti mensahe daytoy iti mensahe ni Nehor iti Alma 1:2–9. Mabalinda pay nga idasig no ania ti insuro ni Nehor maipapan kadagiti mannursuro iti ebanghelio iti no ania ti insuro ken impagwadan ni Alma ken dagiti dadduma pay a lider iti Simbaan (kitaen iti Alma 1:26; 4:15–20). Ania ti pangguyugoy ni Nehor? Kasano a maigidiat daytoy pangguyugoy ni Alma? Allukoyem dagiti miembro ti klase nga agutob maipanggep kadagiti bukodda a pangguyugoy para iti panagserbi iti Simbaan. Ania ti isingasing ti Alma 1:26 maipapan ti pagrebbengantayo a kas agad-adal?
Ti kinapalangguad ti mangigapu kadatayo tapno “mapaaytayo iti panagrang-ay[tayo].”
-
Ti panagilawlawag iti Alma 1 ken Alma 4 ket makatulong kadagiti miembro ti klase a mangipaawat no kasano nga aringan ti kinapalangguad dagiti agpada nga indibidual ken ti Simbaan. Mabalinmo a bingayem ti klase iti dua a grupo ket kiddawem iti maysa a grupo nga agsursuro maipapan iti kasasaad ti Simbaan kas nailadawan iti Alma 1:19–30, idinto a sursuruen ti sabali pay a grupo maipapan iti kasasaad ti Simbaan sumagmamano a tawen kalpasanna, a nailadawan iti Alma 4:6–15. Kiddawem iti tunggal grupo a mangibinglay no ania idi ti langa ti Simbaan ken dagiti miembrona segun kadagiti bersikulo a binasada. Mabalin nga aggigiddanda nga agplano iti managpartuat a wagas a panangaramid iti daytoy—kas pagarigan, mabalinda ti mangidrowing iti maysa a ladawan wenno mangisagana iti ababa a panangyakem. Kalpasan nga agbibinninglay dagiti grupo iti tunggal maysa, idawat kadakuada a mangilawlawag no ania ti nasursuroda maipapan kadagiti bunga ti kinapalangguad iti Simbaan ken dagiti miembrona ken dagiti bendision ti kinapakumbaba. Ania dagiti adalen nga ibagi dagitoy a pakaammuan para kadatayo iti agdama?
Ti “balikas ti Dios” ken “natarnaw a pammaneknek” ti makapagbalbaliw iti puspusotayo.
-
Adu a tao ti makarikna iti narikna ni Alma idi “napnuan ladingit” isuna (Alma 4:15) maipapan iti kinadangkes ken panagrigat dagiti taona. Mabalin a panunoten dagiti miembro ti klase maipapan iti maysa nga ipatpateg a pagdandanaganda ken laglagipenda dayta a tao bayat ti panangbasada iti Alma 4:12–20. Kalpasan a basaen dagiti miembro ti klase, mabalin nga agdamagka kadagiti saludsod kas kadagitoy tapno maparegta ti panangilawlawag kadagiti bersikulo: Ania ti nangparag-o kadagiti tao iti narigat a kasasaadda? Ania ti kaipapanan kenka ti ragup ti balikas a “saan a pinaay ti Espiritu ti Apo”? (Alma 4:15). Ania dagiti sakripisio nga inaramid ni Alma a makatulong kadagiti taona, ket ania dagiti sakripisio a maidawat nga aramidentayo no dadduma? Ania dagiti pagarigan a nakakitaantayo iti bileg ti “natarnaw a pammaneknek”? (Alma 4:19). Kasano a maibinglaytayo dagiti pammaneknektayo a saan nga agbalakad wenno managhusga? Mabalin nga ikkam dagiti miembro ti klase iti gundaway a mangisurat iti maysa a mensahe ti pammaneknek kadagiti ipatpategda.
-
Nalabit a pagsayaatan dagiti miembro ti klase iti panangilawlawag no ania ti “natarnaw a pammaneknek.” Kasano a dagitoy a pammaneknek, wenno dagiti dadduma a nangngegantayo, ket “riingenna[tayo] a manglagip iti pagrebbengan[tayo]”? (Alma 4:19). Kasano a tulongannatayo dagitoy a pammaneknek a mangparmek iti kinapalangguad ken panagsusupanget?
Yallukoy ti Panagsursuro iti Pagtaengan
Mabalinmo nga ilawlawag kadagiti miembro ti klase nga iti Alma 5–7 mabasadanto ti “natarnaw a pammaneknek ni Alma” ken makitadanto dagiti epektona kadagiti tao (kitaen iti Alma 4:19).
Dagiti Nainayon a Resources
“Ipariknam ti impluensiam.”
Saan a nabayag kalpasan ti pannakaawag ni Sister Belle S. Spafford kas Sapasap a Presidente ti Relief Society idi 1945, naawis dagiti lider ti Relief Society a dumar-ay iti miting ti nalatak a national women’s council. Miembro idi iti daytoy a council dagiti lider iti sapasap a Relief Society iti uneg ti adun a tawen, ngem nariknada itay kallabes a saanda a natrato a nasayaat ti council. Kalpasan ti panaglilinnawagda kadagiti mammagbagana, insingasing ni Sister Spafford ken ni Presidente George Albert Smith, ti Presidente ti Simbaan, a nasken a maisardeng ti panagkameng ti Relief Society iti council.
Kas nailawlawag iti rekomendasion, kinuna ni Sister Spafford, “Ammom, Presidente Smith, awan ti magun-odmi nga ania man a banag manipud iti Council.”
Idi agangay nalagipna:
“Kinitanak ti Presidente a masmasdaawan. Kinunana, ‘Sister Spafford, kanayon kadi a panunotem no maipanggep iti pakagun-odam? Dimo kadi panunoten a nasayaat no dadduma no maipanggep iti no ania ti nasken nga itedmo? Patiek,’ intuloyna, ‘nga addaan dagiti babbai a Mormon iti maysa a banag nga itedda kadagiti babbai iti lubong, ket mabalin pay nga makasursuroda manipud kadagitoy. Imbes a paisardengmo ti panagkamengyo, isingasingko a mangalaka iti sumagmamano kadagiti kalaingan a kameng ti boardmoi ket agsublikayo iti daytoy a miting.’
“Kalpasanna kinunana nga addaan iti panangyunay-unay, ‘Ipariknam ti impluensiam’” (Belle S. Spafford, A Woman’s Reach [1974], 96–97).
Tinungpal ni Sister Spafford daytoy a balakad. Nagserbi iti uneg ti adu a tawen iti council ken iti kamaudiananna napili isuna a maysa kadagiti lider daytoy.
Dagiti nasantuan a kasuratan a saan nga umanamong kadagiti palso a pannursuro ni Nehor.
Panangpadur-as iti Panangisurotayo
Siguraduem a mangisursuroka iti pudno a doktrina. “Agtultuloy a saludsodem iti bagim, ‘Kasano a matulonganto ti isursurok dagiti miembro ti klasek a mangpatibker iti pammatida ken Cristo, agbabawi, agaramid ken agtungpal kadagiti katulagan iti Dios, ken umawat iti Espiritu Santo?’” (Panangisuro iti Wagas ti Mangisalakan, 20).