ti anghel nga agpakpakita ken ni Alma ken dagiti annak a lallaki ni Mosiah

Pannakapasurot ni Alma nga Ub-ubing, ni Gary L. Kapp

Mayo 18–24

Mosiah 25–28

“Naawaganda iti Tattao ti Dios”

Ti kasayaatan a wagas tapno agsagana a mangisuro maipapan iti Mosiah 25–28 ket panangbasa kadagitoy a kapitulo ken panagtungpal kadagiti pagbatayan nga isuroda. Bayat ti panangaramidmo, mabalin a paregtaennakanto ti Espiritu a mangisuro iti no ania ti agbalinto a kapatgan para kadagiti miembro ti klasem.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Mabalin nga ikarkarigatan ti sumagmamano a miembro ti klase a maaddaan iti agtultuloy a bukod ken sangapamiliaan a panagadal iti nasantuan a kasuratan. Makatulong kadi dagiti padas ti dadduma pay a miembro ti klase? Nalabit a mabalinmo nga irugi ti klasem babaen ti panangawis kadagiti miembro ti klase a mangibinglay iti maysa a banag nga inaramidda iti bukod wenno sangapamiliaan a panagadalda a naaramid a naballigian.

icon iti panangisuro

Isuro ti Doktrina

Mosiah 26:15–31; 27:23–37

Siwawaya a pakawanen ti Dios dagiti agbabawi.

• Ti panagbabawi ken pannakapakawan ti madagdagullit a tema kadagitoy a kapitulo. Mabalinmo nga adalen dagitoy a tema babaen ti panangisurat iti Panagbabawi ken Pannakapakawan iti pisarra ken panangidawat kadagiti miembro ti klase a manglista iti baba dagiti paulo no ania ti malagipda no panunotenda maipapan kadagitoy a balikas. Kalpasanna mabalinda a sapulen iti Mosiah 26:22–24, 29–31; ken 27:23–37 para kadagiti balikas ken ragup dagiti balikas a mangisuro kadakuada maipapan iti panagbabawi ken pannakapakawan. Mabalin nga inayon dagiti miembro ti klase dagitoy a balikas ken ragup ti balikas kadagiti listaan iti pisarra. Kasano ti rikna ti Dios maipapan kadagiti agbabawi ken agkiddaw iti pammakawan?

• Mabalin a masdaaw ti sumagmamano a tao no umdasen ti panagbabawida tapno pakawanen ida iti Dios. Tapno makatulong iti asino man iti klasem a mabalin a makarikna iti kasta a wagas, mabalinmo nga awisen dagiti miembro ti klase a mangipapan nga isuda ni Alma a Laklakay ket indawat kadakuada ti maysa a miembro ti Simbaan iti Zarahemla no kasano a magun-od ti pannakapakawan dagiti basolna (mabalin a yakem daytoy a senario). Ania ti nasursuro ni Alma manipud iti Apo iti Mosiah 26:15–31 a makatulong iti daytoy a miembro ti Simbaan? (kitaen met iti Moroni 6:8; DkK 58:42–43). Makatulong pay daytoy a palawag manipud ken ni Presidente Henry B. Eyring: “No nariknam ti impluensia ti Espiritu Santo iti agdama, mabalinmo nga ibilang a kas pakakitaan a maipatpatungpal ti Pannubbot iti biagmo” (“Gifts of the Spirit for Hard Times,” Ensign, June 2007, 23).

Mosiah 27:8–24

Denggen ti Dios dagiti kararagtayo ken sungbatanna dagitoy a maibatay Iti pagayatanna.

• Mabalin a maiparikna kadatayo dagiti rikna ni Alma a Laklakay a ti anakna a lalaki ket “umalsa iti Dios” (Mosiah 27:11). Mabalin nga ilawlawag dagiti miembro ti klase no kasano a mabalinda nga usaren ti pakaammuan iti Mosiah 27:8–24 a mangted iti namnama iti maysa a tao nga addaan iti nasukir a miembro ti pamilia. Ti pannakaawat a saantayo a mabalin a kiddawen ti maysa a milagro wenno mangpasardeng iti wayaya a pumili ti maysa a tao, ania ti siuumno nga ikararagantayo no mayaw-awan ti maysa nga ipatpateg? (kitaen met iti Alma 6:6).

Mosiah 27:8–28:4

Nasken a maipasngay manen ti amin a lallaki ken babbai.

• Dagitoy ti sumagmamano a saludsod a makatulong kadagiti miembro ti klase a mangsursuro maipapan iti pannakayanak manen: Ania ti kayat a sawen ti agbalin a naespirituan a mayanak manen? (kitaen iti Pangiwanwan iti Nasantuan a Kasuratan, “Pannakapasurot”). Kasano nga ikarigatantayo ti agtignay iti sanguanan dagiti dadduma no naespirituantayo a mayanak manen? Tapno matulongan dagiti miembro ti klase a mangsungbat kadagitoy a saludsod, mabalinmo nga awisen ida nga agadal iti Mosiah 27:22– 28:4 para kadagiti tanda a naespirituan a nayanak manen ni Alma ken dagiti lallaki nga annak ni Mosiah.

• Addaan ti tunggal maysa iti estoria iti pannakapasurot wenno conversion, ta kas iti kinuna ni Alma, “amin a sangkataw-an … nasken a maipasngay manen” (Mosiah 27:25; nainayon ti nagiray a balikas). Nalabit a mabalin nga ibinglay ti sumagmamano a miembro ti klase no kasano a napasurotda wenno na-convertda iti ebanghelio ni Jesucristo—babaen man dagiti nabileg a naespirituan a pasamak iti biagda wenno babaen iti in-inut, no dadduma saan a matukod a proseso a mabalin a mabigbig laeng kalpasan a mapasamak daytoy. Mabalin pay nga ikkam dagiti miembro ti klase iti gundaway a mangisurat kadagiti padasda. (No awan ti oras a mangaramid iti daytoy iti klase, mabalinmo nga isingasing nga aramidenda daytoy iti pagtaengan.) Yunay-unay a nasken nga agtultuloy ti pannakapasurot wenno conversiontayo, mabalinmo nga isingasing a masansan nga irebyu dagiti miembro ti klase no ania ti insuratda ken mangnayon iti baro a padpadas.

• Inusar ni Alma ken dagiti dadduma pay iti nasantuan a kasuratan ti metapora ti pannakayanak manen a mangiladawan iti panagbalbaliw nga isangbay ti ebanghelio ni Jesucristo iti biagtayo. Impada ni Elder David A. Bednar daytoy a panagbalbaliw iti maysa a pipino ngaagbalin nga atsara (kitaen iti “Dagiti Nainayon a Resources”). Tapno matulongan dagiti miembro ti klase a mangutob no ania ti isuro dagitoy a panangidilig maipapan iti pannakapasurot wenno conversion, mabalinmo ti mangitugot iti maysa a pipino ken atsara iti klase. Wenno mabalinmo nga awisen ti maysa a tao a mangitugot iti maysa a maladaga ken mangiilawlawag no apay a ti pannakayanak ket maysa a napintas nga analohia maipapan iti no ania ti napasamak ken ni Alma ken dagiti lallaki nga annak ni Mosiah. (Kitaen iti Mosiah 27:23–28:7.)

Ni Alma nga Ub-ubing a mabagbagkat tapno mayeg iti balay ti amana

Nagrag-o ti Amana, ni Walter Rane

icon iti panagsursuro

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti Mosiah 29–Alma 4 iti sumaruno a lawas, mabalin a dakamatem kadakuada a kadagitoy a kapitulo, naikkan iti gundaway dagiti tao ni Nephi a mangipeksa iti pammatida iti gobiernoda. Ania ti masursurotayo manipud kadagiti padasda no ikarigatantayo nga impluensiaan dagiti komunidadtayo para iti pagimbagan?

resource icon

Dagiti Nainayon a Resources

Ti panamati wenno pannursuro.

Insuro ni Elder D. Todd Christofferson: “Ti pannakayanak a mabaliwan, saan a kas iti pisikal a pannakayanaktayo, ket ad-adda pay a maysa a proseso ngem iti maysa a pasamak. Ket ti pannakiraman iti dayta a proseso isu ti kangrunaan a panggep ti mortalidad” (“Born Again,” Ensign wenno Liahona, Mayo 2008, 78).

Ti kumbersion ken dagiti atsara.

Imbinglay ni Elder David A. Bednar ti sumaganad nga analohia a mangidasdasig iti naespirituan a pannakayanak manen iti atsara a pipino:

“Ti atsara ket maysa a pipino a napagbalin a maysa a nasalsalumina a recipe nga inaramatan dagiti addang. Dagiti umuna nga addang iti proseso ti panagbalin ti maysa a pipino iti atsara ket panangisagana ken panangdalus . …

“Dagiti sumaruno nga addang iti daytoy a proseso ti panagbalbaliw ket panangisawsaw ken panangyuper kadagiti pipino iti naasinan a danum [brine] iti nabayag a panawen. … Dagiti pipino ket makapagbalin laeng nga atsara no naan-anay a mayuperda iti naasinan a danum [brine] iti uneg ti naituding a panawen. Ti proseso iti panangpreserba ket in-inut a mangbaliw iti pakabuklan ti pipino ken agbalin a transparent ti itsurana ken naidumduma a raman ti maysa nga atsara. Ti sagpaminsan a panangwarsi wenno panangisawsaw iti naasinan a danum ket saan a makaaramid iti kasapulan a panagbaliw. Ketdi, ti agtultuloy, naanamongan, ken naan-anay a pannakaideppel iti danum ket kasapulan para iti tinarigagayan a mapasamak a pagbaliwanna.

“Ti maudi nga addang iti proseso ket agkasapulan iti panangserra kadagiti napreserba nga atsara kadagiti botelia a naisterilisa ken nadalusan. Maikabil dagiti atsara kadagiti botelia, a nakaluban iti agburburek a naasinan a danum [brine], ket maproseso iti boiling-water-bath canner. Nasken a maikkat ti amin a rugit manipud kadagiti atsara ken dagiti botelia tapno masalakniban ken mataginayon ti naileppas a produkto. …

“Kasta met laeng iti nasken a pannakaisagana ken pannakadalus ti pipino sakbay a mapagbalin daytoy iti atsara, iti kasta makapagsaganatayo babaen ‘ti balikas ti pammati ken ti nasayaat a doktrina’ (1 Timoteo 4:6) ken immuna a nadalusan babaen dagiti ordinansa ken katulagan a naannong babaen ti turay ti Aaronic Priesthood. …

“Kas iti panagbalin ti pipino nga atsara no maideppel daytoy ken mayuper iti naasinan a danum, kasta met a mayanaktayo manen no masagepseptayo babaen ti ken iti ebanghelio ni Jesucristo. … Daytoy a paset ti proseso iti panagbaliw ket agkasapulan iti panawen, panagpursige, ken panaganus. …

“… Ti annuroten iti boiling-water-bath a proseso ti mangpabalin kadagiti atsara nga agpada a masaluadan ken mataginayon iti las-ud ti nabayag a panawen. Iti maipada a wagas, sirarag-ay nga agbalintayo a natarnaw ken nasantuan bayat ti pannakaugastayo iti dara ti Kordero, mayanaktayo manen, ket awatentayo dagiti ordinansa ken dayawentayo dagiti katulagan a naannong babaen ti turay ti Melchizedek Priesthood” (“Ye Must Be Born Again,” Ensign wenno Liahona, Mayo 2007, 19–21).

Panangpadur-as iti Panangisurotayo

Agsaganaka a pampanunotem dagiti tao. “No agsaganaka, bay-am a ti pannakaawatmo kadagiti tao a sursuruam ti mangtarabay kadagiti planom. … Dagiti mannursuro a kas ken Cristo ket saan a nakatalimudok iti masinunuo nga estilo wenno pamay-an; nakatalimudokda iti panangtulong kadagiti tao a maaddaan iti pammati ken Jesucristo ken agbalin nga ad-adda pay a kas Kenkuana” (Panangisuro iti Wagas ti Mangisalakan, 7).