Ni Abinadi iti Sanguanan ni Ari Noah, ni Andrew Bosley

Mayo 4–10

Mosiah 11–17

“Ti Silaw … A Saan a Pulos a Mapasipnget”

Ibilangmo ti pagwadan ni Abinadi iti panangisuro iti ebanghelio. Ania a masarakam iti Mosiah 11–17 a makatulong kenka nga agbalin a nalalaing a mannursuro?

Isuratmo Dagiti Impresionmo

Yawis ti Panagbibinninglay

Tapno mapalugodan dagiti miembro ti klase a mangibinglay iti maysa a banag a nasursuroda iti bukod wenno sangapamiliaan a panagadalda iti nasantuan a kasuratan, mabalinmo nga awisen ida a mangileppas iti sumaganad a binatog: “No nasken a pumiliak iti maysa a bersikulo manipud iti Mosiah 11–17 nga ibinglay iti maysa nga ipatpateg, daytoy ket .

Isuro ti Doktrina

Mosiah 11–13; 17

Mabalintayo ti mangitakder para iti kinapudno, uray no itakderantayo nga agmaymaysa.

• Nupay saan a sigurado a mapangtaandanto iti pannakapapatay dagiti miembro ti klasem gapu iti pammaneknekda, mabalin a maipasangoda iti pagsusupadian gapu iti pammatida. Nalabit a masarakanda dagiti pasamak wenno binatog iti Mosiah 11–13 ken 17 a mangted kadakuada iti nayon a tured a mangitakder iti kinapudno. Ania ti nangted kada Abinadi ken Alma iti tured nga agbalin a napigsa iti pakinakemda? Kasano nga agbalintayo a natibker ken napigsa iti panangsalaknib iti kinapudno? Dagiti adaw iti “Dagiti Nainayon a Resources” ti mabalin a mangted iti sumagmamano a kapanunotan.

• Tapno matulongan ti klasem a makasursuro manipud iti dadduma pay a pagarigan ti situtured a mangsalaknib iti kinapudno, mabalinmo nga isurat ti Dagiti Tao a Nangitakder iti Kinapudno iti pisarra. Mabalinmo nga irugi ti panangilawlawag ken ni Abinadi, a mangaw-awis kadagiti miembro ti klase a mangibinglay iti sumagmamano a banag a nakaawis iti imatangda maipapan ken ni Abinadi bayat ti panagbasada maipapan kenkuana iti daytoy a lawas. Kalpasanna mabalinda nga inaganan ti dadduma pay a lallaki ken babbai—manipud kadagiti nasantuan a kasuratan, dagiti pamiliada, wenno bukod a padpadas—a mariknada a pagarigan dagiti mangitaktakder iti kinapudno. Ania ti mariknatayo a makaparegta nga aramiden gapu kadagitoy a pagarigan?

Mosiah 12:19–37

No adalentayo ti balikas ti Dios, nasken nga aramatentayo ti puspusotayo iti pannakaawat.

• Bayat ti panangadalda iti Mosiah 12:19–37 iti daytoy a lawas, mabalin nga addaan dagiti miembro ti klase kadagiti nauneg a pannakaammo ken pannakaawat maipapan no ania ti kayat a sawen ti aramatentayo ti puspusotayo iti pannakaawat iti balikas ti Dios. Ibilangmo ti panangkiddaw iti sumagmamano kadakuada a mangibinglay kadagiti kapanunotanda. Wenno mabalin a mausarmo ti sumagmamano a minuto iti klase nga aggigiddan a mangsukisok kadagitoy a bersikulo ket paglilinnawagan no ania ti isingasingda maipapan iti no kasano nga aramiden a napatpateg ti panagadal iti ebanghelio. Kas pagarigan, apay a napateg nga agpada nga awaten ti paglintegan ti Dios ken “tungpalen daytoy”? (Mosiah 12:29).

• Ania ti masursuro dagiti miembro ti klasem babaen ti panangidasig dagiti galad ken kannawidan dagiti saserdote ni Noe iti wagas [approach] a nasken nga usarentayo iti panagadal iti ebanghelio? Awisem ida a mangbasa iti Mosiah 12:19–37, a mangsapsapul kadagiti panagdillaw nga insawang ni Abinadi maipapan kadagiti saserdote ni Noe. Ania ti mabalin a kinuna ni Abinadi maipapan iti panagadaltayo iti ebanghelio iti agdama? Idawat kadagiti miembro ti klase a mangibinglay no ania ti maaramidda tapno makatulong kadakuada a mangaramat iti puspusoda iti pannakaawat ken mangnayon iti dakdakkel a kaipapanan iti panagadalda iti ebanghelio.

  

  Iraman ti nasamay a panagadal iti ebanghelio i ti panangaramat iti puspusotayo iti pannakaawat.

Mosiah 13:28–15:11

Umay ti pannakaisalakan babaen ken ni Jesucristo ken ti Pannubbotna.

• Tapno makumbinsi ti managduadua a dumdumngeg maipapan iti yaay ti Mesias, inadaw ni Abinadi ti makasagid-rikna a padto manipud iti Isaias (kitaen iti Mosiah 14). Adda sumagmamano a wagas a mabalin nga irebyu dagiti miembro ti klase iti daytoy a kapitulo. Mabalinda a saggaysa a basaen ti sumagmamano a bersikulo ket paglilinnawagan dagitoy, wenno mabalinmo a bingayen ti klase iti babassit a grupo iti panaglilinnawag tapno pagsasaritaan ti maipapan kadagiti napapateg a bersikulo, agraman dagiti footnote, tapno matakuatan dagiti nayon pay a nauneg a pannakaammo ken pannakaawat [insights]. Allukoyem ida a mangibinglay no ania ti masursuroda maipapan iti Mangisalakan iti daytoy a kapitulo.

• Maawatan kadi dagiti miembro ti klasem no ania ti kaipapanan ti ni Jesucristo “napenneknan ti kasapulan ti linteg”? (Mosiah 15:9). Tapno matulongan ida a makagun-od iti nasaysayaat a pannakaawat, mabalinmo a rugian babaen ti aggigiddan a panangbasa iti “Linteg” ken “Manangngaasi, Panangngaasi” iti Pangiwanwan iti Nasantuan a Kasuratan (scriptures.ChurchofJesusChrist.org). “ Nalabit a mabalin nga agboluntario ti maysa a tao a mangisurat iti ababa a panangilawlawag iti tunggal balikas iti pisarra. Kalpasanna mabalinyo a basaen ti Mosiah 15:1–9 nga aggigiddan. Kasano a pinennek ni Jesucristo dagiti dawdawaten ti linteg? Kasano nga ipaayna ti asina kadatayo? Awisem dagiti miembro ti klase a mangpanunot kadagiti dadduma nga analohia a mangiladawan no kasano a pinennek ni Jesucristo dagiti dawdawaten ti linteg.

Mosiah 11; 12:33–37; 13:11–26

Nasken a maisurat dagiti bilin iti puspusotayo.

• Mabalin a makatulong a maipaawat kadagiti miembro ti klase ti kinapateg ti kaadda dagiti bilin a “naisurat iti puspuso[tayo]” babaen ti panagsaludsod kadakuada no ania iti panagkunada a kaipapanan daytoy a ragup dagiti balikas. Kalpasanna awisen ida a mangidasig kadagiti bilin nga insuro ni Abinadi iti Mosiah 12:33–37 ken 13:11–26 iti basbasol a lablabsingen ni Ari Noe ken dagiti taona (kitaen iti Mosiah 11:1–7, 14–15). Kasano a maigiddiat ti kaadda dagiti bilin a “naisurat iti puspuso[tayo]” iti panagbalin laeng a pamiliar kadagitoy? (Mosiah 13:11). Kasano nga ammotayo no naisurat dagiti bilin iti puspusotayo? Ania dagiti pagarigan a maibinglaytayo?

Yallukoy ti Panagsursuro iti Pagtaengan

Narikna kadi dagiti miembro ti klase ti kas iti mabalin a narikna ni Abinadi—nga awan kaes-eskan dagiti panagkagumaanda a mangibinglay iti ebanghelio? Ibagam kadakuada nga iti Mosiah 18–26mabasadanto ti maipapan iti nawadwad a bunga dagiti panagkagumaan ni Abinadi.

Dagiti Nainayon a Resources

Dagiti napadtuan a pannursuro maipapan iti panangitakder iti kinapudno.

Insuro ni Presidente Russell M. Nelson: “Siaayat dagiti pudno a disipulo ni Jesucristo nga agbalin a naidumduma, agsarita, ken agbalin a naisalsalumina kadagiti tao iti lubong. … Awan ti nalaka wenno awtomatiko maipapan iti panagbalin a kasta a nabibileg a disipulo. Nasken a sititibker a maibatay dagiti pokustayo iti Mangisalakan ken iti ebangheliona. Agkasapulan daytoy iti adu a panagkagumaan iti a mainaig iti panunot tapno kumita Kenkuana iti tunggal panunot. Ngem no aramidentayo, maawan dagiti panagduadua ken panagbutengtayo” (“Drawing the Power of Jesus Christ into Our Lives,” Ensign wenno Liahona, Mayo 2017, 40–41).

Kinuna ni Presidente Thomas S. Monson: “Makapagbalintayo koma a natured ken nakasagana a mangitakder no ania ti patientayo, ken no nasken nga agtakdertayo nga agmaymaysa iti dayta a proseso, mabalin nga aramidentayo a situtured, napapigsa iti pannakaammo nga iti kinapudnona saantayo nga agmaymaysa iti kaano man no makipagtakdertayo iti Amatayo iti Langit” (“Dare to Stand Alone,” Ensign wenno Liahona, Nob. 2011, 67).

Insuro ni Presidente Gordon B. Hinckley: “Insurat ni Pablo ken ni Timoteo: ‘Saan nga inted ti Dios kadatayo ti espiritu ti kinatakrot; ngem ti bileg, ken ti ayat, ken ti nasalun-at ti panunot. Saanmo ngarud nga ibain ti pammaneknek iti Apotayo’ (2 Tim. 1:7–8). Tarigagayak a tunggal miembro daytoy a simbaan ket mangikabil kadagita a balikas iti lugar a makitana dagitoy iti tunggal bigat bayat ti panangirugina iti aldawna. Mangtedda kadatayo iti tured nga agsao, mangtedda kadatayo iti pammati a mangpadas, papigsaenda ti natibker a pammatitayo ken ni Apo Jesucristo” (Teachings of Presidents of the Church: Gordon B. Hinckley [2016], 338).